كابوس بياضه

( كابوس بياضه )
"قصه على حلقات
جزء 1 "

استيقظت السمكة بياضه وهى ترتجف والماء حولها يتذبذب بقوه واحست ان خياشيمها غير قادرة على فصل الماء عن الهواء وقامت واستلقت على القوقعه التى كانت تذهب اليها كلما جاءها هذا الكابوس ؛ وبعد قليل تذكرت موعد العمل فقامت وجهزت اوراق العمل و اسرعت لتذهب اليه و هى فى الطريق راكبه على ظهر الحوت النقال سرحت فى هذا الكابوس وكيف تتخلص منه وهى اوشكت على الزواج فماذا تفعل ؟ فقررت ان تذهب الى الدكتور هامور الطبيب النفسى وهو مشهور بكفائته فى علاج جميع انواع الكائنات البحريه وتذكرت قول صديقتها بلطيه بأن هذا الدكتور قد ساعدها فى الخروج من عقدتها التى كانت تشعر بها بأنها سمكة ليست كأنواع الاسماك الفليه و البياض والبورى فشعرت بعقدة نقص بأنها سمكة رديئه ولم تصل الى جمال الاسماك الاخرى.
وعندما وصلت الى العمل اسرعت الى صديقتها بلطيه لتسألها عن عنوان الطبيب هامور فوجدت بلطيه منكبه على المكتب تحاول ان تنجز اعمالها فى وقت قصير فتنحنحت بياضه فنظرت اليها بلطيه وقالت:
ط : فى حاجه يا بياضه ؟ومال لونك مخطوف كدة ليه !!
ض : نفس الكابوس يا طاطا ومش عارفه اعالجه ازاى وبقى يجيلى
كتير اوى .
ط : ما انا قولتلك الدكتور هامور هو اللى هيظبتك انتى عارفه هو عالجنى ازاى
ض: ازاى يا طاطا ؟
ط : انا اول ما روحتله كنت متضايقه من نفسى وبحس انى سمكه وحشه وكل السمك بيحتقرنى حتى هو ؛ فبصلى و ابتسم ورحب بيا جدا وحسسنى انى سمكه قشر بياض فتعجبت وقلت : انت بتعاملنى كده ليه يا دكتور ! مردش عليا وفتح الاب توب بتاعه وهو بيبتسم وكتب عليه ورفع الاب توب عشان اشوف هو كتب ايه لقيته كاتب "ايه مشكلتك؟ "
ض : هو الدكتور هامور اخرس ولا ايه ؟
ط : مش عارفه يا بياضه فى ناس بتقول انه اخرس وناس بقول انهم سمعوه بيتكلم قبل كده بس ده اسلوبه فى العلاج عشان المريض يرتاحله ويطمن ان سره فى بير.
ض : وبعدين ؟
ط : انا لما حسيت انه مبيتكلمش ارتحت اوى وقلت كل حاجه مكنتش ممكن اقولها غير لنفسى والحكايه دى ريحتنى اوى ؛ و كانت عقدتى انتى عارفاها وفوجئت انه كتب" كلمينى عن طفولتك" وكانت طفولتى يا قمر انى كنت بخرج مع اهلى وبحس ان السمك بيتعالى على اهلى اوى وكانت الحكايه دى بتضايقنى جدا فكنت دايما عصبيه واتخانق مع كل السمك عشان محدش يتعالى عليا والحاجه اللى كانت بتضايقنى اوى ان اهلى مش حاسين بتعالى السمك عليهم !!
ض: جيبى من الاخر يا طاطا .
ط : يا ستى من الاخر انه اقنعنى انى سمكه مميزة وبختلف عن اى سمكه ومفيش اى سمكه ممكن تكون شبهى او فى مهارتى او فى نشاطى وانه عاملنى كويس عشان السبب ده انى مختلفه عن باقى الاسماك وساعتها حسيت بثقه كبيرة وعقدتى راحت خالص و بقيت نشيطه جدا فى شغلى زى ما انتى شيفانى واتجوزت وخلفت سمك بلطى صغير ودخلته مدرسه البحور للغات .
ض : عنوانه ايه الكتور ؟
ط : هو مش بعيد من هنا ده ساكن فى مدينه المحار اللى بعد الشعب المرجانيه فيلا لؤلؤة هامور دى مشهورة اوى هناك انتى بس ادخلى المدينه واسألى الف مين يدلك عليها .
ض : بس الحوت النقال مبيروحش المدينه .
ط : مش مشكله انتى ممكن تاخدى سلحفه خاصه توديكى لغايه باب الفيلا .
وأهتزت القوقعة محدثة صوتا يتذبذب في الماءفأسرعت بياضة لترد على حبيبها بياض التي كانت تضع له نغمة مميزة في القوقعة وجرت المحادثة الاتية:
ض:واحشتني يا حبيبي
ب:مكلمتنيش ليه الصبح
ض:مش عارفة اقولك أيه
ب:نفس الكابوس يا ديدي مش كدة ؟
ض:أيوة وعايزة اروح للدكتور هامور
ب:طيب يا حبيبتى هاعدي عليكي بعد الشغل وأخدك ونروح له
وفي هذه الاثناء حضرت سلمون وهى تعمل سكرتيرة لمستر جمبري
وهومدير عام والعضو المنتدب لشركة الطحالب المجففة و تصدير الكافيار المعلب التي لها فروع في المحيط والبحار وبعض الانهار
وقالت سلمون لبياضة:
"مسك" بياضة المدير عايزك حالا:
"ملحوظة : ميسك هي مثل مسز أو أستاذة في مجتمع البحار والاستاذ يسمونه مسكر على وزن مستر."
بياضة:حالا جاية
وأسرعت بياضة الى مستر جمبري وهي تحمل أوراق كانت تحملها معها من المنزل ودخلت على مستر جمبري وقالت:
-صباح الخير يا بروف جمبري
ج:صباح الخير يا ميسك بياضة.فين الورق اللي قولنا عليه
ب:أدي يا فندم العقد الاول لتصدير الطحالب الى المحيط مع شركة محيطكو وأن فيه بند شركة نقل السمك النفاث على حسابهم.
بند أتنين,والعقد التاني بأسم شركة أعلى المحيط اللي متفقة معانا على كمية الكافيار المطلوبة لمدة شهرين والعقد التالت بأسم شركة النهر الجميل اللي طالبة أعشاب بدون مبيدات
ج:شكرا يا ميسك بياضة ومن فضلك عدي على الخزنة هتلاقي العلاوة اللي وعدتك بيها