عدنا مع ... مين اللي هيقعد على كرسي الاعتراف .. الآن مع الضحية العشرين ..المهندس/ Ahmed Hussien

لو الزمن رجع بيكى كنتى تتمنى تكون حياتك زى ما انتى دلوقتى ولا كنتى تتمنى حاجة تانية

واضح ان الكل خايف مني ومش عايز يسأل هو انا بخوف للدرجة دي:(

عموما باشكر مادا ومورا علي الجراءة دي وان شاء الله الباقي يتشجع:(

يالا ياباشمهندسة عرفينا الاول بالcv

الكرسي ... لطيف ومش بيشوك

@مادا موضوع الcv محرج قوي:
الاسم : مدام محمد عبد المنعم والدلع سحر.
السن : الحمدلله 33 وربنا يدمها علينا نعمة.
المؤهل: بكالوريوس هندسة قسم عمارة جامعة حلوان.
السكن : القاهرة
الحالة الاجتماعية :طبعا متزوجة وعندي ولدين شمس الدين وسراج الدين
اهم الهوايات : دخول موقع زيدوني

انا يقى هسألك بتحبيى مين أكثر من اولادك

@مورا :طبعا الحمد لله علي كل شئ وربنا يبارك فيه وباحب اقول دايما
لو علمتم الغيب لإختارتم الواقع

@ صفصف...حبيبتي... دي حماتي ياجماعة للي مش عارف

انتي بترديهالي ياصفصف وبتسأليني نفس السؤال ماشي
طبعا بحبهم هما الاتنين زي بعض بس شمس الدين في تفاعل بيني وبينه عشان هو كبير وعنده 7 سنين لكن سراج صغير ومزهقني ومش بيعرف يتكلم خالص فطبعا العلاقة بيني وبينه بهدلة علي الاخر

انا اسأل: اتعرفتي ازاي على زوجك ؟
وليه انتي كنتي مخدوعة في سني ؟
وماشاء الله على شمس وسراج ربنا يخليهم ويبارك فيهم

@نورا ... الأمورا

انا و جوزي تجمعنا قرابة بس من بعيد شويه يعني مامته safaa تبقي بنت عم بابايا واللي هو بالمناسبة hamada بس الحقيقة انا ماشوفتوش الا اول مرة لما جيه وتقدم لي فقط يعني ممكن تعتبرية جواز صالونات.

انتي عارفة لما الواحد يسمع مذيع في الراديو ويتخيل ويرسمله ملامح تتلائم مع نبرات صوته وطبيعة برنامجه زي بالظبط كدا انا لما كنت متخيلة ابلة فضيلة حاجة تانية خالص غير لما شفتها في التليفيزيون .... اهو نفس الحكاية معاكي انا مش عارفة ليه اول ماشاركتي في الموقع تخيلت اسمك مع تعليقاتك اللذيذة ومشاركاتك اللي دمها خفيف انك بنوته صغيرة في الجامعة سن 18 او 19 سنة دي طبعا مش حاجة وحشة جميل قوي انك تبقي محتفظة بالشقاوة دي لحد ديلوقتي .

وطبعا مرسي علي دعائك لشمس وسراج وعقبالك ان شاء الله عن قريب

طيب بالنسبة انك تقريبا كان جواز صالونات عملتي ايه اول لما اتقدملك وخصوصا ان انتي كنتي في الجامعة يعني مش مقفول عليكي ؟

ومتقلقيش والله يا باشمهندسة انا الشقاوة دي بتزيد عندي مش بتقل خالص ومش عارفة اعمل ايه ؟

حلو حلو خليكي كدا بكرة مشاغل الحياة والمسؤليات هتظبطلك الموضوع ده بالتدريج

انا عملت اللي بنصح بيه اي بنت يتقدم لها عريس مهما كان سنها وهو:

الصراحة والوضوح والتأني

لازم تكون الواحدة صريحة في اجابتها علي العريس ولا تخجل انها تسال في ادق التفاصيل وتتناقش معاه في كل كبيرة وصغيرة لان ده بيعطي رؤية واضحة لمستقبلهم مع بعض هل هيبقي في تفاهم ولا سيطرة ولا استهتار كل حاجة كل حاجة ومع اول شك او بوادر عدم مصداقية لازم يكون ردها بالرفض جاهز بدون تردد ولو توفر القبول والتفاهم المبدئي لازم بردو تتأني في خطوة الخطوبة لانها مهمة ويتبني عليها تفاصيل كتير.

يعني تقعد مع العريس مرة واذا كان فيه قبول مبدئي يبقي لازم تقعد مرة واتنين وتلاته واربعة وتدرس وتتناقش وتحلل وتحط الخطوط العريضة قبل ماتوافق وتبدأ مرحلة الاتفاقات والالتزامات والخطوبة وده مش عيب.

طبعا في اهالي بيبقوا مستعجلين وشايفين انه عريس مناسب وبيأثرو علي البنت بطريقة سلبية نصحتي لا تهتهمي خلي قرارك بكامل ارادتك ومفيش مانع انك تاخذي المشورة بس من ناس تثقي في حبهم ليكي ومتاكدة اني مصلحتك تهمهم مش تسألي صحبتك اللي لسة متجوزيتش وبتحقد عليكي عشان جالك عريس ولا صديقتك اللي عايشة عيشة نكد مع جوزها اوعيلتها حتي وتضللك ...... واهم حاجة اهم حاجة اهم حاجة استخارة ربنا

ايه رأيك في الجيل الحالي من الشباب ؟

@مادا ...لاماضا

انا مش مختلطة بشباب الجيل الحالي باي صورة من الصورة فبصراحة شديدة هيبقي حكمي عليهم من خلال اللي بشوفوا في الشارع انا طبعا متاكده ان في شباب منهم واعي وجدي ولكن الصفة السايدة حاليا هي الاستهتار واللاوعي وعدم ادراك الواقع وعدم تحمل المسؤليات.

كل واحد بابي جايبله عربية لو مش بابي يبقي مامي مفيش مشكلة عايز يتجوز دي ماشي عايز يطلق ماشي فشل في الثانوية وماله يدخل جامعة خاصة مش لاقي شغل يعجبة يسافر برة يعني مشتت وتحس انهم مش رجالة لا عيال وخنافس لكن في ناس محترمة كتير المشكلة الحقيقية مش في الجيل ده المشكلة في اللي بعده يعني اللي ابوه اصلا شاب مايص زي ده هو يطلع ايه ؟؟؟ واحدة واحدة الاخلاق هتنعدم والتسيب هيزيد والاتدهور والانحلال هيكتر وهي دي ببساطة علامة الساعة الكبري وربنا يلطف بينا.

ونكمل بكرة عشان تصبحوا علي خير بقي

صباح الهندسة، بتحني لأيام الكلية والرسومات والمللي اللي بيفرق في شارع والعفاريت ؟وعلاقتك أيه بالهندسة بعد الزواج سلامات من بعيد؟وهل حاولتي تعملي حاجة عن طريق النت تصميمات أورسومات هندسية كشغل ومذاكرة ولا باباي مسطرتي ومرحبا مريلتي؟

طبعا ساعات كتير بحن للادوات بتاعتي المسطرة والكرسي والطرابزة والمثلثات وادوات التحبير وخلافة وساعات كتير لما ببقي عند ماما اعقد اطلع شوية حاجات واتفرج وبعدين اقفل قبل العيال ماتبهدل حاجة ولكن علاقتي بالكلية والدراسة الان لا تتخطي اتصالي بزميلاتي من الكلية واللي لا يتعدو 4 مهندسات وطبعا ده في المناسبات والاعياد وخفافي كده طول السنة ونعقد نحكي ذكريات ونتكلم في الجديد بردو.

وفي الحقيقة انا اصلا بشتغل في الهيئة العامة للابنية التعليمة من فترة قبل الزواج وحتي الان بس بقالي 5 سنين ونص اجازة رعاية طفل من وقتها انقطعت عن كل الاعمال الهندسية وده لان طبيعة شغل الادارة اللي انا فيه كمان ماكنش له علاقة بدراستي نهائي وبالتدريج ابتديت انسي كل حاجة واحدة واحدة واعتقد ان ايدي كمان ابتديت تتقل علي القلم ومسكة المسطرة ودي حاجة مزعلاني جدا بس بقول دايما في نفسي انا بادي رسالة اهم وهي رعاية بيتي واسرتي وان شاء الله اول ماتتيح ليا فرصة لن اتردد في استرجاع كل مافتني وبالذات في ظل التطور الرهيب و التكنولجيا اللي بقيت موجودة في حياتنا ديلوقتي وخاصة برامج الرسم الهندسي والاظهار المعماري

انا كدا بقالي 24 ساعة وزيادة قاعدة علي الكرسي الحمد لله الموضوع سهل وبسيط ....وعشان ممكن يبقي في صعوبة في الوصول الي الضحية اللي جاية .... احب طبعا تبقي الاستاذة هي من بعدي علي الرغم من انها ما شاركتش غير في تعليقات بسيطة ولكن جميل ان نقعدها علي الكرسي ونزنقها ....

واذا تعذر الوصول اليها خلال 12 ساعة القادمة يعني حتي 11:30 ليلا تبقي mora واذا تعذر الوصول اليها هي ايضا خلال 24 ساعة القادمة يعني حتي 11:30 ظهرا غدا الاحد ان شاء الله....

يبقي مفيش غيرك يا لاماضا .... اقصد MaDa

عجبتني اوي اجاباتك على سؤالي ويارب الحال يتعدل وينصلح ونرجع لدينا واخلاقنا

بس لسة بدري انتي مستعجلة ليه في أعضاء كتير لسة مسألوش .. لسة حضرتك على الكرسي شوية .. مش عايزين كروتة .. انا لسة عندي اسئلة كتيييير

مستمرين مع البشمهندسة

عايز اعرف بقى علاقتك عاملة ازاي بخالتو صفاء وعمو عبد المنعم حماتك وحماكي .. بتتعاملوا ازاي ؟؟

وانابقى عايزة أعرف أخبارك أيه مع ريس الموقع
؟ياترى فيه حكم دكتاتوري عندكم ولا الريس ديموقراطي في كل مكان؟وكمان هل بتتبادلوا أدارة الموقع وبتشيلي عنه شويه ولا الليله كلها عليه؟والأهم هتقدري تقنعيه يجي على الكرسي ونستجوبه ولامافيش أمل؟:-D

الحمد للة نا مششششششششششششش من الضحايا

مدام دخلتي يايارا يبقى استنى دورك

جيتي لقضاكي ياشابهوالدورالدورالدور الدور موعوده ياللي عليكي الدور هههههههههههه

الدرو عليا في الاسئلة:
ياباشمهندسة عايزين نعرف ايه الحلم انتى حققتيه وحلم اخر نفسك تحققيه
وبزود على سؤال مادا ايه؟ اللى انتى بتحبيه فى اخوات جوزك وايه اللى مش بتحبيه(شوفتى زنقتك ازاى)وايه اللى بيزعلك منهم

لو تقدرى ترسمى مستقبل اطفالك تحبى تشوفيهم اية ؟ يعنى نفسك شمس و سراج يكونو اية ؟

هههههههههههههههه شفتي يا بشمهندسة كنتي عايزة تنزلي وتسيبي ده كله

ايه دا كله ... كل دي اسئلة ... يعني اروح اشتري لبس المدرسة وارجع الايكو حبسني في الكرسي ... وزنقني في الكورنر.... ماشي ماشي.... دا انا كدا قاهده بقالي 48 ساعة ... ممكن كدا الزق وماحدش يعرف ينزلني

اولا احب اقول ل yara هتتزنقي يعني هتنزنقي

@مادا:@ الحمد لله وماشاء الله ولا قوة الا بالله ...علاقتي بصفصف وعبدو حلوة جدا وبعتبرهم اصحابي علي الاخر يعني المعاملة بينا اخر دلع وده لانهم حبوبين وطيبين جدا جدا ودماغهم متفتح مش زي بقي حموات الزمن اللي فات امثال ماري منيب

وممكن تتأكد منهم وهما يردو عليك

@لوليتا .... العفريتا...حلو بعرف اقول افيشات انا كمان :(

والله ريس الموقع ده مفيش اطيب منه في الدنيا دي كلها الا صفصف مامته متفاهم جدا ومتعاون لابعد الحدود هو بس غيور حبة وقلوق شويه ومش فاضي علي طول والحمد لله ديمقراطي جدا جدا جدا بس في حاجات بالنسبة له تكون حساسة بيحب يفرض رأيه فيها وانا بحترم ده من حقة بردو ياجدعان ... ده الريس بتاعي

فيما يتعلق بشئون الموقع انا في البدايات اتعلمت منه حاجات كتير والحمد لله برمجتها وصممتها بس الحقيقة هو اللي شايل ديلوقتي اي برمجات لانها تفاصيل كتير ومش هفهمها بسرعة وكمان هتاخذ وقت أطول مني واعضاء الموقع مابيحموش
انا اصلا بتاعت طوب وخرسانة وكويس قوي اني ليا في الكمبيوتر عشان كدا انا مسؤلة حاليا عن فتح الصور والفديوهات ومتابعة التبويبات الحاجات البسيطة دي .

موضوع الكرسي ده مش صعب قوي بس لو دا حصل يبقي سؤالين او تلاتة بالكتير لانو زهوق ومابيحبش الانتظار وطبعا مشغول كان الله في عونوا وراه شغل وبيت وعيلين وست زي السكر لازم يراعيها وكمان ابنه الجديد زيدوني وان شاء الله احاول اخليه يبقي اخر واحد يقعد علي الكرسي بس ماوعدكوش

@زغباوية: الحمد لله اتعلمت واتخرجت واخذت شهاده عالية واتجوزت احسن راجل في الدنيا وخلفت اتحف طفلين اعتقدمفيش بعد كدا احلام يبقي طمع.... بس ممكن الواحد يطمع في كرم ربنا ويسأله الصحة والستر ونفسي قوي احج ويكون جوزي معايا ونكون لسة بصحتنا عشان نستمتع بالحج ... ومفيش مانع كدا لو اتكعبلنا في 2 او 3 مليون جنية في السكة يعني مش هيخصر .

بس حقيقي نفسي موقع زيدوني يبقي من احسن 100 موقع في العالم ويحقق الهدف الرئيسي منه وهو زيادة وعي وثقافة الناس الكبير قبل الصغير ويظل باحترامه ورقيه وتربع فوق كل الموقع الاخري اللي عايز تتقفل بالضبة والمفتاح وواخده الشباب في سكة اللضياع.

جينا للمطب الصناعي بتاع زغباوية اللئيمة
احب اقول وبكل صراحة اكتر حاجة بكرها في اخوات جوزي انهم مابيعرفوش يتفقوا علي حاجة ولو اتفقوا عليها بعد خمسين جولة كدا بردو حد فيهم بيخلف الاتفاق... مش كدا ولا ايه ؟ :(:(:(

وبحبهم كلهم زي اخواتي لانهم لذاذ ودمهم خفيف من كبيرتهم زغباوية لحد ام العيال ومرورا بtafatifi وطبعا الفنان الكبير حاتم .وعمرنا مازعلنا من بعض والحمد لله ... وربنا مايجبش زعل .

@شادي .... الهادي انت فينك بقي بقالك مده؟
عموما فيما يتعلق بولادي احب اتمنلهم الخير وانهم يبقوا احسن مني ومن ابوهم كمان بس الحقيقة ان عمري ماحد رسملي حياتي وبالتبعية مش هافرض حاجة عليهم وهسيبهم يعملوا اللي هما عايزينوا طالما صح ومقتنعين بيه والحقيقي بقي مابقاش فيه حاجة تفرح قوي ديلوقتي يعني الدكتور بيبيع اعضاء المرضي والمهندس بيخم في الاساسات والمدرسة بتديعي عيال دروس خصوصية والمحاسب بيتلاعب بالميزانية والاعلامي دلدول للحكومة او بيدخل السجن والطيار بيهرب مخدرات او بيتهموا انه ارهابي لما يقول ادعية قرأنية في الطيارة والشرطة بتضرب في الشعب .... يعني الامل بقي في المستقبل ان حال البلد يتصلح او تظهر مهن جديدة مكناش نعرفها والعيال تفلح فيها

اظن كدا انا عداني العيب وازح انزل بقي وانا شايفة mora علي الخط ديلوقتي فاحب اقولها انك الضحية التاسعة وماتحوليش تهربي اكيد هيوصلك التعليق ده .... لامفر ولا تراجع ولا استسلام .... سمي باسم الله واقعدي يا شابه

السؤال الاول والتقليدي تعرفينا بنفسك .... توكلي علي الله وجاوبي:(

بردجو خلعتي بدري بدري يا باشمهندسة ماشي
كملي يا موراشجرة عيلتك في زيدوني ؟

انا خلعت بدري!!! ... انا بقالي يومين بحالهم قاعدة علي الكرسي مده ايدي مستنية الاسئلة وبعدين ده كاس وهيدور تاني علي كل الناس:(

يعنى عجبك كدا يا باشمهندسة حتى النت خاف منك وفصل وهو لسه شغال حالا

@ الباشمهندسة اجابتك صحيحة 100 % بس كنت بناغشك شوية واشمعنى انا يعني اللى معملش مطبات صناعية ماهى البلد مليانة جت عليا:(
مورا: أدخلى ياشابة مستنينك

ماشي يا بشمهندسة نزلتي برده قبل ما نخلص اسئلة .. مش هنسيبك وهتقعدي تاني ان شاء الله .. بس أحييكي على إجاباتك

نورتي يا مورا الكرسي ويارب تتبسطي معانا
انا هسأل بعد ما تقواي ال cv

واللهى يا باشمهندسة انا بعمل حاجات كتير وحاسس انى مأثر حتى فى شغلى , وربنا يكرم اولادك ويكونوا احسن ناس ان شاء الله
مورا تعرفنا بنفسها علشان نعرف نسألها

@شادي: ربنا معالك ويعينك ... عموما لو انت بتعمل اللي عليك بذمة يبقي حالة عدم الرضا عن اداءك ده شئ كويس لانك بتبقي عايز توصل للافضل وبتكون دافع ليك للتجويد كمان وكمان

نورتي يا مورا يلا جاوبي

قبل ما اجاوب عايزة اقول لكل اسرة زيدونى انى مبسوطة جدا وانا معاكم وانى اول مرة اشترك فى موقع اصلا الموقع تحفة وانتوا احلى حاجة فى الموقع

يارب دايما يا مورا وانتي احلى .. يلا جاوبي بقى على أول سؤال عشان نسأل

يا ربى انت طلعتلى منين يا مادا

انتي خلاص قعدتي واتدبستي .. وابقي خلصي تارك من البشمهندسة :D:P
يلا قولي ال cv ؟

اولا اسمى مروه احمد
36سنة
بكالوريوس تجارة شعبة اداره اعمال
متزوجة وعندى محمد وحسين
اقامتى فى قها

ايه ده بلديات يعني
قوليلنا شجرة العيلة والأصدقاء المقربين في زيدوني ؟

زوجى اسمه احمد وهوابن عمى
ابنى الكبير اسمه محمد وهو فى كى جى تو وعنده 5سنين
ابنى التانى حسين وهو عنده 3 سنين
انا الاخت الكبيرة
وليا اخ اسمه محمد متزوج وعنده ولدين وبنت
واخت اسمها اسراء متزوجة وعندها ولد
وقبلهم بابا حبيبى ربنا يخليه يارب ويبارك فيه ومامتى حبيبتى
اما الاصدقاء من زيدونى فهم
1-حبيبه قلبى طنط صفاء
2-زغباوية ودى صديقتى الحميمة وكنا مع بعض فى المدرسة
3-ام العيال ودى بموت فيها
4- الاستاذ مادا بجد بعتز بصداقتك جدا لانك شخصية محترمةولذيذة جدا

وعلى فكرة فى اصدقاء بتعجبنى كتباتهم زى نورا ولوليتا وشادى والاستاذة والباشمهندسة

والاهم عمو عبد المنعم اللى مطنشنا خالص

ومش هنسى طبعا صاحب موقع زيدونى الاستاذ محمد

أولا:
أنا بعتذر عن طول وقت النحميل للمشاركات اللي لها تعليقات كثير زي دي ... عندي حلول للمشكلة دي لكن للأسف الشديد وقتي كله مش ملكي ... دعواتكم بقى!

ثانيا :
طالما محدش بيسأل ... أنا هسأل:
الموقع هدفه زيادة الوعي والثقافة لكل الناس اللي بيتكلمو عربي عن طريق تبادل الخبرات ... هل بتحاولي تطبقي اللي بتقريه وبتشاركي بيه في الموقع حقيقي ولا الموضوع أقرب لملء الفراغ ... بمعنى آخر : هل استخدامك للموقع أثر إيجابيا على حياتك ... بدون أدنى نوع من المجاملة

اكيد طبعا اثر فيا يعنى على سبيل المثال عرفت معلومات مهمة عن الاطفال بحاول اطبقها هيا طبعا احيانا تصيب واحيانا تخيب بس بجرب
بحاول اقرا المواضيع الدينيه وطبعا بلا قى حاجات كانت خفية عليا
والاهم وبصراحة انا ملحقتش اقرا كل الموضوعات بس بحاول

وعلى فكرة انا مش بجامل دا بيقولوا عليا مدب عشان مبعرفش اذوق الكلام
بجد الموقع جميل اه صحيح عجبنى جدا اهتمامك برؤيه الصورة او الفيديو قبل عرضه وكمان التعليق على المواضيع
بجد موقع محترم جدا وجميل ومواضيعه شيقه
ان شاء الله فى تقدم دائم يا رب
واخيرا شكرا على الاهتمام والسؤال لحسن انا شكلى بقى وحش
مع انى والله مكنتش عايزة اقعد على الكرسى بس الباشمهندسة
ضحكت عليا وخلتنى امام امر واقع

ربنا يخليكي يا مورا .. وانا كمان بعتز بصداقتك جدا جدا :(:(
@monem: ربنا يعينك يا بشمهندس

اكيد انتي نزلتي القاهرة ووسط البلد .. عايزك بقى تقوليلي الفرق بين قها وبين المدينة وهل نفسك تفضلي في قها ولا تنتقلي للعيش وسط المدينة ؟
ملحوظة : قها طبعا دلوقتي وصلت لقدر كبير وهائل من المدنية

انا بفي عايزة اعرف شعورك بما انك عندك ولدين هل نفسك في بنت وايه رأيك في موضوع تنظيم النسل وشعار 2 ويس

مادا@
طبعا بنزل مصر دايما وبشترى كل حاجة من مصر وسط البلد مصر الجديدة المهندسين الهرم الخ هو فى حد مبينزلش مصر
الفرق انى عشت فى البلد دى احلى سنين عمرى وكمان اتجوزت فيها ومعظم اهلى فيها بس مش كلهم لكن مصر !!فيها الفسح وكورنيش النيل وشبرا اللى بموت فيها
بس بحب قها طبعا لكن لو حكمت الظروف بالانتقال لمصر مفيش مشكلة طبعا هاقلم نفسى عادى جدا
وطبعا حضرتك مش بتتريق لما بتقول قها وصلت لقدر كبير من المدنية دا من زمان دى مدينة كل حاجة عندنا من الابرة للصاروخ بس برده بشترى اغلب طلباتى من مصر
على فكرة التكاتك عملة عندنا شغل جامد قوى تلوث سمعى وبصرى حاجة ايه تخنق
قولى بقى انت لو عشت فى مكان اهلك واصحابك واحلى ناس اتعودت عليهم فى هذا المكان هتحس بايه لو فرضت عليك الظروف الانتقال لمكان اخر تسكن فيه؟؟؟؟؟؟؟؟؟؟

يالهوى يا مورااااااااااااا ان شاء الله مش هتنزنق ياترب ينسونى يااااااااااارب اعتبرونى فراغ فى الصفحة دى:-D

اما الباشمهندسة فردا على سؤالك
اولا ولدين ورا بعض حاجة صعبة جدا فى المعاملة والتوجيه ولا الخناقات بين الاتنين اكنك بترودى اسود او قرود او كلاب
بس هما زى العسل ولمضين وروحهم خفيفة بس لما يكونوا رايقين
طبعا انا من زمان من قبل ما اتجوز نفسى اخلف 3 اطفال يعنى تنظيم النسل عندى 3 مش اتنين
وبعدين بنت طبعا هتحلى الجو شوية ما هى البنت حياة البيت وكله نعمة وفضل من عند ربنا الحمد لله

لاء يا مورا طبعا الجنة من غير ناس ماتنداس

لا متخافيش هيزنقوقى ويخدوكى على غرة زى ما حصلى من الباشمهندسة متخفيش شكة دبوس صغننة

ما ان بقول كدا برده والحمد لله انى بين اهلى وناسى دى احلى حاجة الحمد لله

الله يكون في عونك بجدالبيت اللي كله ناشف كدا مفيش بنوته تعمل جو وشقاوة في البيت ربنا يرزقك ببنوتة يارب

ربنا يخليكى بس الشقاوة دى اساسى عندى كل يوم كل يوم والحمد لله بس والله دمهم خفيف جدا ومسكرين

ربنا يخليهم ليكي وتشوفيهم احسن ناس في النيا والاهم انهم يكونوا بارين بيكي انتي ووالدهم
قولي بقا يا مورا عرفتي زوجك ازاي ؟

زوجى هو ابن عمى ومعرفتى به انه ابن عمى فقط ومعرفش حاجة عنه غير شكله بس جه عمو (حمايا )يوم وكلم بابا فى التليفون وقال جى عندنا معرفش ليه حسيت بحاجه حلوة لكن ايه بالضبط مش عارفة
مشى عمو من عندنا وبدات الحوارات المغلقة بين بابا وماما وجدتى مامه مامتى واخويا وانا زى العبيطة ولا فاهمة حاجة
وبعدين انفضت الجلسة واخبرونى وطبعا عشان بابا وماما بيحبوا احمد زوجى كانو بيمدحوا فيه والحمد لله صليت صلاة استخارة والحمد لله كنت مبسوطة
وتمت الخطوبة بعد امتحاناتى فى 2كلية تجارة
والله انا معرفت اى تفاصيل عن شغله او بيحب ايه الخ الا بعد ما لبست الشبكةوالحمد لله

زواج تقليدى مع ملرتبة الشرف بس خلال اسبوع بقى حاجة جميلة جدا الحمد لله

هما الاهالي دول مبيتغيروش ابدا ابدا الطريقة واحدة مهما بعدوا ومر الزمن حاجة غريبة فعلا:(

لا يابيتغيروا كان الوضع مختلف تماما مع اختى الصغيرة على العكس تماما اصل الابهات كانو بيجربوا فينا الاول دا احنا كنا غلابة والله

ههههههههههههه لاء والله الاسلوب واحد انا يمكن انا اللي واخدة راحتي انا اختي بابا قالها يا توافقي ياتوافقي وطبعا مكنش فيه مفر ففوافقت كوميديا صح

يامورا ايه الصفة اللى بتحبيها فى جوزك واتعلمتيها منه؟وايه اللى نفسك يغيرها؟

monem: انت اللى جبتوا لنفسم ايه يابنى اللى دخلك الموضوع المليان تعليقات ده عموما منور وفي انتظارك على الكرسي

بس انا يا نورا وافقت بمزاجى وبجد كنت هندم لو رفضت لان جوزى رجل بكل ما تحمله الكلمة من معانى

حرام عليكى يا رانيا اخوكى قال يجبر بخاطرى ومحدش معبرنى ايه الرخامة بتاعتك دى ولا انتى متغاظة انه مسالكيش

حمدل على سلامة النت عندك كفارة ومنورة الموقع يا جميل

لا والله انا برأف بحاله من كمية التعليقات اللى فى الموضوع ده انه يقعد يقراها لانه فعلا مش فاضي

وكمان مبسوطة انه دخل هنا علشان مكنتش متوقعة يدخل فيه وبمهدله الطريق انه يقعد عليه خليه بقى بعدك ايه رايك لما بس الاول نخلص عليكي من الاسئلة:D

رانيا@
بحب حنيته جدا ومواقفه الجميلة مع كل الناس بس كان نفسى اتعلم منه ازاى اوزن الامور صح لكن دايما يقولى انتى متعملتيش مع ناس ابدا طب والله اعمل ايه
بس دلوقتى ابتديت افهم بعض الامور بطريقة تتناسب مع الحياه اللى عيشنها
اما اللى نفسى يغيرها العصبية ثم العصبيه ثم العصبيه

تصدقى احنا فعلا لازم ندبسه ونخليه يقعد ع الكرسى بس المشكله
انه اننا لازم نجهز اسئله من العيار التقيل تتناسب معاه ولا ايه
بس اوعى يطردنا من الموقع انا معرفكيش هههههه

لا متخافيش بس هاحاول اجهز له اسئلة جامدة فعلا

انا معجب جدا بإجاباتك كلها يا مورا .. بجد عاملة جو تحفة للكرسي
بالنسبة ليارا و للبشمهندس محمد فمش هيفلتوا وكمان عمو عبد المنعم .. كله هيقعد على الكرسي :D:P

ربنا يخليك يا مادا دا من ذوقك وان شاء الله مش هيفلتو بس المشكلة فى عمو عبد المنعم هنمسكه ازاى

سيبي الموضوع ده عليا

اوكيه لما نشوف

مورا خليكي فاكرة السؤال اللي سألتيه ليا عشان لما اقعد على الكرسي تبقي تسأليه

حاضر من عنيا

بس خليك فاكر انا سالتك السؤال من قبل متقعد ع الكرسى بس انت اقعد وهتشوف !؟؟؟؟؟؟؟؟

ربنا يستر عشان انا كل مرة بزوغ وبقول خليني للآخر

ماهو حرام كدا كفاية علي مورا ... زي مادبيستك في الكرسي هشيلك منه عشان ماتبقيش منفسنة مني خلاص كفاية عليك كدا اختاري حد تاني وسني سنانك تطلعي فيه القديم والجديد

بيني وبينيك كدا من غير ماحد يسمعنا اختاري مادا ... عشان هو بيتهرب بس ماتقوليش لحد ان انا اللي وزيتك عليه

يا وحشه والله ابدا دا انا بحبك بالرغم انى مشفتكيش خلاص مخصماكى

هو المفروض انى اختار على العموم امامى 3 اشخاص مادا عمو عبد المنعم الاستاذ محمد اختاروا انتو بقى ويا ريت بالترتيب من غير ما حد يتهرب من الكرسى

الاستاذ مادا بناء على طلب الجماهير وانا اولهم اتفضل الكرسى مستنيك

اهلا يامادا منور (من حفر حفرة لاخيه وقع فيها) ها ها ها ها:D
أحلامك ايه او نفسك توصل لإيه؟دا كدا بس لغاية ماجهز اسئلة جامدة شوية

بناء على طلب الاستاذ مادا فى هذا السؤال
مادا لو عشت فى مكان اهلك واصحابك واحلى ناس اتعودت عليهم فى هذا المكان هتحس بايه لو فرضت عليك الظروف الانتقال لمكان اخر تسكن فيه

مادا
سؤالك المعتاد الcv بتاعتك

متنسوش يارا فى كرسى الاعتراف

ميرسي ليكي يا مورا وعلى اعجابك بالمواضيع بتاعتي
ربنايجبر بخاطرك

والحمد لله انكم وصلتم لمادا لانه قال انه اخر واحد يعني الكرسي هايقفل بعديه لان الزنقة وحشة قووووووووووووووي

وسؤالي ليه ايه افضل قرأتك
لان ماشاءالله ماشاءالله الثقافة عندك عالية قوي وافكارك معظمها ان ماكنش كلها جميلة
لدرجة اني بتمنى اني ابني يبقى زيك
انا مش بحسد والله
وربنا يبارك فيك يا ابني

قبل ما اجاوب
@البشمهندسة : ليه كده بس
@مورا : أهون عليكي داحنا بلديات حتى وبعدين لسه في يارا والأستاذة غير عمو وبشمهندس محمد .. يلا الخيرة فيما اختاره الله
@زغباوية : ربنا يخليكي على اللقب .. مع انه كبير اوي عليا
@الأستاذة : ربنا يكرم حضرتك انا لساني عاجز عن الرد ويارب ابقى عند حسن ظنك بيا ويباركلك في ابن حضرتك يبقى احسن الناس

استعنا على الشقى بالله
هبدأ بسؤال مورا ال cv :
الاسم: محمد سعد سعيد
السن : 20 سنة (بعد 3 شهور)
طالب في سنة تالتة بكلية الحاسبات والمعلومات جامعة حلوان
أعزب ونفسي أتجوز بقى
ساكن في شبرا الخيمة ومسقط رأسي .. حبيبة قلبي قها
عندي أخت واحدة بس هاجر وهي معانا هنا في زيدوني .. (مصلحة مليش جيش)
مامتي حبيبة قلبي ربنا يخليهالي يارب
ان شاء الله المهنة .. مبرمج

سؤال الزغباوية :
انا احلامي ملهاش حدود .. طموح لأقصى درجة ممكن تتخيليها .. مثابر ولو فكرت في حاجة بوصلها الحمد لله ومش بتنازل او بسلم بسهولة .. ساعات كنت بضعف واستسلمت قبل كده لكن بعد كده اتعلمت اواجه واصمد ومستسلمش ابدا والحمد لله خطوة خطوة بحقق احلامي ..
بحلم ابقى مبرمج شاطر ومشهور .. عندي افكار ياما نفسي اخدم وانفع بيها غيري .. بحلم ربنا يجمعني على خير مع الانسانة اللي اختارها قلبي وميفرقش بينا ابدا .. بحلم اخلي ماما دايما مبسوطة ومرتاحة ومش ناقصها حاجة عشان هي تعبت عشاني كتييير اوي وعملت عشاني اللي محدش عمله .. وضحت بنفسها ونسيتها خالص عشاني وانا مهما عملت مقصر اوي اوي اوي في حقها .. في حلم كده كان زمان بيروادني وهو اني ابقى اعلامي كبير بس بعدت عنه ..
بحلم اني اعيش حياة كريمة ليست حياة ترف او بزخ .. لوكنها حياة بسيطة اهم ما يتوفر بها هو الرضا من الله والحب من الله والناس
بحلم بأولاد بارين .. عشانهم اضحي بأي حاجة .. راسملهم صورة في خيالي مش هرتاح الا لما يبقوا فيها ان شاء الله

يارب احلامك كلها تتحقق يامادا
سؤال صغنن:
تقول لنا على مواصفات للفتاة اللى هتكون ان شاء الله زوجتك

سؤال مورا التاني:
اكيد هحس بالغربة والعزلة ومش هرتاح الا لما ارجع تاني .. لأن كل واحد بيحن لأصله وذكرياته والمكان اللي تربى فيه واللي فيه عاش اجما ايام عمره مع اجمل ناس عرفهم وحبهم .. بس اكيد دوام الحال من المحال والواحد لازم يتأقلم على كل جديد .. ومهما حصل هيفضل الأصل في القلب هو رقم واحد

ممكن تعيدي كتابة السؤال تاني يا أستاذة عشان مش واضح ؟

لو جتلك تذكرة سفر هديه تتمنى تكون لاى بلد وليه ومين يكون معاك فى الرحله دى

سؤال خالتو صفاء :
تكون مليحة .. ((( خجووووووووووولة ))) عاقلة .. محترمة .. رقيقة .. تفهمني من نظرة عيني دون أن اتكلم .. تحسن التصرف .. طيبة وحنينة .. ملتزمة .. مطيعة .. متفاهمة .. أصلها طيب .. صبورة .. ترعى الله في بيتها وفي اولادها وفيا .. اكون انا اهم حاجة في حياتها .. مخلصة .. قنوعة .. تجيد التعامل مع الآخرين .. صوتها منخفض .. تدفعني إلى فعل الخير وصلة الرحم .. تنبهني لأخطائي .. متواضعة .. كتومة وما بيني وبينها لنا نحن الاثنان فقط .. ست بيت شاطرة ( مش مهم اوي عشان انا هساعدها وهعملها كل اللي نفسها فيه بايدي ) .. قليلة الكلام ( مش رغاية ) .. بسيطة وغير متكلفة في مظهرها .. واقعية .. طيبة الكلام

بس كده يا خالتو

انت قنوع اوى يا مادا , المهم بقى انك تقدر تديها كل الحاجات دى برضة

هختار تايلاند عشان أجمل بلد في الدنيا وفيها مناظر طبيعية ملهاش حل وشعبها طيب أوي أوي ومنظمين جدا .. وهاخد معايا مراتي طبعا بس لما تيجي بس

أكيد يا شادي .. ربنا يقدرني واديها ده كله واكتر كمان
يلا اسأل بقى

شوف يا محمد انت ردودك كلها جميلة ومثالية وحتى فتاه احلامك مثالية برضة , سؤالى بقى هل انت شايف انك ممكن تلاقى واحدة مثالية كدة ؟ طيب هل انت شايف نفسك اصلا شاب مثالى وناجح؟ , انت شايف ان مجتمعنا دة ينفع معاه الانسان المثالى وينجح؟ , اكتر مكان بتحبه وبتستريح فيه وبتتمنى تكون لوحدك او معاك حبيبتك او مراتك , شايف نفسك هتكون اية كمان 5 سنين ؟ بتعمل اية لو حد استفذك فى الكلام وكان هو دتور فى الجامعة او ظابط فى القسم او مدير شركة بيعملك مقابة ؟ رد على كل الاسئلة دى يا عبقرينو من غير مثالية

عيقرينو انت جيت وانا مش هنا بس لحقتك يا جامد ايه الحاجات الفظيعة اللي انت عايزها دي بس بما انك كتبتها تبقا لاقيتها ;)مش كدا ولا ايه ؟

هطلب منك حاجة صعبة بما اني مش عارفة افكر فيي اسئلة دلوقتي يا عبقرينو انك تجاوب على كل سؤال سألته لكل واحد قعد عالكرسي

بالنسبة لفتاة أحلامي فالحمد لله هي موجودة وبحمد ربنا عليه ليل ونهار عشان رزقني بيها لأني لقيت فيها اللي عمري ما تخيلت او خطر في بالي انه يبقى موجود في انسانة في الزمن ده
انا شايف نفسي ناجح الحمد لله ولسه قدامي سكة طويلة ان شاء الله بس مش مثالي طبعا .. لأني عشان أحقق المثالية دي لازم تتوجد حاجات كتير حواليا .. حتى لو انا جوايا المبادئ والقيم المثاليه اكيد مهما عملت وحاولت عمري ما هوصلها لأنها ببساطة شديدة هتتنافر مع المجتمع اللي احنا فيه
وعشان نحققها محتاجين نغير مجتمع وفكر بأكمله
بس مش معنى كده اننا نستسلم وننجرف مع التيار .. لازم الواحد يقاوم ويعمل الصح مهما واجه من عقبات بل واننا نحاول على اد ما نقدر اننا نصلح الفكر ده .. ناخد بإيد المنحرف ونحاول نحطه على الطريق الصح .. وما دام كله لوجه الله وبننوي الخير ربنا هيقف جنبنا .. وعلى فكرة انا بتكلم عن تجارب شخصية

اكتر مكان بستريح فيه هو موجود على النيل.. مكان كده محدش يعرفه اوي بروحه دايما لوحدي لما ببقى متضايق هو في المظلات عندنا في شبرا .. بفكر في كل حاجة عملتها وبفضل اقيم تصرفاتي واحاسب نفسي .. وبمشي من هناك وانا مرتاااح اوي

كمان 5 سنين هكون لسه في بداية حياتي .. ان شاء الله أكون حققت حلمي وابقى مبرمج واكون اتجوزت من الانسانة اللي اخترتها

بالنسبة لموضوع الاستفذاذ .. فانا بارد لأقصى درجة تتخيلها بس مش دايما .. يعني الموضوع بيبقى حسب الموقف .. بس في الغالب بتصرف بعقل ومبتهورش واتعصب عشان مضيعش حقي ومخليش حد يركبني غلط ..
يارب تكون اجباتي واضحة

ربنا يكرمك بيها يارب وتكون ليك طالما هيا غالية عندك وقى كدة , بالنسبة لاجابتك ياسيدى زى الفل لكن حاسس ببعض المثالية فى موضوع المجتمع دة مع ان انا حذرتك وبصراحة موضوع كمان 5 سنين دة رد ممكن يرده اى حد لو عايز تبقى عبقرى لازم تشزف نفسك عبقرى وتبقى عارف هاتبقى ازاى كله طبعا بإذن ربنا انت الوحيد اللى تقلت عليك فى الاسئلة وجاوبت عليك وانتقدتك بكل صراحة علشان احنا رجالة زى بعض مش اكتر وربنا يقويك وينجحك وخليك واثق فى نفسك وربنا هايكرمك ان شاء الله

@نورا : بالنسبة للنقطة الأولى فالحمد لله لقيتها
بالنسبة للسؤال التاني .. فليه الافترا ده هو انا عملت حاجة فيكم :D:D

ربنا يكرمك يا شادي وبجد بدون مجاملة أقوى وأجمل أسئلة اتسألتها من ساعة ما لعبت اللعبة دي من زمان
ويارب انت كمان تحقق كل اللي بتحلم بيه ونحضر فرحك قريب بقى

حبيبى يا محمد ان شاء الله عن قريب , هسيب غيرى يسألك بقى وانسحب انا

ايه الحاجة اللى تقدر تعملها للبلد او فى منطقتك حاليا وعملته اولو لسة ماعملتهوش ايه اللى خلاك ماتبدأش فيه

بما إنك لقيت فتاة أحلامك بتتصرف إزاي مع البنات اللي ماتعرفش وبتحاول يمكن تبقى عروس المستقبل؟أو عرايس العيلة ونظام الواد لبنت عمه وخاله والحاجات دي؟وبتتصرف إزاي مع البنات والولاد الموقعتيه اللي مابيصدقوا يلاقوا أتنين مبسوطين ويصروا على عكننة الجو؟
وبالنسبة للمثالية هل أنت شايف أنك فعلا مثالي وقدوة؟ ولا ليك عيوب وهل بتعرف تتصرف مع عيوبك صح وتتصاحب عليها ولا هي اللي بتغلبك؟ولو حصل وغلبتك بتعمل إيه؟ولو قابلت حد مش مثالي ومليان عيوب ممكن تتصاحب عليه؟أو لو حد حبيبك قوي أعترفلك بصراحه على عيوب جوهرية فيه تفضل مصاحبه ولاهتطرده من قائمة أصحابك؟ولوقابلت مشكلة جوهرية فحياتك ماتتحلش غير بطريقة غير مثالية تعمل إيه؟
كده يادوبك انا بصبح عليك يامادا أنت أخويا الصغير وبما إنك صاحب أقتراح اللعبة فالسؤال لينا بعشرة ليك:-Pولا إيه؟جاوب بقى:-D

ههههههههههههههههه شكل كله بيحيك وناويلك اتفرج بقى على الاسئلة , رد يا عبقرينو

يا مادااااااااااااااااا انت فين فين الاجابة عالاسئلة بتاعتي

الهاتف الذي تتصلون به غير موجود بالخدمة .. ايه يا جماعة الحب ده كله .. مكنتش اعرف معزتي في قلبكم اوي كده :D:D

@نورا : انتي بتتكلمي بجد في سئالك ولا بتهرجي
@شادي : ارد على ايه ولا ايه .. ادعيلي يا شادي
@لوليتا : أحلى صباح يا لوليتا .. ماشي ماشي

أجاوب بقى وأمري لله
سؤال الزغباوية:
سؤالك جميل وليه علاقة بالموضوع اللي انتي طرحتيه قبل كده في اكتر من مشاركة .. من وانا طالب وحتى الآن بشارك في اعمال كتير تفيد المجتمع وتنميه .. شاركت في قوافل طبية مجانية لمساعدة اهالي الحي اللي انا فيه وغيره .. شاركت في حملات توعية كتير جدا زي حملة لا للتدخين وحملة لمواجهة الإدمان وتعاطي المخدرات وكنت بنزل الشارع وبتكلم مع الناس .. شاركت في تنظيم ثورة المترو اللي كان هدفها توعية الناس بالاتزام داخل المترو وعدم تشويهه والاتزام بأبواب الصعود والنزول وعدم التزاحم ودفع اللآخرين للمحافظة على سلامة الجميع .. وحاجات تانية كتير اوي استفاد منها كتير مش هقول كل الناس .. بس حققت الحمد لله نجاح كبير واتغير ولو جزء بسيط للأحسن .. وهو ده دور المثقفين والمتعلمين .. مش بس التوعية من خلال الكلام .. لا اننا نشارك ونعمل بإيدنا .. نعلم غيرنا الصح .. مش مجرد اننا نوجهه .. في اللي اتكلموا كتير لكن من غير نتيجة .. المشاركة المجتمعية وأعمال الخدمة العامة هي اللي بتجيب نتيجة .. الناس لما بتشوفنا بنعمل حاجة حلوة بتبدأ تفكر ليه منعملش زيهم وييجوا ويسألونا ويتناقشوا معانا .. يفهموا ويبدأ يغيروا .. في اللي بيقتنع وبيبدأ يغير من نفسه .. في اللي بيقول ده كلام فاضي وفي وفي وفي .. ولسه عندي أمل اننا نغير .. انا ومل اللي معايا هنعمل اللي نقدر عليه في شارعنا في الجامعة في المترو في الجناين .. في إشارات المرور وفي كل مكان .. مش مستنين حاجة من حد ولا بنعمل كده عشان شهرة .. هدفنا اننا نغير أي حاجة غلط حوايلنا وان شاء الله مكملين انا وشباب كتير معايا

في حاجات كتير لسه نفسي أشارك فيها وابدأ فيها .. في حاجات حاولت أبدأ فيها وواجهت احباطات سواء من الناس او من المسئوليين .. بس انا مبزهقش والفريق اللي معايا كله حماس وربنا معانا ونحقق كل اللي بنحلم ونبنفكر فيه

صعب اوي يا نورا اجاوب على كل الأسئلة دي وبعدين في اسئلة مش متناسبة معايا خالص يعني في عن الأبناء وعن الحموات وعن الشغل وكل ده انا لسه مليش علاقة بيه .. انتي اختاري منهم اللي انتي عايزاه وانا هجاوبك من عنيا

مش عارفة اقولك غير ربنا يوفقك انت وكل اللى معاك وماتزهقش مهما واجهت ومصر مش هاتتظبط غير لو كل الناس بدأوا يشتغلوا كدا بجد ربنا يحقق كل اللى بتتكمنوه ويعينكم ويوقفلكم اللى يساعدكم

طيب سؤال بقى مش بتقول اللى بتعملوه هنا على الموقع ليه ؟؟؟؟علشان الكل يستفيد واللى يقدر يعمل زيكم يتشجع وعلشان نحس ان فيه ناس مننا بتعمل وبتشتغل اهيه

عريضة لوليتا بقى اللي مليانة أسئلة كلها ملعوبة :P:D

بالنسبة لأول نقطة وموضوع البنات اللي متعرفش اني مرتبط واخترت الانسانة اللي هتشاركني حياتي فبتعامل عادي وبطبيعتي كأنهم اخواتي ده غير اني بريح نفسي وبقول بصراحة وفي وشهم بس طبعا بطريقة فيها شياكة عشان مجرحش احساسهم .. والحمد لله انا عديت من المرحلة دي بأمان من القرايب لكن الغُرب لسه شوية كل يوم في جديد وده عشان انا بتعامل مع الناس كلها بذوق وشياكة زيادة شوية وعشان انا بطبعي اجتماعي وعلاقاتي كتير وطول الوقت بتعرف على ناس جديدة فوقعت في مشاكل كتير بسبب كده بخصوص الموضوع ده .. والحمد لله كل بيعدي على خير في الآخر

بالنسبة للموقعتية فالحمد لله لسه مقابلتش حد منهم لأن كل اللي حوالينا أصحابنا وبيحبونا وبيتمنولنا الخير .. وحتى لو ده حصل فمفيش قلق لأن انا وهي عاقلين ومتفاهمين جدا جدا وعارفين بعض كويس وثقتنا في بعض ثقة عمياء الحمد لله وصعب اوي ان حد يقدر يأثر على الثقة دي او انه يهز صورة أي حد فينا عند التاني

مفيش انسان كامل فمقدرش اقول اني مثالي بكل ما تحمله الكلمة من معنى .. لكن الحمد لله انا طول عمري الطالب المثالي والأفضل بين كل اللي حواليا في كل شيء سواء الأخلاق او الدراسة او الثقافة او او وبحس دايما ده من نظرة الناس ليا ومن حبهم ليا اللي بشوفه دايما في تعاملهم وده بالإجماع من كل الناس اللي اعرفهم وكمان اللي بتعرف عليهم للمرة الأولى يعني بفضل الله مقابلتش حد او متعرفتش على حد الا وكانت نظرته ليا كده .. مش معنى ده كله اني خالي من العيوب .. لكن عيوبي الحمد لله مسيطر عليها وانا دايما معترف بيها وهي العصبية والغيرة والتسرع بس الحمد لله بسيطر عليهم .. غلبتني أحيانا واضعفت واستسلمت في اوقات ووقعت في مشاكل بسببها لكن سرعان ما بتدارك الموقف وبفوق وارجع تاني و الحمد لله بتعدي علي خير وبنتصر في الآخر وبحقق اللي انا عايزه

موضوع الأصحاب .. انا ليا أصحاب من كل نوع ومن كل سن .. لو قابلت حد فيه عيوب عادي ممكن اصحابه بس لو انا من جوايا مقتنع انه انسان كويس وممكن يصلح عيوبه دي لو لقى اللي ياخد بإيده ويساعده ولو ليا صاحب وفيه عيوب بفضل مصاحبه وبحاول اني أساعده لأني ببقى واثق انه من جواه كويس بس محتاج اللي يقف جنبه .. ومش بيأس بسهولة لكن لو هو من جواه مش مستعد ومش عنده الإرادة وحابب انه يتغير فبيبقى مجرد شخص عادي بالنسبة ليا مش صديق يعني مجرد السلام والسؤال في المناسبات المختلفة وولو احتاج مني اي حاجة أقدر اساعده فيها بس كده .. وعلى فكرة انا ليا اصحاب كتير جدا كده والحمد لله قدرت اني اغير فيهم حاجات كتير .. اللي كان بيدخن وبطل .. اللي كان مهمل في درساته ومكبر دماغه وبدأ يهتم ..... إلخ بجد ببقى في منتهى السعادة لما ده بيحصل

مهما حصل ومهما كانت المشكلة اللي انا فيها لو قدامي طريقة مش مثالية بس هتحل المشكلة وطريقة مثالية ومفيهاش غلط بس هتضرني او هتتعبني فبختار اني اتعب لأن ببساطة شديدة لو اخترت الطريقة اللي مش مثالية يبقى بضحك على نفسي لأن ربنا مش هيباركلي وهقع في مشاكل تانية اكبر واكبر .. فبختار الصح عشان ربنا يكرمن واكيد مدام بتعامل بضمير سليم ولوجه الله ربنا هيذلل كل الصعوبات والمشكلة هتتحل بس اهم حاجة اني انوي الخير ومفكرش في اي طرق ملتوية

ربنا يسمع منك يا زغباوية
وان شاء الله أي حملة او اي عمل خير او خدمة عامة هنوه عنه هنا واللي حابب يشارك يتفضل .. ده غير فكرة كده هتكون انطلاقتها من هنا من زيدوني هقولك عليها بس بعدين لما تكمل كل جوانبها

انا عاوزة العب معاكووووووووووووووووووووووووووووووووووو مليش دعوة

لو بقيت رئيس الجمهورية ومتاح ليك تنفذ قرار واحد بس وتسيب الحكم .. هتقرر ايه ؟
ايه اصعب موقف قابلته في حياتك واتعاملت معاه ازاي ؟
جاوب على ما اكمل بقا

يالا بسرعة الحقي اسئلي انتي كدا دخلتي خلاص يايارا

احم احم حيث كدة ....... وسعولى بقااااااااااااااااااااااااااااااااااااااا
لو صديق عمرك خان وغلط فيك هتسامحة؟
ولو كنت رئيس جمهورية اية اول قرار هتاخدة؟

اهلا اهلا .... هو انت اللي قاعد عكرسي معلش جيت متأخر بس ملحوقة

@مورا :طبعا انا ماقدرش علي زعلك ... المسامح كريم
@الاستاذة :مش هتهربي انا اصلا كنت مختاراكي بعد مني بس عرفت انك كنتي متوعكة فأجلناكي شويه لما تستردي صحتك... الف لا بأس عليكي وحمدلله علي سلامتك.
@شادي : خذ راحتك الموقع مافهوش تفرقة عنصرية بين ولاد وبنات قول اللي نفسك فيه طالما هو بدون تجريح او خروج عن اللياقة يبقي ولا يهمك اعترض واسأل وانتقد زي مانت عاوز بلاش حزب الرجالة وحزب الستات

@مادا :اولا ايه رأيك في اللقب بتاع مادا لاماضا عجبك ولا نغيره قول بدون احراج
ايه رأيك في الصداقة بين الولد والبنت من وجهة نظرك يعني ينفع يبقي ليك صحبات وتقبل ان زوجة المستقبل يكون ليها اصحاب رجال ؟

يا باشمهندسة مش حزب الستات وحزب الرجالة بس انا بقدر امسك نفسى لما اشوف اتنين بيتكلموا قدامى وما انتقدهمش , لكن لما انا اكون اللى بسأل مش بقدر امسك نفسى , وهحاول افهمك دة , يعنى انا ردى على محمد انه عايش فى ماية البطيخ ومسكت نفسى برضة وما قولتهاش مع اننا رجالة زى بعض وهو مش هايزعل مش عايز ابقى انتقد حد هو مرتاح لفكره و رأيه ويزعل منى , احنا داخلين اللعبة للتعارف والتسالى ليس اكثر

معلومة هو ربنا يكرمه ويتخرج وها بعرف ساعتها انا قولت كدة لية , علشان كلنا كنا زيه فى نفس مكانه , انا كنت فاكر نفسى ها اتجوز اول لما نتيجة رابعة طلعت , ادينى متخرخ بقالى 4 سنين ومفيش خطوبة لسة ومفيش الحاجات اللى الواحد حلم بيها , انا بعد كدة عملت stop وبقيت واقعى وعرفت انى علشان اغير الناس اهم حاجة اغير نفسى مش اغيرهم هما لأن الطوفان كبير وكان غيرى وغيره اشطر , وانا كاتب حاجة زى كدة كيف كان اختراع النعال

يا شادى تفائل بالخير تنله مين عارف يمكن ظروف مادا تكون افضل من ناس كتير ان شاء الله ربنا يكرمك ويفتح كل الابواب المغلقة كل حاجة ربنا كتبها عنده بمعاد ومسيرها تفرج ان شاء الله بس انت قول يا رب
ومتعقدش الراجل الواحد مهما سمع نصايح مش بيسمع ولا يهتم الا لما يجرب بنفسه
وساعتها هيكون هو الناصح الامين

قبل ما اكمل إجابتي
اولا اكيد انا عمري ما هزعل منك يا شادي لأنك بتعرض وجهة نظرك .. بس انا ليا تعليق على كلامك في موضوع اني عايش في مية البطيخ او اني متفائل زيادة عن اللزوم .. انا مبحبش احبط نفسي مهما كان كل اللي حواليا ميشجعش على كده .. مش معنى ان الواقع دلوقتي ان لما اتخرج واتمرمط ومحققش اللي بحلم بيه اول ما اتخرج يبقى دي النهاية .. الواقعية اللي بجد اني اخلق لنفسي واقع جديد واحقق فيه اللي انا عايزة .. هتقولي دي مثالية هقولك لا .. لأن في كتير مستسلموش للواقع ده وبداوا وكملوا المشوار ونجحوا وتغلبوا على الواقع اللي اللي انتي بتتكلم عنه .. مش معنى اني متفائل بإني هنجح في تحقيق كل احلامي يبقى انا كده مش واقعي .. انا طول حياتي وانا كده بتفائل وبحط هدف قدام عينيا وببقى واثق في الله ثم في نفسي اني هحققه .. مهما كان صعب المنال ومهما كنت هتعب عشان احقق الحلم ده .. المهم اني مستسلمش للإحباطات والعراقيل اللي هتبقى في سكتي .. على فكرة في غيري كتيييير اوي نجحو وانا واخدهم قدوة ليا وماشي على طريقهم وهم يمكن مش مشهورين لأنهم ناس عاديين مش هقولك انهم مثلا ناذج مشهورة وكده .. وانت ربنا يكرمك وتحقق كل اللي بتحلم بيه .. ويبعد عنك أي مشاكل تواجهها

ماشى يا مورا مش هعقده ولا حاجة انا قولت اسكت الباشمهندسة هيا اللى قالتلى انتقد , وكمان اتمنى ظروف محمد واصحابى واهلى وكل الناس تبقى بخير دى حاجة تفرح , وعلى فكرة هى المسألة مش مسألة مفيش , انا لو عايز اتجوز فى شهر هتجوز الحمد لله , بس الواحد شايف مستوى معين عايز يحققه فى بيته هو دة اللى كل الناس نفسها فيه , شقة محترمة , عربية , عفش كويس , يا مورا الوضع فعلا غصب عننا بقى صعب وانا مش مجامل انا واقعى ومكنتش عايز افتح سيرة علشان مش بحب المثالية انا بحب النجاح وعلشان برضة مش عايز حد يزعل منى , انا اقدر اكتب كتب عن المثالية بس انا مش بوشين علشان انا مش بعمل كدة , انا بحترم نفسى وبحترم الناس , لو لقيت حد عايز مساعدة مش شرط تكون فلوس فى اى حاجة بحاول اعملهاله , مش بحب اغلط فى حد ولاحد يغلط فيا , بحب افكر كويس انا بعمل اية , احب اكون متميز عن غيرى فى كل حاجة شغلى مظهرى كلامى افكارى ارائى مش بحب التقليدى خالص,, انا واقعى ليس اكثر كلنا بنتمنى الخير لكن مش هنقعد نستناه على جمب لازم تتحرك وتشوف مستقبلك وانت بكل ادب واخلاق , لازم تكون شاطر فى شغلك وتكون مدير بنك ومرتبك 50 الف جنيه احسن ماتكون الموظف المثالى وتاخد مكافأة 1000 جنيه , وكله بالادب والاخلاق والمخ اللى ربنا خلقههولنا علشان نفكر بيه , يارب تكونوا فهمتوا قصدى اية من غير محد فيكو يزعل وكل واحد له رأيه وتفكيره و وجهة نظرة اللى مقتنع بيها

أكمل إجابات بقى
سؤال نورا:
القرار هو تعيين نفسي رئيسا لفترة رئلسية جديدة
لا بجد هقرر إقالة كل الوزراء الموجودين وتعيين وزراء جدد من الشباب وان تكون مقاليد الحكم بالبلاد في أيديهم وأسلم الحكم لشاب بدره

أصعب موقف واجهته في حياتي هو مشكلة مع عائلة والدي وبالتحديد اعمامي وكان السبب مشكلة كبيرة وصلت للقضاء .. لكي ان تتخيلي لما تقفي قدام اعمامك في المحكمة بسبب مشكلة عائلية والأصعب من ده ان الوالد يقف في صفهم مع ان هم المخطئين ومش عايز اقول المجرمين
واتعاملت معاه في الأول بعصبية وتهور وجنون لكن بوجود ناس كبير وعاقلة وقفوا جنبي ووجهوني صح ولولا هم بعد ربنا مكنتش المشكلة خلصت منهم عمو أحمد عبد العزيز والد شادي وعمو عبد المنعم وخالو حسن خليل (أخو خالتو صفاء) وخالو عادل أخو ماما والعيلة كلها .. بجد هو ده اصعب موقف عيشته واللي لحد دلوقتي بعاني نفسيا منه

يا محمد انا مش بحبطك ولا انا اقصد دة , وكمان مين قالك انى مغيرتش الواقع بتاعى , انا اساسا بقولك كل الكلام دة علشان تغير الواقع بتاعك , بص يا محمد انت ماتعرفش ال cv بتاعى علشان لسة ما تكلمناش , انا عمرى 25 سنة بشتغل مدير مالى لاكبر شركة تخليص جمركى فى ميناء جدة الاسلامى بالسعودية , ودى جت فى الاول حظ وكانت لفترة 8 ايام فقط وانا اثبت كافأتى لدرجة انهم رفدو المدير وخلونى انا وانا المسؤل عن كل حركة مالية بالشركة وبتدخل فى اكتر من 80% من الشؤن الادارية للشركة من تعين موظفين او رفد او جزاء , يا محمد انا بحمد ربنا انى ناجح واخت خبرة فى 3 سنين مكنتش ها اخدها فى 20 سنة , اللى بيحطم طموحات الناس دة بيكون انسان فاشل وعايز النس فاشلة زيه , بس انا انسان ناجح وعايزك انجح منى وانا اكبر منك فى السن والخبرة ولو زعلان من النصيحة بلاش منها وما تزعلش حقك عليا قدام الموقع كله

لا والله انا مزعلتش خالص وانت مفمتش قصدي .. انا فهمت كلامك كله وانا عمري ما برفض نصيحة من حد سواء اكبر مني او اصغر مني .. انت كلامك كان من خلال تجربة انت عيشتها وخبر ةانت اكتسبتها زي ما قلت .. انا مهما كان لسة قدامي سكة طويلة ولسه هكتسب خبرات كتير تانية .. ومهما كانت الخبرات اللي عندي فمش هتقارن بخبراتك ودي حاجة انا متأكد منها .. كل اللي حبيت اقوله اني بعيش بتفكيري وبطريقتي مهما كان ايه اللي حاوليا .. مش معنى كده اني بعزل نفسي عن المجتمع اللي انا فيه والظروف اللي حواليا .. لا انا اللي بخلق الواقع ده لنفسي وانا بمجهودي وفكري وبمساعدة اللي حواليا بوصل للي انا عايزة والحمد لله لحد دلوقتي من ساعة ما اتولدت مفيش حاجة بحطها في دماغي الا وبحققها وربنا يكرمني ويارب واحقق كل اللي بحلم بيه .. وربنا يزيدك نجاح وتقدم ونشوفك في اكبر مكان وتوصل للمستوى اللي بتحلم بيه وزيادة .. ومتقولش كده تاني عشان انا مزعلتش واحنا بنتكلم وبنتناقش ومفيش اي مجال للزعل خالص :(:(

سؤال يارا:
بالنسبة لموضوع صديق عمري فهي حصلت وسامحته ونسيت اللي حصل ومهما عمل عمري ما هستغنى عنه ولا حتى هشيل منه في قلبي ولا هعايره في يوم باللي عمله
أول قرار هاخده لو بقيت رئيس جمهورية هو تسليم الأرض الصحرواية دي للشباب اللي قاعد مبيشتغلش واوفرلهم سكن هناك ومرافق وكل اللي محتاجينه عشان يزرعوا ويبنوا هناك ويعمروها .. وتبقى عمار ومدن ينتقل الناس ليها ونحل مشكلة الزيادة السكانية ونعمل اكتفاء ذاتي ومنحتجش حاجة ولا معونة من حد

سؤال البشمهندسة:
بالنسبة لمادا لماضا فنوبروبليم
بالنسبة للسؤال التاني فرأيي ان الصداقة بين الرجل والمرأة ممكن تبقى من أنجح الصداقات واللي مبتتوجدش بين الأصدقاء اللي من نفس النوع يعني بين الرجال والرجال او النساء والنساء .. ولكن الصداقة بين الولد والبنت او الراجل والست لازم يكون ليها حدود ومعايير ومتبقاش مطلقة زي الصداقة بين الرجل والرجل .. والحدود والضوابط دي اللي بيفرضها علينا هو ديننا ومجتمعنا وعاداتنا .. ويمكن في المجتمع الشرقي بينظروا لأي صداقة بين الرجل والمرأة نظرة شك لأنها خارج نطاق الزواج وتكون فكرة الصداقة البريئة مجرد ظل
وعشان المجتمع لشرقي يتفهم ان ممكن تكون في صداقة بين الرجل والمرأة او بين الشاب والفتاة في إطار الاحترام والمشاركة في العمل إلخ لازم يغير فكر كامل وعادات مترسخة وموروثة عن الأجداد ..
انا ليا صديقات وبنتعامل مع بعض عادي جدا ولكن في حدود الأخلاق والاحترام لأنهم في الاخر زي أختي بالظبط واللي مش هقبله على أختي مش هقبله عليهم
بالنسبة لزوجة المستقبل فانا مش هكدب عليكي انا غيور جدا جدا ومببقاش متصور انها تكلم راجل غيري .. بس لو الراجل ده مثلا صديق في العمل او صديق دراسة مثلا والكلام بينهم يكون في حدود معينة وهي تشركني في هذا الكلام فمفيش أي مشكلة من ده برغم اني هبقى من جوايا قايد نار لكني ثقتي فيها ملهاش حدود وهتبقى غيرتي دي غيرة طبيعية لشدة حبي ليها فقط وانا كمان بنفس المنطق هشركها في حواراتي مع أي صديقة ليا في العمل وتكون دايما في الصورة عشان نسد أي طريق للشك وتفضل العلاة قوية والثقة في محلها دائما

في انتظار الفكرة ويارب نقدر نساعد فيها
سؤال خفيف بقى لو معاك مليون جنيه(واو انها مابقيتش تعمل حاجة اليومين دول:O) تعمل بيها إيه؟

اول حاجة هعملها هطلع ماما تحج وهجيبلها أي حاجة نقصاها .. وهجيب لأختي كل اللي هي عايزاه .. وهفتح مكتب برمجة صغنون كده على أدي وأبدأ بيه المشوار .. واللي يتبقى بقى من نصيب العروسة .. بيتهيألي هيفضلها كتير

هايل قوي كل اللي قريته من اسئلة لردود سواء من مادا او غيره
وجميل قوي المناقشة اللي حصلت بين مادا وشادي بس يا شادي الواقعية مش لونها كحلي قوي كده والحياة برده مش كلها جد قوي كده وكله بيعدي وكفاية ان ربنا ساترها معانا والانسان علشان يحس بقيمة حياته لاااااااااااازم يتعب كتير او قليل حسب المواقف اللي بيمر بيها امال فين تحابيش الحياة وبهاراتها اللي من غيرها تبقى حياتنا ماسخة
وبالنسبة لسؤالي يا سيد مادا بسيط خالص خالص كنت عايزة اعرف بتنمي افكارك ازااااااااااي
والسؤال الاهم لي بعد قرأتي لردودك اوصل بأبني ازاي علشان تفكيره يبقى زيك يعني تنصحني اتصرف معاه ازاي في تربيته ونشأته وللعلم انه عنده 7 سنين ونص بس تفكير النت والكمبيوتر والاي باد والموبايل ايوة طفل بس عايزة تفكيره يتزبط شوية بص انا مش عارفة اوصلك سؤالي
بس تنصحني بإيه في تربيتهم من وجهة نظر التربية اللي مامتك ربتهالكم ومن وجهة نظر اللي انت ناوي تعملوا مع اولادك بإذن الله بعد ما تتزوج
معلش انا بحب اخد افكار واللي ينفعني اعمله واتمنى ان اللي تكتبه يفيدني
والله معك

انا مش بقول ان الدنيا سودا على فكرة , بس هيا مش وردى يا جماعة وكلنا عارفين دة , المشكلة بالنسبة للرجالة معقدة بكتير عن البنات , البنات بيتعبوا وبيشيلو المسؤلية بعد الجواز لكن قبل الجواز الراجل هو اللى لازم يشيل مسؤلية علشان اصلا يقدر يتجوز , متر الشقة بكام دلوتى ؟ الدهب بكام ؟ العفش بكام ؟ ولو اصلا اشتريت شقة هتوضبها بكام ؟ لو فى رجالة معانا اكيد كانوا هايفهو قصدى اية خصوصا لو كانو داخلين على جواز وياريت حد من رجالة الموقع يقول رأيه فى كلامى علشان تصدقوا

الإنسان الذي يعتمد على الآخرين في رفع معنوياته يفقد نفسه حين يفقدهم

للباشمهندسة:
شكرا على السؤال عن الصحة-وبعدين بعد مادا ماينفعش حد تاني يقعد-دا انتوا بتسلخوا الواحد--ارحمنا يا رحيم
..
لشادي:
بص للحياة نظرة تفائلية ولو شوية صغيرة وخد في بالك ان حالنا احسن من حال ناس كتير ومش لازم اتجوز وعندي اغلى شقة وافخم عربية وحساب قد كده في البنك
لأ الاعتدال حلو وكل شئ بإذن الله بيتم ويوم ما ربنا يهديك لبنت الحلال فكتير من نظرتك للحياة هاتتغير ويا رب تتغير للاحسن وربنا يناولك اللي بتحلم به

انا متفائل على فكرة وعلشان كدة بلعب اللعبة دى
لو متشائم كان زمانى نايم , لكن طول مانا صاحى وبفكر عمرى ما بتشأم ولا ولا بيأس ومتوب فى ال cv ان عندى القدرة على استخاذ القرار , اكيد مفيش متشأم ها يعمل كدة ولا يقعد على الموقع الحلو دة علشان يتعلم حاجات جديدة:(

شادى: عجبنى كلامك اوى واحنا عارفين ان الدنيا مش وردى خالص بس لسة مادا في فترة الوردى بتاعته ومش عايزين نسودهالو دلوقتى هى هتسود لوحديها ههههههه
وعجبتني اوى حكمتك :
الإنسان الذي يعتمد على الآخرين في رفع معنوياته يفقد نفسه حين يفقدهم
وعايزة بس اكملها انه كمان بيدمر لما مابيلاقيش منهم رد الفعل اللى عاوزه منهم وللاسف انا كدا

@ الاستاذة
هو الواحد مش عايز رصيد فى البنك ولا حتى عربية فى بداية حياته هو بس عايز شقة ويعرف يتجوز
@ زغباوية
ربنا يخليكى وكلى الحكمة زى ما انتى عايزة , على فكرة انا اساسا ساعات كتير بزود على حكم انا قراتها وبكتبها هنا كا اجتهاد شخصى بتحصل معايا كتير وبحاول انقى كلام يتفق مع الحكمه ويكون كان ناقصها فعلا
@ مادا
انت ممكن تنزل من على الكرسى وتختار حد وكفاية قوى اللى حصل لحد كدة

بس ياترى مين اللى هيقعد عليه المرة دى!!ياريت تكون ام العيال او الاستاذة

ولسة كمان يارا والريس

لأ مادا مابنزلش الا لما يجاوب على باق الاسئلة

نسيتى باباكى يازغباوية اومال مين غيرك اللى هيقعدة على الكرسى دا

لية يا زغباوية كدة يا زغياوية كدة؟ هاة؟ انا كنت عملتلك اية يعنى عشان تقولى ياراااااااااا اديكى فكرتيهم بيا ينفع كدة يعنى؟؟؟؟؟؟؟؟؟؟؟؟؟؟؟؟؟؟؟؟؟؟ لو شفتك هعضك عضة

يالا اتكلى على الله واقعدى يايارا ....دا جميل ومش هتندمى
وانا هقولك اول سؤال عن cv بتاعتك

قبل ما أنزل لسه في سؤال للأستاذة هرد عليه وبعدين هختار اللي هيقعد بعدي ان شاء الله

@شادي : شكلك زهقت مني بس انا هريحك وهنزل مع اني مبسوط جدا وارتحت اوي لما اتكلمت معاكم وخصوصا انت وزي ما اتفقنا بقى اول ما تنزل مصر ان شاء الله
@زغباوية : ان شاء الله هخليها دايما وردي والسواد مش هيعرف ليا طريق
@يارا : مش محتاج حد يفكرني

سؤال الأستاذة:
بالنسبة لأول جزئية وهي تنمية الأفكار .. الأفكار بتتخلق في لحظة يعني من معلومة بعرفها من كلمة أسمعها من موقف بعيشه أو بشوفه وهكذا .. انا بنمي أفكاري عن طريق مصادر كتير جدا زي القراءة في كل المجالات ومن مختلف المصادر يعني كتب , انترنت .. وأيضا عن طريق الحوارات والمناقشات مع الأكبر مني سنا وخبرة .. عن طريق التجربة ودي اهم نقطة بمعني اني مش بخاف مني اي شيء جديد عليا وبجرب بنفسي وبغلط مرة واتنين لكن في الآخر بوصل للصح بنفسي وبعلم نفسي شيء جديد .. ((((التركيز)))) في فكرة واحدة والإصرار على النجاح فيها مهما كانت العراقيل اللي بتواجهني والتصميم على تنفيذها وبمجرد نجاحي فيها ببدأ في التفكير من تاني في فكرة تانية .. في كل شيء بون ملتزم وبعمل حساب للوقت والظروف اللي حواليا .. يعني خلاصة القول هي ان الثقافة والتجربة والاجتماعية والطموح والمجهود الشخصي والتركيز هم الأساس وسهل اوي ان حضرتك تخلقي جو زي ده لابنك .. يعني تشجعيه انه دايما يبتكر .. لو بوظ حاجة في البيت تشجعيه انه يصلجها بنفسه .. تشركيه دايما في الحوارات سواء بينك وبين والده .. او بينك وبين أصحابك .. تشجعيه على القراءة عن طريق الوسيلة اللي يحبها .. توفري له جو اجتماعي عشان يقدر يكون صداقات وعلاقات مع ناس جديدة تحت مراقبتك طبعا .. تحسسيه انه دياما محل ثقة .. كل ده هيخليه دايما متطلع للأمام وبيفكر كل يوم في شيء جديد ومفيد

والدتي بنا يخليهالي يارب مش بس اللي ربتني وكونت شخصيتي .. الحمد لله انا ربنا كرمني بمجموعة من الأساتذة العظام جدا ربنا يارب يجازيهم كل الخير ساعدوا في ده وكان ليهم دور عظيم جدا .. ماما في البيت كانت دايما بتعلمني الأخلاق والأدب وازاي اتعامل مع الغير والصلاة طبعا وحفظ القرآن دول شيء أساسي والمحافظة على الصلاة في المسجد ده غير انها من وانا صغير بدأت في تأسيسي للتعليم في كل الموادوالحمد لله لما دخلت المدرسة مواجهتش اي صعوبات او مشاكل في الدراسة بسبب المتابعة والاهتمام منذ الصغر .. علمتني كمان اني اعمل الصح مهما كان ومهما اللي قدامي غلط فيا انا اعمل الصح برده ومقولش اشمعنا ده عمل وهكذا .. وأساتذتي اللي انا قلت عنهم دول هم عشرة عمري واللي لحد دلوقتي علاقتي بيهم مستمرة ودايما معاهم كأنهم اخواتي الكبار .. اهتموا بيا في الدراسة وغير الدراسة علموني ازاي افكر وازاي اتعامل مع مشاكلي .. اواي ابقى متفوق وازاي انظم وقتي .. كانوا خير قدوة ليا عشان كده انا مرتبط بيهم لح دلوقتي وعلاقتي بيهم أكتر من الإخوات ولسة بروح المدرسة وبزورهم غير مقابلاتنا بره

انا كمان ان شاء الله نواي اعمل كل ده مع ولادي .. اهتم بيهم من وهم صغيرين .. أحفظهم القرآن وأعلمهم الصلاة والمحافظة عليها .. اعلمهم الاحترام والأدب وازاي بتعاملوا مع الأكبر منهم واللي في سنهم .. ازاي يختاروا اصحابهم .. ازاي يفكروا في مشاكلهم .. ازاي يعتمدوا على نفسهم .. اصاحبهم واحسسهم ان انا في سنهم مش اكبر منهم .. اقرب من دماغهم اوي .. الطفل دايما بيبقى محتاج ده .. بيبقى محتاج تبقى المسافات بينه وبين والديه تبقى قريبة اوي عشان ميخدش جانب منهم ويعيش في عزلة مع نفسه ويبقى الوالدين في دنيا وهو في دنيا .. الاهتمام بيهم مش مجرد اللبس والغذاء والترفيه وبتأمين المستقبل .. الاهتمام هو ببناء شخصية تكون قادرة على العيش في هذه الحياة تحت اي ظروف ويبقى عنده القدرة على حل المشكلات اللي هتواجه بنفسه .. وعلى رأي المثل ابني ابنك ومتبنيلوش ..

انا حاولت على اد ما اقدر اجاوب على سؤال حضرتك يا أستاذة .. ويارب تشوفي ابنك أحسن الناس ويبقى دايما في مراكز عليا ويتفوق على الكل ومتحطيش حد للتفوق ده او انه يبقى زي حد بل يبقى افضل منه

انا كده خلصت يا جماعة وهنزل من على الكرسي
بجد متشكر اوي ليكم كلكم واتبسط اوي وقضيت وقت ممتع واول مرة احس بمتعة اللعبة دي هنا مع اني بلعبها كتير بس اول مرة اتسأل في حاجات محدش فكر انه يسألهالي من أصحابي .. يارب مكونش تقلت عليكم ومحدش يكون زعلان مني .. وربنا يعلم انا مخبيتش حاجة وقولت كل اللي في قلبي وجاوبت بصراحة .. والله على ما اقول شهيد :(:(

ان شاء الله هختار Monem الريس عشان يقعد على الكرسي اللي هو مكانه أصلا بما انه الريس .. فالكرسي يتاديك يا بشمهندس .. اتفضل ومتزعلش مني بقى :D:P

احنا عارفين ان حضرتك مشغول كان الله في العون بس احنا هنسأل اللي نفسنا فيه وحضرتك تبقى تجاوب على مهلك واحنا مش مستعجلين :D:D:D

@خالتو صفاء : معلش أجلي سؤال يارا لما تبقى تقعد بقى عشان الريس هو اللي قاعد دلوقتي

حاضر يامادا

يالا ادخل ياريس وقول لنا على الcv

هو انتم مش قادرين تستنو لحد ما أنفذ إمكانية تحميل التعليقات الأخيرة فقط في الأول عشان سرعة تحميل الصفحة دي

عموما كده هيجبرني إني أشتغل بهمة أكثر ... أصلي أنا كده متضرر!

ال CV:
محمد عبد المنعم حسين ... 36 عام ... ونص ... ماجيستير هندسة حاسبات ... التخصص سفتجة متينة (جاية من سوفت وير الكمبيوتر) ... بس خلاص ... كل الباقي أسرار

الحالة الاجتماعية يا بشمهندس .. الرتبة العسكرية

متجوز ... ولو كنت اتخرجت من كلية عسكرية كان زماني يقيت مقدم بقالي يجي سنة

إيه مفهوم الحريه الشخصية عندك؟وهل بتدي نفسك الحق في التحكم في اللي حواليك حتى لوهما مش بيعملوا حاجة غلط؟ولولاقيت حد من أخواتك وقرايبك بيعمل حاجة مش عجباك بتتناقش معاه ؟ولا بتنفذ وبعدين نتناقش؟
ولو حد من ولادك بعد عمر طويل أختار عروسة مش عجباكوا ستايل بقى وفانكي هتتصرف معاه إزاي؟

عادي ... طالما الإنسان بقى عاقل هو حر في تصرفاته بشكل مطلق طالما لم يؤثر بشكل مباشر على الآخرين ... لكن كل اللي بحبهم زي إخواتي وقرايبي وكله كله ... وده بيتكرر كثير ... معنديش أي حرج إني أوجه النصح ليهم بشكل مباشر وغير مباشر لو حسيت انهم مش على الطريق الصح ... لكن لو الإختيار تم خلاص والفاس وقعت في الرأس مبحبش أعيد وأزيد وأقول ليه عملت كده وبتاع ... بخليني في دلوقتي وبأقبل الموضوع بدون حواجز نفسية.

وطبعا مفيش حاجة اسمها بنفذ ... أنفذ فيما يخصني فقط طبعا

موضوع إبني ... أنا مش هستنى لما إبني يجيب حد زي ما بتقولي ... التربية بتبدأ من بدري عن كده بيجي 20 25 سنة ... في سن الجواز ممكن أشرحله بشكل منطقي سلس وغير نمطي عواقب الإختيار المنيل ده إيه ... وأتأكد إنه فهم كلامي 100 في ال 100 وبعد كده هو صاحب الإختيار ... وبعد كده مراته هتبقى زي بنتي ولها مني كل الحقوق بتاعت زوجة الإبن من حب ورعاية وإحتضان ... زيها زي لو كانت ليا بنت مش عاجبني تصرفاتها بالظبط ... هل أستسهل وأتبرأ منها وأخلص ؟ طبعا لأ

بتقسم وقتك إزاي مابين شغلك وبيتك وولادك وموقعك؟وهل حاسس أنك مدي كل منهم حقه؟ولو مش كده بتحاول تظبط النظام إزاي؟

ميزة الشغل عندي إن معظمه بيبقى من البيت ... يعني وسط الأسرة ... ودي نعمة كبيرة جدا من ربنا ... فأنا بأتوكل على الله ... بنام قليل ... متطلباتي قليلة ... وبشتغل شوية هنا شوية هنا وشوية هنا وشوية هنا ... الأولوية للي مقصر معاه أكثر ... زوجتي طبعا شايلاني في موضوع الولاد ومقدرة الظروف جدا ... صحيح أنا كده حاسس إني بتحرق يوم ورا يوم ... لكن لما بنعمل حاجة كويسة هنا ولا هنا سعادتنا بيها بتنسينا ... مش لازم الواحد يعيش 100 سنة يعني ... كفاية قوي 99 سنة بس مليانة إنجازات إن شاء الله

إن شاء الله العمر كله يا باشمهندس
جتلك من فين فكرة الموقع ؟

اهلا منور الكرسي ياريس
كدا هانضمن ان موضوع تحميل الصفحة علشان التعليقات الكتيرة هايتنفذ بسرعة
للأسف مش عارفة اظبطلك سؤال متين بس هاحاول اعصر دماغي

س1: ايه الحلم اللى حلمتوا وانت صغير وحققته وايه اللى ماحققتهوش وندمان عليه وايه اللى نفسك تحققه؟؟؟

س2: قولنا صفة فيك مش عجباك ونفسك تتخلص منها؟؟؟؟

س3: الصفات الاساسية اللى بناءاً عليهااخترت زوجتك؟؟؟

برافو يا زوزو انا كنت عايزة اعرف بردو هو اختار الباشمهندسة ازاي؟ وشافها فين اول مرة ؟وبناءا على ايه تم الاختيار؟ ويا بشمهندس كل الاسئلة اجباري مش اختياري

الليلة إن شاء الله هظبط التعليقات الطويلة وأجاوب على الأسئلة

في انتظارك ياريس

طيب خد السؤال ده: ما الذي استفدته من الموقع كمدير وكعضو عادي والمواضيع اللى فعلا استفدت منها

انا هسألك سؤال واحد
الحياة طول ما احنا عايشين فيها بتخلى الواحد لازم يقدم و لو شوية تنازلات علشان الحياة تمشى سواء كانت فقى العمل فى البيت مع الاصدقاء , هل انت من النوع اللى بيتنازل بسهولة , ولو اتنازلت هل بتأنب نفسك على كدة , ولو حصل مرة تانية واتعاد الموقف للمرة التانية هل ها تتنازل برضة علشان انت اتعودت وعايز تكبر دماغك وما تعملش مشكلة على الفاضى ولا ها تعمل اية

حضرتك ما شاء الله متفوق من وانت طالب يعني طلعت الأول على المحافظة في الإعدادية وما شاء الله متفوق في حياتك العملية .. سؤالي بقى عن الحسد .. هل كنت بتعمله حساب ولا مكنتش بتفكر فيه او عارفه بس مش خايف منه وبتقول خليها عليه .. وهل نظرتك ليه دلوقتي زي ما هي ولا اتغيرت .. كلمنا عن الحسد عموما في حياتك وهل ليك ذكريات ومواقف معاه ؟؟

تعبتوني ... بالليل هجاوب على الأسئلة إن شاء الله

ربنا يعينك

مبروك تظبيط الاخطارات ربنا يعينك

مبروك ومستنيين الإجابات

لولولولوللللللللللللللللللللللللللللللللللللللللللي
مبروك ياريس يالا بقا فين الاجابات

إحم إحم ... بسم الله الرحمن الرحيم

سؤال @noura:

1- من زمان وأنا بنتقد المواقع العربية لأنها كلها نسخ من بعضها بدون تقديم شيئ جديد يذكر غير الألوان الفاقعة والصور الثقيلة
2- كنت بتغاظ جدا جدا لما بشوف حد بيقول أي كلام ويقوم باعته إيميل ل500 من إصحابه وهكذا بيتناقلو الجهل بدون ما يبقى هناك طريقة لتصحيح المعلومة لل30 مليون اللي شافو الميل ... كان نفسي أعمل حاجة تبقى بديل للإيميل في المواضيع اللي زي دي وتبقى أفضل كمان من الفيسبوك لأن الفيسبوك لا يسمح للزوار باستعراض المشاركات

@زغباوية س1
وأنا صغير كنت صغير قوي على إني يبقى ليا حلم ... كنت ساذج جدا ... لكن الحمد لله كل شيئ حصل في حياتي هو الأفضل ... حتى لو معرفتش إنه الأفضل دلوقتي بيتضح إنه الأفضل بعد كده

الحلم اللي متربي على الغالي دلوقتي عندي إني أفسخ العقد مع الشركة اللي شغال فيها - حتى لو هنفذ الشرط الجزائي - ويبقى عندي شركة في مكان هادي ونظيف جنب البيت اللي ساكن فيه والشركة دي بتعمل برامج كمبيوتر غير تقليدية تخدم مصر والعالم وبتدخل مليارات الدولارات سنويا لمصر (لشركتي في الواقع) ... أدفع زكاتها صح ... تصرف على أعمال خيرية صح ... وربنا يتقبل ده. يحضرني هما دعاء بحبه جدا: اللهم إني أسئلك علما نافعا ورزقا طيبا وعملا متقبلا

@زغباوية س2
متردد جدا ... أصدقائي بيقولو عليا إني بندولي ... صحيح دي صفة مش عاجباني بشكل عام لكن إنا شايف إنها كانت السبب في حاجات كثيرة عملتها كويسة الحمد لله ... فأتمنى إني أعرف أوظفها كويس بدون ما آخذ مساوئها ... (للأخوة المهندسين أذكركم إن أنجز منحنى للأداء الحركي هو underdamped response المليئ بالتردد)

@زغباوية س3
بصراحة اللي أنا فاكره إني كنت محتاج (ده طبعا بالإضافة للدين يعني الأخلاق) واحده عاقلة

طلعت أكثر حد عاقل في الدنيا ... لكن إختياري ده كان توفيق من الله وليس ذكاء مني ... لأني ما كانش عندي أي نوع من الخبرة قبلها تسمح لي إني آخذ قرار إنها تصلح لي أو لأ ... زي ما ذكرت في أحد الإعترافات إني متردد جدا جدا ... يعني مش سهل عليا في الأمور اللي زي دي إني آخذ قرار ... سبت نفسي ... والحمد لله الإختيار ما كانش هيجي أفضل من كده

@noura

الموضوع كله إني طلبت من أمي وجدتي (الله يرحمها) وإخواتي البنات حصر كل المرشحات لمنصب الخطيبة ... عملت شيت إكسل ... عملت حصر بالمعايير المطلوبة ... حطيت أوزان للمعايير دي ... إبتديت أحط بيانات المرشحات ... كانو 5 أو 6 مش فاكر ... جمعت النقط ... أول واحدة كسبت طلعت قريبتي بس ما كنتش شفتها قبل كده ... توكلت على الله ... اتقدمت لها ... وافقت ... طلعت بعد كده أحسن ست في الدنيا ... بس عرفت بعد كده إنها ما كانتش طايقاني أول مرة

طبعا لا أرشح لحد إنه يعمل كده ... اللي حصل معايا لا يمكن إنه يتكرر مع حد ويصيب ثاني أبدا

سؤال @Mada بتاع العساكر وحجات كده
مش فاهم قصدك إيه ... حضرتك تقصدني أنا؟

@زغباوية
إللي استفدته من الموقع إني لقيتني وسط أهلي وحبايبي كل يوم مش كل أسبوع ... استفدت كمان إني بشكل غير مباشر خليت ناس غالية عليا تبتدي تقرأ وتبحث وتتدبر.

استفدت كمدير خبرات فنية مجربتهاش قبل كده لأن الموقع وبرمجته مش هي مجال خبرتي الأساسي

ايه دا الهندسة والكبيوتر في الجواز كمان

ما شاء الله غبت يومين كل دى اسئله ع العموم مؤقتا اسال الباشمهندس سؤال
ما هو السؤال الذى تتمنى الاتسأل فيه ولو فرض هل ستجاوب عليه ام لا
وما هو السؤال الذى لو سؤلت فيه ستجاوب باستفاضة واستمتاع وهل فعلا سؤلت فيه ولا لسه

@shady
فعلا أنا من النوع اللى ممكن بيتنازل لأني ببساطة متردد جدا وبحاول أتحرى عدم الخطأ وطبعا معرفش الخير فين ... لكن أنا عمري ما بأنب نفسي خالص

الموقف لو اتكرر ثاني ... في الأول هعمل فيها سبع البرمبة وفي الآخر هسامح ... ليس عن ضعف ... لكن خليط من التسامح وتكبير الدماغ زي ما قلت

طبعا أنا بتكلم عن المواضيع البسيطة ... لكن كل واحد بيبقى مع ذلك عنده مواضيع مفيهاش تسامح حتى من أول مرة

@سيMaDa

على فكرة ... أنا ما منتش الأول على المحافظة ولا حاجة ... أنا كنت الأول على المدرسة الوحيدة في المدينة ... بس مش أكثر ... طبعا ساعتها مكنتش أفهم الحاجات دي خالص

دلوقتي نظرتي إن الخوف من الحسد مينفعش يمنعنا إننا نعمل حاجة كويسة أيا كانت خوفا منه ... وخصوصا إن الموضوع بسيط ... توكل على الله واظبط النية ... قضيها أدعية الصباح والمساء:
@@

عايز أقول كمان إن المصريين دول شعب عجيب جدا جدا جدا ... يموتو في الفشخرة وفي نفس الوقت يموتو من الخوف من الحسد ... حاجة مزعجة جدا

أكيد حصلت لي بلاوي شديدة لكن والله يا أخي أنا بنسى جدا جدا ومفيش حاجة معلقة معاية خالص والحمد لله ... النسيان زي ماهو صفة وحشة دي نعمة كبيرة جدا جدا ... كان زماني خسران ناس كثير جدا جدا حسد وغير حسد

mora@

انتي عملتي زي اللي أول ما شاف الكعبة ودعا ربنا إنه يبقى مقبول الدعوة

مفيش سؤال معين في ذهني خايف منه ... ولو جالي السؤال ده هضطر أجاوب عليه طالما مفيهوش إفشاء سر لحد مثلا

أما السؤال اللي أتمنى أنه يجيلي ... برضه مش في ذهني لكن أنا بشكل عام بحب الحوارات البناءه وبحب أستفيض في الإجابة عن الأسئلة الأسئلة بشكل عام