6 نصايح للتعامل مع المتطفلين وأسئلتهم….

9
0
كلنا أكيد واجهنا ناس متطفلين بيسألوا اسألة كتير او بيتصرفوا تصرفات فيها تطفل .. فقريت فى المواضيع دى كتير وحاولت اجمع الخلاصة فى بعض النقاط وهى:

أولا: أول ما تحسى أن الكلام بدأ يلف ويدور حواليكى وسؤال سخيف جاى نحيتك غيرى الموضوع بسرعة .. غيرى الموضوع بذكاء على أد ما تقدرى يعنى على حسب الشخص المتطفل اللى بيسألك لو مهتم بمظهره مثلا ممكن تقولى “سيبك انتى بس الجاكت ده عليكى أنهارده جاااامد جدا جايباه منين!!” او اى كلام يلمس اهتمام اللى أدامك عشان تشغليه فيه. ولو أعدين مع بعض ممكن ببساطة تقومى تتمشى فى المكان او تمسكى موبيلك وتتشغلى فيه ال يعنى بتعملى حاجة او تمسكى مجلة وتبدى الاهتمام فيها.

ثانيا: لو حصل المحظور والسؤال السخيف أتسأل يبقا تردى السؤال بإجابة غامضة او بسؤال زيه يعنى لو السؤال “جوزك بيقبض كام؟ او انتى بتقبضى كام؟” الاجابة ممكن تكون “عادى زى كل الموظفين اللى فى قسم المحاسبة اللى فى شركة كذا” او “هااا أمال انتى جوزك بياخد كام؟” او “هو الحمدلله بياخد كويس..بتسألى ليه في حاجة؟” ولو اللى بيسأل من النوع المثابراللى مش هيسيبك الا وانتى قايلة رقم ممكن تبقا الاجابة ال يعنى بتهزرى “بتسألى ليه يا جميل..عايزة سلفة ولا اييييه محتاجة فلوس؟”

ثالثا: فى بقا تكنيك حلو جدا عرفته لأول مرة من برنامج دكتور فيل وأتأكدلى من خلال دراستى لعلم النفس وهو ان أى كلام ميعجبكش سواء كان الكلام ده سؤال متطفل او كلام سخيف موجه ليك كل اللى عليك تعمله هو انك تشيل اى تعبير ظاهر على وشك وبالتالى لا تبقا مبتسم ولا مكشر فى نفس الوقت تبقا مركز للى بيقولك الكلام او بيسألك فى عنيه وتستمر فى صمتك وتركيزك التام..مبدئيا التكنيك ده هيدى انطباع للشخص المتطفل او السخيف احساس بالحيرة ياترى انت مبسوط أواضايقت!! ومش هيبقا عارف وقع الكلام عليك ايه فساعتها هو اللى ممكن يغير الكلام لانك بكده بتفقده الثقة فى نفسه لانه معرفش ايه اللى دار فى دماغك..الطريقة دى ابسط تشبيه ليها هو أنك بتعمل وشك مراية للى أدامك فلو بيقول شوية سخافات بتنعكس عليه لانه مش لاقى منك رد فعل وهو مش قادر يحدد احساسك من نحيته.

رابعا: لوفرضنا ان التطفل ده شوفتيه من خلال زياره حد ليكى فى البيت بإنه بيدى نفسه الحق ان يتجول فى البيت من غير استأذان او مش ضرورى التجول ممكن تبقى رايحة المطبخ عشان تقدمى حاجة للضيوف تلاقى اللى داخل وراكى المطبخ او مدخلك دماغه من الباب وعلى فكرة مش بالضرورى يبقا حد متطفل ممكن أهل جوزك بحكم سكنك فى نفس البيت مثلا اواى حد شايف نفسه مش غريب فى الحالة دى لو انتى بتضايقى فى نصيحة بسيطة جدا هو انك تنورى نور الصالون بس وتحاولى تفقلى نور الاماكن المحيطة او تضلميها على خفيف وتقفلى ابواب الأوض المحيطة بحث انك تحدى حركة الضيف ولو فكر يجى وراكى تقوليله بهزار “لالالالاانتى انهارده ضيفتى وانا لازم ادلعك”.

خامسا: لو الشخصية اللى ادامك بدأت تتكلم عن حد (نميمة) يعنى مش لذيذ انك تسيبيه يعيش ويكمل كلامه متبينيش انك مستمتعة ولا عايزة تسمعى أكتر وفى وسط الكلام ممكن تقولى “واحنا مالنا” او “انا مش عارفة الناس بتوجع دماغها باللى مالهش فيه ليه؟” وبالتالى هتوصله المعلومة انك بتتخنقى من التدخل والتطفل.

سادسا: لو اللى أدامك بقا من النوع اللى كل اللى فات ده مأثرش فيه يبقا توجعى دماغك ليه ؟؟ بكل بساطة ووضوح ممكن تقولى “اووووه لا بليز مبحبش اتكلم فى المواضيع دى؟” او تقوليله “سؤالك غريب؟بتسأله ليه؟” او “اوعى تكون سألت السؤال ده لحد قبل كده..أصله سؤال ميتسألش بصراحة” من الاخر ومتديش معلومة انتى مش عايزة تقوليها ومتخليش حد يجبرك تقولى حاجة انتى مش عايزة تحكيها ومتفتكريش انه هيزعل منك لانه جواه عارف انه متطفل.

اشهر الأسألة المتطفلة واجابات مقترحة:
1- عمرك اد ايه؟ او انت عندك كام سنة؟ لو معندكش مشكلة انك تقول.. قشطة قول. لكن لو عندك مشكلة ممكن تجاوب..”انا هفضل طول عمرى شباب”

2- مافيش بيبي فى الطريق؟ هتتجوزى امتى؟ هتتخطبى امتى؟ الاجابة ممكن تكون بشكل مقتضب ومختصر جدا “ربنا يسهل..ادعيلى” ولو استمر الاسئلة الاجابة تكون برده مختصرة “ربنا يكرم” مع تعبير على وشك بالاستغراب عشان اللى بيسأل يحس انه مش لذيذ او انك تردى السؤال بسؤال لو متجوز تسأليه هو هيجيب بيبي امتى لو خاطب تسألى هو هيتجوز امتى وهكذا.

3- مرتبك كام؟ الاجابة “بتسأل ليه يا جميل..عايز سلفة” او “الحمدلله جميل معقول مكفينى”.

4- السفرية كلفتك كام؟ شبكتك بكام؟ جبت كذا بكام؟ الاجابة “بتسأل ليه؟ عايز زيها؟” او “والله كان السعر معقول مش كتير اوى”


 

إضافة منذ 9 عام
غير محدد
تعديل منذ 5 عام
safaa
50483

المصدر

سلمى المنصورى

التعليقات

زغباوية منذ 9 عام
10/10
bonty منذ 9 عام
+1
الباشمهندسة منذ 9 عام
لا المتطفلين اللي انت بتتكلمي عنهم في مقالك غلابة خالص او لسه هواة دا فيه ناس اساتذة في التطفل وحتي لو عملتي اللالي وخبتي بردو بيطلعوا باي معلومة علي الماشي وبمنتهي البساطة ممكن تقولك اه عايزة زيه اه اصل معروض عليه وظيفة شبهها اه انا كذا وكذا وكذا لان غالبا المتطفل مش بيعرف يداري قوي بيبقي سهل فقسة بردو .

سبيها علي الله وربنا يستر
amani منذ 9 عام
اناواجهت شخصيه متطفله وكانت معي بالمصيف لدرجه سؤالهالي هل تنامي انت وزوجك علي السرير ام انت علي سرير وهو علي سرير. في الاول كنت احرج وارد ولكن مع زياده التطفل قررت الصدوالهروب باي طريقه مثلا اقول مش عارفه.ليه في حاجه.والردودالعائمه كثيره.هل انا شريره؟
الباشمهندسة منذ 9 عام
لا طبعا مش شريرة من حقك ان تحتفظي باي معلومة شخصية مش عايزة تطلعي حد عليها وهي اللي ماعندهاش ذوق عشان بتسألك حاجات شخصية لهذة الدرجة واحسن حاجة هي انك صدتيها لانها كمان شويه كانت هتقعد تشركك وتدبسك في مشاكل وحورات مالهاش لازمة ما هينوبك منها الا وجع الدماغ .
zedony.com - A mmonem.com production. Privacy Policy