علي لسان إحدى الفتيات المسلمات

فى ناس زعلانة أووى من ان التيار الاسلامى ليه نسب عالية !!

معلش من حقى أنا ولو مرة أحس انى مش مضطهدة عشان مسلمة ملتزمة ،، وانا يعنى مش ملتزمة اوى ..

انا بس بحاول اكون مسلمة كويسة ،، و رغم اننا المفروض فى دولة أغلبيتها مسلمين ..

لما كنت عايزة اقدم فى السلك الدبلوماسى .. قالونى انسى يا بنتى يا السلك يا الحجاب ،، و اخترت الحجاب ...
لما كنت عايزة اشتغل مذيعة ,, برضه نفس الحلول يا قناة دينية .. و انا مش عايزة اقدم برامج دينية و كل اللى يعرفنى شايف انى انفع مذيعة كويسة .. بس طبعا " لا للحجاب " حتى فى تلفزيون الدولة اللى مفترض ان دستورها بيقول ان الاسلام دين الدولة ..
و برضه اخترت الحجاب ..

فى كل بعثة فى شغلى كانت كلمة الحق واقفة بينى و بين الفرص رغم انى كنت الاولى على مستوى الجمهورية فى المسابقة اللى اتعملت للبعثات و غيروا تقديرى للتانية و بعدين طلعوا الأولى تزوير و الثالث الرابع لحد العاشر و انا لأ ..
و صاحبتى اللى زوجها خُير بين انه يكون قنصل عسكرى فى سفارة و بين التزام زوجته الحجاب و اختار التزام زوجته بالحجاب ،، و الضابط المعرفة اللى اتفصل لما اتعرف انه بيحضر دروس فى مساجد و كان عايز يدرس دعوة " كأن الضابط لازم يكون بيسب الدين و مفترى " ،، المتدين المحترم مينفعش .
اسفة لانكم زعلانين اوى ،، بس المرة دى من حقى افرح ،، من حقى اكون اغلبية .
من حقى آخد حقى مرة فى حياتى ،، من حقى أختار ،، من حقى أنجح .
من حق ولادى " لما ربنا يدينى ولاد " ينجحوا و هم ملتزمين بدينهم مش يدفعوا ثمن النجاح ..

آسفة انكم زعلانين ،، بس انا فرحانة ،، لانى أول مرة فى حياتى أحس انى بجد أغلبية .. لأول مرة فى حياتى أحس انى مش مضطهدة لانى مسلمة ..
لأنى أول مرة فى حياتى أحس ان كفائتى بس هى المقياس مش شكلى ،، مش الواسطة ..

"" يهمنى الإنسان ولو ملوش عنوان ""