يا من يسرى بى دماك...

اية دا كلة انتى شاعرة ياانوس...كدة بقى عاوزين مكتشفين للمواهب
على الموقع...اهلا بك ياانوس ...نورتينا +1

+1 جميله قووي ياأنوس بس بماإني شاعرة برضة ليا نقد صغنن قوي هو أنك مخلطة الفصحى على العامية وده بيقلل شويه من قيمةالكلمات لكن لوفصلتيها وخصصتيها تبقى حلوة كتيير وياريت تزيدينا وأهلا بيكي معانا

لا بقى وبجد... دا انتم كدة عاوزين مكتشف للمواهب وكمان معانا على الموقع الشاعرة ريم..ربنا يزيد ويبارك

والله ياطنط انا طالبت من بدري بأضافة تصنيف مواهب وخاصة الشعر بس الريس مضغوط شوية وانا وراه لحد مايعمل كده

+1 على الشعر وعلى اول مشاركة ليكى معانا ياأنوس

بس كدا تقريبا عرفتك انت صاحبة ريم صح ولا شكى مش فى محله

خليكى وراة يالولو واوعى تسيبية ..بس يارب تفتكرونا بعد كدة

انا المهندسه ايناس صاحبه ريم يا جماعه واللى ريم كانت بتزله ليكم هو الشعر بتاعى وعجبنى ارائكم علشان كده انا اشتركت وان شاء الله اللى هنزله واللى جاى احسن كمان

يبقى شكى طلع فى محله واهلا اهلا بيكى فى موقعنا وبيتك الجديد زيدونى ودا ترحيب علشانك من العضوة صفاء اللى هى مامتى:
[ __مشاركة محذوفة__ ]

ان شاء الله واهلا بك مرة ثانية ياباشمهندسة... نورتينا انتى وريم
على فكرة ريم من الاعضاء النشيطة عندنا ومن اول مقالة كتبتها دخلت فيها المسابقة..

طيب كنتي مستخبية ليه يا انوس .... حد يبقي عندو المواهب الحلوة دي كلها ويداري .... عموما احنا في انتظار كل جديد منك.

مرحبا بيكي و +1 علي الاشعار الجديدة

شغل عالى يا انوس

ده احلى سطر فى القصيده يا عم

استاذ عبد المنعم الطبيعى انى بحترم النقد ومش بزعل منه نهائى وده رايك وانا بحترمه بس اسمحلى اوضح انا كاتبه تزوجت او بقيت عذراء اهواك ده مش معناه الخيانه فى حاله كونى متزوجه ولكن الانسان بطبيعته مش بينسى حبه الاول وده مجرد تعبير منى عن كده ومش شايفه انه فيه خروج عن الاخلاق والا مكنتش كتبته من البدايه وعايزه اعرف بردو حضرتك فهمته ازاى...

انت عارفة ان الله يعلم السر واخفى .. ويعلم ما تخفى الصدور ..فالاحسن نعمل دليت مش نعمل سيف .. ما دام ان الانسان قد ارتبط بزوجه .... مستنى تعليق تانى لو اردت..

عاجبني جدا جدا جدا الحوار ده ... تبادل المفاهيم شيئ مهم جدا ... اتمنى من الجميع الحفاظ على موضوعية الحوار ومنطقيته بدون حد ما يزعل

من غير نق ولا حاجة ...بسم الله ماشاء الله من أول مقالة لكى يا انوسة أخذتى 8 نقط يعنى دخلتى المسابقة وبجدارة...بارك الله فيكى

ميرسى جدا يا صفاء

استاذ عبد المنعم انا هرد اكيد على حضرتك المشاعر شىء خارج تماما عن التفكير بالعقل ولو حكمنا العقل اكيد رايك هيكون صح لكن بالمشاعر راى صح وعمر ما حد هيحب ابلعقل ولا ايه ؟ والا ميكنش حب تكون صفقه انا بحترم رايك جدا لانه دينى طبعا وعقلانى جدا لكن الانسان ميقدرش يتحكم فى مشاعره او ينسى حب ليه بسهوله وده اللى بكلم عنه واحب اسمع راى حضرتك فيه...

بجد احنا بنحبك ياانوسة

أنا شايف ان الإنسان مفروض عليه انه يسطر على مشاعره ويكبح جماح نفسه حتى لو كان هناك مليون ضامن ان محدش هيعرف أو حتى هيبان عليه لحد ما يموت

وده مش معناه ان الإنسان يبقى آلة وبدون مشاعر طبعا

أنا بعتبر ان السيطرة على المشاعر جزء لا يتجزأ من رقي النفس البشرية ... يعني كل ما المشاعر بيتم السيطرة عليها وهي لسة في اللفة في أعماق أعماق القلب ... كل ما الأنسان بيزيد سمو

كمان أنا عندي قاعدة بحبها وأطبقها وهي سهلة جدا جدا ... الحاجة اللي محبش الناس تعرفها عني محبش أسيبها جوايا ... لازم أسيطر عليها لحد ما تخرج من جوايا إلى الأبد

لأن المشكلة اننا لو فتحنا الباب شوية وقلنا طالما محدش هيعرف اللي جوايا أعيش وأحلم وأحس زي ما أنا عايز ... 500 مليون احساس ومشاعر ممكن يبقى لها وجود ... منها طبعا بالإضافة إلى المشاعر اللي بنتكلم عنها هنا ... الغيرة والحقد والحسد والإنتقام والكبر ....
أوبه ... دول طلعو أكثر من 500 مليون

محتاج تعليق

نا حاسس إن كل اللي كتبنه في التعليق اللي فات ده هو روح تعاليم كل الأديان

كلام تستاهل عليه +1 وبالاضافة ليه طبعا اذا ماسيطرش الانسان على نفسه وطوعها لصالحه ولواقعه وانه يتعايش مع هذا الواقع حتى لو كان مش عاجبه هايحصله امراض نفسية كثيرة منها الاكتئاب والتقوقع مع نفسه والانطواء والعزلة وهايكون مصيدة او فريسة للشيطان انه يلعب بيه زى مايحب ويشكله حياته
وياسلام فعلا لو حاول يغير من تفكيره ويعيد النظر فيه ويسعد نفسه بواقعه ومايفكرش فعلا فى الماضي بس يفكر فى الحاضر وكيف يسعد بيه

لازم الانسان يكون قوى جدا واهم حاجة يكون قوى على نفسه ويسيطر عليها ومايسبهاش تسيطر عليه

100 100 يا زغباوية

انوس : الحالة الشعرية اللى انت فيها دى اغلب الناس بتمر بيها فى فترة ما من مجريات حياتها ..يعنى مش حالة غريبة ولا هى مخزية ... انا شخصيا مريت بيها زمااااان قوى ... وكان الكون كله مقفول من حوالى الا شباك واحد صغير بتبصلى منه بنت .. زى القمر .. زى الورده .. زى النسمة .. زى الغزال .. الى اخر المرادفات الممكنة ... حليت مشكلة مشاعرى ازاى بقى ؟ .. قعدتين تلاتة مع نفسى فى تلات حالات مزاجية مختلفة ... فاكتشفت ان الانسان هو الذى يصنع اوهامه الخاصة .. ويظل يغذيها بما يزيد اشتعالها .. واكتشفت ان فراغ الوقت والدماغ والنفس هم الاسباب الرئيسية فى هذا الهوان النفسى المكبوت ... بدات اشغل نفسى بالقراءات الفكرية والفلسفيى الجادة اللى تاكل الدماغ .. وقربت بكل عزيمة من الدين .. وبقيت اهد حيلى فى التربية البدنية واليوجا .. وغيره وغيره ... وبطلت اسرح فى الخيال لان معديش وقت .. خدت معايا حواى شهرين ... بعدها تاكدت ان الكون مفتوح .. وكمان بيتسع اكتر واكتر .. وان الشباك كان عبارة عن خرم انا اللى عملته فى وجدانى .... وبسرعة لقيت نفسى باضحك على اللى عملته فى نفسى ... وتوتة توتة خلصت المشاعر اللى كانت ملتوتة ...

بعد تعليق عبد المنعم الأخير ده ... دلوقتي أقدر أقول ان زيدوني.كوم جاب أول ثمره حقيقية ... طازة ومسكرة وصحية ومفيدة جدا جدا

أيها العضو عبد المنعم .... لا تتوقف عن كتاباتك ويا ريت تاخد كلامك الجميل اللي هنا وتجمعه في شكل مقالة وهتشوف أنا هدعمها إزاي

معلش ياجماعة مع إحترامي للجميع ولكل اللي إتكتب سابقا وهو سليم 100 %بس أرجع وأقول إحنا بشر مش ملايكة يعني بنغلط مش مثاليين وصوابعك مش زي بعضيها يعني ياسلام لو كل واحد فينا قدر يتغلب على المشاعر اللي جواه ويغلبهافي وقتها بس مش كلنا بنعرف نعمل كده الدنيا فيها وفيها
انا شخصيا هألخص تحليلي للموقف في 3أوقات:الأولى هي وقت حالةالحب نفسها ساعتها مراية الحب بتبقى عامية وبتخللي الكوسة بامية والعقل بيترمي ورانا وبرضاناوبكامل تعمدنا
ثانيا:مرحلة مابعد الفراق أو الجفا أو أو أو هنا برضه مشاعر الإنسان بتبقى غالباه وبيحس زي ماكتبت أنوس إن الدنيا إنتهت وأنه ضاع وأنهار وإنه عمره ماهيقدر ينسى أو يوصل للإحساس ده مره تانيه وبيكون ساعتها ناقم على الدنيا واللي فيها وبيعاني من ألم نفسي رهيب لايسمح بتدخل العقل فيه
المرحلة التالته:هي مرحلة تدخل العقل بقى ساعتها الواحد بيعالج نفسه ويرمم نفسيته وبيفنط ذاكرته وإحساسه ويرمي المؤذي ويسيب السليم وبيبدأ صفحة جديدة من حياته وبيتعلم من غلطة وبيقول إيه السذاجة اللي كنت فيها دي

الشخص واحد بس نظرته للأشياء مختلفه في الثلاث حالات وانا كشاعرة لو كتبت شعر في كل حاله هأكون مختلفه في رد فعلي ووصفي لمشاعري
عشان كده أرجع وأقول الفن مش مثالي لازم يوصف كل حالات الإنسان مهما كانت بشعة بدون أبتذال المهم هو المناقشة للعمل الفني والخروج منه بعبرة لمن يعتبر

يعني ده عمل فني مش مطلوب منه يكون مثالي مدام مش مبتذل

لكن من حق الكل ينقده ويفهمه بطريقتة ويناقشه ونخرج بالمفيد بدون تغيير للعمل الفني نفسه

تحليل معقول من loleta1 لكن بشكل عام الفن لا يجب إنه يوصف كل حالات الإنسان وخلاص.

الفن لازم يكون له هدف وهو الرقي بالنفس البشرية.

أي عمل فني لا يرتقي بالنفس البشرية لا يجب اننا نسميه فن أساسا ... ممكن نسميه إفراز إنسان موهوب مثلا ... زي مثلا الرسام المحترف اللي رسم صورة بشكل إحترافي هايل لكن لشيئ بشع مقزز ...

طبعا لا أقصد شعر anos اللي مكتوب هنا من قريب أو من بعيد

ماهو الناس نظرتها للشيئ بتختلف يعني اللي انا شايفاه بشع غيري يحبه جدا ولولا إختلفت الأذواق
أما الرقي بالنفس الإنسانيه بيحصل بنقد العمل الفني والحوار حواليه وعن مكوناته وتفصيصها بحيث الكل يقول وجهة نظره وتبقى شرح تفصيلي للعمل يعني مثلا لوحة الموناليزا لأول وهله لما تشوفها تقول صورة ست هادية وخلاص
لكن لو قريت قصة اللوحة نفسها والبنت والنقد تكتشف ان اللوحه فيها أسرار كتيره منها أنها مبتسمه وحزينه في نفس الوقت دلالة على حيرة نفسيتها وكمان إن عيونها بتبص لكل الأتجاهات بنفس الزاويه والنظرة لأن الرسام كان بيحبهاوماكانش عايز يبعدها عن نظره
ولوحات بيكاسو اللي يشوفها يقول إيه العبط ده مع إنه من أهم الفنانين وليه مدرسة كاملة إسمها الفن التجريدي
وبعدين لازم يبقى عندنا ليونه كافيه عشان نتعلم الفن وكل جديد لأننا بنعيش ونموت بنتعلم يبقى نقد العمل الفني والعبرة منه هو اللي بيسموا بالنفس البشرية أضافة لجمال العمل الفني نفسه

والله ياريس اللي يحب الفن ويدرسه ويدرس تاريخ الفن ومدارس الفنانين وفلسفة الجمال والفن على إختلاف مدارسه يعرف إنه لازم يبقى مش مثالي برضه بدون إبتذال أو قبح عشان

أيوة ... العبرة دي هي اللي أنا بسميها الهدف ... فن بلا عبرة (واضحة أو لها درجة من الإستتار) = عبث

يكون صادق في نقل الحدث والصورة بعيوبها وكمان يحقق الهدف بتسليط الضوء على المشكله وحلها
عموما لو كان ليا عمر وأجل هأكتبلكم حبة مقالات عن فلسفة الفن ونظرة الفنانين للجمال وكمان مدارس الفن المختلفة ،وبعد أذنك ياريس إرئف بحال المواهب الشابة الجديده دي وياريت تضيف لنا تصنيف مواهب وشعر وأكون شاكرة انا وأخواتك الموهبين الصغيرين دووول وأسفة على الصداع الفني ده بس كعاشقه للفن لازم كنت أوضح الصورة

ربنا يديلك الصحة وطول العمر.. واحنا مستنين المواهب دى ..ولاحظى ان معاكى منافسين شداد ..طبعا زى انوسة كدة.. وربنا معاكوا

ده من دواعي سروري المنافسين بيخللوا الواحد يقدم الأفضل وأن كنت انا مميزة أني لسة قادرة أكتب وأعمل مليون حاجة فوقت واحد وكفاية روزا وشقاوتها ده انا لو كنت متفرغة كنت عملت الهوايل وانا مخصصة وقت للموقع عشان بحبكم كلكم وبحب كل اللي بتقدموه هنا من معلومات

ربنا يخليلك روزا ويبارك فيها..دى عندنا اهم حاجة

اية ياانوس... حتة مقالة تعمل التعليقات دى كلها ..مش بنق عليكى ولا حاجة..بس نفسى اعرف التخصص بتاعك اية غير انك شاعرة

تخصصى الدراسى يعنى ؟

بالظبط كدة ...وبعدين يالا الاول اسألينى قبل ما انزل من على كرسى الاعتراف

ميرسى ليكم جميعا بجد وانا بحترم جميع ارائكم جدا وبقدر مدى ثقلفتكم واللى انا كمبتدئه بستفيد منها وانا راى من راى لوليتا وده اللى كنت هكتبه او هنكلم فيه كراى ... الانسان يكبح فقط مشاعره اللى تخرج عن تعاليم الدين والاخلاق والافكار السيئه لكن مشاعر بريئه وصادقه تجاه شخص ما دون مصارحته بها تقريبا مفهاش حاجه .... انا رديت بناءا على طلبكم وبفكركم باحترامى التام لكل ارائكم

حلو جدا تفهمك وروحك الرياضية ياأنوس واختلاف الرأى لايفسد للود قضية ده بالعكس كمية التعليقات الهادفة الكتيرة دى بتخلى الواحد يستفيد اكتر

تمام ياأنوس إكتبي كمان وكمان وأنا وراكي هزقك عشان ماتكسليش:-D

ان شاء الله يا لوليتا

انا بس هاخد من اول :مشاعر بريئة وصادقة تجاه شخص ما دون مصارحته بها تقريبا مافيهاش حاجة .. وهاعلق عليها بس الساعة دلوقت ستة ونص وانا قاعد هنا اربعة .. ومش قادر بصراحة .. فى اول فرصة ان شاء الله .. انت بموضوعك ده رجعتينى تمانين سنة !!!

أمسك الخشب ياعمو حضرتك عايز تكبر نفسك ولاأيه:-(

هو حضرتك يا سي العضو عبد المنعم كنت مقضيها مراهقة قبل ما تتولد بيجي 15 سنة ... ياه ... أنا أعرف ان الطفل ممكن يبتدي يعيش سن المراهقة بتاعته من سن 3 أو أربع شهور ماشي ... لكن قبل ما يتولد دي معلومة جديدة

هههههههههههههههه يمكن ياريس

هو يعنى الواحد ما يعرفش يفك عن نفسه شوية فى الموقع ده ؟؟ اروح فتاكات يعنى ؟؟!!!

انما ايه العالم الصياعة دى ؟؟ انتم ايه اللى مصحيكم لغاية دلوقت ؟؟!!

والله ياعمو أنت تعمل أي حاجة أنت عاوزها لو عاوز فتكات نبئالك فتكات ،وبعدين انا بأصحى من 6 مش سهرانه لحد دلوقتي

يالولو عمك مفكر الناس كلها بتسهر زية لحد الصبح