السن دا احسن حاجة فيه انه بيموووت في التقليد ومابيكونش لسه مدرك مسألة الواجبات والفروض دي وعليه :
اولا لازم يبقي عنده ادوات زي بتاعت الكبار مقلمة واقلام منوعة وبريات واستيكات غريبة يحس انها لعب ومش هتستخدمها الا عشان نعمل كذا وكذا الاول وكل يوم حاجة جديدة
ثانيا يشوفك انتي شخصيا قاعدة بتعملي كدا وبتكتبي عشان يقلدك
ثالثا المكافأت وعن تجربة احسن مكافأة بعد طبعا الحلويات هي الاستيكرات وبالذات لوشخصيات كرتونية سوبر مان سبونج بوب وميكي ... الخ واللزق علي الايد والرأس ويبص علي نفسه في المرايه ويشوف استيكر الولد الشاطر.
رابعا لازم تشجيع خارجي من الاب او الجد والجدة ... زي شوفتوا عمل ايه برافو برافو حتي لو وحش لان الاتقان هيأخذ وقت طويل جدا
خامسا دي بقي بتعمل شغل شديد جدا جدا جدا لازم الشيخ او مشرفة الحضانة تكوني مظبطة معاها هدية مفاجأة ليه وفي يوم يكون شاطر يطلعها الشيخ او المدرسة وهتكون مفاجأة حلوة جدا ليه وهتحببه بس اهم حاجة مايعرفش انك علي علم بالمضوع دا.
سادسا ادوات تعليمية تدعيمية يعني كتب بتكون فيها كتابه هو يقلدها او رسومات يمشي عليها عشان تعرّفوه الحروف والخطوط وتتقل ايده علي القلم ويبقي خطه حلو مع التدريب مع الوان طبعا.
سابعا الثبات علي مبدأ ونظام يعني لازم يبقي فيه ميعاد يومي للعمل دا ومايتغيرش لاي سبب اختاري ميعاد يبقي مستعد فيه وتبتدي حلقة التدريب والتشجيع والمكافأة واحدة واحدة هتلاقيه هو من نفسه بيرجع من الحضانة او اول ما الشيخ يمشي يطلّع ويخلص الواجب اللي عليه عشان يلعب او يتفرج او يأخذ المكافأة.
ارجو اكون افادتك انت والاخرين الكلام دا عن تجربة شخصية وليس مدعم باي رأي فني او علمي او طبي.
وأسأل مجرب ولا تسألش طبيب 