طفلى و الاعلانات التجاريه؟؟؟؟؟؟؟؟؟

أنا تقريبا كل المنتجات اللى بتيجى فى اعلانات التليفزيون ولادى عايزينها سواء حلويات أو شيبسييات أو لعب والمشكلة ان الاعلانات ورا بعض كلها وبعد كل اعلان طبعا ماما أنا عايزة ده ,ماما هاتيلى دى ,ماما انا بحب ده ,ماما أنا نفسى فى دى والآخر بلاقى أنهم عايزين كل حاجة تقريبا.
والمشكلة بقى ان كل قنوات الاطفال بيتفننو انهم يطلعو الاعلان بشكل مغرى جدا جدا بالنسبة للطفل لأنهم عارفيين أنه فى آباء وأمهات ضعاف جدا قدام طلبات أولادهم ولا بيقولو لأ ولا غلط ولا بيعلموهم القناعة والرضا .

أنا عن نفسى الحمدلله مسيطرة على الموضوع نسبيا يعنى بشكل مرضى للطرفين

عن نفسى ليل ونهار ماما عايزين دا(طبعا للعب)وبصراحه اللعب تحفه تجنن طبعا نفسى اجبلهم كل حاجه بس طبعا صعب
بقولهم شوفوا انتوا عندكوا لعب جميله فى ولاد كتيره معندهاش فلوس تجيب لعب يبقى نقول الحمد لله ونحافظ على لعبنا
وطبعا من وقت لاخر بجيب لهم لعبه وبصراحه ولادى قنوعين جدا بأى لعبه حتى لوكانت 2 جنيه ويا سلام لوكانت عربيه
وطبعا ميمنعش وجود اللعب على شكل مكافأت المهم مش كل ميطلبوا انفذ طبعا لا
وبالمثل للحاجات الحلوه وبعرف ايضا اضرار بعض المنتجات وبالاخص الشيبسى والاندومى

الحمد لله الى حد كبير مسيطرين على الموقف وربنا بيسهلهالي يعنى مثلا الشيبسي وهما صغيرين شوية كانت بتصادف لما ياكلوه يرجعوا او يجلهم برد فربط الموضوعين ببعض فبطلوا ياكلوه لما راحوا المدرسة في كى جى 1 المدرسة ربنا يكرمها كانت بتحذر منه جدا واللى بتشتريه بتاخدوا ترميه فبطلوا لما راحوا كى جى تو خلاص فقدت السيطرة في موضوع الشيبسي بس مش بنجيبوا كتير برضوا

اما بالنسبة للاعلانات فمرة كان في اعلان لجبنة معينة وله اغنية حلوة فقلت اجربها الحمد لله ماعاجبتهمش خاااااالص فقلتلهم شوفتوا بقى هما بيعلنوا عن الحاجات الوحشة علشان مش لاقيين حد ياكلها ويوروهالنا انها جميلة وحلوة وشكلها حلو وهى وحشة جدا

وعموما احنا قبل مانشتري اى منتج سواء كان بسكوت او الكيكات اللى برة بقولهم نقرا اللى عليها الاول لو فيها حاجة مضرة مش هانجيبها لو مافيهاش هاجيبهالكو والحمد لله بيستجيبوا ولما يعوزوا حاجة يقولولي ماما اقري اللى عليها:(

المهم لازم الاولاد تعرف ان هناك منتجات مضرة بالصحة وماينفعش نجيبها يعنى نعلمهم الاهتمام بصحتهم اهم حاجة علشان لما يكبروا ونفقد السيطرة عليهم يكون عندهم الثقافة دى ومش اى حاجة يشتروها

الحمد لله الحاجة اللي واجعين دماغي بها دايما وحسبي الله ونعم الوكيل هي منتجات لعب الاطفال في قنوات الاطفال وخصوصا لولو كاتي وكارس وسبونج بوب...............الخ
بس طبعا بيخضعوا لرأي الاستبداد بتاع امهم المستبدة بأنه لألألألألألألألألألألألأ
لان طبعا مش كل حاجة نشوفها نجبها
ونحمد ربنا على الموجود عندنا واللي مش عند غيرنا ولانها اعلانات لتسويق منتج مش اكتر
للعلم هم ياعيني بيستسلموا للكلام ده مش اقتناع لأ ده لانه الحوار مش هايجيب حل تاني بدليل انه اول ماييجي منتج اخر بيطلبوا نفس الطلب
بس طفاية لما اقولهم انهم لو بطلوا شقاوة هانفكر في الموضوع فطبعا مش بيبطلوا وبالتالي هم الخسرانين وبيلوموا انفسهم هم
المهم وما طولش عليكم بعد الرخي الكتيرررررررررر ده وبكل صراحة
.
.
.
.
.
.
انا بيبقى نفسي في اللعب دي قبلهم علشان العب بها ما انا اعيل منهم

بصراحة الواحد لازم يكون صريح جدا مع الأطفال ... أنا عن نفسي لو المنتج فعلا كويس لكن الميزانية لا تسمح بقول إننا مش هينفع نشتريه لأننا كده ممكن منعرفش نشتري حاجة أهم منه زي الأكل أو الشرب أو الفسحة أو الكتب أو أو أو.

ولو الحاجة دي مش كويسة بأحاول أفهم الطفل قد إيه الحاجة دي خطيرة وبشكل علمي مبسط.

واحدة واحدة وعلى المدى الطويل وبدون ما الأب والأم ما يملو الطفل بيفهم وبيستوعب وﻷتمنى إنه من جواه ما يكونش حاسس بالحرمان

آه نسيت ... كمان لازم يكون فيه بديل عن الحاجة المعلن عنها ... مثلا الشيبسي اللي بتتباع في أكياس بديلها الأصح والأطعم كمان الشيبس بتاعت البيت ... اللعبة اللي في التليفزيون ممكن نجيب له لعبة أفضل منها على الكمبيوتر مثلا ... وهكذا !