عدنا مع ... مين اللي هيقعد على كرسي الاعتراف .. الآن مع الضحية العشرين ..المهندس/ Ahmed Hussien

اوعوا حد يقومنين ..لسة شوية ...دى لعبة حلوة ...يالا اسألوا

طيب انا ها اسأل بقى
اية هيا اهم حاجة فى حياتك؟
واية اكتر حاجة بتكونى مبسوطة وانتى بتعمليها؟
واية الحاجة اللى نفسك تعمليها لحد دلوقتى ولسة ما تحققتش؟
انا لسة بسخن

اكيد ولادى واحفادى وطبعا زوجى..بس اوعى تقول لة كدة لا يتقل عليا
-بكون مبسوطة لما اساعد عمك عبد المنعم فى تحضير منتج من منتجات النحل(حبوب اللقاح) وخصوصا لما يكون حد محتاجها وبحمد ربنا عليها لما المريض يخف..وكفاية كدة مش هتكلم تانى ياشادى فى الموضوع دة لحسن مدير الموقع يفكر انها دعاية
الحاجة اللى نفسى اعملها ولم تحقق حتى الان طبعا انى احج
وحاجة تانية..نفسى اعرف الناس كلها على حبوب اللقاح (خبز النحل ) وانا تكلمت عنها كتير فى الموقع لانها فعلا تستحق المعرفة..وبقول كدةعلشان لو حد قريب منة منحل او يقدر يعمل منحل علشان الكل يعرف اد اية هو مفيد وراااائع

طنط لو جالك حد من أولادك واقع في مشكله مالهاش حل أو معقدة حبتين بتعملي إيه وبتنصحيه بإيه؟

اولا انصحة بالتوجة والتقرب الى الله وبالهدوء النفسى وساعتها بتتحل بأذن الله ولو معقدة بخلى زوجى معانا فى حل المشكلة لانة حكيم جدا

ايوة بتنصحيه بالهدوء وتقلقى انتى مش كدا؟؟؟:(

ليه التسيح ده

هو مش كرسي الاعتراف صحيح ياصفصف شكل الكرسي عجبك:P

عايزين ضحية جديدة أختاري ياصفصف بما اننا متجمعين

اكيد عجبنى الكرسى ..لكن لازم انزل علشان حد تانى يقعد علية ..ولو انة مرييييييح جدا ...يالا ياشادى استعد لاجابة السؤال
وانت فى الغربة ياشادى وقتك بيضيع ازاى طول اليوم ولو عندك اى مشكلة بتلجأ لمين وتفضفض معاة

مممم الكرسى جالى كدة بسؤال على طول بدون تمهيد ,,, طيب
انا بقى بشتغل محاسب مالى زى ما انتو عارفين وساعات بكون فاضى وساعات بكون مشغول جدا بطريقة ما يتحملهاش انسان يعنى لاما فاضى لاما فى ستين تيلفون على المكتب وعلى الموبايل وناس عايزة ايميلات وفاكسات وابلغ العملاء بحاجات وكلام من دة كتير غير طبعا مسؤلية الفلوس وسندات القبض والصرف يعنى من الاخر اليوم كله بيضيع فى الشغل والنت هو صديقى العزيز اللى بيسلينى فى الغربة ومن غيره ها احس بوحدة فظيعة انا فعلا مش بشوف التلفزيون على طول على النت فيس بوك وتويتر ومكتوب ويو تيوب واضاف اليها مؤخرا زيدونى , ولما بتكون عندى مشكلة جامدة قوى يعنى ساعات بكلم والدى علشان هو رأيه دايما صح وبنسبة كبيرة قوى قوى قوى بس انا اصلا بطبعى كتوم ومش بحكى لحد ودايما بحب اعتمد على نفسى فى كل حاجة وعندى الشجاعة انى اواجه اى مشكلة وبحاول لو دخلت فى مشكلة كبيرة ومش هقدر اكسب منها حاجة بحاول على قد ما اقدر انى مخسرش وما ارجعش لورا بس كدة , اللى عندة اسئلة يقول يا جماعة انا معنديش اى مشكلة فى الصراحة

طيب اية رأيك فى الموقع الجديد زيدونى وبصراحة

واللهى ومن قلبى موقع جميل هو مش تواصل اجتماعى بس هو مفيد والواحد بيستفيد منه و كمان اعضائه محلينه ومخلينه زى السكر بتعليقاتهم الجميلة والجو الاسرى والالفة اللى موجودة وتحسى انك كل الاعضاء محترمين ودى حاجة مش سهلة هو فى ناس واخداها جد حبيتبن بس برضة فى ناس بتحب تهظر وتضحك وتفيد وتستفيد وانا من الناس دى واتمنى النجاح للموقع من كل قلبى علشان طبعا صاحبه ابن خالتى وعلشان هو موقع مفيد ودى حاجة كويسة وانا بشجعه ومستعد اشجعه بأى طريقة لو اتطلب منى حاجة

طيب وبكل صراحة مين بيضايقك فى الموقع وليه؟؟؟؟؟بالرغم من انى عارفة الاجابة

على فكرة انتى مش عارفة الاجابة اصلا لان واللهى مش مضايق من اى حد فى الموقع هو احيانا بيكون فى اختلاف فى وجهات النظر بس دة علشان التفكير مختلف وكل واحد بيبص للحاجة من وجهه نظره هو لكن عمرى ماشيلت من حد انا ممكن اضايق بس بيكون ساعتها بس لكن بعديها بشوية الموضوع بيكون اتنسى وكمان احلى حاجة هنا اصلا ان كلنا اخوات واصحاب

طيب كويس طمنتنى افتكرت انك زعلان منى ولاحاجة علشان ساعات مبعرفش انقى كلماتى وبكون مدب

سؤال بجد بقى نفسك فى ايه عايز توصله؟؟؟؟؟

انا نفسى اكون مدير مالى وا ادارى وانا عارف ان شاء الله اانى هكون فى يوم من الايام كدة علشان كل زمايلى اصلا بيقولولى انى ادارى كويس وفى ناس بتشوفنى فى الشئون القانونية للموظفين علشان انا صارم معاهم ومحدش بيعرف يحور معايا وعايز بيت محترم و وظيفة محترمة وعربية محترمة كأى شاب طموحاتى مش كبيرة قوى وفيلا وبورش والكلام دة وربنا يقدرنى عليها يارب

شادى: عاوزة اعرف منك اية الى ناقص فى الموقع ومش موجود

واللهى انا شايف الموقع تمام جدا بس هو لو فيه حاجة يومية بتنزل عليه هايشد الناس اكتر يعنى مثلا كل يوم معلومة طبية , او كل يوم معلومة منزلية او نصيحة زوجية او اسرية او حتى حكمة بالتالى العضو ها يخش كل يوم علشان يقرأ االملومة بتاعت اليوم ودة ها يشد الناس اكتر وكمان لو اتظبط موضوع الرسائل دة بين الاعضاء للتهنئة او شات جماعى بس مش اكتر دة اللى انا شايفه حاليا

انا اسأل بقا : نفسك تعمل ايه دلوقتي حالا ؟

fنفسى انزل اجيب كارت شحن علشان ارغى شوية فى التيلفون ومش لاقى المحفظة وفيها الاقامة والرخصة والفلوس ومش عارف اعمل اية وضيفى لكل دة انى جعان وعايز اشترى حاجة اكلها

بعد 6 ساعات.... ياترى لقيت المحفظة ياشادى لانك قلقتنى بس علشان الاوراق اللى فيها

ايوة لقيتها ونزلت وجيبت كارت شحن وجيبت اكل واتعشيت فى مطعم تركى بحبه جدا والحمد لله

طيب الحمد لله قلقتنى عليك ياشادى خلى بالك بعد كدة ...وبنا يسترها معاك

اولا ربنا يوفقك وتحقق كل اللى نفسك فيه واكتر
ثانيا الحاجات اللى شايفها فى الموقع كلها جميلة وافكار حيوية مش بتقولها ليه فى موضوع الاستفسارات
ثالثا بالهنا والشفاوقولنا بقى كلت ايه فى المطعم التركى:D

ربنا يخليكى يا خالتو
شكرا يا زغباوية اكلت حاجة اسمها طاجب لحمة بالجبنة وسلطة خضراء بس كدة

معلش جيت متأخر .. أحييكي يا خالتو على إجاباتك ويارب الكرسي يكون عجبك

بما ان شادي بقى هو اللي قاعد على الكرسي .. جاوب بقى

ايه هو اكتر وقت بتحس فيه بالغربة .. أي غربة?

دا حلو جدا يامادا ...على الاقل الواحد بيطلع كل اللى عندة

الحمد لله إنه عجب حضرتك

شوف يا سيدى اكتر وقت حسيت فيه بالغربة كان مرتين
كان فرح واحد من اصحابى القريبين منى قوى ومحضرتوش وتانى مرة كانت خطوبة صديق عمرى ودعمت لما اتفرجت على الكليبات والناس واللمة وكان نفسى اكون جمبه فى يوم زى دة

فعلا احساس وحش اوي

الحياة في مصر أحسن ولا في السعودية احسن ؟؟

لاء فى السعودية ياباشا انا فى مصر جيبت 4 كيلو مانجا ب 100 جنية يعنى صباح الخير يا مصر الواحد محتاج يبقى مرتبه ما يقلش عن 3000 علشان يعرف يعيش وياكل كويس

ده بالنسبة لمستوى المعيشة .. طب بالنسبة للناس .. للنظام ... إلخ
يعني لخصلنا الفرق بين هناك وهنا من كل الجوانب

صباح النظام هنا فى السعودية كل حاجة نظام اصلا يعنى الاجنبى او السعودى مايعرفش يضحك على الحكومة مثلا يعنى لو مأجر عربية وعملت بيها مخالفة بتنزل عليك انت مش على العربية حتى لو كنت اتصورت بالكاميرات او الرادار مش زى مصر مظلومين بتوع تأجير العربيات وكل الناس هنا بتقف فى اشارات المرور حتى لو الساعة 5 الفجر ومفيش كاميرات ولا فى عساكر مرور للعلم , لو واحد معدى على رجله الناس تستناه يعدى الاول وبعد كدة هما , فى اى مكان بنك او قطاع حكومى فى مكان مخصص للسيدات ممنوع دخول الرجال فيه حتى الاطفال طالما عمرهم يزيد عن 6 سنين ممكن تشترى كل حاجة من لبس او السوبر ماركت الصغير جدا بالصرافة مش محتاج تنزل بفلوس اصلا كل حاجة ليها نظام وطوابير ومدخلين كل حاجة على الانترنت الشوارع نظيفة جدا والاسفلت حتى مختلف وطبعا انا بحس على بسوق وتحس قد اية العربية بتكون مستريحة على الارض غير مصر , لو مثلا روحت اشتريت كيس سكر او رز ولقيت التاريخ منتهى بترفع سماعة التيلفون المحل يتقفل على طول , طبعا فى كوسة و واسطة وممكن يتفتح تانى بس فى فرق شاسع الناس اصلا عايزة تبقى منظمة مع انهم بدو ومخهم طخين اصلا , لكن المصريين مش بيحبوا النظام ولا الطوابير لانهم شعب فهلوى ودة طبعا للطبقة الغير متعلمة الاكثر فى مصر , وهنا فى حاجة اسمها مرور شكل العربيات وهيا ماشية اصلا محترمة غير مصر خالص كله داخل فى بعضة يا مادا محدش هنا بيستخدم الة التنبيه بتاعت العربية خالص انا نزلت مصر صدعت كل واحد ماشى يدوس عليه كأنه بيطلع فلوس و حاجة اخر قرف يعنى ,

لكي الله يا مصر
عشان كده عايز اقولك .. سنتين وهتلاقيني عندك بإذن الله

انت عارف هنا لو عربيتك عطلت عربية شرطة معدية من جمبك تقف معاك وفيها معدات علشان تساعدك فيها وصلة بطارية وكوريك والعسكرى هو اللى يعمل كدة بنفسه وكمان فيها حديد من قدام علشان يقدر يزقك لحد ورشة التصليح و لو توهت بالعربية فى حاجة اسمها امن الطرق تتصل بيها وتدلك على الطريق اللى انت عايزاه ولو مش عارف توصل او تخرج على طريق عمومى بيحددو مكانك وبيجولك ويوصلوك لاقرب مكان تعرف تمشى منه , مهما حكيتلك هكون مقصر يارب اشوف مصر كدة

يارب يا شادي

مرحبا بك علي الكرسي .... ياتري بتلاقي معاملة كويسة من العرب عندك ولا في اضطهاد زي مابعض المصرين ما بيقولوا.... وبتتصرف مع ده ازاي ؟

واللهى يا باشمهندسة مفيش اضطهاد ولا حاجة بس احيانا بيكون فى تفرقة عنصرية بيفرقوا بينك وبين السعودى وبيميزوهم فى حاجات كتير بس ترجى وتقولى ماهى بلدهم برضة بس انا شغال مع ناس كويسة ومش بتفرق بين الناس وانا اصلا شخصيتى مش بتتحمل دة يعنى لو حسيت انى قليل اكيد هسيب الدنيا كلها وارجع بلدى حتى لو هنا بيدونى مليون جنية فى الشهر , بس فى المطار بتلاقى للسعودين فقط طابو مخصص , فى طلوع الرخصة للسعودين اسهل من الاجانب , السعودى حر يشتغل فى اى حتة ويقدر ياخد حقه من مكتب العمل لكن الاجنبى مايشتغلش الا عند كفيله مش بنفس القوة دى فى مكتب العمل, المرة الوحيدة اللى حسيت بالفرق كنا فى فرح بنت صاحب الشغل ولقيت اننا متخصصلنا مكان والسعودين مكان على الاكل بس يعنى لان هنا الفرح عبارة عن عشاء كبير ولازم لحمة ورز وكدة بس لقيت كل المدرين المالى والادارى وكل الناس قاعدة معانا حتى اشوية سعوديين كانو معانا علشان كدة قول عادى يعنى مهو معانا سعودين برضة وكان نفس الاكل على فكرة

كل اللي انت قولته وده ومفيش اضهاد ماهو ده الاضطهاد بعينه لكن جايز انت ربنا موقعك في ناس كويسة لكن اكيد فيه مصريين كتير بيعانو

لا هو بالنسبة لموضوع المطار او الرخضة فهيا بلدهم ولازم يكون المواطن مميز وعلى فكرة مصر المواطن فيها مميز , بس موضوع الشغل دة نظام البلد واللى مش عاجبوا ما يشتغلش هنا ومش الاجانب هما اللى هيغيروا نظام البلد

زى ما الاجانب فى مصر لازم يحترموا قانون مصر يعنى مثلا لو سعودى سايق عربية على سرعة 120 كيلو و وقف فى كمين مش ها يروح يقول للظابط احنا عندنا السرعة 120 وما تدنيش مخالفة اكيد ها يدفع علشان هو لازم يحترم قانون البلد اللى هو فيها واحنا كمصريين مش بنحب حد يدخل فى بلدنا ويعمل اللى هو عايزه يبقى لازم نحترم وجهة نظرهم وعلى فكرة مش السعودية بس اللى كدة كل الخليج والله اعلم اوربا وامريكا ازاى

شادى:مين اكثر حد تحس انه بيحبك قوى وخايف عليك دائما ..مع مثال لذلك

واللهى صعب احدد الموضوع دة لان بفضل ربنا فى ناس بتحبنى جدا وبتخاف عليا واكيد ماما وبابا واهلى وليا كمان كام صاحب كدة قريبين جدا منى غير بقى البنات مقولكيش

انا عارفة ياشادى ان انت هتقول كدة بس انا بنكشك علشان تقول لى ماما وابلغها بالكلام الحلو دة

يانهار اربعه قعدوا على الكرسى وانا معرفش مش كان حد يقولى يا جماعه عشان ادخل معاكوا ف الحوار عموما حصل خير هههههههههه

لسه فيها واديكي دخلتي يا ريم .. ومكانك في الكرسي محجوز بس شادي ينزل من على الكرسي ونشوف مين اللي هيقعد يمكن تكوني انتي

اية هو دة يا مادا انا نزلت هو انا هقعد العمر كله ولا اية , انزلى ياريم بيتك ومطرحك

ههههههههههههههههههه خلاص شادي نزل من على الكرسي واختر ريم تقعد مكانه
يلا يا ريم

فين ريم .... هربت ولا ايه .... هو الكرسي بيزحلق ولا ايه

اسألي يا بشمهندسة وهي اول ما تقعد تجاوب .. هتروح مننا فين

ياريم ... ايه رأيك في شباب اليومين دول ... اللي من جيلك طبعا؟

هو ايه حكاية السؤال ده يا بشمهندسة

بحب اعرف توجهات بنات وشباب الجيل الحالي باعتباري سابقه بجيل عنكوا ياتري هتقولوا كلام زي اللي احنا في عمركو كنا بنقوله ولا فيه جديد ... نوع من مواكبة العصر

تمام .. يلا يا ريم جاوبي

سؤالي : ياؤيت ياريم تقوليلي شجرة العيلة بتاعتك اللي هنا في زيوني ؟

وسؤالى: ايه هو حلمك اللى عايزة تحققيه؟؟

وقولي ال cv بتاعك ياريم ؟

ايه يا جماعه كل الاسئله دى براحه لاعليا شويه
اولا سؤال البشمهندسه شباب الجيل ده بحس انه هو مستهتر وميقدرش يشيل مسؤليه بس مش كلهم بس معظمهم بقى كده وكمان اخلاقهم بقت مش حلوه خالص وتصرفاتهم كمان وقليل لما تلاقى شاب محترم دلوقتى اصلا الواحد بيخاف ينزل الشارع بسببهم وكمان لبسهم برضو بقى وحش وطريقه كلامهم بس ياريت بعد الثوره يكونوا اتغيروا واتعدلوا شويه
خلاص كفايه عليهم كده هههههههه

فعلا الواحد بقى بيخاف ينزل اخته او مامته الشارع بس هم مش بيرضوا وبينزلوا برضه

سؤال نورا بصراحه انا مكنش ليا شجره عيله هنا خالص معرفش حد هنا غير محمد بس وهو كمان اللى قالى على زيدونى فدخلت واشتركت فيه وعد كده جت سما ومحمد ودول اخواتى التوام بس

محمد اللي هو مادا يعني

سوال زغباويه انا نفسى ابقى مهندسه شاطره واعرف استفيد من اللى بتعلمه كويس بجد وبعد كده بقى ياتى الجواز والاطفال وكمان نفسى اخلى ماما تحج لان كل م تيجى تعمل حج او عمره يحصل حاجه ومترحش ربنا يسهل

ان شاء الله ربا يكتبهلها وتحج وتدعيلنا بقا على الله تنسي تقوليلها

الاسم:ريهام علاء الدين
السن:19
انا بدرس ف هندسه شبرا ف تانيه اتصالات
عندى 4 اخوات وانا الكبيره كفايه كده

ههههههههههه لا مش هنسى يا نورا ان شاء الله بس هى تروح الاول ههههههههه

هندسة شبرا يعني جارتي وجبتي ريم دي من فين

طيب حلو اوى احنا جيران اهو يعنى لازم تقفى جنبى بقى وتخليكى حنينه عليا شويه ف الاسئله هههههههههه

لا ريم ده اسم الدلع عشان كده كتبته لكن انا اسمى ريهام

ريم انتى بقى شايفة ان الولاد معظمهم بقى مستهتر ومايقدرش يتحمل المسؤلية واخلاقهم بقيت ذفت , بما اننا فى لعبة صراحة يبقى قولى كمان رأيك فى بنات اليومين دول , اللى مفيش حد بيشكر فى واحدة اتجوزها ولا بتعرف تعمله نص اللى مامته بتعملهولو

وهل dيقدروا يشيلو مسؤلية بيت واطفال ولا لاء

لا البنات مش بيقدروا يشيلوا المسئوليه بسهوله قبل الجواز وبيبقوا برضو مستهترين لكن بعد الجواز معظمهم بيتحمل المسئوليه اللى هما فيها بس الراجل هو الاساس لازم هو اللى يشجعها ويقف جنبها ويساعدها ولازم هى تحس ان جوزها يقدر يحميها ويحافظ عليها عشان هى كمان تقدر تتحمل المسؤليه ومتكنش خايفه واكيد طبعا الزوجه مهما عملت مش هتوصل للى كانت الام بتعمله فى الاول لحد م تتعود وتتاقلم على كده وكمان البنات معروف انهم بيبقوا مدلعين عن الاولاد

والبنات بقى لبسهم مش حلو خالص وضيق يعنى بقوا حاجه تكسف وهما بيكونوا السبب ف اللى الاولاد بيعملوه لانهم بيدوا ليهم الفرصه لكده بس مش كلهم برضو فى بنات محترمين جدا الحمد لله

اللهم صلي على النبي ايه الحلاوة دي

اسأل انا بقى
- لو انتي بتحبي و خيروكي بين أعز أصحابك وحبيبك تختاري مين ؟
- هتشتغلي بعد الجواز ولا لأ ؟
- هتعملي ايه لو انتي بتحبي شخص ومتقدريش تعيشي من غيره وأهلك رفضوه ؟

جامد جدا يا مادا يالا بقا جاوبي ياريم عشان تعرفي اني كنت حنينة ومسألتش اصلا

انتى صعبانة عليا ياريم خلى سؤالى لبكرة لانك تعبتى من كتر الاسئلة

لا يامحمد مفيش مقارنه بين الصاحب والحبيب ده حاجه وده حاجه تانيه خالص وعمر ما هيحصل انى اختار حد فيهم لانهم الاتنين مهمين عندى مقدرش اعيش من غير الاتنين وبصراحه لو خسرت صحبتى هتبقى حياتى تعيسه مع حبيبى من غير صحاب وعمرى م هنسى الموقف ده ابدا

اما بالنسبه للشغل فانا عايزه اشتغل بعد الجواز دى حاجه اساسيه
السؤال التالت بقى هحاول اقنعهم بيه وهما اكيد هيوافقوا لما يعرفوا انى مقدرش اعيش من غيره بس انت متقطعش هههههههههه

ههههههههههههههههه يا مقنع

ههههههههه لا ياخالتو براحتك لو عايزه تسألى اسألى انا موجوده

sواللهى ياريم بالنسبة لكلامك على البنات فهيا اجابة دبلوماسية فيها من الواقع وانتى معترفة انهم مدلعين ومفيش واحدة هاتبقى زى مامتها بس انا عارف ان فى بنات اخر جدعنة واخر حلاوة كمان بس احنا بنتكلم على الاغلبية للأسف . وبالنسبة لردك على الرجالة انا ها ارد عليكى بحكمة:-
ليس كل من يطلق عليهم "رجال".. هم رجال... فكلمه "الطير" تجمع بين الصقر والدجاجه

-أيه أكثر حاجة عندك بتحبي تعمليها بمزاج عالى( الدراسة او المساعدة فى شغل البيت او المطبخ او القرأة والاطلاع على ماهو جديد )
- أكثر حد من أسرتك اقرب الى قلبك

بجد سياسية شاطرة ياريم يعني بتعرفي تهربي من السؤال وتلفي معناه
وحلوة حكمة الصقر والدجاجة دي
انا سؤالي ليكي ياريم لو أتحطيتي في موقف صعب ياإما تكدبي وتخبي وتجاملي ياإما هتواجهي مواجهة ممكن تخسرك حد هتعملي إيه؟
وبما إنك صديقة واحدة بتكتب شعر قوليلي رأيك في كتاباتي بكل صراحة

ههههههههه ايه رايك يا نورا هما دول بنات شبرا هههههههه حلوه الحكمه دى يا شادى فعلا عندك حق فيها بس ان شاء الله الاتنين يتغيروا للاحسن

والله يا لوليتا انا فعلا بحاول اهرب للانى اصلا مش بحب اكون فى موضع اسئله خااااااااااااااالص بس هو فى اسئله كده تحسى انها مينفعش انها تتسأل اصلا لانها عمرها م هتحصل خالص

اكتر حاجه بحب اعملها بمزاج اوى لما بكون ف المطبخ لانى مش كتير بدخله بس يوم م بدخل مبحبش حد يقف معايا وبعمل كل حاجه بهدوء هههههههه عشان كده باخد وقت وبيكونوا ماتوا من الجوع
واكتر حد قريب لقلبى هو بابا واخويا الصغير

ليه بس الاسئله الجامده دى يا لوليتا حظك انك قعدتى على الكرسى قبلى وانا مكنتش موجوده عشان اسأل ماشى ماشى هجاوب بصى انا لو اتحطيت ف موقف صعب هحاول اهرب منه من غير م اكدب ع قد ما اقدر ممكن اخبى حاجات عشان المشكله متكبرش بس اكيد مش هاكدب ولو الواحد ده قريب منى اوى اكيد هواجهه بكل حاجه لان هو هيكون عارفنى وعارف اللى انا كنت اقصده وبعد م الموقف يخلص بقى ابقى اصالحه لوحدنا كده هههههههههه

هممممممممم عموما ياريم أنتي اللي هتختاري مين يقعد بعدك وانا ماعنديش أي مانع تختاريني وانا أجوابلك عن كل سؤال لو من المريخ أحنا مابتفرق معنا الأسماء

والله انتى كتباتك حلوه والكلمات كمان بس بحس انها مش راكبه على بعضها يعنى السجع ف الكلام والجناس والقافيه مش بتكون واحده عشان كده لما بحب اقرا قصيده احبها تكون ماشيه مع بعضها ف القافيه بس والله انتى كتباتك حلوه وانا اصلا على فكره ماليش ف الشعر خالص ومش بعرف اكتبه يعنى ممكن متخديش على كلامى

ههههههههههههه لا يا ستى كفايه عليكى كده نشوف بقى حد تانى ناخده كبش فدا هههههههههه

يلا بسم الله حلال الله أكبر ،مين بقى؟

انا هختار نورا جارتى بقى ههههههههههه

أه حبيبة قلبي يانورا

اهلا ياشابة داحنا هانروقوكى
ايه اكتر اكلة بتحبى تعمليها وبتطلع حلوة منك واكتر حاجة بتحبى تاكليها؟

لما بتعملي جريمة ماماكي بتعمل معاكي أيه؟وبتعرفي تهربي من الموقف ولاأيه؟

@ ريم: كل اجاباتك حلوة وعجبني ان مفيش حد عرف يجرجرك في سكتة

@ شادي: حلوة الصقر والدجاجة .... طب كنت خليها كتكوت عشان يبقي مذكر

@ نورا: منورة الكرسي ..... تعاليلي

ايه رأيك في الارتباط عن طريق الجامعة .... ورأيك في جواز الصالونات ... تفتكري مين فيهم يعمر اكتر؟

وعايزة الcvبتاعك كمان زي ريم مخلصة بتشتغلي مرتبطة مخبوطه كده ولا لسه ماحصلتلكيش الحادثة؟وأهم حاجة بحبها فيكي ونفسي أسألك عنها جايبة اللماضة بتاعتك دي من مين؟

ههههههههههههه ماشي ياريم كنت شاكك مع اني كنت متأكد استنوني بقا

اكتر حاجة بكون مبسوطة وانا بعملها هي اني العب بالالوان مع العلم اني مبعرفش ارسم والخرز والترتر واي حاجة فيها الوان ، واكتر حاجة بحبها وبتمزك وانا باكلها هو السمك

انا رأى لو انتى فاضية بعد الضهر تروحى محو الامية علشان بتمزك بتاعتك دى ما تأكلش عيش اسمها بتمزج وجاية من المزاج اساسا

لاء الحمدلله مامتي بتفضل تكتم في نفسها وتقولي نفسي اعيش لما اشوفك هتعملي ايه مع ولادك وطبعا بقا مش عايزة اقولك انا وولادي هنكون عاملن ازاي

@ شادي : معلش والله ماخدتش بالي:p

والحمدلله انا مبهربش من اي حاجة كله بالمواجهة

ارتباط الجامعة مش بأيده خالص ...وجواز الصالونات حاجة فاشلة جدا وانا بتكلم عن نفسي طبعا لان انا قدامي ناس اتجوزوا كده وماشاء الله عليهم حلوين اوي ......... واللي ممكن يعيش اكتر هتبقا الجامعة وامري لله عشان هيكون في حب في الموضوع

انا نورا محمود
24 سنة
ليسانس تربية
وبشتغل علاقات عامة في دار ايتام
واحنا 5 اخوات انا خير الامور فيهم لاني انا الوسطانية
وبالنسبة للماضة والله معرفش دا انا حتى هادية خالص ومحدش بيشتكي مني غير شوية ناس كده

@ريم : برافو عليكي مع انك ملحقتيش تقعدي وكان نفسي اسالك تاني بس ملحوقة
@شادي: موت من الضحك على مزك ومزج دي :D:D
@نورا : نورتي الكرسي وواضح ان الكل كان مستني الفرصة دي من زمان :D:P

أسأل أنا بقى
انتي دلوقتي بتشتغلي وده شيئ جميل جدا .. عايز أعرف حياتك اختلفت قبل الشغل وبعده ولا لأ .. وهتفضلي تشتغلي إن شاء الله ولا ممكن تقعدي لأي ظرف ما زي الجواز مثلا ؟

انا قولتها قبل كده كلكو عليا ولا ايييييييييهه

اكيد اختلفت كتيييييييييييير جدا ،تؤ تؤ اني اكمل في الشغل مااظنش واكيد ظروف كتير تخليني اقعد من الشغل واولهم الجواز

ايه هو الاختلاف بقى .. وايه هو طموحك وحدوده ؟

الاختلاف وحش مش حلو مبقتش اشوف حد خالص لاني يدوبك ارجع من الشغل انام
طموحي بقا اني اعمل مشروع اشتغل فيه انا واصحابي مع اني عارفة انه هيفشل فشل ذريع عشان هكون انا واصحابي فيه وطموحي مش عالي اوي يعني كلها حاجات بسيطة ممكن تتحقق بفضل الله

تمام

انا اتصدمت فيكي يانورا ... مش عارفة ليه كنت فاكراك بنوتة في الجامعة بالكتير 19 سنة
عرفتي تخدعيني ....:(
استغلك بقي. ليه ماشتغلتيش مدرسة ولا ده عملك تطوعي

ليه كدا هو انا كبيرة اوي والله انا مش عملت حاجة ولا كنتي جيبالي عريس
لاء انا اصلا مش بحب التدريس خالص ولو كنت بدخل الفصل كنت بلعب مع الولاد ومش بنشرح حاجة

انا بقى بعشق التدريس مع انه بعيد خالص عن تخصصي

ايه رأيك في المسلسلات التركي اللي غزت الدراما العربية .. واللي انا بكرهها وبتخنق منها

طيب استفدتى ايه فى شغلك مع الايتام وايه اسواء واحلى مواقف بتقابليها معاهم

انا بكره المسلسلات التركي دي موت بس بحب المسلسلات الكوري والياباني جدا:p

انا عندي ابن خالتي يا مادا مهندس مع ايقاف التنفيذ وبيشتغل مدرس رياضة من اول اعدادي لحد كلية تجارة وسبحان الله بجد احسن من 100 مدرس خرج من كليتي وهو اللي كان بيذاكرلي في الثانوية العامة

انا كمان بشتغل في التدريس من وانا في سنة أولى بس الكلام ده بيني وبينك

اما بالنسبة لشغلي يا زغباوية انا اتعلمت اني اتعامل مع الاطفال واني ابقا عندي طولة بال شوية كتير ( بس دا مبيحصلش على طول )

احسن مواقف بجد لما بعرف اوفرلهم حاجة بيكونوا محتاجينها لان الشغل دا صعب لانك بتقنع الناس انهم يتبرعوا لحاجة ممكن تكون مش في دماغهم اصلا ولما بنخرج رحلة بقا صباح الشقاوة بنهيص مع بعض جدا
واسوء حاجة لما طبعا بفشل في اني افور حاجة يكونوا محتاجينها وتكون ملحة في وقتها ووكمان لما يجي حد ويسألني عن الولاد ازاي جبناهم بحكيلهم وممكن نعيط احنا الاتنين وكمان انا كنت بشتغل في دار قبل اللي كنت انافيها دلوقتي بس كانت ايتام معاقين فكانت حاجة بؤس وهما كانو حالاتهم شديدة واعمارهم قصيرة وفي ولد منهم مات وكمان راحت المسئولة عن الدار الله يكرمها اخدت الولاد اللي كانوا في الفرع اللي انا فيه وكنا متعلقين ببعض وبدلتهم مع ولاد من فرع تاني خالص فانا طبعا مقدرتش اكمل وسبت المكان خالص بس بجد هما واحشني مووووووووووووووووت

ربنا يكرمك يا نورا ويجازيكي خير

شكرا يا مادا ها بقا هانزل امتا

انتي زهقتي ولا ايه .. لسه شوية

ايه هو الحلم اللي مش بيفارقك لحظة .. ونفسك تحققيه بفارغ الصبر ؟

حلم احققه قريب ولا عالمدى البعيد

الاتنين
كنتي جاوبي وخلاص لازم تسألي

انا بقى هسأل ايه مواصفات اللى انتى عايزه ترتبطى بيه ؟وايه اكتر حاجه ممكن تضايقك ف الشخص اللى قدامك ؟وايه اكتر مسلسل كورى بتحبيه ههههههههه عشان انا كمان بحب الكورى؟

يارب ارزق المسلسلات الكوري دي بقنبلة هيروشيمية عشان نرتاح

انا اول مرة اسمع عن المسلسلات الكوري ...انا اخري أوشين هي قديمة قوي ممكن منكم مايعرفهاش بس سمع عنها اكيد كانت مشهورة جدا في التسعينات

حلم احققه قريب اني اطلع رحلة الكس مع صحباتي عشان بجد خلاص زهقنا وعايزين نغير جو عالمدي البعيد او الللي مش بعيد اوي هو اني اتجوز واخلف بنوتة
وفي حلم بس انا عارفة انه مش هيتحقق وهو اني الاقي بيتسي
انا تقريبا بحب كل اللي شوفته زي اغاني الشتاء وخريف في قلبي وجوهرة القصر
اوشين دي انا فاكراها من زمان وكانوا كل جيراني وقرايبي بيقولولي أوشين عشان احنا تحسي ان فينا عرق صيني او ياباني كده

وعلى فكرة ياريم انا هنزلك اغنية مسلسل اغاني الشتاء عشان احنا جيران:p

هديكي -1 لو نزلتيها يا نورا

وبالنسبة للمواصفات ياريم خدي عندك يكون طيب وحنين وبيعرف ربنا وميكنش بيلبس بنطلون لو ويست عشان انا بموت من الغيظ منهم وزي نيكول سابا ما بتقول فارس احلامي اللي بالي نفسي ميجرحنيش وميرتاحش الا في احضاني ابدا ميسبنيش .....إلخ
واكتر حاجة بتضايقني في اللي قدامي هو البرود عشان لما بشوف كدا بتجنن وبتعفرت وممكن اغلط

ههههههههههههههههه طيب عشان خاطرك يا مادا هنزلها بس ها:p

لأاااااااااااااااااااااااااااا X_X

الله يقويكوا
بجد حاجة جميلة
ومع اني كنت تعبانة قوي
بس حاسة اني فوقت شوية من اللي قريته
يكفي اني بتعرف على ناس وكأنهم معايا في البيت
فعلا تواصل جميل
احييك يا مادا على افكارك الجميلة دي
واحيي كل اللي نزل الكرسي واعترف بكل صدق
هل من مزيد

الف مليون سلامة عليكى ياأستاذة...واية رأيك فى الكرسى؟
...تحبى تقعدى علية...بجد دى قاعدتة مريحة جدا

الله يسلمك يا طنط وربنا يخليكي
بس بجد لسه ما فوقتش قوي ادعيلي وساعتها يبقى ربنا المعين على الكرسي

بصي يانورا أنتي سكرة وفعلا انا برضة أكتر حاجة تجنني في اللي قدامي البرود والهدوء والتعامل الميري بيبقى نفسي أديه بوكس عشان الوش الخشب يفك وقبل كده كان أتقدملي واحد بيضحك زي ليلى مراد قلتلة لو إنت آخر راجل في الكون مش ممكن أقبل ده أنت بتفتح بقك بالعافية وانا بقفلة بالعافية لايجوز
وبرضه يامادا انا شاطرة جدا في التدريس ومن زمان قوي من الأعدادي وأصحابي بيحبوني أذاكرلهم ولحد دلوقتي ماببخلش على حد بمعلومة أو شرح مدام انا فاهماها
وبالنسبة للمسلسلات هي ظريفة بس عايزة يتشال 3/4 كميتها لأن القصة تتخدم في 15 حلقة بس مش محتاجة كم الحلقات ده
وبجد فرحت بيكي وبشغلك حاجة حلوة ورضة أتخدعت في سنك كنت فاكراكي أصغر بس عادي انا كمان بيتخدعوا فيا كتير بس بيفتكروني أكبر من سني بكتير وأتشرفت بيكي ياقمر
بس ممكن أزنقك وأسألك مين أقرب شخصيات أتعرفتي عليها في زيدوني ولو غابوا تحسي أن في حاجة ناقصة في الموقع؟وبرضه إيه رأيك فيا لما بنكشك بيقى نفسك تعملي فيا أيه؟:-Dأصلي بحس أنك نفسك تقوليلي حاجة وبتسكتي فقلت أديكي الفرصة

متى تكونى في أحسن أحوالك ؟
- في الصباح ام خلال فترة بعد الظهر ام فى المساء
وبتحبى ايه أكثر..مشاهدة التليفزيون او امام جهاز الكمبيوتر

حمدالله على سلامتك يا استاذة ويارب يكون بعدك عننا ده بخير مش حاجة وحشة .

انا مرة اتقدملي 2 في نفس الوقت واحد اسمه محمد زكريا والتاني اسمه احمد زكريا مش عايزة اقولك بقا قمة الفكاهة اللي كنت فيها الاتنين زي بعض في كل حاجة والله كنت هتجنن الفرق الوحيد بينهم ان محمد دا كان هادي هدوء رهيب لدرجة اني كنت بقول لمامتي انا بعد ما اتجوز هافضل نايمة عشان مش هلاقي حد اتكلم معاه واحمد كان مبيقفلش بوءه خالص وقلت لما انا هنام من الصداع اللي هو هيعملهولي وبجد كنت بموت في الفترة دي بس قولت لمامتي لو ما اتخطبتش لاحمد ابقي خله يجي يزورنا عشان قاعدته متتعوضش ومع الاتنين انا مكنتش واخدة راحتي ومكنتش عارفة اتعامل بطبيعتي ولا بشخصيتي خالص لما كنت هتجنن وانا كنت عارفة اني الاتنين مينفعوش معايا اصلا انا تقدري تقولي كدة شعنونة حبتين وبحب اضحك على طول ولاتنين برغم من سكوت واحد ورغي التاني الا انهم مكنوش ينفعولي برردو بس محدش صدقني

ميرسي يا أستاذة وحمدا لله على السلامة .. والكرسي مستنيكي ان شاء الله

ولا حلقة واحدة يا لوليتا .. انا بتشل منهم اصلا
وبالنسبة للتدريس فطبيعي عشان انتي شطورة
احكيلنا عن بتاع ليلى مراد ده في حد عنده ذكرى ظريفة

هم كانوا اخوات يا نورا ولا جايين مع بعض ولا ايه نظامهم ؟

لأ مش هأحكي عايزة ذكرياتكم انا تقريبا جبت تاريخ حياتي في الموقع هأدي فرصة ليكم ولوفكرتوني بحاجة هأبقى أقولها

اكيد تشابه فى الاسماء

لاء بجد اللي انا بحبهم يمونوا موجودين كل الناس هنا في زيدوني مش حد واحد
وانتي يا لوليتا مش بستغرب اللي انتي بتعمليه فيا لاني مؤمنة بان ربنا بيسلط ابدان على ابدان يعني اللي باعمله في الناس بيطلع عليا تاني
لاء يا مادا والله ماكنوش اخوات ولا يعرفوا بعض اصلا وسبحلن الله واحد من الشرق وواحد من الغرب
بالنسبة لاحسن حالاتي بتكون من بعد الظهر يعني بعد الحر مايخلص لحد بليل بس مش بليل اوي
وانا مليش حاجة معينة بحبها من الكمبيوتر او التليفزيون لاني ملولةجدا وممكن اقفل الاتنين واشغل الراديو

والله يا طنط مش تشابه في الاسماء بس في حاجات كتير دا الفرق الوحيد بس هو اللي انا قولته بس السكوت والرغي

ها بقا هنزل امتااااااااااااااااا

فكرتينى يانورا.. لما كان بيتقدم لبناتى اتنين مرة واحدة وساعات تلاتة ويترفضوا لاقل سبب هو فعلا النصيب ..عقبالك هم دلوقتى متزوجين منهم (زغباوية)

ربنا يخليهم لحضرتك ويسعدهم يارب بس والله بتبقا حاجة رخمة موت

لو زهقتي وعايزة تنزلي .. انزلي واختاري اللي هيقعد بعدك بس بلاش انا .. خليني للآخر :D:P

يعني خلاص كدا هنزل

انتي وراحتك لو زهقتي قولي ان انتي نزلتي واختاري مين هيقعد بعدك

خلاص انا هنزل بس قول لريم بقا اني نزلتلها الاغنية:p وهختاااااااااااااااااااااااار زغباوية

كنتي ضيفة لذيذة يا نورا ويارب تكوني اتبسطي من الكرسي

يلا يا زوزو انتي بقيتي دلوقتي على الكرسي نورتي ..

سؤالي بقا: عايزة cv ؟
وكمان ليه زغباوية وانتي اصلا رانيا ؟
وشجرة العيلة في زيدوني بقا على ما افكر في التقيل ؟

اه يا رونة جالك من لا يرحم استلقى وعدك بقى هههههههههه

يازوزو انا عرفت ان عندك 3 توائم مع اني ماشوفتهمش لما كنت عند أم العيال سؤالي أزاي واجهتي موضوع3×1 في الأول وهل زوجك كان متعاون معاكي؟و دلوقتي بعد ماكبروا حبة بتقولي حاجة حلوة أنهم قد بعض وجم مع بعض ووفروا وقت ومجهود ولا برضه الموضوع لسه متعب؟

رونة مكان اقامتك دلوقتى احسن ولا الاول وانتى معانا ولا مش فارقة كتير

عايز اعرف حياتك قبل الجواز كانت ازاي وبعد الجواز بقت ازاي من حيث كل حاجة

رانيا الحقى جاوبى قبل ما افتن عليكى ما احنا صحاب من زمان

وهل جوازك كان عن حب ولا تقليدي .. ؟

ايه اكتر موقف محرج الولاد بيحطوكي فيه ... وتبقي مش عارفة تردي او تتصرفي معاهم ازاي؟

؟رونيتا أنتي خلعتي ولا إيه ؟ماتخافيش أي سؤال من بره المنهج نحذفة بس تعالي:-D

الظاهر بتجيب للولاد هدوم المدرسة .... عام دراسي سعيد ان شاء الله علي كل الطلاب والطالبات:p

معذرة رانيا بتفول لكل الجروب انها هتدخل بكره ان شاء الله لان النت اوشك على النفاذ وهيا متغاظة جدا لانها كانت تتمنى تكون معانا النهاردة استنوها بكرة ان شاء الله

وعن نفسى انا اسفة انى مشركتش فى سوال حد لانى كنت فكرة انكم نجتمعين فى وقت واحد وبتسالوا الضحية زى الشات ع الفيس بوك اسفة انى فاتتنى الفرصة دى

اوك وميرسي يا مورا لاهتمامك

ولسة الفرصة قدامك .. احنا بنسأل عادي في اي وقت واللي على الكرسي بيجاوب .. يعني لو عايزة تسألي زغباوية دلوقتي اتفضلي .. وهي اول ما هتفتح هتجاوب على كله .. وبعد ما تنزل من على الكرسي هتختار عضو تاني يقعد وبرده تسأليه

اوكيه يا مادا

وحشتيني ياأحلى رونيتا وزوزو موقع زيدوني بجد الموقع ناقص من غيرك ومعلش هتنوري في أي وقت
ويامورا شاركي وإسألي وتابعي الإجابات اللعبة لذيذة وعايزين نجيب رجلك على الكرسي

اولا شكرا جدا جدا جدا ليكوا علشان سألتوا عليا وانتوا كمان وحشتوني جدا وكنت عايزة ادخل بس النت عندنا قرب يخلص فمتفقين ان كل واحد يوم والنهاردة بتاعي:D
ثانيا :شكرا على شعلة الموقع يامادا مجاملة رقيقة منك
ثالثا :انتوا مصدقتوا تسألوني شكلكوا كدا كنتوا ناوينلي انا عملت فيكوا حاجة:(
رابعا هاجاوب على كل سؤال بإذن الله

دي اقل حاجة ليكي ويلا مستنين الإجابات

اسئلة نورا:
ج1:الاسم: رانيا عبد المنعم
السن: 35 سنة اهئ اهئ اهئ:)
الحالةالاجتماعية: متزوجة واعول 3 توائم منة الله ومريم ويوسف
المؤهل: بكالوريوس تربية رياضيات (ولو حد عايز حاجة فى الموضوع ده مش هاقدر اخدمه) ودبلومة رياض اطفال والحمد لله انى خدتها نفعتنى جامد
الوظيفة: ست بيت مع سبق الاصرار ةالترصد
ج2: زغباوية لان الولاد جدهم اسمه الزغبي فبقينا مسمينهم الزغباوية وعندنا بقوا يسمونا كلنا عائلة الزغباوية
ج3 :شجرة العيلة دى كبيرة لان الموقع كله تبعنا
monem:اخى الكبير
safaa: مامتي
عبد المنعم: بابايا
د/الزغبي: زوجي
الباشمهندسة :زوجة اخي الكبير
hatem:اخي الصغير
tafatifi:اختي الصغيرة
ام العيال :اختي اخر العنقود
بيجست مان : عمي الكبير
اولا العمة او العمة او الخالة:شادي والدكتورة ومحمد حمدي واحمد والمهندس احمد
ومادا يبقى ابن بنت خال ماما
والباقي قرايبى او اصحابي يعني اسهل لى انى اقول اللى مش قرايبى علشان منساش حد

اسئلة لوليتا:
واجهت الموضوع: بتساهيل ربنا فعلاومفيش غيرها ثم حبة نظام
زوجى كااااااااااااااااان متعاون جدا بصراحة
وحاجة حلوة طبعا انهم مع بعض سواء وهم صغيرين او لما كبروا الحمد لله لانى فعلا مقدرش على الحمل والولادة كل شوية سبحان الله ربنا بيدي فعلا على اد مابتقدري
والحمد لله فترة التعب والاجهاد وعدم النوم عدت بس فيه مشاكل تانية بتظهروحتاجين تفكير طول الوقت ومجهود برضوا بس أحسن الحمد لله

سؤال مورا:
لا طبعا دلوقتى احسن بس عندي عيب جامد اوى ماليش اصحاب كتير هنا ومفتقدة لامة اصحابي والمقرأة والمشاريع الفاشلة اللى كنا بنعملها وكمان طبعا دلوقتى مفتقدة مساعدة ماما ليا علشان لو كنت لسة عندكوا كنت حملت عليها جامد

سؤال مادا: هو انا عموما مابدقش ومابعملش مقارنات بين الماضي والحاضر بس هي الحياة ماهي الا محطات وانت شخصيتك واحدة مابتتغيرش وهي تكملة لبعضها هو بس بعد الولاد الواحد بقى عصبي اكتر من الاول

سؤال مادا التاني:
جوازي كان تقليدي وقَلَب

سؤال الباشمهندسة:
بصراحة ياباشمهندسة مش فاكرة جايز علشان الولاد محطونيش فى موقف رخم او محرج جامد او جايز لان الزهايمر عندي عالى ومابركزش اوى فى الحاجات دى

انا كدا تقريبا جاوبت حد عنده اى سؤال ؟؟

ايون انتي لحقتي ولا ايه .. وبعدين انتي بتجاوبي اجابات مختصرة اوي

كل ده مختصرة ماشي ياعم اسئل براحتك

علاقتك كانت عاملة ازاي باخواتك ومين كان اقرب حد ليكي وبتحكيلو دايما اسرارك .. وهل الولاد زي البنات ولا ايه ؟
بالتفصيل بقى

ايه الاسئلة دى مش بعرف اجاوب عليها انا عموما هاحاول
هو انا ترتيبي التاني بعد واكبر بنت فكنت عاملة على طول عليهم الريسة الناظرة حاجة كدا وعلى طول بغلس عليهم وماما وبابا كانوا مدينى الفرصة دى فأكيد كانوا بيكرهوني
- بحترم اخويا الكبير جدا وبحبهم كلهم جدا جدا وبحس انى مامتهم وخصوصا لو حد عنده مشكلة او متضايق فعلا بفكر فى مشاكلهم
ودلوقتى طبعا المريسة دى خلاص راحت لحالها كلنا بقينا نشكي لبعض ونرغي كتيير بس طبعا الولاد مابيحبوش الرغي الكتير مع انى بحب اكلمهم كتير وهما كلهم مش راغيين ماعدا انا وام العيال اكتر اتنين رغايين فطبعا بنرغى احنا الاتنتين اكتر حاجة
مفيش اكتر من كدا تفصيل

يازوزو لما عرفتي إني أصغر مما توقعتي كنتي متفجأه كده ليه؟وياتري عن طريق زيدوني حاسة إنك بقى عندك خميرة أصحاب مش وحشة؟وعيزاكي تديني لقب لكل حد قريب منك في زيدوني توصفيه بيه أو شايفاه فيه زي شعلة اللي لقبك بيه مادا

بس لما أكون نفسيتي مش متظبطة او عايزة نصيحة بكلم بابايا على طول بيخرجني فعلا من المود وانا أصغر برضوا كنت بحكيله واسراري كلها كانت معاه

معلش يالوليتا وياشباب انا هامشي دلوقتى وافكر في سؤالك لانه صعب اوى توصفي حد هى بتيجي كدا فاجئة
عموما كل اللى عنده سؤال يكتبه واول مادخل هاجاوب على طول وماتزعلوش لو اتأخرت عليكم لغاية بس لما النت يشحن تاني ان شاء الله احاول ادخل من وقت للتانى فى السريع

طيب اختاري حد يقعد مكانك على الكرسي عشان ميبقاشفاضي ولما ترجعي تبقي تقعدي تاني .. ها تختاري مين ؟؟ ولا نستناكي ؟

لا طبعا ماتستنوش هاعطلكوا كتير ...اصلا يوم الجمعة والسبت مش بدخل الموقع واذا دخلت بخرج بسرعة جدا
عموما من اللى دخلوا الموضوع ده وعلقوا عليه ناقص مورا والباشمهندسة والاستاذة وطبعا مادا ومادا اختار انه يكون اخر واحد وعشان انا ديموقراطية فممكن تختاروا بدالى حد من الثلاثة الباقيين حسب وقتهم
وشكرا ياجماعة استمتعت معاكوا

بالنسبة لسؤال لوليتا
-علشان كتاباتك بحس منها ان عندك خبرات كتير وده بيدي انطباع بالنضج ولانى بحقد على كل اللى قبل ال30:D
-وطبعا بقى عندي اصحاب كتير الحمد لله وكمان قرايب ماكنتش اعرفهم كويس بقيت نفسي اشوفهم
-حاجة صعبة يالوليتا انى ادى لقب لكل واحد في الموقع وخصوصا ان احنا في الغالب بننقل مش من صميم تجاربنا او ابداعتنا بس ممكن تيجي فى لحظة، حد معين كتب حاجة من ابداعه الخاص فتقدري تحكمي عليه
ونلتقي مع ضحية اخري ها ها ها ها:D: D
انا نزلت من على الكرسي بس كنت فاكراه بيكهرب هههههههه:(

البشمهندسة هي اللي هتقعد .. يا زوزو ويارب يكون الكرسي عجبك مع انك مطولتيش بس هتقعدي تاني لما النت يتظبط

نورتي الكرسي يا بشمهندسة .. ويسعدني اني اول واحد اسأل
نبدأ بأسئلة خفيفة :نعرف الأول ال cv ؟