اول حادثه سرقه: اول عيد ميلاد ليها يوم 3ديسمبر القادم.انا ساكنه في عماره ارضي و3ادوار.الارضي دكتور وانا في الدور الثاني والدور الثالث شقه والدي وهي تقريبا فاضيه.المهم كان يوم جمعه وانا اذهب لوالدتي (كل يوم جمعه).اقضي اليوم عندها انا واخواتي وصادف ان اليوم ده كان خطوبة ابنةجارتي .ذهبت لوالدتي وحوالي الساعه 10مساءاتصل اخو جارتي بوالدي لانه صديقه وقال لبابا انهم رجعوا من الفرح وجدوا باب شقة اخته وشقتنا وشقة بابا مكسوره.(كسروا ابواب ال3شقق) المهم انا طبعا صرخت لان كل ذهبي وفلوسى في الدولاب والحرامي هيلقيها بكل سهوله . جرينا انا وزوجي ووالدي واخواتي الي البيت بسرعه وربنا وحده هو اللى كان عالم باحساسي وقتها.صعدت السلالم ووجدت جارتي جالسه وحلق باب شقتها مكسور فجريت علي شقتي وكانت انوار الشقه كلها مضاءه وحلق الباب مكسور .وواقع علي الارض شنطه من شنط ايدي وكانت مفتوحه ومرميه في وسط الصاله.جريت اناواختي علي حجرة النوم .وكانت الحجره حالتها صعبه قوي زي الافلام كل الملابس واقعه في الارض والحاجه متبعثره علي الاخر.واكتشفت انهم اخدوا كل ماهو له قيمه كل الدهب والفلوس وكاميرا فيديو وكمبيوتر وهاردات ديسك خاصه بشغل زوجي.وكسروا مكتب زوجي واخدوا مبلغ بسيط كان موجود .بس اكثر حاجه مأثره في هي الدهب لانها حاجات كثيره قوي ومش موجوده الان .غير كده ان كان فيه الشبكه بتاعتي وهدايا لي ولاولادي من يوم ولادتهم.كل قطعه فيه ليها معايا ذكري.يالله الحمد لله....اه والمجرمين فتشوا شنط اولادي بتاعة المدرسه ودولابهم واخدوا فلوس ابني اللي بيحوشها من مصروفه.المهم جاءوا امناء الشسرطه وعاينوا المكان لكنهم لم ياخذوا اي بصمات من علي الدولاب رغم انهم تركوا الادوات اللي كسروا بيها الشقق.طلبوا مني كتابة كل اللي اتسرق مني .حاولت اكتب علي قد ما قدرت.وبعد كده ذهبنا للقسم .وكان في ضابط متعجرف بيكلمنا وايده في جيبه.وعملنا محضر انا وجارتي. ووالدي لم يقوم بعمل محضر لان شقته فاضيه ما اتسرقش منها حاجه. وجارتي اتسرق منها موبيلات ودهب بس قليل وحذاء جديد بتاع ابنها.اخدالضابط السيريال نمبر لاحدي الموبايلات وقال سنتعقبه.اعطونا رقم المحضر وقال بعدم اهتمام لما نوصل لحاجه هنتصل بيكوا.وانتوا برضه تابعوا معانا.ذهب لهم زوجي بعد شهر قالواله التاخير مش مننا.التاخير من شركات المحمول.كان عندي امل ان اي حاجه ترجع.بعد كده قامت الثوره واتحرق القسم .فسلمت امري لله....البلد كلها اتسرقت مش انا لواحدي.ماكدبش عليكم انا كنت مرعوبه وماكنتش بنام من الخوف .تخيلت شكلهم ازاي دخلوا وعبثوا بشقتي وحاجاتي وحركتهم .كان مطلوب مني اطمن اولادي رغم رعبي واحساسي ان لو نمت ممكن يدخلوا الشقه تاني.بس الحمد لله ركبت باب حديد علي باب الشقه.ومع الوقت نسيت وقولت فداي انا وزوجي واولادي.اللي يضحك ان كان عندي علب حلويات للاولاد أخدوها ايضا.... ............................................................................ حادث السرقه التانيه: الموضوع ابسط كتير.شقه بالسادس من اكتوبر اول بلكونه. فاضيه فيها شويه كراكيب.والمكان علي فكره عمران بالناس .الحرامي كسر شيش البلكونه لاحدي الغرف الداخليه وكسر الزجاج ودخل الشقه ولم يجد حاجه ياخدها اخد الخلاطات بتاعه الحمام وعيون البوتاجاز .وكل (اكر)مقابض الشبابيك والبلكونات والابواب ونزل تاني .......هم يضحك وهم يبكي.
التعليقات