دى مش نظرية جديدة ولا حاجة , دى حاجة بديهية .. ان اى مسمار مربوط او اى صامولة مربوطة ممكن فكها .. وبعدين نعيد ربطها .. بتضحكو على ايه !!
انا باشجعكو تعملو زيى .. انا وفرت النهارده على الاقل 50 جنيه .. اصلا عندى مفتاح بلدى 24 .. ومفك عادة .. ومفتاح بلدى 8 .. وبنسة ببوز رفيع طويل .. والحاجات دى تمنها حوالى 15 عفريت .. سخان الغاز الفرنساوى عندى من سنة 77.. وكان مستعمل اصلا .. وطول خدمته معانا فكيته وصلخته ييجى خمس مرات .. لغاية ما وصل لحالة مزرية وميئوس منها لعدم وجود قطع غيار على الاطلاق..
انا فى الحاجات دى عنيد ولا استسلم ابدا .. فكيته وخليته قدامى يومين .. ابص وافكر .. ابص وافكر .. ابص وافكر .. وفورا لغيت اى حاجة اوتوماتيكية فيه .. وركبت قلبين حنفية واحد للشعلة الصغيرة وواحد للشعلات الكبيرة .. خلصت القصة .. افتح الانبوبة .. افتح سكة الشعلة الصغيرة .. افتح المية .. السخان شغال مية مية ..كام سنة بقى على التعديلات دى ؟؟ ييجى 8 سنين ..
وفجأة امبارح حسيت انه عاوز يشتكى ..
النهارده فكيته .. 8 مسامير .. جلدة جديدة ( رداخ) .. اعادة ربط ما تم فكه بنفس الترتيب ..
العملية بسيطة وما تخوفش .. اقفل المية واقفل الغاز .. فك وصلات المية واشتغل .. هو ربع ساعة بالكتير .. رجع كل حاجة زى ما كانت .. ومبروك عليك الحمسين جنيه ..
اللى مهتم بالصيانة والاصلاحات المنزلية ومش عارف او مش قادر ، يسالنى وانا تحت امره ..
اللى بيعمل حاجة بنفسه بيكون سعيد جدا انه قدر يعملها لوحده ..