الساده المحترمين اعضاء موقع زيدوني عندي اقتراح..........

100 100 ولو إن مفيش داعي لحد يزعل من الحاجات دي

اقتراح جميل +1

بس ممكن انوه عن حاجة لو فيه حاجة مكررة وحد نوه عنها او حط رابط للموضوع المكرر ده بيكون علشان عايزين نوصل المواضيع ببعض (حد يكون ضايف حاجة او التعليقات ظريفة) مش ومفيش مشكلة لو المواضيع متكررة يعنى مش شرط نحذفها بمعنى ان مبدأ الرخامة او التضييق على الاعضاء مش موجود اصلا يعني لاداعي لوجود هذه الحساسيات من اساسه
وطبعا المراسلة مطلوبة علشان لو فيه ملحوظة جانبية او محرجة
هدفنا الاساسي مصلحة واثراء الموقع والاعضاء اهم جزء فى الموقع
ولو فيه زعل بين اى حد من الاعضاء او فيه حاجة في نفسه يقولها في رسالة ويبعتهالوا اكيد فيه سؤ تفاهم والموضوع يتحل فى رسالتين :(

كلام زغباوية مظبوط ... واحب اضيف ان ساعات المقال الاول بيبقي اخذ تقييم عالي والمكرر بيأخذ تقييم اقل وصاحب المقال مش بيبقي عارف السبب وممكن يصاب باحباط ....واذا عُرف السبب بطُل العجب

اولا : زغباويه
اولا انا متاكد ان مبدأ الرخامة او التضييق على الاعضاء مش موجود وا نتي او الباشمهندسه لما بتعملوا كده فهدفكم اللي انت كتباه وانا عن نفسي مبزعلش ومش بتكلم عن نفسي لاني قادر علي فهم نوايا الاعضاء وقادر علي الرد بس حطي نفسك مكان عضو جديد او حد ملهوش خبره اوي في الكلام ده وحط موضوع ولقي اول تعليق هو رابط الموضوع بدون اي كلام ولا حتي تقدير للجهد المبزول ده شعوره هيبقي ايجابي تجاه الموقع او العضو اللي عمل كده (اشك) يبقي انا كده خسرت عضو كان ممكن يضيف للموقع او علي الاقل زعلته ده بالنسبه للموضوع المكرر اما بالنسبه للملاحظات علي المواضيع فاكيد لما تتبعت في رساله هتبقي اشيك وبتدل علي ان الهدف هو الصالح وليس الفزلكه وحب الظهور او تقليل من شان الاخر
وكمان بالنسبه لتعديل المواضيع ان شايف ان الموضوع ده لازم يتقنن شويه .
دي وجهه نظري واختلاف الراي لا يفسد للود قضيه

ثانيا:الباشمهندسه
لما الموضوع يبقي في شكل رساله العضو برضه هيعرف ان موضوعه مكرر ومش هيستغرب لما تقديره هيقل وحتي لو معرفش ان موضوعه مكرر فالاحباط اللي هيحصله اقل بكتير من الاحباط اللي هيحصله لما يلاقي اول تعليق لموضوعه هو رابط نفس الموضوع بقلم شخص تاني

فعلااختلاف الراي لا يفسد للود قضيه ولولا الاختلاف لبارت السلع والاختلاف والنقاش بيوضحلك اكيد حاجات فنية او رؤية الاهداف العامة للموقع وبيوضحلنا حاجات كتير ممكن نكون مش واخدين بالنا

بالنسبة للمكرر انا عن نفسي حصل معايا كتير جدا انى بحط موضوع وعضو جديد يكتبلي تعليق ان الموضوع اتكرر جايز علشان هو اللى كان عامله قبل كدا او علق عليه وفاكره فبيوضحلي ودى ماتزعلش في حاجة دا بالعكس يوضح للعضو الجديد صاحب الموضوع المكرر ان الناس اصحاب الموقع صاحيين بدل مانعمل تبويب خاص بالمكرر ومحدش يقراه اصلا زى كتير من المنتديات
اما بالنسبة للتعديلات ان اى عضو عدى 1500نقطة يعدل لباقي الاعضاء بتحسسك ان الموقع بتاعك وانت حابب انك ماتشوفش فيه اخطاء سواء كان من عضو قديم او عضو جديد وكلنا بنغلط في حرف او كلمة او معنى مش مظبوط ممكن لو فيه حساسية معينة ممكن تعمل تعديل تاني باسمك وانتهت المشكلة

وعلى فكرة كتير بنعمل تعديلات مش بهدف التعديل بالعكس بهدف ان الموضوع يطلع تاني في اول الصفحة لانه بيكون موضوع مهم وماخدش حقه او ناس كتير ماشافتهوش

شكلي رغيت كتير معلش

ياريت توضحيلي وجهه نظرك في رفض التنبيه عن طريق الرسائل
وبالنسبه للتعديل اكيد صاحب الموضوع احرص عليه ان هو يطلعه في الصفحه الاولي

انا مش برفضها ولا حاجة بس من حق كل القراء انها تعرف اذا كان الموضوع مكرر انه مكرر او متشابه او فيه اضافة معينة فى موضوع اخر وشايفة ان مفيش اى مشاكل خالص

وبالنسبة للتعديلات صعب جدا ان كل واحد يشوف مواضيعه القديمة يوميا بس لو عضو كان بيدور او بيبحث عن حاجة معينة ولقى موضوع جميل وقيم وعاجبه وشايف ان الناس هاتستفيد منه ليه مايخليهوش في الصفحة الاولى انا مش شايفة اى حساسية فى الموضوع ليه مانعتبرهاش احساس بالمسئولية وروح التعاون في الموقع وان الموقع بكل مواضيعي بتاعي ومن حقى اعدل فيه لو شفت اى حاجة غلط

على فكرة المواقع الكبيرة زى ويكبيديا لو فيها نقص في معلومة بتشير لها ان لو عندك معلومةاضافية تضيفها وصحتها على مسئوليتك ليه مانكونش زى المواقع الكبيرة دى

رأيي الشخصي اني مدام كتبت موضوع على النت ماشي هو باسمي بس مابقاش ملك ليا بقى ملك لكل واحد قراه ولو شاف فيه غلط ليه مايصلحهوش ويعدل فيه ونوصل لموضوع حلو بدون اخطاء ولسة لما المدير يعمل اضافات
برضوا رغيت تاني بس نفسي اكون وضحت وجهة نظري وتكون وصلت صح

اولا:
1- حق القارء هو مضمون الموضوع وليس اذا كان مكرر ولا لا
2- بالنسبه للمواضيع المتشابهه او بها ما يتعلق بالموضوع دي مفهاش مشكله بالعكس دي بتزود الموضوع اهميه
3- كلامك ده مقبول لو كل الاعضاء نيتهم سليمه وقصدهم خير مش قصدهم حب الظهور والتقليل من شان الاخر لاظهار الجهبزه والفزلكه ودي حاجه محدش يقدر يجزمها.
4- في مواضيع مكرره وعادي جدا محدش معلق عليها ولاقايل انها مكرره ولا حاجه وممكن اجبلك امثله لو حبيتي.
ثانيا :بالنسبه للتعديلات :
1- موضوع ان شخص عجبه الموضوع وعايز يرجعه اول صفحه دي انا مش مقتنع بيها لان لو الموضوع عجبه كده ممكن يحطه في المفضله وبعدين اللي يعجبه هوه ممكن ميعجبش حد تاني
2- ممكن مدير الموقع يخترعلنا حاجه ترجع المواضيع للصفحه الاولي غير موضوع التعديل ده ومن وجهه نظري لازم يكون فيه مواضيع متثبته وتتغير كل فتره .
3- موضوع ان الموقع بكل مواضيعه بتاعي مش مقتنع بيه لان بكده نلغي اسم صاحب الموضوع من الموضوع احسن ونلغي حاجه اسمها الملكيه الفكريه (حلو الكلام الجامد ده مش عارف جبته منين )
4- مش من حقي اعدل في موضوع لو انا شايف ان فيه حاجه غلط لان ممكن اللي انا شايفه غلط صاحب الموضوع شايفه صح يبقي انا كده اتعديت علي وجهه نظره.
5-انا طلبت قبل كده من مدير الموقع ان تحت كل موضوع يكون هناك مكان للاضافه وتكون باسم صاحب الاضافه ودي مفهاش حاجه تزعل المهم اللي بيقرا حاجه لازم يكون عارف كل واحد كاتب ايه وانتي بنفسك قولتي موقع ويكيبديا بيسمح بالاضافه علي مسئوليه صحبها طيب انا هعرف منين فين الموضوع وفين الاضافه.
6- كل الكلام ده علي افتراض ان الاضافه او التعديل صحيح طيب افرضي ان الاضافه او التعديل ده غلط يبقي صاحب الموضوع ايه زنبه ان الموضوع بتاعه يحصل فيه كده .
ثالثا: رايك الشخصي يحترم بس انا اختلف معاكي في انه ميبقاش بتاعي ويبقي ملك لكل حد يقراه هو ملكه فعلا بس للقراءه فقط او ابداء وجهات النظر والتشاور وليس التعديل فيه
رابعا:خلتيني ارغي اكتر منك بس والله الموضوع ده انا عملته رد فعل لموقف اناشوفته ووالله مكنتش انا الضحيه بس خليت نفسي مكان صاحب المقال ولقيت نفسي هتضايق لاني حسيت ان اللي عمل كده غاوي منظره ومعلش طولت عليكي

يعني كل الرغي اللى احنا فيه ده بسبب افتراضات واحساسات ممكن تكون غلط:(
محدش يقدر يجزمها. مدام محدش يقدر يجزم يبقى الاصل فى الموضوع حسن النية كما علمنا اسلامنا
4- في مواضيع مكرره وعادي جدا محدش معلق عليها ولاقايل انها مكرره ولا حاجه وممكن اجبلك امثله لو حبيتي.
اوباااااااااا جبته لنفسك يعنى بتعترف انك شوفت مواضيع مكررة ولم تبلغ صاحبها طيب عدت علينا بس ليه تعدي عليك كدا مش شايف شغلك كويس مع سبق الاصرار والترصد:(

بالنسبة للتعديلات انا اكتر واحدة بعاني منها كل مواضيعي فيها اخطاء املائية او نحوية وبتقبل الامر عادي جدا واعتقد كل الاعضاء كدا ولو فيه ناس مش كدا وحاسة ان التعديل ده مش صحيح او مش في محله يبقى يعدلوا الموضوع تاني باسمهم والمشكلة تتحل شوفت بقى الموضوع بسيط جدا:(

بالنسبة للاضافة دى في الخطة وانا كنت اقترحتها في بداية انشاء الموقع وطبعا هاتكون حاجة ظريفة وتثري الموقع

يبقي انتي مختيش بالك من اخر جمله انا كتبتها كويس (اقريها تاني)وبعدين انتي بتقولي ممكن تكون غلط وبرضه ممكن تكون صح
وبعدين الاسلام علمنا ان احنا نخاف علي شعور بعض ونتقي الشبهات
موضوع ان انا شوفت مواضيع مكرره ومعلقتش عليها ده لاني اصلا رافض الموضوع ده لان ممكن يكون ضرره اكتر من نفعه (دي وجهه نظري)يعني تقدري تقولي بحافظ علي شعور اللي كاتب الموضوع لاني مش ضامن هو هيزعل ولا لا بس أأكدلك لا انتي وقعتي في الفخ هعمل حفله عليكي (ههههههههههه)
بالنسبه للتعديلات الاملائيه دي مفهاش مشكله بس ياريت صاحب التعديل ينوه عن التعديل اللي عمله (وعلي فكره انا بعمل كده عشان اوضح انا عدلت ايه)
واحب ازكرك بموقف احد الاعضاء كان عنده خطا املائي وعدلته وكان رد الفعل سريع جدا وهو انه اعد يقلب في مواضيعي عشان يطلعلي غلطه (يعني زعل وخد الموضوع علي صدره)وافتكر ان انتي علقتي علي الموضوع ده(يعني في ناس بتزعل من التعديل حتي ولو املائي).
وبالنسبه للاضافه الحمد لله اتفقنا ان الاحسن تكون مستقله وباسم اللي اضاف

ايه كل ده يا جماعه الموضوع ابسط من كده بكتير
لان انا شايفه كل اناء ينضج بما فيه اللي عايز يتفزلك بيبان واهلا وسهلا بس ياريت الفزلكه تريحه واللي عايز يضيف للموقع بيبان من اسلوبه وطريقه كلامه

اهى ام يوسف جابت المفيد وبعدين اصلا فى مجال النت مفيش مجال للفذلكة والمنافسة الحساسة كل واحد بيتنافس علشان يطلع احسن ماعنده وهدفه توصيل المعلومة للناس يعني مش شركة او وظيفة وحركات من تحت لتحت والحمد لله من كل الاعضاء بلا استثناء ماجتش شكاوي في الموضوع ده الكل مبسوط ومستريحواللى عاجبه الموقع بيكمل معانا

اما بحكاية الاسلوب فعفوا انا شخصيا كتير بيخوني التعبير او مش بعرف اعبر او استخدم كلمات لطيفة وبيطلع اسلوبي سئ للغاية وناس كتير بتزعل منى من كدا واعتقد ان ناس كتيير زيي كدا وعلشان مفيش مواجهة فالواحد مش بيشوف تعبير الوجه فمنقدرش نحكم على الاشخاص من خلال الكتابة دى بتكون حسب الحالة النفسية انا حبيت اوضح علشان فعلا بيقابلنى الموضوع ده كتير

وعفوا للرغي الكتييير

ماشي علشان خاطر ام يوسف مش هقدر اتكلم

بقى كدا علشان خاطر ام يوسف مش هارغي تاني