عربيتي كليو موديل 2004 ومصاريف البنزين حوالي 200 جنيه بنزين ( مشاوير عادية داخل القاهرة) أما مصاريف الصيانة فعلى حسب التزامك بجدول الصيانة المذكورة في كتالوج العربية. لو هتمشي صح ممكن تبقى في حدود ألفين جنيه في السنة شامل تغيير الزيت.
في مصاريف الناس بتنسى تدخلها في الحساب وهي مصاريف الترخيص والتأمين. المصاريف دي أنا مش فاكرها لأن العربية بتاعتي انتهى ترخيصها من شهر مارس ومعاييش فبوس أرخصها .... قصدي معنديش وقت.
وهنا أحب أوجه نداء إلى أصحاب القلوب الرحيمة: محدش يبلغ المرور بالموضوع ده
التعليقات
عربيتى ميراج 99
مصاريف البنزين بصراحة غول بنزين عشان موتور كبير تقريبا 250-300 جنيه بالشهر زيت كل 3 او 4 شهور ب 120 ج
وكل سنة مخالفات ب وتجديد واللازى منه بدفعلى باكو
يعنى انا لو مخلف عيل دلوقتى مش هصرف عليه المصروف ده
عربيتي دايو لانوس ومابحسبش لاني لو حسبت هايغمي عليا بس مش عايزة اقولك اني كل كام يوم يبقى نفسي اعيط من اللي انا فيه فعلا بيت تاني ومهما عملت ميزانية ليها فالاروبة بتفاجأك بمفاجأت تطلع من دماغك ربنا يهديها ويهدي كل العربيان الجديدة والمستعملة بس اللي اعرفه ان الزيرو مصاريفه اقل