كابوس بياضه 10

6
0
كابوس بياضه
(قصه على حلقات)
_____________
جزء (10) ،
______ ______
وحينما حاولت بياضه الاستفسار عن الجمله الاخيره ، سمعت الممرضه بصوت فيه عجله : انتى فين مسك بياض ، عندك تاخير عن ميعاد "دك هامور " خمس دقايق ، من فضلك هو منتظرك ، ومستعجل يشوفك عشان كابوس امبارح . .
فانتبهت بياضه واكتشفت ان الشمس قاربت على التوسط فى السماء وكل السمك خرج للرياضه ،والظلال موجوده من انعكاس الشمس على الاعشاب المرجانيه ، وكانها كانت فى غرفه مضاءه باضاءه خافته وفجأه فتح الشباك ودخلت الشمس بعنفوانها . . ونظرت لسى . . وسارت مع الممرضه . . وهى لاتدرى فى اى اتجاه تسير . . وعقلها ترن فيه جمله "سى" وتحاول ان تستوعب . . ليه ولماذا وكيف يكون رجل احلامها . . الوحيد الذى احتواها . . واخبرها عن نفسها بصفات لم تكن تلقى لها بالا . . ولم تعرف انها ستكون محط اعجاب هذا الرجل ، الذى هو محط اعجابها واعجاب الجميع لصفاته واخلاقه الدمثه . . وتذكر جيدا قوله لها قبل ان يزورها بياض خطيبها . . وفى اول لقاء ليها معه : تسمحليى بصفتى خبير ودارس طباع النساء فى البحار المالحه اقولك انتى فيكى 11 ميزه .
فضحكت بياضه وقالت : 11 مره واحده ، انا صحيح واثقه من نفسى والحمد لله ، لكن 11 مبالغه منك . .
"سى" (بجديه) : هما بالترتيب 1- براءه السمك الصغير . . 2- ذكيه . . 3- قريبه الى الله . . 4- جميله . . 5- رقيقه القلب . . 6- انيقه . . 7- ذات اسلوب راقى . . 8- صوتك جميل . . 9- تعليم عالى . . 10- عينك ملونه . . 11- قوامك جميل ومتناسق . .
ازاى تفكر تسيبه . . متقدرش ، لكن لازم يكون عندها اطفال وتحبهم ويحبوها ومحتاجه تكون ام . . ولم ينقذ بياضه سوى انها وصلت الى "دك هامور" ففاقت من الافكار السريعه الملحه والمتلاحقه . .
وانارت شاشات هامور يوجه كلامه الى بياضه : الكابوس بان عندى فى صور الذبذبات ، وللاسف الكابوس اللى شفتيه . . حقيقى بيحصل فى الواقع . لاننا خلقنا لهدف . . ولكل منا دور . . ومصير لازم يشوفه . .
(ضه) : مش فاهمه قصدك يادكتور .
(ها) : حسب اللى خرج من البحر ونقل لينا فى موسوعه البحار السبع . . ان فيه مخلوقات عملاقه تسمى البريين ، الذين يعيشون فى البر وليس داخل البحر ، وهولاء يأكلون الاسماك التى يخرجونها من البحر . . حتى الحوت العملاق . . لكن الحلم بتاعك اكيد سمعتى عنه وانتى صغيره . . فظهر فى الحلم من خوفك ان يكون قد حدث لاخوكى ووالدتك . . لانك عندك امل انهم يظهروا . . لكن للاسف . .
(ضه) : واحده واحده يادكتور من فضلك ، العمالقه موجودين ؟
(ها) : ايوه . .
(ضه) : وبيكلونا ؟
(ها) : تمام . .
(ضه) : وانا كنت عارفه من وانا صغيره ؟
(ها) : ههههههه . . مش بالضبط كده. . انا ححاول اوصل النقطه الاخيره دى . . من عاده الكبار لما يكون ليهم اطفال اشقياء بيحكوا ليهم قصص مخيفه . . منها ماحدث ومنها لم يحدث حتى يخاف الطفل ويبطل شقاوه . . بس واضح من تحديد الكابوس انك سمعتيه وانتى طفله فتركز فى ذهنك الداخلى وظهر من خلال احلامك عند اختفاء "باض" ، لانه الذهن الداخلى ومن خلال الاحلام يقول لكى ان "باض" اختفى ازاى . . وراح فين .
(ضه) : وانت متأكد انهم مش حيرجعوا تانى ؟
(ها) : انتى اللى لازم تكونى متأكده ، اذا كنتى عايزه الكابوس يروح منك . . قولليى . . انتى قريبه من الخالق . .
(ضه) : قوى يادكتور . . انا بلجأ اليه بعد كل كابوس . . وبكلمه عشان يبعده عنى . .
(ها) : جميل . . ربنا خلقنا ليه ؟
(ضه) :عشان نشكره ونذكره ونعمر البحر ونجمله ، ونخلف بعد مانتجوز عشان ماننقرضش . .
(ها) : يبقى نقول . . 1- ذكر وعباده . . 2- عمل وتكاثر . .هذا فى مفهمومنا البحرى . . الذى لايتعدى البحر ف نظريه داخل الصندوق . . اللى هى . . ." البحر عباره عن صندوق خارجه ارض ونجوم وابعاد اكبر من مفهومنا ، وهذه الابعاد مالكها قوه جباره نورانيه وعظيمه لانستطيع رؤيتها او تخيلها "، وهنا لازم نتأكد ان فيه حكمه اكبر من فهمنا لخلقنا كسمك . . وان الله اراد لنا ان نكون طعاما لمخلوقات اخرى الذى من الممكن ان يكونوا طعاما لمخلوقات اخرى . . وهكذا .
واسغرقت بياضه فى تفكير عميق . . ومعانى لم تطرق على ذهنها من قبل ، وجاء على ذهنها "بياض" و"سى" هل ترضى بالقدر ام تعانده ، واسئله كثيره دارت فى ذهنا . . حتى اضاءت شاشه "هامور" وهو يقول :
علاجك دلوقتى ف ايديك ، وممكن تكمليه ف البيت ، مع الدواء والكتيب اللى محضره ، وفيه الكلام اللى قولته ، مع نصايح اخرى ، اولها القرب من الله والايمان بقدره ، وان مايريده لابد انه نافذ ، ولكى نعيش سعداء ونبعد ع الكوابيس نرضى بقضائه . . ودلوقتى تقدرى تطمنى خطيبك .
(ضه) : على ايه يادك ؟
(ها) : انكم ممكن تتجوزوا الاسبوع اللى جاى .
(ضه) : مين قالك كده ؟
(ها) : خطيبك جالى وطلب انه يعرف مده العلاج لانه متفق معاكى على الجواز بعد خروجك مباشره . . هو الكلام ده مش مضبوط ولا ايه ؟
(ضه) : ايوه . . ايوه مضبوط طبعا . . بس انا حاسه انى محتاجه اقعد هنا شويه كمان . . من فضلك لو سالك قوله قدمها شهر . .
فضحك هامور وقال : باين عليكى مش مستعجله زى بياض .
(ضه) : ابدا . . الموضوع مش كده يادكتور . . لكن انا محتاجه اطمن ان الكابوس راح .
(ها) : يبقى انتى مش واثقه ف كلامى . . على العموم حعمل اللى انتى عايزه ، واقوله انك محتاجه تقعدى هنا شويه ، لحد ماتطمنى على نفسك . .
وهنا اغلق هامور الشاشات والاجهزه . . وتكلم بصوته الهادئ الرزين : انا حكلمك كأب مش ك دكتور . .
فاندهشت بياضه من المفاجأه . . وابتسمت وقالت : الله . . مانتى صوتك جميل يادك . . ليه حرمنا منه . .
(ها) بصوته : ده اسلوبى ف العلاج والحمد لله بينجح بنسبه ميه ف الميه . . لكن مش ده الموضوع . . انا حسيت انك عندك عدم اتزان عاطفى ، ومش حسالك ليه وامتى وازاى . . لان العواطف بالذات ، والقرارات المترتبه عليها ، لن يستطيع اى سمك انه يتدخل فيها ، لان السمكه نفسها هى الوحيده القادره على ترجمه عواطفها الى قرار ، ممكن يكون خاطئ . . بس العذر انكى لم تجبرى عليه ، وانه ليس ف الامكان ابدع مما كان ، فكرى كويس يابياضه ف ضوء المعطيات الجديده اللى عيشتيها فى مرحله العلاج بالمركز ، وتمهلى ف قرارك ،وانا متأكد انك حتخدى القرار الصحيح بنفسك . . . انتى حتمشى على الكتيب والدواء ، وحنشيل من جدولك مواعيد جلساتك معايا ، لانك مش محتاجاها خلاص ، والمركز مفتوح ليكى بكل الانشطه والاقامه ، لحد ماتخرجى ف الوقت اللى انتى عايزاه .
(ضه) : ومش حاقبلك تانى يادكتور ؟
(ها) : اذا احتجتينى فى اى وقت انا موجود . . مع السلامه .
وخرجت بياضه واسرعت الى حمام السباحه ، والصخره ولكنها لم تجد "سى" وبحثت ف كل المركز فلم تجده ، وعند صعودها للحجره ، نادتها الممرضه واعطتها تسجيل وقوقعه من النوع المضئ وقالت : مسكر "سى" سابلك الحاجات دى قبل مايخرج .
(ضه) : خرج اجازه ؟
(ممرضه) : لا خروج نهائى وقال انه مسافر .

(وللحديث بقيه فى الجزء ال11 وقبل الاخير )

(ابو شهاب )

 

إضافة منذ 7 عام
الكاتب الأصلي

المصدر

https://www.facebook.com/Mhmdsdmhybabwshhab?ref=bookmarks

التعليقات

safaa منذ 7 عام
فى انتظار الجزء ال11 يا ابو شهاب
محمد سعد مهيب منذ 7 عام
ان شاء الله
zedony.com - A mmonem.com production. Privacy Policy