عدنا مع ... مين اللي هيقعد على كرسي الاعتراف .. الآن مع الضحية العشرين ..المهندس/ Ahmed Hussien

يارب اوعدنا بزيارة الكعبة

سؤال آخر :
لو حد انتقد حضرتك بشدة سواء أكان نقد موضوعي وفي محله او نقد ظالم .. بتتعامل ازاي في الموقفين ؟؟ وهل بتتقبل فكرة النقد من الآخرين عموما ؟

وعلى فكرة ماما اللي قالتلي ان حضرتك كنت اول المحافظة في الإعدادية

فعلا يامادا وانا عندى المجلة محتفظة بيها حتى الان ...دا غير انه اول واحد يبتكر برنامج لمكافحة فيروس (تشرنوبل) ودى مكتوبة فى مجلة نصف الدنيا يوم الاحد 23 مايو 1999 العدد484

بسم الله ما شاء الله .. عقبال ما يشوف ولاده ونشوف أولادنا زيه كده ان شاء الله

سؤال كمان
هل تجد أهمية لفرق العمر بين الزوجين بحيث يكون الزوج اكبر سنا عن الزوجة ؟؟ ولماذا ؟؟

هو انا ها اطلب منك طلب يا باشمهندس انا مش هطلب منك صورة الشيت بتاع الاكسل ,لكن ها اطلب منك طلب خاص لاخوك اية هيا المعاير المطلوبة وعلى اى اساس وزنت المعاير

فكرتني بالذكريات الجميلة وخصوصامن واحنا صغيرين وايام الشيت وايام تجهيز الموقع
طيب هل استفدت معرفيا حاجات جديدة ومهمة من مواضيع الموقع ؟

@MaDa
أنا أكثر واحد ممكن يتقبل النقد لأني بحب أراجع نفسي على طول ودايما أول حاجة بتيجي في دماغي إن النقد ده في محله إلى أن يثبت العكس ... وللأسف حاجات وحقوق كثير ضاعت مني بسبب الموضوع ده ... بس الحمد لله طبعا

@MaDa
مش أنا المناسب للسؤال ده لكن أعتقد ان الموضوع موضوع تقبل اجتماعي ليس إلا ... كمان هل الراجل والست لما يبقو عندهم 50 سنة هم الإثنين مثلا ... عينيه مش هتروح هنا ولا هنا مثلا

@shady
انت ادتني عنوان هايل لموضوع حابب أتكلم فيه جدا ... هحاول أفتكر أنا كتبت إيه في الشيت وهضيف بعض نتائج الخبرات المكتسبة كمان

@زغباوية
بإعتبار إني على كرسي الإعتراف أنا للأسف هعترف بشيئ مش كويس ... أي مشاركة طويلة مبقرأهاش كلها ... وبدوس +1 طالما مفيهاش هلس مباشر أو هجس ... في الأول كان نوع من جبر الخواطر لكن دلوقتي لازم أكون عادل وأدوس +1

طبعا أنا عرفت حاجات كثير لكن مفيش حاجة معينة في دماغي دلوقتي لكن أنا مثلا عجبتني جدا القصة دي:
وضَعت الكاميرات في بيتها فانظروا ماذا حدث -- قصة حقيقية --
ودي اللي خلتني أفكر في موضوع المسابقات

إيه ... مش كفاية كده؟ انتو استحليتوها؟ فين الأستاذ اللي هيختار حد تاني؟

لسة شوية في ناس مسألتش .. وبعدين حضرتك اللي هتختار اللي هيقعد بعدك

سؤالي بقى : لو قدام حضرتك فرصة عمل في الخارج تسافر ولا تفضل هنا في مصر ؟

لو عندي زنقة جامدة للمال هسافر لمدة وجيزة ومحدودة ... بس أنا أساسا مبفضلش أشتغل نظير راتب ... بحب الحرية ... بحبها قوي قوي قوي ... نفسي فيها بقى

كفاية يامادا فى ناس كتير عاوزين يقعدوا على الكرسى
يالا شوفوا مين

لاء ياريس مش تقوم لسه هنسأل

حاسس بحضرتك ويارب تنولها يارب

ما هي الطريقة المثلى من وجهة نظر حضرتك لتحصيل المعرفة

القراءة في نفس الموضوع والمواضيع اللي حواليها من مصادر متنوعة والتجربة العملية كلما أمكن ذلك ... تدبر المعاني الفيزيائية للمعادلات في الرياضيات والفيزياء إلخ إلخ إلخ وتطبيقها على كل شيئ ممكن حولك

انتم كلكم عليه ولا ايه

هو احنا عندنا كام ريس يا طنط لحد دلوقتي هو واحد بس

ايه علاقة حضرتك بالرياضة سواء تشجيع او ممارسة .. وهل بتشجع اولادك على ممارسة الرياضة منذ الصغر ولا لا ؟؟

علاقتي بالرياضة لا تتعدى علاقة التقدير ... أنا بقدر الرياضة ... ولا أمارسها ... أحب وأشجع أولادي عليها طبعا ولكن مبحبش مشاوير النادي والإلتزام بالتدريبات وكده ... أجيب وقت منين يا أخواننا؟!

علاقة حضرتك بالسياسة .. فكرك .. انتماءك .. دورك ومشاركتك ؟؟

علاقتي بالسياسة علاقة حب من بعيد لبعيد ... يعني أنا جوايا سياسة نار ... بتستوي وهتطلع كمان كام سنة كده ان شاء الله ... ليس لي أي إنتماءات سياسية وفكري في السياسة إني ميصحش حد يبقى له إنتماء سياسي ... حاجة كده ملعوبة بس في وقتها إن شاء الله

ياااااااااه .... كل ده حصل في اليومين اللي فاتو طيب اسألك في ايه بقي .... دول ماخلوش حاجة ليا خالص

انفد بجلدك بقي واختار حد تاني يقعد مكانك

فرحنا جدا جدا بوجودك معانا ياريس وعايزة اعرف اخر حاجة احساسك وانت قاعد على الكرسي ايه؟

القدوة .. عايز حضرتك تكلمنا عن الأشخاص اللي اتخذتهم قدوة في حياتك وأثروا في حضرتك ازاي ؟؟

@زغباوية
حاسس إني جات لي الفرصة لأول مرة وعرفت أفتح قلبي وأقول كلام طول عمره نفسه يطلع لكن مفيش فرص للأسف ... لسة عندي كلام كثير وأفكار لكتب هألفها إن شاء الله لما أحس بشوية فراغ إن شاء الله

@MaDa
موضوع القدوة دعه يا إما معملش معايا شغل ... أو مش فاكر.

لكن بالعكس ... كوني أكبر إخواتي كان بيزود عليا شوية موضوع إني أخلي بالي من تصرفاتي بشكل أكبر من العادي شوية ... قبقت عادة ولحد دلوقتي كمان

كمدير للموقع كلمة توجهها لاعضاء الموقع قبل ماتقوم من على الكرسي

أحب أقول:
أتقو الله فيا وساعدوني شوية

حاضر من عنيا بس انت قول ايه اللى عاوزه بالظبط غير الاساسي اللى بنعمله

عايز حضرتك توصف كل واحد من اخواتك زي ما بتشوفه دايما

حلو السؤال ده جاوب بقى ياريس

تليفونات بقى ... كفاية بقى ... حرام!

يلا جاوب يا بشمهندس :D:D

سؤال لكل اللي موجودين .. دلوقتي بقى انا مش عامل اللعبة دي مجانا .. في 11 ضحية كل ضحية ب +1 والمقال تقييمه 8 بس .. عايز حقيييييييييييييييي :D:D:D

+1

قفشتك يا شادي

انت تعرف لو مقال او فيديو اكيد كان زمانى زودتك من زمان لكن اللعبة دى بتخليك مركز فيها بغض النظر عن موضوع التقيم

انا بهزر يا شادي وبراحتك يا كبير

بردو انا مش موجودة هييييييييييييييييييييييية

متستعجليش انتي اللي جاية على فكرة :P:P

انتهى الموضوع ... تم اختيار yara

على فكرة يا بشمهندس من شروط اللعبة ان اللي قاعد مينزلش من على الكرسي الا لما يجاوب كل الأسئلة وحضرتك مجوبتش على سؤالي .. جاوب وبعدين هنقعد يارا

السؤال تاني .. عايز حضرتك توصفلنا اخواتك كلهم زي ما بتشوفهم دايما

أساسا أنا مبسبش تخيل لحد زي كده في دماغي ... ثم أنا مبتكلمش على حد وهو مش موجود ... ده ردي ... اللي بعده

هههههههههههههههههههههههههههه مشاي يا بشمهندس خلاص :D:D

ماشي*

يلا يا يارا بيتك ومطرحك .. داحنا هنوضبوكي نيها نيهاهاهاهاهاهاهاهاهاها :D:D:D

يالا ياجميلة انتى اقعدى وقولى لنا ال cv بتاعتك

اهلا ياشابة منورة الكرسي
عايزة تحققي ايه فى حياتك يعنى احلامك ايه؟؟؟؟؟

ايه اصعب موقف عشتيه واطرف موقف واهيف موقف وموقف بتتمني يحصلك ؟ :D:D

اية الحاجة اللى بتكرهيها فى حياتك , بصفة عامة وشاملة

طبعا من الواضح ان يارا بتتهرب بس علي مين يلا شباب ... مطاردة ... هجوم ... كتفوها :D:D

لو تقدملك واحد وعايز يتجوز في شهر ويسافر للعمل بالخارج وهو انسان كويس وفيه قبول هل توافقي تسافري وتسيبي اهلك ولا ترفضيه علي الرغم من اته كويس .... هل البلد اللي رايحها ممكن تأثر في قرارك يعني لو مثلا امريكا اكيد مش زي قنا

سؤال زغباوية -- انا احلامى كلها انى اعيش فى امان وسلام وحب مش عاوزة حد يكرهنىولا حد يقول عليا كلمة وحشة نفسى احس ان مصر دى هية تركيا بجمالها ونظافتها وكل حاجة نفسى اخل ف اطفال واحفظهم القران الككريم كللللللللللللللللللللللللة ويبقوا متفوقين ونفسى فعربية هامر:-P

مادا بقا -- كل دى اسئلة خف عليا شوييييييييية اصع موقف عشتة لما واحد هجم عليا وحاول يغتصبنى بس الحمد للة ملمسش منى شعرة بس لمس ايدى لان فى راجل جة فلحظتهااااااااااا وانقذنى منة اينعم دماغة اتفتحت بس انقذنى ربنا يخليية
واظرف موقف لما كنت شتم واحد والحمد للة لقتة فوشة وخسرنا بعض هههههههههههههههههههههههههه
واهيف موقف لما عكملت محشى ونسيت احط شوربة واتحرررررررررررررررررررررررررررررررررررررررررررررررررررررررررق واتحرق (قلبى ) معاة اهئ اهئ
*
موقف بتمنى يحصلى انى اقابل واحد واحبة من اول نظرة بس ( حب محترم) وحط تحتها مليون خط يا دودو اى خدمة انت تؤمرنى بس

سئال بشمهندسة قلبى وحببتى --ممكن اوافق طلما انسان كويس مش هقول لا بالعكس هساعدة وهقف جنبة اكيييييد
لا مفيش حاجة ممكن تاثر فيا طول مانا مع ربنا وبفكر صح وحاطة دينى واهلى ادامى

ربنا ياخده وياخد كل اللي زيه:-) ياترى يايارا بتتقبلي النقد وبتتصرفي أزاي لونقد مش عجبك؟

ايون بقبل النقد طبعا بس بزعل بصرحة سعات بس بردو مش بجرح الى قدامى عشان ميبقاش فى بينا زعل او كدة بس طلما النقد صح بحا ول اغير من نفسى والله

مش من عادتى اسئل السؤال ده علشان العضو براحته حابب يقول يقول مش حابب له كل الحرية

فين الCV بقى؟؟؟

انا يا ستى اسمى يارا البارودى عندى 18 سنة بلعب تنس واخدت بطولات وصوتى حلو بعرف اغنى
وبكتب شعر زى ما انتى عارفة وفكلية فنون تطبيقية وعندى اخ واخت ضغننين يعنى اناالكبيرة و بابايا نائب مدير عام فجرنال الاهرام وكدة يعنىىىىىىىىىىىىىى

جميل جدا انك بتلعبي رياضة وياريت تستمري عليها بس هو فيه تنس في القليوبية ولا انا قديمة اوى

بجد اصيلة يايارا

فى طبعا لحد دلوقتى فى نادى الشباب دا والى بيجى يدرب واحد من بنها ومتمكنننننننننن

اوكيه هاحاول اجرب اتدرب عليه واسال في النادي عندنا
اختارتى كليتك ازاى عن حب ولا التنسيق

عن حب انا اصلا 92 % ملحقتش ولا هنسة ولا حتى فنون تطبيقية وجالى تجارة بنها وانا اصلا كنت هموت على فنون تطبيقية وتعبت اوى فبابا دخلهالى خاص فى جامعة 6 اكتوبر بس الكلية مش المعهد اسمهاcollege of applied arts 6-october uni.بس يا حببتى ملحقتهاش على 1 % لما كنت هتجنن وانا عملى رياضة اصلا

بما أنك بقى حبيبتي وطلعنا بنات كليه واحدة عامله أيه بعد أول كام يوم دراسه؟وأيه أنطباعك على مواد الكليه ودكاترتها؟وياترى مبسوطة أنك دخلتيها؟

يالهووووووووووووى انا لسة مدخلتش دا يوم الحد لسة كل الجامعت داخلة يوم 1-10 يا بنتى ههههه

هو مين بيسأل مييييين؟:-Pعموما أيوه كنت ساكنة في أكتوبر وكليتي كانت فنون تطبيقية اللي في القاهرة بس المواد الدراسية والدكاتره هما هما؟هنا وفي اكتوبر بس جاوبي برضه حتى لوداخله يوم بيبان يايارا؟

لسة مدخلتش والله خالص هدخل يوم الاحد الجاىى

طيب الغي السؤال ولو عايزة مساعده انا موجوده،عندك اخوات؟

اة يا قطتى عندى اخ ف 1 ثانوى واخت ف 5 ابتدائى

على فكرة يا يارا انا سئلتك سؤال وانتى ما رضتيش عليا ردى على السؤال يا يارا

معلش يا شادى انا متاسفة ماخدتش بالى
والاجابة --- بكرة الكدب اوى ومتاكدة وواثقة ان اى حاجة بتتبنى على الكدب بتنتهى مهما طال الزمن علشان كدة مش بكدب ابدااااااااااااااااااا وبكرة الخيانة بردو بما تحملة الكمة من معانى..... بس يا سيدى

من الاجابات استنتجت انك عايشة في القليوبية ....صح

هل كنتي تتمني انك تعيشي في بلد تانية او في القاهرة او الاسكندرية العواصم الشديدة دي ولا مبسوطة وراضية بيها ؟

بصراحة انا بعشق اسكندرية عشق ملوش حدود وعارفة كل حتة فيها االبراهيمية والشاطبى والمعمورة حبيبتى والمنتزة والرمل والمنشية وخالد وبحرى وكل الحتت دى حفظاها بشوارعها الداخلية بكل حاجة فيها وبتمنى اعيش فيها ولو فى اوضة وصالة ..... وفى نفس الوقت بحب بنها اوى وبشتقلها والله حتى لما كنت فشرام الشيخ كانت وحشانى اوى ونفسى ارجع وامشى فى الشارع واشوف الناس وكدة وعمرى ما استعريت انى بنهاوية او استقللت بيها لااااااااا بالعكس دنا اى حد فى اليكس بيسالنى مبقولش من القاهرة بقول من بنها

برافو عليكى يا يارا دى بنها بقت تحفة على فكرة كليتى كانت فيها بس بصراحة بنها احلوت اكير من الاول

انا بعشق حاجة اسمها بنها
طيب سؤال كمان : لو صديقة ليكي طلبت منك مساعدة وانتي ياعدتيها وبعد كده اكتشفتي انها كدبت عليكي .. وانتي اصلا عشان تساعديها كدبتي في البيت وبسببها حصلتلك مشكلة .. هتتصرفي ازاي معاها ومعاهم في البيت :D؟؟

*ساعدتيها

بنها العسل
مين اللي ما يحبش بنها
فعلا يا يارا (اي نعم انا جاية متأخر) بس فعلا بنها من الاماكن اللي تتحب وحبنا لها مش لانها مكان جميل لأ ده لانها بلدنا اللي اتولدنا فيها واتربينا فيها ولنا فيها ذكريات جميلة
ومتهيقلي ان كل انسان مسقط رأسه زي ما بيقولوا هي احب بلد ليه
السؤاااااااااااال بقى انت بإذن الله لما تتأهلي وتتجوزي تحبي تتجوزي في بنها ولا براها
لاني اعرف بنات كتير كان شرط جوازهم انهم يكونوا بره بنها

الاهل الاصحاب البلد الحياه بصفة عامة ايه اكتر حاجة اثرت فيكى وايه مدلول كل كلمة بالنسبة لك
وبتطبقى سياسة الاخت الكبيرة على اخواتك ولا ايه

فينيك يايارا نمتي علي الكرسي ولا عشان الدراسة...معلش اختاري حد بعدك .... بيني وبنيك كدا وماتقليلهاش فيه عندك الاستاذة هي اللي دخلت في مقاله كرسي الاعتراف ولسه ماقعديتش عليه ...

خدي ربع جنيه وسبيني في حالي يا باشمهندسة
هوانتي ماعندكيش اخوات بلاستيك ولا ايه؟

على فكرة الكرسى جميل ومرييييح جدا يااستاذة اميرة.. اقعدى عليه وانتى تشوفى بنفسك يالا اوعى تكسلى

يالا يااستاذة هاتستريحي اوى مستنيينك
يالا قوليلنا ايه الحلم اللى لسة ماحققتيهوش

في الحقيقة انا مليش اخوات بنات بس كل عضوات الموقع بحبهم زي اخواتي .... دانا بخدمك عشان تقولي كل اللي نفسك فيه من غير قيود ... مستنينيك بقي

امري لله طالما ان كلكم علي
بس رفقا بالقوارير
يعني بالراحة عليا دانا غلبااااااااااااااان

الحلم اللي لسه ما حققتهوش ويارب يارب يارب يتحقق
اني اشوف ولادي زي مابحلم وفي احسن الاخلاق والمراكز
آآآآآآآآآآآمين
ده بالنسبة لولادي وبالنسبة لي وبكل صراحة الحلم اللي ماحققتهوش اني اخس والنبي

عايزين Cv عشان اللي مش عارفين حضرتك

الاسم/امــينة
والشهرة/اميرة
متزوجة وعندي 3 اولاد
ندى-9
محمد-7
منة اخر العنقود-4
مدرسة (استاذة)رياضيات ع
مواليد 1/11/1973
رقم 2 في اخواتي ماحنا 4 اخت اكبر مني واخين اصغر مني
معرفتي بالموقع ان tfatifi اخت الريس تبقى زوجة اخويا يعني انا عمتها

اهو عرفتو كل حاجة مش كفاية كده وانزل بقى
علشان غيري ياخد فرصته

انتى احلى عمة فى الدنيا يامرمر..وربنا يخليكم لبعض

يا هلا يا هلا بالاستاذة اخيرا منورة والله

يا ترى بتحبى مهنة التدريس ولا ايه وبتقعدى تذاكرى مع اولادك ولا باب النجار مخلع واصلا بتلاقى وقت ليهم وللبيت وللشغل

بلاحظ إنك بتجمعي قصص كتير حلوه إنتي بتحبي القراءة وخصوصا القصص والقراءه من هواياتك وكمان حابه أعرف هواياتك المفضله؟وإيه حاجة شدتك وقريبه من نفسك في الموقع؟:-(

ربنا يحققك كل اللى بتتمنيه
ايه اللى فادك من اشتراكك فى زيدوني

للاسف بحبها جدا وخصوصا الرياضيات بحس ان فيها نوع من التحدي مع الذكاء
بس برده للاسف الطلبة مش مديين فرصة للواحد لان المعلومات عارفينها قبل كده من الدروس الخصوصية فمعلوماتي بالنسبة لهم قديمة لكن الجديد معاهم التمارين اللي ما اخدوهاش بتبقى في ملعبي لاني بحس فيها اني بفيدهم وبياخدوا معلومة جديدة

طبعا بذاكر مع اولادي على قد ما اقدر لانهم لغات وانا في الانجليزي فظيعة مش عايزة اقول يعني من الاخر بتعلمه معاهم وبالنسبة للوقت فمعظمه لهم ولكن الشغل والاولاد جاي على حساب البيت شوية
وعلشان كده عملت في شغلي اجازة نصف اجر علشان اظبط الدنيا اللي تاهت عندي

انا بحب قرأة القصص جدا وخصوصااااااااا قصص الاطفال بموت فيها بشتريها لاولادي علشان انا اقرأها
بحس ان في القصص مواعظ وحكم ومعاني كتيرة مفتقدينها في حياتنا وفي قصص كتير اثرت في وفي تفكيري للامور بطريقة افضل ووضحت لي حاجات كتير كانت ملخبطة عندي
بصراحة هوايتي وانا صغيرة كانت جمع العملات ولسه الى الان بجمعها لو صادفت
لكن هوايتي دلوقتي هي المطبخ بحب اخترع اكلات بطريقتي وأألفها والحمد لله معظمها ان ماكنش كلها بتتطلع جميلة بس للاسف ماليش في الحلويات الشرقية
لكن مع مذاكرة العيال وواجباتهم اللي ياعيني عليهم ما بتخلصش مابقتش لاقيه وقت لي في حياتي
ياللا اهو كله علشان مصر تعيش

طيب بمناسبة إنك مدرسه عندك كام تلميذ في فصلك؟ولوكانوا كتير بتتصرفي إزاي؟وإيه رأيك في الرأي اللي بيقول أركز مع 7من النوابغ ولايضيع تركيزي مع الفصل كله ومايطلعش حد متفوق؟

آمين يا رب العالمين
فادني كتير اولا في القصص اللي انا بنزلها وفي الاسئلة اللي ماكنتش تخطر على بال حد يسألها ومع انها موجودة في عقول معظمنا واجابات هذه الاسئلة والمواضيع الجميلة اللي استفدت من معظمها
وثانيا وهو اهم حاجة استفدها ان بقى لي ناس كتير اعرفهم وبحبهم في الموقع حتى من غير ما اعرف شكلهم بسبب التواصل اللي موجود في زيدوني

عندي في كل فصل 30 طالب لان مدرستنا رياضية ودي كثافتها ماتزدش عن كده
اما الرأي ده اللي اول مرة اسمعه فامش بحبه ده شعار المدرسين الخصوصين مش شعاري
بالعكس انا لما بشرح لطالب مستواه متوسط او ضعيف والقيه استوعب ومشي معايا في الحل فببقى في قمة سعادتي
لكن في الفصل مااقدرش اركز مع الضعيف بس او المتفوق بس لازم اقسم الوقت على الكل بقدر المستطاع وربنا اللي بيعين ادعولي

يااااااااااااا باشمهندسة يا زنقتيني وخلعتي احب اقولك وبكل ثقة-----------------------------------------------------------------------------------------------كل ســـــــــــــــــنة وشمس طيــــب------------
---وعقـــــــــبال100 سنــــــــــــــة------------

معلش يا مورا نسيت اقولك ميرسي ليكي وده نورك ونور كل اعضاء زيدوني

محجبه ؟ وايه اخبار الطاعات؟ وبتتمنى ايه لزيدونى وللى فى زيدونى؟

اولا يا استاذة انا مخلعتش انا بس مش عايزة اقطع الارزاق وازنق علي الاعضاء التانيين واديكي فرصة تشمي نفسك من طابور الاسئلة دا

ثانيا بشكرك علي التهنئة نيابة عن شمس و Monem كمان

ثالثا احنا كمان سعداء بوجودك معانا في زيدوني

رابعا بما انك مُعلمة ايه رايك في موضوع اعتصام او اضراب المدرسين في الفترة اللي فاتت ويا تري شاركتي فيه ولا لأ ... وليه؟

محجبة من 2/ع والحمد لله ومش متزمدة ولا متفتحة قوي فخير الامور الوسط واهم حاجة ان الانسان يراعي ربه في تصرفاته
اتمنىلزيدوني ان ربنا يبارك فيها وتحقق لصاحبها اللي بيتمناه
اما لاعضاء زيدوني فبتمنى ان ربنا يحقق لهم كل امانيهم ويكونوا في سعادة وهدوء بال

أأأأأأأأأأأأه من الاعتصام ده للاسف اتنفذ بغباء لاني مابحبش حد ياخد حد بذنب حد
لأ انا ماشاركتش فيه لكن مدرسة اولادي شاركت فيه وطبعا فات اسبوع من التدريس فبالتالي كوموا على العيال منهج الاسبوعين في اسبوع
اشارك في ايه يا باشمهندسة دي كانت مهزلة ناس عاملة وناس لأ وفي نفس المدرسة كمان وناس بتشرح وناس لأ
انا عن نفسي اشتغلت من اول يوم مانا قلت قبل كده اني براعي بنا في تصرفاتي واحلل القرش اللي باخده لاولادي
انا مش بقول كده من باب المثالية لأده فعلا اللي حصل وللعلم مدرستنا كلها ماعملتش اعتصامات ولا اضراب وكان رأينا كلنا واحد
وربنا يهدي ويسترها معانا

لو جالك عقد عمل فى الخارج يامرمر تسافرى ولا تقعدى فى بلدك احسن

لما اتكلمت مع زوجي بعد سنة من الزواج وكان معايا ندى لسه مولودة قالي انه ماعندوش مانع وابعتله المرتب اول بأول علشان يتزوج واحدة تربي العيال او البنوتة
فلو كنتي مكاني تعملي ايه يا طنط؟؟؟؟؟؟

انا كده كده مابحبش السفر للعمل اصلي فقر--لاني جربته مع مامتي وبابايا وكنت شايفة تعبهم قد ايه في الوقت اللي معظم الناس كانوا بيتعملوا معاهم على انهم قاعدين في بنك بيصرف لهم كل يوم ملايين ده غير ضريبة الغربا واللي هي الصحة وحرقة الدم والضغط والذي منه
اينعم الحاجات بتيجي لنا واحنا في بلدنا بس برده الاسم في بلدنا مش في الغربة

عندك حق يامرمر ...وعمك عبد المنعم كدة برضة يادوب قعد سنة وماكملش الثانية وزهأ ورجع مع انه كان متدلع جدا هنالك واى طلب منه الشركة تنفذة فورا

بصوا بقى يا اعضاء الموقع
انا خللت من القاعدة على الكرسي
ورجلي وجعتني فكفاية علي كده
وخصوصا ان الكل انشغل في كليته او شغله
ماهي للا سف الاجازة خلصت
انا هانزل بقى

نورتي الكرسي وكان ختامها مسك ... وممكن نبقي نعيد اللعب مرة تانية ومش هتفلتي بسهولة

تعيشي يا باشمهندسة
ولما تيجي الاجازة يبقى يحلها الف حلال
ان شاء الله

اجازة مييييين ... الجمعة والسبت من كل اسبوع ان شاء الله يبقي فيه ضحية

بص يا مادا ة اكييييييييييد هقاطعها وهعاتبها عشان كدة ميرضيش ربنا خالص ومش هساعدها فاى حاجة مهما كانت

مين بس يا يارا اللي زعلك وهاتخصميه كده

ايه دا ... ايه دا ... دا فيه موضوع كبير قوي احكيلنا يا yara واحنا نساعدك تتصرفي بحكمة وبدون تهور ومن غير ماتخصري حد

يا جماعة ده كان رد على سؤال قديم ل MaDa

آآآآآآآآآآآآآه
ده كان سؤال لمادا صفحة 34

نورتينا ياأستاذه،وقلبك أبيض يايارا،ومين هتختاروا يكمل المسيره على الكرسي

اعتقد توتومكس اللى عليها الدور

طب ليه كده

علشان نتعرف عليكى اكتر
وانا هابدأ مش هاسالك عن الcv جايز ماتكونيش حابة تقوليه بس لو عادى مفيش مشكلة
السؤال بقى ايه هى احلامك اللى حققتيها واللى لسة ماحققتيهاش

لسه محققتش اى احلام بس انا نفسى اكمل فى الجامعه واخد الماجيستير والدكتراه بس انا مش فاضيه خالص وطبعا اشوف ولادى احسن اولاد

أو ممكن تكتبي منه اللي يعرفنا عليكي

ممكن ده يتحقق لما اولادك يكبروا شوية وهاتحسي بمتعة كبيرة وانتى بترجعي تدرسي من تاني وتذاكرى مع اولادك وده ممكن يكون حافز كبير ليهم برضوا

اسألى يا لوليتا وانا هجاوبك

منورة الكرسي يا توتو

ايه اللي انتي عاوزة توصليلة بالماجيستير والدكتوراة ... الشغل ولا التدريس ولا العلم ؟

وايه اكتر حاجة استفدتيها من الموقع وايه اكبر عيب شيفاه في الموقع؟

انامش بحب الشغل بصراحه انا عاوزه اكمل عشان العلم نفسه وانا طبعا استفدت حاجات كتير من الموقع المعلومات ثريه وكفايه صحبتكم الحلوه العيب انه لسه محدود بس ده طبعا عيب هيتغير بمرور الوقت

بتنظمى وقتك فى بيتك ازاى ياتوتو ...وايه هى الاولويات عندك

انا مش بشتغل فطبعا الوقت بيبقى كبير مدرسة الاولاد قريبه من البيت بنزل بيهم المدرسه وارجع افطر واقعد شويه اتابع الاخبار واتابع زيدونى واكمل يومى اروق السراير واعمل الاكل وانزل اجيب الاولاد ونعمل الواجبات ونزاكر واليوم بيخلص الاولويات الزوج ثم الاولاد

انا هازود على سؤال الباشمهندسة ايه اكتر حاجة معلقة معاكى او فاكراها دايما او موضوع استفدتي بيه من الموقع سواء موضوع او اجابة او حتى تعليق يعنى حاجة مهمة عرفتيها ومش ناسياها

لا دى حجات كتير ايه اكتبهالك كلها مش ممكن

ماشي ياتوتو طب حاجة واحدة او 2 او حتى 3

http://www.zedony.com/index.php/article/view/id/2195

هاتانى ولا كفايه

لا خلاص كدا حلو اوى

الاول يا جميل توتو مكس دي جاية من ايه؟
والتاني يا جميل برده نفسك تعملي موضوع الماجيسير والدكتوراه عن ايه؟؟؟؟؟؟؟؟؟؟؟؟؟؟

توتو ده اسمى من وانا صغيره بيندهولى بيه فى البيت ومكس من اسم حبيبى وزجى وابو الاود اما عن الماجيستر والنا فى الكليه كنت بحب مادة الاقتصاد جدا فلو اتيحت لى الفرصه هعمل فيها

يارب تحققى كل ماتتمنيه

ربنا يوفقك وتحققي كل اللى نفسك فيه

شكرا جزيلا

سؤالي سهل جدا
ممكن توصفي كل واحد من أفراد أسرتك يعني بابا وماما وإخواتك زي ما انتي دايما بتشوفيهم

ياترى مين ياتوتو اللى هييقعد على الكرسى

الوالد رحمه الله كانت احسن راجل فى الدنيا على الاقل بالنسبه لى وامى ربنا يشفيها ويخليهالى ست عظيمه ربتنا وعلمتنا الاصول والحب والاحترام اما اخواتى دول حبايبى اخين واخت هما كل اللى ليه بحبهم جداااااااا وهما اخدين كل صفات الوالد الصلاه والالتزام وصفات الوالده وربنا يخليهم ليه

عم عبد المنعم ان الاوان

ربنا يخليكوا لبعض ويشفي ماما

نبعتلكوا كلنا رسايل انه يجي عايزينه يعترف

ربنا يخليهالك ويشفيها ويعافيها يارب

الكرسي مستنيك يا عمو .. كل اللي قعد على الكرسي يبعت لعمو عبد المنعم رسالة فيها رابط الكرسي وننشرلله الرابط في مشاركاته .. كلنا وراه لحد ما يقعد على الكرسي :D:D:P

تييت تييت عمو تييت يالله

أول سؤال .. عايز أتعرف لى حضرتك من واقع البطاقة الشخصية والعائلية .. وشجرة العائلة في زيدوني

توتو حبيبتى ...ربنا يبارك فيكم ويشفى ماما ويطمأنك عليها

اللهم امين

معلش ياجماعة عمكم عبد المنعم لسة متأثر بالاحداث اللى حصلت عند ماسبيرو بس بنقووول( الصبر جميل )

يارب البلد تهدى وعبد المنعم يدخل

ههههههههههههههههههه

انا عن نفسي مش عايزة اسأل عمو
انا عايزة اقرأ ردوده بس

ومين سمعك يامرمر انا كمان عاوزة اسمع اجاباتة ...ويمكن وقتها
تطلع الاسئلة لوحدها له من غير ما نفكر...
طيب ممكن نديلة فرصة كمان يومين تلاتة ولو مقعدش...أنا هقعد بدالة
واجاوب

عاوز ايه ياد انت وهى وهو ؟؟؟

وفين الكرسى دا انا مش لاقى حاجة اقعد عليها اصلا ؟؟؟!!!

ايه ده انا مش مصدقة عينيا عمو حن ورد على الشعب العربي
احمدك ياااااا رب

انا اول واحدة هاسألك ايه الحلم اللى انت حلمتوا واتحقق وايه اللى نفسك تحققوا وايه اللى كان نفسك تحققواوماحققتهوش

ياسيدي الكرسي اهو اتفضل اقعد واسترخي خالص



عرفنا بنفسك بقي عايزين C.V تفصيلي

مش لاقى حتة اكتب فيها !!

انت تكتب في أي حته ياكبير منور الكرسي ياعمو

ايوة ايوة هانتلكك بقى مرة مش لاقى كرسي ومرة مفيش مكان ماهو الموضوع كبير اهوه جاوب وبلاش تلاكيك يالا علشان هاتجاوب هاتجاوب

دا حتى الكرسى دا شكلة مريح جدا ....طيب ما انا اقعد علية وخلاص

انا نفسى اكتب والله .. بس مش عارف زز مرتبك .. اول مرة اتحط فى الموكف ده .. احذرونى .. محلش !!! اشوفكم فى فرصة تانية .. بس احصابى تهدى شوية ..

الحمد لله لقيت فرصة .. اعرفكم بى بقى :
عبد المنعم حسين عبد المنعم خضر .. مختصر .. لان الباقى طويل ويتصل بسلالة لها كل التقدير ..
متزوج واعول ..
هواياتى القراءة والنحل واللب الابيض ..
اكلتى المفضلة الملوخية بالارانب او الحمام ورز بالشعرية عليه صلصة البامية بالليمون ..
احب السياسة واعتبر نفسى من المندسين .. ولمل اسمع اسم مصر اعيط على طول ..
احب ام كلثوم القديمة وعبد الوهاب وفيروز وقليل من الاخرين ..
عندى 58 سنة وكنت بالعب كل حاجة وانا صغير وخصوصا الجمباز ..
اتعرفت على احد اسرار اليوجا وانا عندى 30سنة ..

احب البدنجان المخلل والزيتون الاسود الدلع والاخضر الحراق .
اشرب الشاى بالقرنفل او الجنزبيل او الريحان وبعد الاكل لازم الليمون
اشرب ماء كثيرولازم اعمل اى مجهود ميكانيكى يوميا ..

طبعا مريت بالمراحل الطبيعية لنمو الانسان ..والحمد لله عديت المراحل كلها زى الشعرة من العجين ..
احب الحنية واحيانا حب العزيز وبالذات السودانى الاسوانى والكاجو..
بعد اذنكم دلوقت .. عندى حاجة اهم ..

منور ياعدوا بس هاننصب من اولها 58 سنة برضوا ماشي هانعديها:(

1- طيب ايه الحلم اللى لسة ماحققتهوش بالرغم من مرورك بالمراحل الطبيعية لنمو الانسان:( وايه اللى انت حققت
2-عايزين تدينا خلاصة تجربة فى سطرين او اكتر للشباب

تلاقي القلم هو اللى غلط يارنيا متبقيش وحشة كدة

هل انا هافضل اتكلم لوحدى كدا ؟؟ ولا انت تسال وانا اجيب ؟حددوا .. علشان لسه هنبتدى ..اللى كتبته امارح دا مجرد تسخين .. دا انتم هتقروا بلاوى .. ورونى بقى الاسئلة .. بس اعرفوا ان السؤال الهايف هيترد عليه بتهكم ..

طيب اللى يدخل هايسألك وانت تدور على كل الاسئلة وتجاوب عليها
ماجاوبتش على رقم 2

هنا سؤال لعبدو
حاسس انك بعد العمر ده عملت ايه عشان البلد وايه اللي كان نفسك تعملوا وماكنتش قادر بس تقدر تعملو ديلوقتي ... زي مثلا ترشح نفسك عن دائرتك وحاجات زي كدا.... يعني بتفكر تخدم اهلك وناسك ومدينتك ازاي ؟

حضرتك من أكتر الناس المثقفين اللي انا قابلتهم .. وكمان حضرتك حققت معادلة صعبة انك قدرت تواكب العصر وتستخدم التكنولوجيا الحديثة في تحصيل المعرفة ونشر فكرك وثقفاتك وخبرتك .. السؤال بقى : ازاي حضرتك قدرت تحقق ده وهل القراءة كانت السبيل الوحيد وهل فكرت تعلم اللي انت اتعلمته ده للغير وتنقل خبراتك ومعلوماتك دي عشان الكل يستفيد ولا لا ؟

طب بس بعد اذنكم الليلة دى لان ضرسى بيزن ..

ايوة ايوة هانبدأ التلاكيك تاني عموما احنا مستنيينك ماورناش اى حاجة عندك كدا 3 اسئلة ماجاوبتش عليهم

الف سلامة ياعبدو ... منتظرينك لما تخف ان شاء الله

كدا مفيش تلاكيك الموضوع بجد والف سلامة عليك

الف سلامة يا عمو

جميل قوى التواصل الاجتماعى ده .. اشوفكم بعد ساعتين ان شاء الله

ردا على سؤال زغبوبة الاول:
اللى لسه ماحققتوش - ودا تعبير غلط - والصح : ايه الى ربنا عملهولك- .. اللى نفسى انا انا واللى معششة جوايا ان ربنا يرزقنا حجة .. قولى يارزاق يا كريم ..

السؤال التانى : النصيحة الخلاصة صعب تنفيذها على شباب الايام دى.. وهى القراءة .. عمرك سمعتى عن شاب بيقرا اى حاجة ؟؟ لكن انا هاقول اللى كنت باعمله ... قراءة فى جميع افرع العلم والمعرفة .. لتوسيع المدارك والافق الفكرى ولتخليق المنطق الذاتى داخل العقل حتى اتمكن من البعد عن التقليد او التكرار .. يعنى اعمل لنفسى بصمة نفسية ذاتية مختلفة زى ما بصمة الاصبع مختلفة عن كل البصمات .. على ان يصب ذلك فى خانة الايجاب وليس السلب .. يعنى لا اصبح معقدا .. او متكبرا .. او فذلوكا .. بل ان اكون واعيا بمعنى التيقظ الكامل لكل ما افكر فيه او اعمله وان اكون جاهزا بالبدائل المتعددة لكل حالة .. وان اكون سريع الاستجابة بايجابية .. كفاية رغى بقى يا اخى !!!!

اجابة سؤال الباشنهندسة :

حضرتك كل ما اشوف حاجة غلط لازم اصلحها .. كل معلومة خاطئة باصححها ..كل سلوك معوج باضبطه .. كل مفهوم ملتبس باشرحه ..دا اصبح طبعى من زمان قوى .. ودا يفسر لك انى لو اترشحت فى اى حاجة سياسية فالنتيجة واحدة من اتنين : اما يرفدونى واما ادخل السجن
وبيتهيالى ما اهونش عليكى ..


الرد على مادا :اولا كلمة ( تواكب ) ما احبهاش لانها مستهلكة من الحزب المعفن .. ثانيا : حضرتك مفيش حد بيحقق حاجة .. اللى بيحقق ربنا .. وما على الانسان غير انه ينوى باخلاص .. ويحب اللى فى ايده باخلاص وبدون تذمر ولا تافف ولا تكبر ... هل ربنا بيهدى اى حد ؟؟ لا !! لكن بيهدى اللى عاوز يتهدى ..

الشق التانى من سؤالك: طبعا مفيش فرصة قدامى ما اعلمش اى حد فيها .. او اشرح.. او اوعى ..او اعمل بنفسى اى حاجة لاى حد .. او اساعده ..


اديكم شايفين ما اخدتوش فى ايدى نص ساعة ... فين بقى الاسئلة اللى قعدتم تخوفونا منها !!!!

طب خد السؤال المتين ده:
وللا بلاش ... لما أشوفك أحسن

اولا شوفت بقى كنا عايزين نسمع الكلام الحلو والجامد ده
المشكلة انى مش قادرة اجيب اسئلة تكون على اد دماغك العالية دى انت عايز اسئلة من العيار التقيل وانا على ادى بس هاحاول
عارفة انك سافرت كتير استفدت ايه من سفرياتك وايه احسن بلد عشت فيها وبتحبها وليه؟؟؟؟
ناوى تنتخب مين سواء مجلس شعب او رئاسة؟

رد على المدير : انت عاوز تفهم الناس انى ربيتك على القهر ؟ بتسوا سمعتى ؟ ما تسال اللى انت عاوزه احنا ما عندناش حاجة نخاف من نشرها !! ( ايه رايك فى الطلقات السريعة دى ؟)..

اوروبا كلها جميلة .. وكل بلد لها جمال خاص بيها .. وكلها نطيفة .. نطافة تخليكى تحسى ان بلدنا عبارة عن زريبة بهايم قذرة ..الناس برة بتلاقيهم قاعدين على الارصفة تاكل ايس كريم .. الرصيف بيلمع .. حاجة تقرف !!!

مفيش حد يتعالى على حد .. الكل فعلا سواسية كاسنان المشط اللى بنقول عليه فى الاسلام .. احنا شعوب كاذبة ومنافقة ..

كل واحد فى شغله زعيم .. الرئيس زعيم شغله .. الزبال زعيم شغله .. يالهوى على الزبال فى اوروبا !!!

عمال النظافة الداخلية يحترمهم الجميع .. ما شفتش حد بيهين حد .. ولا يكلمه بالاطة .. مفيش كدب .. مفيش غش .. العمال ..حتى الصغيرين منهم كل واحد عنده عجلة وموتوسيكل وعربية ..

ليه بقى دا كله ؟؟ لييييييييه؟؟؟؟ العدالة الاجتماعية !!!!! الحد الادنى والاقصى للاجور : ادمية الانسان وكرامته ..

وجاية تقوليلى انتخابات ؟؟ بلا ستين نيلة ..!!!

لو لقيت شباب من الثوار مرشحين نفسهم هانتخبهم ولو ما لقيتش هابوظصوتى ... لكن للرئاسة هانتخب البرادعى انشاء الله ..

خلاص كفاية عليك كدة ...كتر الف خيرك
هو فى احلى من مصر وشعب مصر ياباشمهندس عبد المنعم...معلش كل واحد حر فى اللى بيقولة...دا كفاية بس ساعةالشدة بيكونوا يد واحدة

خلاص يا عمو كرهتنا في نفسنا
ده كفاية علينا القول المأثور
( ارفع راسك فوق....انت مصري )

شكل الكرسي عجبك صح؟؟؟؟
طيب خد دى
عارفة ان ولادك متربين احسن تربية والكل يشهد لهم بحسن السير والسلوك:D
تنصحنا بإيه في تربية ولادنا وكنت بتعمل ايه مع ولادك وكان عندك اهداف وانت بتربيهم ولا بتعيش اللحظة وخلاص؟؟؟؟

مش فاكرة يارانيا مسلسل يوميات ونيس من اول جزء كانت الاقارب تقول زى بابا مابيعامل اولادة

لا مؤاخذة يا زغبوبة ... ولادكم مش زى ولادنا ..ايامنا مش زى ايامكم .. اكلنا زمان غير اكلنا دلوقت .. صح ؟ ثقافتنا زمان غير فضائيات الايام دى .. ولذلك عليكى الالتزام باقصى درجات الحلم ...

طبعا القعدة على كرسى زى ده والناس كلها بتسال يخللى الانسان يعذر القيادان اللى بتحط على الكرسى غراء !!!

لو حضرتك قابلتك مشكلة كبيرة جدا بتتصرف ازاي .. بتحاول تحلها لوحدك ولا بتلجأ لربنا ثم لأي حد قريب منك ويقدر يساعدك ولا ممكن تستسلم .. عايز أعرف تفكير حضرتك بيبقى إزاي عند مواجهة أي مشكلة ؟
وربنا ميجبش مشاكل أبدا

you are very nice , all of you , i am glad to join this group.

د/دريم مدام علقت على هذا الموضوع يبقى دورك القادم

is it a trick or what? lol