عدنا مع ... مين اللي هيقعد على كرسي الاعتراف .. الآن مع الضحية العشرين ..المهندس/ Ahmed Hussien

17
0
كنت اقترحت قبل كده موضوع كرسي الاعتراف اننا هنلعبه بس لما يبقى عدد الأعضاء المتواجدين كبير واحنا دلوقتي بسـم الله ما شاء الله عددنا يشجع على اللعب .. مين هيلعب معانا .. يلا عايزين نتجمع عشان نختار مين اللي هيقعد على الكرسي :P:(

الضحية الأولى: وائل بيومي :D
الضحية التانية: لوليـــتا :D
الضحية التالتة: خالتو صفـــــــاء:D
الضحية الرابعة: شـــــــــادي :D
الضحية الخامسة: ريـــــــــــم :D
الضحية السادسة: نــــــــــورا :D
الضحية السابعة : زغباويـــــة - شعلة الموقع - :D
الضحية الثامنة: الباشمهندسة:D
الضحية التاسعة: مـــــورا:D
الضحية العاشرة: مـــــــــــــادا -عبقرينو الموقع- :D
الضحية الحادية عشرة: Monem -الريــــــس- :D
الضحية الثانية عشرة: يـــــــــــارا :D
الضحية الثالثة عشرة: الأستـــــاذة:D
الضحية الرابعة عشرة: TOTOOMEX :D
الضحية الخامسة عشرة: عمو عبد المنعم :D
الضحية السادسة عشرة: شيماء مصطفى :D
الضحية السابعة عشرة: هاجر :D
الضحية الثامنة عشرة: Lady Rasha Reda :D
الضحية التاسعة عشرة: :D لولو الزغبي
الضحية العشرين: المهندس/ Ahmed Hussien {{uf:2542}}

 

إضافة منذ 10 عام
MaDa
11058
غير محدد
تعديل منذ 6 عام

التعليقات

loleta1 منذ 10 عام
سكر ياعمو وعندك حق شعوب بره بيطبقوا الأسلام بلا مسلمين وأحنا هنا مسلمين بلا تطبيق للأسلام سؤالي ليك ياعمو بتعمل ايه لما بتتناقش مع حد منطقي ولمض ؟وأيه أكتر حاجة بتعجبك في موقع زيدوني واكتر حاجه نفسك تغيرها؟
عبد المنعم منذ 10 عام
لما ازهق منه فعلا باشوح بايدى فى وشه مع نظرة قرف واسيبه وامشى ..
اللى عاجبنى فى موقع زيدونى ان النساء اصبحن يمثلن قوة .. وعلينا ان نخشاهن ..
نفسى اغير جنسيتى .. بس برضه ابقى فى مصر .. باحبها جدا جدا جدا ...
عبد المنعم منذ 10 عام
رد على مادا : المشاكل نوعين على وجه العموم .. نوع ممكن يتحل ونوع غير قابل للحل .. صح ؟؟ النوع الاول له بدائل وخيارات متعددة .. بادور على الاسرع الاسهل الاامن الاقل خسارة والاقل تكلفة سواء مادية ولا معنوية ..

النوع اللى مالوش حل عاوز فلسفة .. تعلم نفسك كيف تعيش مع ما تكرهه.. حتى يحدث الله امرا ..
زغباوية منذ 10 عام
ياعيني على الاجابات طيب ممكن تبص في الصفحة السابقة للتعليقات هاتلاقي اسئلة برضوا
عبد المنعم منذ 10 عام
انتى هتمشورينى بين الصفحات ليه ؟ كل صفحة رديت على الاشئلة اللى فيها خلاص !! .. فين بقى الاسئلة اللى بجد ؟؟ دا انتم طلعتم اى كلام .. فيييييين الاسئئئللللهههه!!!!
عبد المنعم منذ 10 عام
اللى عنده حاجة .. ياللا قبل ما نصطاد دكتور دريم !!! ( دبستهلكم اهه )...
الباشمهندسة منذ 10 عام
الله ينور يا عبدو
زغباوية منذ 10 عام
شكلنا وحش ياجماعة عمليين نداء للراجل في كل مكان ولما يدخل مايلاقيش اسئلة كتير .....محدش عارف يجيب اسئلة ولا ايه ؟؟؟الكرسي هنج ولا ايه؟؟؟
الهمة شوية ياعضاء
mora منذ 10 عام
اخيرا يا عمو اول ما يشتغل النت بعد انقطاع دام اسبوعين الاقيك منور كدا دا انا حظى وحش ع العموم اخاف اسئلك اى سؤال بعد اجاباتك دى يا عمو
mora منذ 10 عام
ع العموم يا طنط صفاء لينا عتاب بعدين عشان مبلغتنيش وايضا الاستاذه رانيا
عبد المنعم منذ 10 عام
يا مورا كلنا تحت امرك .. انا عملت زى كل المسئوين وصبيت على الكرسى غراء قبل ما اقعد !!! ومش هاقوم الا بعد ما تسالينى زى ماانت عايزة
زغباوية منذ 10 عام
جمد الله على السلامة يامورا
الاستاذة منذ 10 عام
حمدالله على سلامة النت يا مورا ويا رب ما يخسر تاني
زغباوية منذ 10 عام
يال ياستى اسئلي براحتك
MaDa منذ 9 عام
تلبية لطلب شيماء باللعب فهي أحق واحدة بالجلوس على الكرسي .. يلا يا شيماء المايك معاكي 😃

أول سؤال
عرفينا بنفسك من واقع البطاقة الشخصية والبطاقة العائلية .. يعني cv كامل عنك 😃
الباشمهندسة منذ 9 عام
ما هي هوياتك المفضلة وكيف تخططين لاقضاء اجازة منتصف العام؟
mora منذ 9 عام
تعرفى كان نفسى جدا ادخل كليه الاداب قسم علم نفس بحب علم النفس جدا
شيماء مصطفي منذ 9 عام
انتي ف كلية ايه ؟
شيماء مصطفي منذ 9 عام
أنا شيماء مصطفي . .19 سنة . .ف أولي أداب علم نفس كلية البنات . .ومن محافظة الجيزة . .عندي أخت واحدة أصغر مني .
mora منذ 9 عام
يا ترى انبسطى من موقع زيدونى وهل اضاف لكى شيئا وما رأيك فى المواضيع التى يكتبها الاعضاء
شيماء مصطفي منذ 9 عام
الباشمهندسة :
أنا بحب القراءة ، الرسم ، وكرة السرعة .
وكنت مخططة إن أول حاجه أعملها ف الأجازة أروح معرض الكتاب وروحت امبارح بعد الأمتحان ، وعموما ف الأجازة بروح المكتبة أو النادي .
شيماء مصطفي منذ 9 عام
اه استفدت كتييير طبعا .
mora منذ 9 عام
اتخرجت من كليه التجاره اداره اعمال
شيماء مصطفي منذ 9 عام
ما شاء الله . .يعني بردو أكبر مني . .هو أنا أصغر واحدة هنا ولا ايه ؟:D
mora منذ 9 عام
لا عندك يارا السنه اللى فاتت كان عندها 18 سنه
شيماء مصطفي منذ 9 عام
طب الحمدلله في حد ف سني
mora منذ 9 عام
وريم عندها 19 سنه وبعدين مش بالسن عن نفسى محستش ان فى حد كبير او حد صغير بجد وبدون مبالغه حسيت ان كلنا متقاربين جدا ومفيش فروق فى السن
شيماء مصطفي منذ 9 عام
اه طبعا مش بالسن . .بجد كلكم صحبه جميلة اتشرفت بيها.
mora منذ 9 عام
واحنا كمان اتشرفنا بيكى جدا يا شوشو
MaDa منذ 9 عام
أولا : ازيك يا شيماء منورة الكرسي 😃
ثانيا : انتي اللي هتتسألي فمش من حقك تسألي خالص :D:P
ثالثا : في أعضاء في سنك بالظبط زي يارا أولى فنون تطبيقية وسما ومحمد علاء أولى علوم طبية .. انا عندي 20 سنة وريم كمان تمتهم من كام يوم كده يا مورا 😃 وإيناس 😃
رابعا: العضوة هاجر اللي هي أختي 😃 خريجة آداب عين شمس قسم علم نفس دفعة السنة اللي فاتت يعني لو محتاجة أي حاجة في أي وقت وفي أي مادة اسأليها وهي مش هتتأخر عليكي

خامسا : سؤال
انتي دخلتي كلية الآداب تنسيق ولا حبا فيها وكذلك بالنسبة للقسم خصوصا انه قسم صعب جدا 😞
safaa منذ 9 عام
شيماء ايه أحلى شيىء عجبك فى موقع زيدونى وايه الحاجة اللى مش موجودة وتحبى انها تضاف للموقع؟ واخبار معرض الكتاب ايه السنة دى
يشجع للزيارة ولا لأ
شيماء مصطفي منذ 9 عام
MaDa
أنا ف 2ث كنت علمي وكانت طموحاتي حاجات تانية خالص بعدين حصلت ظروف وجبت مجموع وحش فطبعا حولت أدبي وماكنتش شايفة إن في أي كلية من أدبي عاوزة أدخلها بس من ساعة مادرست علم نفس حبيته جداً وقررت إني أدخل أداب علم نفس والحمدلله جالي أداب وأنا الي اختارت علم نفس
أول رغبة ولو ماكنش جالي علم نفس كنت هحول من أداب لأي حاجة تانية بس الحمدلله قبلت ف قسم علم نفس .
محمد عبد المنعم منذ 9 عام
طلب بعيد عن موضوع الكرسي:
محتاجين بعض المقالات (ياريت في شكل مسلسل) بتشرح العلم النفس لأنه من العلوم المهمة اليومين دول لأن مفيش جد فينا للأسف خالي من مرض نفسي. وده بالظبط اللي كنت بدور عليه من يجي شهرين ، حد تخصص علم نفس يشارك المذكرات بتاعته عندنا

وطالما كنت اتكلمت فبالمرة هسألك عن الموضوع الي كنتي بتدوري عليه ولقيتيه في زيدوني أول مرة
شيماء مصطفي منذ 9 عام
safaa
أكتر حاجة عجبتني إن أي معلومة محتاجاها بلاقيها وحتي لو حاجة مش موجودة ممكن أسأل عنها وألاقي الأجابة . .وكمان فكرة إن الموضوع الي قرأته يبقي بلون مختلف عن الموضوع الي مش قرأته . .والي أحب أنه يضاف للموقع إن يكون في معلومات أكتر عن الأعضاء . .أو يكون في شات بس شات جماعي عشان نقدر نتناقش من خلاله أو نتعرف علي الأعضاء من خلاله .
شيماء مصطفي منذ 9 عام
محمد عبد المنعم
تقريبا كده كان موضوع الإسعافات الأولية.
وبالنسبة لموضوعات علم النفس . .تقصد أنا ولا هاجر أخت MaDa ؟؟
شيماء مصطفي منذ 9 عام
معرض الكتاب :
اه يشجع جداً للزيارة بس كان محتاج عجلة:D عشان نقدر نلف . .أنا بإذن الله هروح تاني قبل الدراسه ويكون يوم من أوله عشان أنا روحت بعد الأمتحان كنت مرهقة مادخلتش كل الصالات والوقت ماكفاش .
محمد عبد المنعم منذ 9 عام
هاجر خلصت فأكيد مش محتفظة بالمذكرات

طيب برضه بالمرة سؤال ثاني ... مين من أعضاء الموقع انتي عرفتيه على الموقع يعني جه عن طريقك؟ ... بصراحة في عدد كبير أنا معرفهوش دخل الفترة اللي فاتت اللي كنت فيها مشغول
شيماء مصطفي منذ 9 عام
بصراحة لسه ماحدش دخل عن طريقي 🙂 أنا لسه قايلالهم امبارح . .بالنسبة لحكاية المذكرات ماعنديش أي مشاكل بس أبدأ امتي ؟ و ب إيه ؟
محمد عبد المنعم منذ 9 عام
بالكلام العام والبسيط الأول وواحدة واحدة الموضوع ممكن يتطور ... يعني محتاجين مواضيع الناس متوسطة الثقافة تحس إنها استفادت لما تقراها ... طبعا بدون تكليف نفسك مالا تطيقي
MaDa منذ 9 عام
@ الريس : أعتقد ان هاجر عندها حاجات كتير ممكن تفيد هبلغها إن شاء الله 😞

@شيماء : ربنا يوفقك إن شاء الله في المجال اللي انتي فيه وهو مجال روعة طالما انتي حباه وان شاء الله تتفوقي وتبدعي فيه 😞

سؤالي بقى :
ايه اول انطباع خدتيه عن الجامعة وشايفة الحياة الجامعية عاملة ازاي والفرق بينها وبين المدرسة وحبيتي ايه اكتر بعد مرور اول ترم عليكي 😞
الباشمهندسة منذ 9 عام
ياتري ليكي في السياسة وايه رأيك في اللي حصل من سنة واللي بيحصل ديلوقتي في مصر باعتبار انك لسه جيل جديد خالص 😞 ؟؟
loleta1 منذ 9 عام
أهلا بيكي ياشوشو ويسعدني إن موضوع الإسعافات الأولية اللي كتبته لفت إنتباهك وضمك لعيلة زيدوني .اناشخصيا بحب علم النفس ودرست جزء منه هو والفلسفه وإيه مأحكلكيش على دماغي وصلت بيّا لفين.أحب أسألك أخبارنفسيتك في التعامل مع دكاترة علم النفس إيه؟وبما إنك بتحبي الرسم هل هو حاجة عابرة ولاّبتحاولي تتطوريها وتمارسيهابإحتراف؟كمان بتتصرفي إزاي في البيت بما أنكم بنتين ومافيش أولاد وأنتي الكبيرة متحملة للمسؤليه؟
زغباوية منذ 9 عام
منورة الكرسي ياشابة جت رجليها ماجت رجليها:D
اولا:انا مع محمد في مقالات علم النفس وانا علشان خريجة تربية فكنت باخده وبحبه جدا وعندى كام كتاب محتفظة بيهم لغاية دلوقتى وبرجع لهم وقت اللزوم
ثانيا السؤال: باؤيد الباشمهندسة في سؤالها وسؤالى التاني: هل ليكى تجارب مع العمل التطوعي او الخيري؟؟؟
safaa منذ 9 عام
ياجماعة مش تسيبوها لما تخلص الجامعة الاول وبعدين تسألوها على العمل التطوعى والخيرى ..طيب انتى لما كنتى فى الجامعة كنتى بتعملى اعمال خيرية!!
زغباوية منذ 9 عام
للأسف ماكنش فيه وعى ولا كنا بنسمع عن الجمعيات الخيرية اصلا بس دلوقتى الشباب اصبح واعي وفاهم وبيشارك من وهما فى اعدادى وابتدائى كمان مش جامعة بس
safaa منذ 9 عام
اذا كان كدا ماشى
شيماء مصطفي منذ 9 عام
MaDa
أنا في كلية البنات نظامها مختلف شوية وطبعا مافيهاش مظاهر الترفيه الي في الجامعات التانية يعني يعتبر أنا لسه ف مدرسة ثانوي بنات زي ماكنت 😃 ، في الأول كنت مستغرباها جدا وكنت ناوية أحول وكنت بقول دي سجن بس بعد كده لاقيت انها احسن في حاجات كتييييير وإن شاء الله هكمل فيها ومش هحول منها .
شيماء مصطفي منذ 9 عام
الباشمهندسة
أنا رأي إن الي حصل ده حاجه عظيمة ماكناش نحلم بيها . .وف الأول كنت زي كل الناس خايفة وحاسه إن مش ممكن الثورة تنجح . .بس الحمدلله أهي نجحت ولحد الآن بعتبر إن الثورة مازالت مستمرة لأن في مطالب كتيير لسه ماتحققتش و ف نفس الوقت أنا ضد المطاالب الفئوية الي بتعطل مصالح البلد . . .وعندي أمل ف مجلس الشعب الجديد.
شيماء مصطفي منذ 9 عام
أهلا بيكي يا لوليتا . .الرسم بالنسبة لي حاجة عابرة كده مش لدرجة الإحتراف . .بالنسبة لحكاية المسئولية أنا لحد فترة قريبة جدا ماكنتش بتحمل حتي مسئولية نفسي وكنت معتمدة ع ماما ف كل حاجة وكان كبيري أوي البيض أو رز معجن 😃 بس السنة دي ولأول مرة ماما سافرت السعودية حوالي شهرين وبجد ف الشهرين دول اتبهدلت بهدلة 😃 عمري بقيت مسئولة إني أحضر أكل وأتابع أختي ومذاكرتها وأنضف البيت وأروح الكلية وأذاكر بس بجد الشهرين دول اتعلمت فيهم حاجات كتييير جدا وأهم حاجة اني حسيت أد ايييه ماما بتتعب جدا معانا واحنا مش حاسين ومن ساعتها وانا ابتديت أساعدها وأحاول اخفف الحمل عنها شوية .
شيماء مصطفي منذ 9 عام
بالنسبة للعمل التطوعي أو الخيري كنت بروح في الأجازة نشاط اسمه كوني جميلة كنا بحفظ قرآن وندرس تجويد ونتعلم أشغال يدوية وكنا بنروح دار أيتام وإن شاء الله هروحه الأجازة دي . .. ولو حد فيكم من القاهرة في نشاط جميييل جدا للأطفال تبع نفس الجمعية دي ف ميدان لبنان ف مسجد حسين شريف بيكون برنامج النشاط : فقرة للقرآن و أحكام التجويد وفقرة ثقافية وفقرة تلوين وأغاني جميلة وفقرة لعب ويوم الأربعاء من كل أسبوع بيكون رحلة وبيكون من الساعة 9صباحا ل الساعة 1ظهرا ..لو تحبو تشتركو لأولادكم.
زغباوية منذ 9 عام
الله عليكى ياشيماء ...شوفتى ياصفصف نظرتى للشباب الواعى كانت صح ازاى
معلش ياشيماء استفدتى ايه من العمل او بمعنى اخر تقوليلنا ايه علشان نعمل زيك
شيماء مصطفي منذ 9 عام
اتعلمنا نعمل حاجات كتيييير بس أحلي حاجه بجدالراحه الي الواحد بيشعر بيها لما بيساعد حد ومش شرط المساعدة دي تكون مساعدة مادية . .يعني مثلا الدار الي احنا كنا بنروحها دي الناس الي مسئولين عنها كانو موفرين للأطفال معظم احتياجاتهم المادية ووسائل التعليم والترفيه لكن فرحتهم بتبقي ماتتوصفش لما بيجي حد يزورهم ويقضي الوقت معاهم واحنا كمان بنكون مبسوطين جداجدا . . .واكيد كل حد مننا جنبه حد محتاج مساعدته ولو بكلمة كويسة أو ابتسامة .
شيماء مصطفي منذ 9 عام
انا اتكمت كتيييير أوي . .زمانكم بتقولو عليا رغاية 😃
MaDa منذ 9 عام
لو زهقتي من الكرسي قولي ونختار حد تاني بس احنا لسه عايزين نعرف عنك أكتر 😃
احكيلنا كده عن الرز المعجن ده 😃 واول طبخة طبختيها ورأي أختك في أكلك 😛
شيماء مصطفي منذ 9 عام
هههههههههه هو معظم الأكل الي عملته ف أول فترة ماما سافرت فيها كان إما ناقص ملح أو مش مستوي كويس أو بيلزق ف الحله . .بس فاكرة إن أكتر حاجة غاظتني 😠 لما وقفت طوول اليوم أعمل صنية بطاطس بالفراخ واما بسأل بابا ها ؟ ايه رأيك ؟ قالي هيا حلوة بس لو مستوية كانت هتبقي أحلي 🙂 . .وبالنسبة لأختي ماكانتش تقدر تعترض لأنها ماكانتش بتساعدني خالص . .ومدرستها قريبة من بيت تيتا كانت معظم الأوقات بتروح عند تيتا وتتغدا هناك وتيجي وساعات كنت بصعب عليها كانت بتجبلي أكل معاها وتقولي خدي أكل شبه بتاع ماما أهو 😃 .
MaDa منذ 9 عام
ههههههههههههههههههههههههههههههههه انتي لازم تزوري مطبخ زيدوني كتييير أوي بقى معانا هنا عمالقة المطبخ وطبعا على رأس الجميع خالتو صفاء 😞
فكرتيني بأول طبخة لأختي :D:D
safaa منذ 9 عام
ربنا يخليك يامادا ... بس يالا قولنا اول طبخة عملتها هاجر كانت ايه!! وبسرعة وقبل ماتدخل على الموقع وتشوفها
safaa منذ 9 عام
شيماء قولى لنا بتنظمى يومك ازاى وانتى فى البيت وايه أكتر حاجة بتحبى تعمليها وانتى مبسوطة
شيماء مصطفي منذ 9 عام
لو ماما طالبة مني حاجة أعملها بعملها الأول بعدها معظم يومي إما ع النت إما في القراءة ونادرا لما بتفرج ع الTV .
وأكتر حاجة بحب أعملها : أي حاجة جدو بيطلبها مني 😃
safaa منذ 9 عام
ما شاء الله عليكى ...ربنا يبارك فيكى
شيماء مصطفي منذ 9 عام
وفيكم جميعاً
MaDa منذ 9 عام
ايه رأيك في الكرسي ده يا شيماء ويا ترى هتختاري مين بعدك ؟ ولو اتحطيتي في موقف وكان الحل انك تكدبي هل ممكن تكدبي عشان تحليه ولا تقولي الصراحة 😃
safaa منذ 9 عام
ايه رايك ياشيماء فى انجى؟
شيماء مصطفي منذ 9 عام
الكرسي لذيذ 😃 . . هختار لوليتا وانجي p:
انجي مواضيعها جميلة وعاوزاها تاخد مكاني ف الكرسي 😞
MaDa منذ 9 عام
لوليتا قعدت قبل كده .. يبقى انجي هي الضحية التالية 😃
شيماء مصطفي منذ 9 عام
أوك . .وانا بما إني عاوزة أتعرف عليها اكتر يبقي زي ما مادا طلب مني هطلب منها تعرف نفسها 😞
زغباوية منذ 9 عام
طيب حد يقولها ولغاية لما انجي تيجي يبقى شيماء مكملة معانا
ايه اخر كتاب قريتيه بما انك بتحبي القراية وبتحبى تقري لمين وايه الكتاب اللى عجبك وشدك
MaDa منذ 9 عام
ههههههههههههههههههههههههههههه ده تحايل على الكرسي يا زغباوية :D:D
زغباوية منذ 9 عام
طيب بس لغاية لما انجى تدخل
MaDa منذ 9 عام
ممممممممم وانا كمان هسأل شيماء .. بتحبي مصر ازاي ؟
على فكرة السؤال ده صعب اوي 😛
زغباوية منذ 9 عام
هههههههههه انت اللى بتتحايل على الكرسي دلوقتى ههههههه:D
MaDa منذ 9 عام
هههههههههههههههههههه تحايل جماعي لا ضرر فيه 😃
شيماء مصطفي منذ 9 عام
أخر كتاب قرأته كان اسمه عيشها صح ، بحب أقرأ كتب محمود المصري وابراهيم الفقي وياسر نصر . .الكتاب الي عجبني وشدني كتاب استمتع بحياتك للعريفي .
شيماء مصطفي منذ 9 عام
بالنسبة لمادا أحب أقولك 😃 :

loleta1 منذ 9 عام
بجد ياشوشو 10/10 فعلا زي ماهي حبها بحلوها ومرّها وضحكتيني موت في موضوع الطبخ ده والله حصلت فيّا قبلك لأوانا آخر العنقود وماما وخالتي سافروا لمصر وكنت بتطبخ لبيتنا وبيت خالتي وانا كل علاقتي بالمطبخ كانت شم الريحه من بره وكنت بعمل مسقعه وأتلخبطت بين الخل ومية الورد عشان أزايزهم شبه بعض وكانت مسقعه مالهاش حل بس كلوها من الجوع ههههههههههههههه وميرسي لإختيارك ليّا .
@مادا:على فكره انا ماعنديش مانع أجدد قعدتي على الكرسي في أي وقت بس إحنا بندّي فرصه للكل عشان يجرب القعدة عليه ولمّا تحتاجوني عليه انا سداده:-(
أرجع وأسألك ياشوشو طيب أخبارك إيه دلوقتي مع الطبيخ؟وهل فكرتي تجربي طبخة من النت وخاصة زيدوني؟وإيه أكبر مشكلة واجهتك فحياتك حتى الآن وواجهتيها إزاي؟
شيماء مصطفي منذ 9 عام
لا دلوقتي بقيت أعرف أعمل حاجات كتير. .أه جربت مرة كيكة بس فشلت جدا:D بس كانت من فترة ، وجربت تارت البسكويت بالشيكولاتة وطلع حلو ، ومن زيدوني عملت الزبادي بالخيار الي قولتو عليها . .وأنا غالبا ف المشاكل بكون سلبية وبستسلم بسهولة جدا 🙂 .
safaa منذ 9 عام
شاطرة ياشوشو ومع الوقت هتعرفى تعملى كل حاجة طالما عندك استعداد للتعلم
شيماء مصطفي منذ 9 عام
إن شاء الله
MaDa منذ 9 عام
انا بقول نلحق هاجر وهي متظمة في الدخول على زيدوني ونسألها قبل ما تهرب 😃
نورتي الكرسي يا شيماء وهنرجعلك تاني أكيد 😃
MaDa منذ 9 عام
منتظمة
MaDa منذ 9 عام
انا هسأل أول سؤال بس طبعا مش هقولك ال cv عشان انا حافظه 😃

عايز اعرف ايه سر حبك لعلم النفس ؟؟
زغباوية منذ 9 عام
اهلا بيكى ياهاجر معانا نورتي القاعدة
اما انا هاسألك عن
افضل عالم فى علم النفس بتحبي تقري كلماته
وافضل كتاب في علم النفس
وبتطبقى اللى درستيه في حياتك ولا لا
واثر عليكي علم النفس فى ايه

بس حاجة بسيطة:D
Hager منذ 9 عام
بالنسبة لسؤال مادا سر حبي لعلم النفس انه اداني الفرصة اني أصلح من نفسي كتير وكمان فرصة اني أساعد الناس على تخفيف آلامهم لن أشد ألم هو ألم النفس.
MaDa منذ 9 عام
جميل اوي الكلام ده 😞

طيب قولي ال cv عشان اللي مش عارفينك هنا 😃
شيماء مصطفي منذ 9 عام
أها 😞 انا عاوزاكي تقولي الcv
شيماء مصطفي منذ 9 عام
وأنا عوزة أعرف ايه الكورسات الي أخدتيها وفادتك ؟ وبما اني ف نفس مجالك تنصحيني بإيه ؟
Hager منذ 9 عام
بالنسبة للأسئلة البسيطة خالص بتاعة زغباوية أول حاجة في علماء كتير بحب أقرألهم لأن كل واحد له وجهة نظر ورأي مختلف بس أهمهم (فرويد،كارل روجرز،مصطفى زيور،يونج،سولفان)
وطبعا مقدرش أحدد كتاب واحد بس ممكن أذكر (تفسير الأحلام لفرويد،التحليل النفسي لأوتوفنخل،علم النفس التجريبي لأحمد خيري).
بالنسبة للتطبيق فتقريبا بطبق كل اللي درسته في حياتي وده بيساعدني كتير.
وعلم النفس أثر عليا في اني بدأت أعرف نفسي أكتر أكتشف فيها حاجات جديدة وبدأت أعرف الناس أكتر أقدر أتعامل معاهم بشكل احسن وعلم النفس خلى نظرتي للحياة أكتر واقعية.
Hager منذ 9 عام
بالنسبة للcv اسمي هاجر سعد سعيد السيد
السن 22سنة
تخرجت في كلية الآداب جامعة عين شمس
الدرجة العلمية ليسانس آداب تخصص علم نفس
حاليا بحضر دبلومة تربوي وان شاء الله كمان سنه هقدم على الماجستير
الباشمهندسة منذ 9 عام
منورة ياهاجر ,,, هل فعلا كل الاطباء النفسيين من كتر الحالات اللي بيقروها ويقابلوها هما كمان يتاثروا ممكن يتعقدوا نفسيا يعني يتعدوا?
وهل يصح ان طبيب نفسي مريض نفسيا ان يعالج الاخرين ولا داممكن يؤثر علي تحليل وتشخيص الحالة?
يعني باب النجار مخلع 😞
Hager منذ 9 عام
سؤال الكورسات أنا لحد دلوقتي ما اخدتش كورسات لكن ممكن أقولك علي كورسات تفيدك فيه تدريب على اختبار بينيه الصورة الخامسه ده اختبار ذكاء مهم وهطبقي الصورة الرابعة منه في سنة التخرج إلا لو نزله الصورة الخامسة للجامعات وكمان في كورسات تخاطب للتعامل مع زوي اضطرابات الكلام وكورسات في كيفية التهعامل مع زوي الاختياجات الخاصه وفي الكلية ممكن تعرفي كورسات جديدة من الدكاتره لكن كل الكورسات دي بتساعد في الشغل لكن على مستوى الدراسة فالكتب والمراجع أهم وأفيد.
Hager منذ 9 عام
ردا على الباشمهندسة الطبيب النفسي بشر وممكن يتأثر بالحالات اللي بيعالجها لكن الطبيب الماهر يقدر يتخلص من التأثير ده لكن مش لدرجة انه يتعدي إلا لو كان عندة قابلية عالية للمرض النفسي ودول قليلين طبعا لو الطبيب مريض نفسي لا يمكن يقدر يعالج المرضى وأكيد هيأثر بالسلب على الحالة لكن في حاجة كويسه اوي بيعملها كتير من الدكاتره النفسيين انهم قبل ما يبدأو عملهم كمعالجين بيخضعوا نفسهم لجلسات تحليل نفسي عند أحد الدكاترة المخضرمين ويصلح أي خلل نفسي عنده قبل البدء في العمل وكمان الاجراء ده بيتعمل كل فترة للتخلص من الآثار اللي ممكن تسيبها الحالات اللي بيعالجها.
MaDa منذ 9 عام
طيب ممكن تحليل سريع كده لشخصيتك وايه العقد النفسية اللي بتعاني منها 😛
loleta1 منذ 9 عام
طيب حيث كده ياد.هاجر مستقبلا ،ممكن تقبليني كأول زبونة مستديمة عندك وإيه عقد وسلبيات وبلاوي كتير مش هأحرمك من حاجة.
بماإنك بنوتة وحيده مع أخ فظييع زي مادا كنتي بتتعاملي إزاي مع إنّي عارفه إنّوا طيب ؟
إيه إهتماماتك ومواهبك بعيداً عن علم النفس؟
ولو كنتي مادخلتيش علم نفس كنتي تحبي تطلعي إيه؟
محمد عبد المنعم منذ 9 عام
ليس سؤال
بأكرر طلبي اللي محدش حاول يساعدني فيه ... عايز إما ملخصات كتب مبادئ علم نفس أو سلسلة مقالات متظبطة خصيصا لزيدوني

سؤال خارج السياق يستحق مقالة منفصلة
أنا شايف إن كل اللي بنعاني منه في مصر سببه علة نفسية ألا وهي التفاخر سواء عن قصد أو شغل عقل باطن وسواء عن غنى (أو علم أو سلطة أو أو أو) أو عن تطلع ... ما اسم هذه العلة في علم النفس وكيف نواجه نفسنا بهذه العلة ونحاول نصلحها. والأهم إزاي نصلح من الناس اللي حوالينا اللي

سؤال داخل السياق
عايزين أمثلة لعلل نفسية كانت عندك وقدرتي تتخلصي منها
MaDa منذ 9 عام
هاجر هتضربني :D:D
زغباوية منذ 9 عام
وانا بضم صوتى لمحمد فى اول اقتراح وتاني اقتراح عايزين ربط الواقع بعلم النفس
سؤالى بقى واحنا بشر عاديين مادرسوش علم نفس يظبطوا نفسهم ازاى؟؟؟؟؟؟؟؟؟؟؟؟؟
وهل التنمية البشرية كافية ان تظبطنا
زغباوية منذ 9 عام
ماتقلقش يامادا دا احنا ماصدقنا متخصصة تدخل معانا لاو ايه علم نفس يعنى زباينها هاتكون كتييييييييييييير 😞
MaDa منذ 9 عام
ههههههههههههههههههه ربنا يستر بقى 😃
Hager منذ 9 عام
طبعا أنا كدة ادبست رسمي بس ماشي مش مشكلة
بالنسبة لسؤال لوليتا فأنا هواياتي الرسم وكتابة القصص القصيرة والمقالات الصحفية وتحويل أي حاجة مالهاش لازمة لديكور أو لعب في البيت وكمان بحب أشتغل حاجات هاند ميد ليه أجدد بيها هدومي أو شنطي أما بالنسبة لو ما كنتش درست علم نفس كنت أحب ايه فكان نفسي أشتغل مرشدة سياحية بس كان العائق موضوع اللبس والحجاب علشان عرفت ان مفيش شركات سياحة بتشغل محجبات في الارشاد السياحي.
Hager منذ 9 عام
طبعا سؤال مادا سؤال خبيث أخوية وانا عارفاه بس برده هرد اتعلمت اني ما اكشفش كل جوانب شخصيتي لأي حد مرة واحدة واني أنتظر وأشوف نوايا الغير عشان ما أسمحش لحد انه يستغل أي صفة لصالحة بشكل يأزيني ودي نصيحة اتعلمتها من دكتور ليه وجابت نتيجة وكمان كنت أحيانا بتسرع في الحكم على الناس بسبب الصور المسبقة اللي لما بلاقي الواقع مخالف ليها كنت بحكم بشكل سيئحتى لو الشخص جيد في الحقيقة واتعلمت اني اتعامل الأول مع الناس بعد كدة أحكم وكنت صلبة ولا أتقبل الاختلاف بسهولة بدأت أحاول أكون مرنة في التعامل مع الاختلافات اللي حولي .............كدة كفاية يا سي مادا ولا عندك حاجة تاني.
Hager منذ 9 عام
بانسبة لطلب محمد انا أول مرة اعرفة وأوعدك اني احاول أنفذهولك وبالنسبة لموضوع العلة النفسية عند الشعب المصري ففي رأي الشخصي اللي ممكن يكون صح وممكن يكون غلط اننا عندنا أزمة حرية ان الشعب المصري ومن غير زعل مش فاهم الديموقراطية ومش قادر يفعلها رغم انه بيطالب بيهالأنه من قديم الأزل ونرجع للتاريخ احنا طول عمرنا معتمدين على الحكام في تسيير أمورناوعندما تمنح الحرية لشعب لايستطيع استغلالها تنقلب لفوضى زي اللي بيحصل دلوقتي وكمان عندا علة نفسية قادرة انها تدمر كل حاجة هي العدوان الكبوت نتيجة للقهر اللي عاش فيه العب ورضي بيه بخنوع مش بس في عصر مبارك لأ ده من عصر الفراعنه ونقدر نرجع للتاريخ
Hager منذ 9 عام
سؤال زغباوية عن التنمية البشره هي فعلا بتساعد بس مش بدرجة كبيرة والموضوع مش محتاج دراسة لعلم النفس لكن محتاج مكاشفة الذات بمعنى مصارحة مع ذاتي أحاول اعرف ايه عيوبي من خلال الناس اللي هم مرايتي بس طبعا مش أي ناس الناس القريبين مني وواثقه فيهم وفي حبهم لية وأبدأ أحاول أصلح العيوب دي ودايما أدور على البدايل وماتحجرش عند نقطة معينة وكمان القراءة في بعض الكتب السهلة المعدة للقارئ العادي نقدر نكتشف حاجات في نفسنا ما كناش نعرفها ونلاقي الحلول ليها ونفذها ولو قفلت خالص مع الواحد يروح لأقرب مركز ارشاد وتوجي وفي هناك اخصائيين بيساعدوا على حل المسائل السهلة الصغيرة
زغباوية منذ 9 عام
شكرا ياهاجر
التالي
هو مش سؤال ولكنه رجاء او طلب
ممكن بما انك بتكتبي قصص ومقالات وبتعملى اعمال يدوية تحطيهالنا على الموقع نفسنا ننمي الابداع فى الموقع ونشوف شغل الاعضاء
safaa منذ 9 عام
يالا ياهاجر ماتبخليش علينا بمواهبك وابداعاتك
loleta1 منذ 9 عام
فعلا وانا مبسوطة أن سؤالي كشف المواهب دي وفعلا ياهاجر ياريت تفيدينا بأفكارك الفنية من وقت للتاني .وأتمنى اكون افدتك .احب اسألك لو جاتلك فرصة مدفوعة الأجر
للسفر تحبي تروحي فين ولومسموح تاخدي شخص واحد تاخدي مين؟
زغباوية منذ 9 عام
معلش ياهاجر هاتقل عليكي بس سؤال لابد منه فى وجود متخصصة زيك
ايه الفرق بين بينكم وبين دارسى طب قسم علم نفس بمعنى اخر ايه الفرق بين الطبيب النفسي والمحلل النفسي(هل هذا مسمى صح ام خطأ)سؤالين فى سؤال
Hager منذ 9 عام
سؤال لوليتا حلو أوي ولو فعلا في فرصة أسافر يبقى هروح طابا وهاخد صاحبتي الأنتيم ونقضيها رغي وفضفضة وتأمل هى تكتب شعر وأنا أرسم.
Hager منذ 9 عام
زغباوية أسألتك دايما في الجول هو بس في تصحيح لمسمى المحلل النفسي هو الاسم الصح معالج نفسي psychotherapist أو اخصائي نفسي والأخصائي كعمل بيندرج تحته تخصصات في فروع مختلفة زي الاكلينيكي وده خاص بالمشكلات والأمراض النفسية وفية التربوي الخاص بالمشكلات التربوية وفي مجالات تانية كتير أما الطبيب النفسي psychiatrist فهو خريج كلية طب بشري حصل على درجات علمية في الدراسات الخاصة بالأمراض النقسيةالعقلية واتخصص في علاجها وكمان هو يقدر يوصف عقاقير علاجية للمرضى على عكس المعاج النفسي لكن المعالج النفسي بيكون خرج آداب زي حلاتي وممكن يكون حاصل عل الماجستير والدكتوراه أو لا لكن المهم انه يكون مؤهل لمزاولة المهنة وطبعا شغل المعالج النفسي بيكون أعمق من الطبيب وده والله مش تحيز ده واقع أنا شفته والمعالج بيكون أعمق وبيتوغل في نفس المريض بشكل أكبر لكن الطبيب اعنماده الأكبر على الأدوية
زغباوية منذ 9 عام
شكرا هاجر بس احجزيلي معاكي مكان في الرحلة وهاقعد ساكتة:(
Hager منذ 9 عام
يا سلام بس كده تنوريوتبقى دي الأجازة اللي اتفقنا عليها
زغباوية منذ 9 عام
😞
MaDa منذ 9 عام
يا ترى مين الضحية ال 18 😃
loleta1 منذ 9 عام
,انا بأقترح (ليدي رشا رضا أوshmais )لأنهم متواجدين دايما والأمر متروك ليكي ياهاجر.
mora منذ 9 عام
معلش يا هاجر بعتزر عن عدم مشاركتى لكى بأى سؤال ان شاء الله تتعوض
MaDa منذ 9 عام
مش هزعلك يا لولي .. يلا الدور على رشا رضا 😃
MaDa منذ 9 عام
يلا ورونا الأسئلة اللي في الجول 😃
safaa منذ 9 عام
يالا يارشا جمدى قلبك وقولى على ال c v ...دا جميل جدا الكرسى:(
الباشمهندسة منذ 9 عام
ايه سر اختيارك للياباني بالذات في دراستك ورائيك ايه فيه تنصحي بدراسته ولا بلاش تعقيدات ???
أم العيال منذ 9 عام
أزيكو أزيكو أيكو ماليش أي سؤال أنا بس قلت أصبح عالناس الحلوةبس
علي فكرة ياباشمهندسة رشا صيني مش يابانيعلي ما أتذكر
الباشمهندسة منذ 9 عام
معلش معلش ... اخذت بالي بعد ما كتبت التعليق وقلت اسبها هي تصحح المعلومة 😃
زغباوية منذ 9 عام
ممكن انتهز فرصة اللخبطة اللى حصلت دى واسأل ايه الفرق بين الصينى واليابانى مع انى معرفش اى لغة فيهم:D
Lady Rasha Reda منذ 9 عام
السلام عليكم و رحمته الله و بركاته على الموجودين و الناس كلها
Lady Rasha Reda منذ 9 عام
أبدا بــ السيره الذاتيه!!

الاسم: رشا رضا حسين عبد المنعم
30سنه زوجه و أم لطفلين (عبدالله أحمد على و ياسين أحمد على)،،
مترجم حر صينى عربى إنجليزى

درست بكليه الالسن جامعه عين شمس ، و كورسات عديده و متنوعه فى مجال الترجمه و البحث و الادب المقارن،

و درست بصوره حره الهندسه الوراثيه،والعديد من المجالات الثقافيه الحره،،،،،،

أمتهنت الترجمه الحره منذ عام 2002،، مما أتاح لى الفرصه للتعرف على العديد من مجالات الحياه، و منها الرخام و السياحه و الافلام الوثائقيه و الصناعه و التجاره و الاستيراد و التصدير و التكيفات و الدراجات الناريه، ة غيرها،،،،،،،،،،،

عشت الحياه الكشفيه حتى عام 2003، و أعتزلتها بعد قياده عشيره كليه الالسن سنتين و نصف، وحصلت على العديد من الكورسات الكشفيه ، و نلت العديد من الجوائز المتنوعه!!

هواياتى : القرأه فى مختلف نواحى الحياة،
الكروشيه (خبره 15 سنه من العمل المتواصل)، الرسم على الزجاج و الحرير ، الاعمال اليدويه بوجه عام ، الشطرنج ، و البحث عن المعلومات المفيده على الشبكه العنكبوتيه،

مش عايزه أطول عليكوا ،ده كده مختصر من
Lady Rasha Reda منذ 9 عام
أه نسيت " الموسيقى ، انا عازفه عود ، و أحب ألعب على القانون و الايقاع
Lady Rasha Reda منذ 9 عام
ليه أخترت الصينى :

هو أخترنى،،

فى الاول انا أخترت ألسن بعد صيدله ، و الحمد لله أن أختار لى الله الالسن، عشقتها، لم أكن عمرى ممن يحفظون ، و لكن فهمت فى اللغه و الترجمه ، مش هاتصدقونى لو قلت لكم أنا أفهم اللغه و حتى الكلمات و المرادفت ، فن

ثم أخترت الاستمرار باللغه الصينيه، علشان هى أغلى ترجمهالورقه الانجليزى 3 جنيه ، الصينى 70جنيه ، و زى ما حسيتوا أحب التحديات

يعنى مثلا كليه التربيه و الاداب و الاسن و أى مركز تانى ممكن بكل سهوله يدرس اللغات الاوربيه،كام خريج إنجليزى كل سنه فى مصر ، متعدوش ، و لكن كام خريج صينى ،، أد 500 نصفهم و أكتر بيتجوز و يقعد فى البيت ، هايفضل كام ،

بس كده
Lady Rasha Reda منذ 9 عام
الصينى و اليابانى و الكورى و غيرها من لغات شرق أسيا هى لغات رمزيه و منغمه و معربه، لغات ذات حضاره ،

إنما معظم اللغات الاوربيه ، مأخوذه من اللغه الاتينيه
Lady Rasha Reda منذ 9 عام
كيف تفرقى بينهما ، بس لو أنتى عارفه أى لغه فيهم هاتعرفى تفرقى ،

يعنى لو جبيت أغنيه أسبانى مثلا و أخرى ألمانى ، كيف تفرقى بينهم ، لو أنتى سمعتى أو قرأتى قبل كده حاجه منهم و لو حتى بالويم يعنى ،
Lady Rasha Reda منذ 9 عام
تمام كده أى خدمه هأشوف العيال و الواجب لغايه لما حد يسأل ، و لا كده خلاص ؟؟؟؟؟!!!!!!!!!!!!
Lady Rasha Reda منذ 9 عام
أرشح من بعدى حسام أحب أتعرف عليه
زغباوية منذ 9 عام
لسة بدري ياشابة
السؤال التاني:درست بصوره حره الهندسه الوراثيه درستيها ليه؟؟؟؟ وفين؟؟؟؟

وطلب مش سؤال بما ان ليكي فى الاشغال اليدوية مش بتحطي لنا اعمالك ليه على الموقع

وكدا انا بعرفك لاول مرة

السؤال الثالث استفدتى ايه من الحياة الكشفية وبدائها للولاد من سن كام؟؟؟
عبد المنعم منذ 9 عام
ما ردتيش على سؤال زغبويه يا رشا .. وانا كمان عايز اعرف انهى لغة فيهم بتتكتب راسى وانهى افقى ؟
user305 منذ 9 عام
انا احمد من القاهرة اتمنا ان اعرفكم وهذا موق
http://www.zorpia.com/sweetaly533/comments/comment_id=72012239#c72012239
ع
user305 منذ 9 عام
موقعى
user305 منذ 9 عام
محمد عبد المنعم منذ 9 عام
يا user305 الروابط من النوعية مبتشتغلش لأنها رابط داخلي بالنسبة ليك
loleta1 منذ 9 عام
منورة ياليدي رشا.بماإنك ليكي في الصيني يبقى أكيد حصلت معاكي مواقف كتيرة إيه اكتر موقف مضحك؟وكمان درستي الهندسة الوراثية بصفة عامة ولاّتخصصتي في جزئية معينة لو حصل هي أيه وأستفدتي منها في حياتك بأيه؟عجبني جدا إنك ليكي في الفنون الرسم والموسيقى ياريت تضيفي أعمالك على زيدوني وكمان مين عرفك بزيدوني وأكتر حاجة شدتك في الموقع وهل إستفدتي في من زيدوني في الفن والموسيقى؟وهل من الممكن ناخد منك ولو نبذة عامة عن اللغة الصينية في زيدوني؟
safaa منذ 9 عام
سؤالك جميل يالولو
loleta1 منذ 9 عام
ميرسي ياصفصف:-(
safaa منذ 9 عام
يالا يالولو الزغبى اقعدى على الكرسى وقولى لنا
1- أكلتك المفضلة ايه؟
2- أحلى حاجة بتحبى تعمليها وانتى فى البيت ؟
3- ايه الحلم اللى تتمنيه فى حياتك ونفسك يكون حقيقة؟
لولو الزغبى منذ 9 عام
اكلاتى المفضله :
- محشى ورق العنب
- البيتزا
- البطاطس فى اى حاجه
احلى حاجه بحب اعملها و انا فى البيت :
- اكتب
- اشتغل شغل يدوى ( عقود بالخرز - مفارش كروشيه )
- انى اقعد ع النت
الحلم اللى بتمناه :
- انى اتفوق فى رياضتى المفضله و اكون فى فريق
- اتمنى اكون دكتورة
- اتمنى يكون ليا دور فعال فى الحياه السياسيه فى بلدى و افيد بلدى
زغباوية منذ 9 عام
ربنا يوفقك يالولو وتحققي اللى نفسك فيه
لا ده انتى عايزة روقان علشان افكرلك في كام سؤال حلو كدا
الباشمهندسة منذ 9 عام
لأ بقي ... ده كلام كبير ولازم البداية تبقي مظبوطة ونعرف سنك ومؤهلك الدراسي وايه هي الرياضة بتعاتك .... وكدا cv مختصر
مها شاهين منذ 9 عام
يارب يانور عيني يحقق لكي كل امنياتك ويحفظك يارب
safaa منذ 9 عام
ربنا يبارك لكى فيها وتشوفيها عروسة وتشيلى احفادك يارب
loleta1 منذ 9 عام
بالظبط يالولو إبدئ بالcv
لولو الزغبى منذ 9 عام
ماشى cv مختصر
اسمى الاء
سنى 14 سنه
داخله 3 اعدادى
رياضتى المفضله هى كره الطايرة و اتمنى احقق فيها انجاز

loleta1 منذ 9 عام
أولاً إنتي هايله مدتلكيش السن دي خالص توقعت إنك أكبر عشان عاقله قوي وربنا معاكي وكويس إنك من محبي الرياضه والأعمال اليدويه ,ودلوقتي أسألك عرفتي الموقع منين؟وأيه أكتر حاجة شدتك ليه ؟وأول موضوع فيه لفت إنتباهك ؟وأيه ممكن تفيدينا فيه في مجال الرياضه؟
لولو الزغبى منذ 9 عام
بجد شكرا اوى لحضرتك 😞
-تمام انا عرفت الموقع من مامتى هى مسجله فى من زماان بس انا سجلت فيه من شهر او اقل تقريبا بس
-اكتر حاجه شدتنى ليه الحوار و النقاش و روح الاسرة اللى فيه و طبعا الحوار و النقاش فى السياسه لانى سياسيه جدا
-صراحه اول موضوع لفت انتباهى فيه مش فكره اوى بس افتكر انها كانت حاجه سياسيه
-معلوماتى فى مجال الرياضه تتلخص يعنى فى كره الطايره طبعا قواننها و كل حاجه فيها و كره القدم شويه بس ممكن افدكوا مثلا فى اى معلومات صحيه للرياضيين على حد معلوماتى 😞
loleta1 منذ 9 عام
حلو طبعاً أي معلومات بتفيد الجميع ،وتحياتي لماما الزيدونجيه الأساس اللي طالع منه الفرع ده ،وحاجه حلوه قوي إنك سياسيه من بدري كده تقريباً في ناس كتير زي سيادتي لسه متعرفين على السياسه قريب ،سؤالي بقه بما إنك داخله على شهاده بتقسمي وقتك إزاي بين الدراسه والترفيه؟وبما إننا في اوقات التغيير إيه اكتر حاجه نفسك تتغير في التعليم؟واخبارك إيه مع الرسم؟والأجازة بتقضيها إزاي؟
safaa منذ 9 عام
بصراحة يالوليتا هى الاسرة جميلة كلها ولو دخلت تكتب فى زيدونى هتعمل شغل عالى جدا ..بس الاول ندعى كلنا ان ربنا يوفق اخوها محمد هو فى الثانوية العامة ويارب يجيب مجموع عالى ويكون زى والدة يارب
زغباوية منذ 9 عام
مع لوليتا فى سؤالها بتنظمى وقتك ازاى؟
بتحبي تقري ايه ولمين؟؟؟؟وبتكتبي ايه؟؟؟؟
ونفسك ايه لمصر؟؟؟؟
لولو الزغبى منذ 9 عام
- بقسم وقتى ازاى فى الدراسه ايام التمرين بتاعى بتبقى 3 ايام انا بروح منهم يومين بس يوم منهم بيبقى الجمعه و طبعا من قبل الدراسه ببقى قاريه و لو بعض الدروس فى اى ماده بحس انى ادخل المدرسه ابقى مجمعه اى حاجه كده و طبعا بذاكر كل حاجه مع المدرسه اول باول و قبل امتحانات نص السنه او اخر السنه بعمل جدول اقسم فيه مذكرتى طول المده قبل الامتحانات بحوالى 3 اسابيع و بذاكر بقى على حسب الجدول دا و ربنا بيوفق الحمد لله
- اخبارى مع الرسم مش كويسه خااالص انا مبعرفش ارسم انا فى التعبير الفنى اللى هو اشخاص بقى و كده لالا مليش فيه بس تصميمات ابتكاريه تمام جدا و الحمد لله مش همتحن رسم تانى 😞 😞
- الاجازة بقضيها بروح التمرين و هاخد كورس انجليزى ان شاء الله و انا متطوعه مع جمعيه خيريه و بشتغل معاها
لولو الزغبى منذ 9 عام
- اكتر حاجه نفسى تتغير فى التعليم اول حاجه طبعا نفسى يغيروا المناهج و يعدلوا فيها كتير لان فعلا المناهج صعبه اوى و كلها حشو و حاجات مش مفيده اوى و نفسى المنظومه كلها تتغير نفسى مفهوم المدرسه عند الطلاب يتغير كل اما حد يتسأل عن مدرستوا بيبقى خلاص هاين عليه يشتم فيها و دا غلط احنا بنطلع من الامتحانات ناسين درسنا ايه بنحفظ و ندخل نسمع و نطلع انما مبنستفدش حاجه فى حياتنا العمليه اه طبعا معلومات مهمه بندرسها بس برضو حشو فى المناهج بطريقه مش ممكنه نفسى كمان منظومه الثناويه العامه دى تتغير كلها الطلاب لازم يحبوا يحضروا فى المدرسه و المدرسين ياخدوا مرتب يريحهم ميطروش يدوا دروس خصوصيه و بالمناسبه انا من اشد محاربى الدروس الخصوصيه بس للاسف الناس بتلجأ ليها علشان مافيش شرح عدل فى المدارس المدرسين نفسهم بيبقوا داخلين الفصول عاوزين يرموا فى وش العيال الكلمتين بتوع الدرس و يخرجوا لازم نحس اننا بنستمتع و احنا فى المدرسه علشان نحبها كمان عاوزة اغير موضوع المدارس الحكوميه اللى الشرح و المعامله فيها زفت اوى لازم المدارس دى تتغير لازم الطلاب يحبوا المدارس لان الاب و الام فى اى اسرة اكيد بيبقوا عاوزين ولادهم يتعلموا كويس و بيفضلوا يفكروا احنا عاوزين فلوس علشان مدرسه خاصه و دروس و كتب و لبس المدرسه بيبقى فعلا تعب على اى اسرة انما لو التعليم كويس فى المدارس الحكوميه هيبقى مافيش مشكله او هتقل المشكله و العبء ع الاسرة شويه كمان الانشطه فى المدرسه تتحسن شويه كتير الانشطه تقريبا ممكن نديها مقبول مافيش صرف كويس ع الانشطه كمان الجداول جداول الحصص دى مشكله كبيرة جدا احنا بناخد ساعه ونص رياضيات مثلا بعدهم ساعه ونص عربى و الساعه و نص دول بيبقوا حصتيين بعدهم e بعدهم علوم كل دا مابيراعاش فيه قدره الطالب على استيعاب المعلومه كويس بنبقى قاعدين بنعد الدقايق و الثوانى علشان نخلص من اليوم و نروح البيت لازم حصص الانشطه تزيد شويه علشان نعرف نفصل بين الماده و الماده اخر حاجه بقى تعامل التلميذ مع الطالب للاسف المعامله بتبقى اكترها خوف انا بحترمها علشان الدرجات بحترمها علشان متزعقليش و دا غلط انا لازم احب المدرس او المدرسه بتوعى و من منطلق حبى ليهم هحترمهم انما مش احترمهم خوفا منهم
دا رأيي فى التعليم و اسفه ع التطويل
لولو الزغبى منذ 9 عام
- بحب اقرأ روايات كتب تنميه بشريه قصص قصيره نثر
- لمين انا قرأت ليوسف السباعى و اللى بحب قصصه جدا و قرأت لاحسان عبد القدوس و بحد اوى اسلوب مصطفى لطفى المنفلوطى فى الكتابه و قرأت بعض الروايات بس مش لمصريين هى مترجمه للعربى
- بحب اكتب ايه يعنى بكتب ساعات شعر بس على قدى كده و بكتب زى خواطر كده و اخيرا بكتب فى السياسه
- نفسى ايه لمصر نفسى حاجات كتير اوى نفسى مصر ترجع تانى رائده بجد فى كل حاجه نفسى يرجع تانى الجامع الازهر مناره العلم فى العالم كله نفسى علماء مصر يعملوا ابحاثهم و اكتشافتهم هنا مش فى اى بلد تانيه نفسى نحب بلدنا اوى و نخاف عليها و نعليها نفسى يكون فى مشاريع كتير اوى فى البلد يشارك فيها كل مصرى صغير او كبير نفسى نهتم بالصناعه اوى و ترجع منتجتنا تنافس فى الاسواق العالميه و نهتم بالزراعه كمان و منتجاتنا الزراعيه ترجع تنافس برضو فى الاسواق العالميه نفسى اشوف مصر فى يوم من الايام بتقود العالم كله نفسى تنتهى التدخلات الامريكيه و الاوروبيه فى شؤنا الداخليه و طبعا نفسى نحسن علاقتنا بالدول العربيه اللى تقريبا نهاها مبارك و اكتر حاجه نفسى فيها هى اننا نرجع كرامة المصرى تانى فى بلده قبل ما نرجعها بره بلده كرامته و احترامه لنفسه قبل احترامه لغيرة و نرجع كرامة المصريين بره فى اى حته فيها مصريين بيشتغلوا فيها يتعاملوا معامله كويسه و كريمه نفسى نقضى ع العشوائيات و نبنيها مناطق صالحه للاستخدام الادمى نفسى نقضى ع البطاله فى مصر نفسى نشارك كلنا فى القضاء على الفقر و الجهل و الاميه نفسى مصر ترجع مصر
الباشمهندسة منذ 9 عام
لأ دا انتي ماشاء الله شديدة قوي لازم الواحد بقي يفكر بتمعن قبل ما يسالك .... استني علي الكرسي حبة اروح ارتبلك سؤالين واجي 😞
زغباوية منذ 9 عام
بسم الله ماشاء الله ....ربنا يوفقك يالولو.
ايه اللى عجبك فى الجمعية الخيرية علشان تطوعي فيها وايه اللى شايفاه ناقص لهم ؟؟؟؟
لولو الزغبى منذ 9 عام
انا اصلا بحب اوى اشارك فى الاطعام مثلا او فى اى نشاط خيرى يساعد الناس فلقيت ان اشتراكى فى جمعيه خيريه بتشارك فى مجالات كتير و ليها انشطه كتير هيوفرلى اللى انا عاوزاه فاشتركت فى الجمعيه و الحمد لله شغاله معاهم كويس
اللى شايفاه ناقص للجمعيه لا يعنى الحمد لله فى ناس بتتطوع فى الجمعيه و ناس بتتبرع كتير و ناس الحمد لله بتبقى متعاونه معانا و مؤمنه بينا لحد كبير اوى بس اكيد طبعا عاوزين تعاون اكتر و تعاطف اكتر
زغباوية منذ 9 عام
😞 حيرتينى يالولو مش عارفة اسالك ايه تاني:(
بدعي بس ان الزغباوية الصغار يطلعوا زى الزغباوية الكبار وربنا يوفقكم ويهديكم ويصلح لكم الحال
لولو الزغبى منذ 9 عام
ربنا يخليكى يا طنط شكرا 😞
الباشمهندسة منذ 9 عام
ايه رايك في شباب وشبات جيلكم الحالي وتصرفاتهم ايه اللي بيضايقك او يعجبك منها وكمان ايه رايك في ازواق اللبس اللي في السوق حاليا
لولو الزغبى منذ 9 عام
رأيي فى شباب و شبات جيلى الحالى
هو طبعا الانفتاح و عصر التكنولوجيا و النت و الفيس بوك اللى موجودين دلوقتى مهواش وحش بس يمكن بيدى فرصه للناس انها تعرف بعض و تكلم بعض و بالتأكيد فى ناس من جيلى بيستخدموا دا غلط جداا او بيفهوا عدم الرقابه و الانفتاح دا بشكل خاطأ جدا و بيرتكبوا اخطاء بالتأكيد و يمكن جيلى الحالى دماغه مش مفيده شويه او مش عارفين يوظفوا دماغهم كويس يعنى بكل صراحه ساعات بحس ان فى شباب و شبات من جيلى دماغهم فاضيه مش مهتمين بحاجه خالص دماغهم فى الخروج و السهر و النت و برامج المسابقات و مسلسل فاطمه اللى هبل البنات دا يعنى جيل مالى دماغه بحاجات فاضيه بس انا برضو بأكد ان الجيل دا لو اتوظف كويس هينتج حاجه و اللى بيضايقنى طبعا الانفتاح اللى بدون روابط و فهم الحريه الخاطىء و الاستخدام الخاطىء برضو ليها
لولو الزغبى منذ 9 عام
رأيي فى ازواق اللبس
و الله هو فى لبس محترم وشيك و حلو و برضو فى لبس مش محترم فى السوق موجود الاتنين الفكره بقى فى الاختيار انتى تختارى لبس شكله عامل ازاى محترم او لا و دا من وجهه نظرى بيرجع للتربيه و قناعه الشخص بنفسه يعنى انا مقتنعه باللى باشتريه ولا لا شايفه ان اللبس دا مناسب لتربيتى و مجتمعى و دينى ولا لا و اكيد بعمل حساب دا و انا بختار و فى ناس مبتعملش حساب لحاجه و بتلبس اللى عاجبها و خلاص حتى دون ان تنظر لقواعد مجتمعها
safaa منذ 8 عام
السلام عليكم
يالا قولنا على ال cv بتاعتك وايه حلمك اللى عاوز تحققة
Ahmed Hussien منذ 8 عام
احمد حسين.. مهندس كهرباء شعبة الكترونيات صناعية و تحكم اتخرجت عام 2012، و ان شاء الله داخل الجيش قريب 😞
نفسي بعد فترة الجيش اكمل في مجال الميكاترونك، و بحلم اني اسافر المانيا
safaa منذ 8 عام
اهلا بك معانا ياباشمهندس وان شاء الله ربنا يحقق لك امالك
safaa منذ 8 عام
ايه رأيك فى موقع زيدونى وفى المواضيع التى يكتبهاالاعضاء
Ahmed Hussien منذ 8 عام
شكرا لحضرتك ربنا يخليكي و انا سعيد اني موجود معاكم 😞

موقع زيدوني موقع مفيد جدا و عمل رائع من البشمهندس محمد ويستحق الإحترام،و إن شاء الله الموقع من تقدم إلى تقدم.. و معظم المواضيع و المشاركات باستفيد منهابصورة مباشرة او غير مباشرة لأنها بتخليني أبحث عن المعلومة.. و هكذا تنتشر المعرفة
safaa منذ 8 عام
😞 هو فعلا موقع مفيد ورائع طول مافي شباب مخلصة ومحترمة وبتحب تنشر كل ماهو مفيد للاخرين وطبعا انت منهم
Ahmed Hussien منذ 8 عام
شكرا جدا لحضرتك، وسعيد جدا بالكلام ده 😞 و بصراحة كل الأعضاء في الموقع ناس محترمة جدا و مشجعين ايجابين جدا
safaa منذ 8 عام
أشكرك وانا بس بسخن لحد الشباب ماتدخل الموقع ويشتركوا فى الاسئلة
Ahmed Hussien منذ 8 عام
ان شاء الله منتظر كل الأسئلة
safaa منذ 8 عام
باذن الله
شيماء مصطفي منذ 8 عام
ايه هي هواياتك المفضلة ؟
Ahmed Hussien منذ 8 عام
بحب دخول المطبخ جدا.. غريبة ؟! 😃
زغباوية منذ 8 عام
ههههههههههه جميل بتحب تدخل وتخرج على طول ولا بتحب تطبخ ايه؟؟؟؟
ولماذا المانيا بالذات؟؟؟
Ahmed Hussien منذ 8 عام
بتطبخ على قدي 😃 اكتر حاجة باعرف اعملها الإسباجتي باللحمة المفرومة و صلصلة الطماطم
Ahmed Hussien منذ 8 عام
المانيا متقدمة جدا في مجال الـAutomation والـmechatronics و مجالات تانيه كتير.. و إن شاء الله انا عاوز اكمل في المجال ده
زغباوية منذ 8 عام
كويس لما نفتح مطعم زيدوني اكيد هانستعين بيك 😃
ربنا يوفقك ويحقق لك احلامك واكثر
زغباوية منذ 8 عام
بتحب تقرا؟؟؟ وايه؟؟؟ ولماذا؟
Ahmed Hussien منذ 8 عام
نعم بحب القراءة.. مش حاجة محددة بس بحب كتب التاريخ، علشان بشوف الانسان كان فين و بقى فين و كمان الروايات ممتعة برضو
MaDa منذ 8 عام
السلام عليكم 😞 هنسخن بسؤالين ع الماشي كده 😃
1 - متجوز ولا لسه - الحمد لله - على البر 😃 وهل بتفكر في الموضوع ده دلوقتي ولا شغلك ومستقبلك واخدين كل تفكيرك ؟

2 - بأمانة شديدة هل لديك أي حماس للعمل داخل مصر في مجالك لو سنحت ليك الفرصة وترفض أي إغراءات برة مصر ولا مش هتتنازل عن السفر ؟
Ahmed Hussien منذ 8 عام
1- لا يا Mada مش متجوز - الحمد لله :D- لسه على البر، بس على فكرة الجواز مش بيعطلك عن مستقبلك.. و فعلا الفترة دي انا بخطط للمستقبل و خصوصا اني داخل الجيش 😃

2- انا كنت اقصد بالسفر اني ادرس و احصل على شهادة في تخصصي، انما ان مش هشتغل بره مصر و ده قرار نهائي بالنسبة لي و على فكرة الشغل في مصر في بعض الشركات الكبيرة بيتيح لك الفرصة انك تسافر خارج و مصر و ترجع تاني
أحمد سمير منذ 8 عام
سؤال للباشمهندس أحمد
إيه هى نقطه ضعفك؟ فلوس؟ ستات؟ منصب؟ عربيات؟ علم؟
أو أى حاجه تانيه انت شايف إنك ضعيف قدامها
Ahmed Hussien منذ 8 عام
نقطة ضعفي الانترنت.. بقعد قدامه بالساعات و بحاول كل شوية اقوم من قدام الكمبيوتر بس برجع تاني بسرعة 😃
safaa منذ 8 عام
😞 وعلشان النقطة دى بالذات أقرأ المقالة دى : إرشادات لمدمني الكومبيوتر
Ahmed Hussien منذ 8 عام
شكـــــــراً 😞
شيماء مصطفي منذ 8 عام
شايف نفسك إزاي ؟يعني ايه اللي بتحبه ف نفسك ؟وايه اللي نفسك تغيره فيها ؟
Ahmed Hussien منذ 8 عام
انا بحب اني باستمرار بفضل الاعتماد على نفسي في اي موقف،، اما اللى نفسي اغيره هو العصبية علشان بتخليني افقد التركيز
زغباوية منذ 8 عام
لو توصلت لعلاج العصبية قولي:)
Ahmed Hussien منذ 8 عام
ان شاء الله 😃
شيماء مصطفي منذ 8 عام
Ahmed Hussien منذ 8 عام
شكـــــــــرا جدا يا شيماء 😞
زغباوية منذ 8 عام
شكرا ياشيماء
safaa منذ 8 عام
تحب مين يقعد مكانك على الكرسى ياباشمهندس ..يالا اختار ولو ان اغلب الاعضاء مش بيدخلوا كتير من اللى بيحصل فى البلد اليومين دول 🙂
شيماء مصطفي منذ 8 عام
عــفــواً.
زغباوية منذ 8 عام
قبل ماتقوم من على الكرسي:
- لو لم تكن مهندسا ماذا كنت تحب ان تكون !!ولماذا! ولو انى اعرف ان الهندسة بالذات لابد وان تكون حاببها وما ينفعش تدخل غيرها

- لو لم تكن مصريا لوددت ان تكون .......(اكمل)

- ايه رايك فى اللى بيحصل فى مصر اليومين دول وايه الحل!!!

- ايه السؤال اللى كنت متوقع ان نا نسأله ولم نسأله
mora منذ 8 عام
عن نفسى هغير النمط واقولك ربنا يوفقك فى حياتك وتحقق كل اللى نفسك فيه ان شاء الله
Ahmed Hussien منذ 8 عام
اولا اسف على التأخير في الرد.. غصب عني كنت مسافر، فارجو المعذرة 😞

@safaa: يعني مفيش حد معين.. بس اخر تعليق كان من mora فيبقى مبروك عليه القعدة على الكرسي 😃

@زغباوية:
-هو فعلا انا من اللى اخترت مجال الهندسة بإرادة تامة،،، بس سعات بتخيل نفسي شيف لأني بحب احضر الأكل جدا 😃

-لو لم أكن مصريا لوددت أن أكون مصـــريا 😞

-باختصار.. عقلية ادارة البلد لم تتغير، و الحل التوافق + عدالة انتقالية + تخطيط سليم(تحت سليم 100 خط).

-مفيش الصراحة مكنتش متوقع اي اسئلة

@mora: شكرا ليك و انا ايضا اتمنالك كل الخير
zedony.com - A mmonem.com production. Privacy Policy