كابوس بياضه8

7
0
(كابوس بياضه )
قصه على حلقات
_____________
جزء (8)

ولما نظرت بياضه الى الخلف وجدت "سى" يقف بجانبها فاطمئنت :
وقالت : مبروك على ايه ؟ .. ده انا سايبه الاوضه عشان جالى كابوس مرعب
(سى) : و انا كده كل يوم .. مبنامش كويس .. لكن بدأ الحلم يقل عن الاول . .
(ضه) : يبقى انت بتقولى مبروك على الكابوس عشان بقينا زى بعض . . هههههههه.
(سى) : لا ياهانم مش على الكابوس خالص . .
فاعتدلت بياضه وبان على وجهها ملامح الجديه فى السؤال. .
(ضه) : امال قصدك ايه على مبروك ؟
(سى) : انا عرفت بالصدفه من خطيبك بياض بعد ماطلعتى اوضتك . . انكم هتتجوزا بعد خروجك من المركز على طول .
(ضه) : هو قالك كده ؟
(سى) : ايوة و وعدنى انى اول واحد هتجيله دعوة الفرح .
(ضه) : مش معقول انه بيتكلم جد . . لأنى معرفش اى حاجه عن الموضوع . . وصمتت برهه ثم قالت : انت عارف. . انه بيحب الهزار .
(سى) : لا . . مكنش بيهزر و كان معايا فى منتهى الجديه . . .
وسهمت بياضه وغابت بذهنها لتتمكن من فهم المعنى من كلام بياض . . . .
(سى) : بس واضح انه بيحبك جدا . . وبيغير عليكى كمان . .
(ضه) : لا اطمن هو مش بيغير خالص . .
(سى) : مين قال كده يا هانم انا راجل وبفهم امتى الراجل يغير على حبيبته . .
فزادت بياضه فى سرحانها وكأنها تستوعب كلام لم تلاحظه من قبل
(سى) : بصراحه يا بياضه . . انتى صعب اوى اى حد يشوفك و ميحبكيش . . انا نفسى اول ما شوفتك . . . . . .
التفتت اليه بياضه بسرعه لأنه توقف عن الكلام
(ضه) : ايوة . . اول ماشوفتنى حصل ايه
( سى) : صمت
(ضه) : انت ناسى ان دكتور "هامور " اكد على الصراحه للمساعده فى العلاج . . . وانا هسمعك كأنى " هامور" . . ومش هعلق على كلامك ومش هزعل منك . . بس قول بصراحه ومن غير نسيان ..
(سى) : شوف يا دوك . .
(ضه) : ايوة . . انا معاك وادى الشاشه فى ايدى هتجاوب عليك
واخرجت ورقه خضراء عشبيه وكأنها هى شاشه الدكتور هامور
(سى) : كل سمك بياض فى البحر بيحلم بواحده من فصيلته لأنها هتكون قريبته و تكون جميله و مميزة و ذكيه . . لما كنت على الضخرة وبدعى ربنا انه يعوضنى عن امى اللى ضاعت منى قدام عينى . . بسمكة حلمى و تكون عوض و ونس ليا عشان احب الحياة . .
(ضه ) : انت مش متجوز يا " سى" ؟
(سى ) : انا اتأخرت بسبب حبى لأمى . . بس بحلم وبدعى ربنا انى الاقيها . . ولما سمعت صوت مليان رقه و احساس و راقى و كله انوثه التفت اليكى فتجسدت فتاة احلامى فجأة . . و توقف لسانى عن الكلام وبعدت عن الواقع و كأنى احلم .
(ضه ) : وبعدين
( سى) : لما مشيتى اتأكدت من رقه قلبك لأنك مدلقتيش عليا عصير التوت البحرى ولا رمتينى بحجر مرجانى
ابتسمت بياضه و قالت : بس انا فكرت . .
(سى ) : و منفذتيش ليه ؟ لأن قلبك منعك انك تعاقبى سمكه قبل سماع اقوالها
(ضه ) بسعادة : هاهاهاها
(سى) : ليكى حق تضحكى . . انا مش عارف ازاى ده حصل وليه بدون مقدمات و مش قادر غير انى اخضعله لأن حبك . . . .
خلانى سعيد . . . طاير فوق السحاب . .
احب كل شريد . . . حتى سمك العاب ..
اسمع القنديل . . يقول يا ويل . .
لطول ليل . . . العاشق وتعذيبه . .
امانه يا موج . خد معاك . فى الفوج . .
حبى فى حبيبى . . . لتهذيبه . .
فتنهدت بياضه و قالت : انتى قولتلى الدكتوراه بتاعتك فى ايه بالضبط . .
فضحك سى لأحساسه ان هذه الجمله اعجاب وليست سؤال .
ودار صمت . . وكل منهم ينظر للسماء بنجومها المتلآلآه , التى تتحرك بفعل االموج , فيزيدها جمالا . .
واخذت بياضه الورقه الخضراء واشارت بها ناحيه "سى" كانها شاشه "هامور" وقالت : والحكايه دى حصلت لك من امتى ؟
(سى) : من اول ماشفت سيادتك يافندم .
(ضه) : وسيادتى عمل ف سيادتك كده ؟
(سى) : واكتر ياهانم . . . . . . . . . . . .

(وللحديث بقيه فى الجزء التاسع )

(ابو شهاب )
16/1/2015

 

إضافة منذ 7 عام
الكاتب الأصلي

المصدر

https://www.facebook.com/Mhmdsdmhybabwshhab?ref=bookmarks

التعليقات

safaa منذ 7 عام
رائع ياابو شهاب
زغباوية منذ 7 عام
تبعوها للأخر والنهاية حلوة وغير متوقعة ..مش هاحرقهالكم
محمد سعد مهيب منذ 7 عام
صباحكم جميل .
safaa منذ 7 عام
😞
zedony.com - A mmonem.com production. Privacy Policy