تربية العصافير

بما اني ليا خبرة سابقة حوالي 3 سنين متصلة في موضوع تربية العصافير ممكن ان شاء الله افيدك:

1- اذهبي لمحل حيوانات اليفة وعصافير هتشتري من عندة جوز عصافير ويكون واحد ذكر والاخري انثي عشان ما ينفعش تربي عصفور لوحدة هيبقي حزين وكمان ممكن تتيح ليكي فرصة الفرجة علي مراحل نشأة عصفور جديد نونو من البيضة لحد مايكبر زي ما هيوضح في باقي الاجابة ان شاء الله والتفريق بينهم بيكون سهل عن طريق لون المنقار وطول الديل احيانا لو سألتي البياع يقولك.

2- بتشتري قفص ومسقاة خاصة بالشرب وتجيبي الاكل وهو الدنيبة وهو يعتبر الغذاء الاساسي وكمان حاجة اسمها قشر سمك وبتكون مصدر رئيسي للكالسيوم ليهم.

3- يتم وضع الدينيبة في درج خاص بيها في القفص تقريبا كل يومين او كل ما تقل وتقرّب تخلص وكمان قشر السمك له مشبك حديدي خاص به وبيتم وضع قطة كل اسبوع تقريبا.

4- لابد من النظافة اليومية حيث ان فضلات العصافير بتكون في ارضية القفص ومعظم الاقفاص بيكون ارضيتها جرار بيتم تنظيفها وتركيبها تاني.

5- الافضل ان العصافير تكون في البلكونة لانها بتبعثر الاكل والريش يتساقط علي الارض فبيكون ارضيات البلكونة اسهل في التنظيف ولما يكون الجو ساقع او شتاء بيتم وضع غطاء ثقيل علي القفص من الخارج لحماية العصافير من البرد القارص.

6- لو هتغيري شئ داخل القفص وهتضطري تفتحيه لازم تقفلي باب الغرفة وباب البلكونة او زجاج الشباك عشان العصافير ما تطرش برة في الجو هي هتلف لفتين في الغرفة وتقع لوحدها علي الارض لان عصافير الزينة معندهاش نفس او قدرة علي الطيران فترة طويلة.

7- في مرحلة بتكون الانثي منتفخة و تحمل بيضا يبقي لازم وضروري تشتري حاجة اسمها بياضة هي دي اللي العصفورة بتضع فيها البيض وبترقد عليه وهو له دورة حتي يفقس حوالي 17 الي 21 يوم وممكن تكتبي التاريخ بالقلم علي البيض عشان تتابعيه ولو فيه بيض بايظ او غير مخصب العصفورة الام بتعرف لوحدها وبتنقرة وترميه في ارضية القفص.

8- بمجرد ما يفقص البيض لابد ان تعزلي الذكر في قفص منفصل عن الانثي لانها بتهاجم الاب لحماية ابناءها ودا لمدة اسبوع علي الاقل .

9- اذا كتر عندك عدد العصافير في القفص لابد من بيع الزائد منها او فصل مجموعة في قفص اخر.

اتمني اكون افدتك وان شاء الله لو افتكرت حاجة تانية اقولك.