مصر المغروسة .... فى الزبالة

7
0
يا نهار اسود ومنيل بستين الف هباب ... ايه ده ؟؟ دا ولا كأن فيه دولة ... ولا كأن فيه مسئولين .. فى اى جهة .. وكله مستهبل ولا كـأنهم سامعين وطبعا ما حدش منهم بيمشى على رجليه علشان يشوف ..

هو فيه فى العالم دولة بقذارتنا دى .. ؟؟؟ بقينا دولة زبالة .. طب نستثمرها !!! نستغلها !!! طب نلمها ونولع فيها !!!

لا لا لا كده احسن علشان العالم يعرف اننا مستوانا الاستهلاكى مرتفع بين الدول .. واننا مش فاضيين لشغل الزبالة ده ... ورانا الاهم من كده ..

احنا بصراحة اتعلمنا من زمان ان اللى بيشتغل بيغلط واللى بيغلط بيتحاسب واللى بيتحاسب هيتعاقب .. اذن خلينا فى السليم يابا ..

احنا نركز ازاى نجمع الفلوس بأى وسيلة ونحشر فى حساباتنا .. وإياكش تولع .. وهى الزبالة هتخلص ؟؟ ما كل يوم فيه زبالة !!! مع الوقت هنتعود عليها !!!

لو مسئول واحد اتحاسب مرة واحدة وأخد عقاب حقيقى مهما كان موقعه ما كانش ده بقى حالنا ... انا كده فضيت شحنتى ...

لكن الحقيقة المرة هى ان ما دام مفيش قلق ، فكله تمام .. ومادام الناس ساكتة ولا تعترض فالمسئولين فى امان تام ...

عاوز اوصل لايه بقى ؟؟؟؟

ان المسئول من حقه يدلع نفسه ، ولما دلعه يزيد يبتدى الافترا يزيد والبجاحة تزيد وطبعا كل ده والفلوس برضه بتزيد ..واثناء ده كله بيزيد شعوره بالانتفاخ والتسيد والكبر والتعالى ...

مين بقى اللى سابه لكل اللى بيحصل له ده .. ؟؟ وما وقفهوش من الاول ؟؟

مين؟ لا قولولى انتم مين ؟؟؟

للأسف احنا شعب سلبى قصير النفس .. انا رأيى نعمل مليونية للزبالة ..

بعد إذنكم انا زهقت ..

 

التعليقات

الباشمهندسة منذ 10 عام
الموضوع ده فعلا فاق الحد بس انا شايفه له شقين ويمكن ثلاثة:

اولا... الدولة مقصرة في سن القوانين والعقوبات وتفعيل انظمة جديدة في جمع القمامة او حتي الاستفادة من خبرات دول تانية اخري وحتي النظام اللي بتتبعة دلوقتي بيعمل بكفاءة ماتعديش 10% علي الرغم من انه اول تطبيق ليه كان كويس وكانت الناس منتظمة والنظافة كانت علي مستوي مقبول...ده اولا

ثانيا... الناس نفسها غير مؤهلة علي النظافة او بمعني اخر البشر اصناف ناس محترمة بتحاول تكون ملتزمة علي قد ماتقدر ولكن قد تجد صعوبات زي انه حاططلك صندوق القمامة بعيد جدا عن بيتك قد تصل المسافة الي 400 و 500 متر وطبعا دي مشقة او هو انك لما توصل لصندوق القمامة تلاقيه اصلا مليان علي اخرة والزباله واقعة حواليه علي محيط يتعدي 1 او 2 متر كمان فطبعا بتضطر ترمي انت كمان في الشارع تقريبا ومع الوقت تبقي مش فارقة ترمي في الشارع قدام البيت ولا عند التقاطع اللي بعده اهو توفر شوية مشي علي الصبح... ده ثانيا

ثالثا... هي المصيبة الكبيرة الزبالين اصلا لم يتم استغلالهم من قبل الدولة عشان يبطلوا يقلبوا القمامة في الشارع ويعدوا يقلبو فيها وياخدو اللي عاوزينة وبعدين يسيبوا الدنيا فوضي زي ماهي وده طبعا لان فيها لقمة عيش حلوة ليهم ولو رجعنا للزمن ورا الزبالين اللي كانوا بيعدو علي البيوت افضل علي الاقل كانو بياخدو 2 او 3 جنية وبيرموا الزباله في مقالب الزباله العمومية في مناطق بعيدة ويولعوا فيها صحيح كانم في شوية تلوث ودخان بس ارحم بكتير من التلوث البصري في كل مكان وبردوا في ناس بتولع فيها وكمان بتدفع 5 جنية علي فاتورة الكهربا بالاكراة .... ده ياسيدي ثالثا

وفي مصيبة تانية ان فيه ناس كتير بتعترض وبتقدم شكاوي ومش بس كده ده فيه ناس كمان بتقدم حلول واقتراحات ولا حد بيهتم بيها ولا بيعبرها واعتقد الحل بقي ان يمسك وزارة البيئة مسئول محترم يكون كل شغلوا الشاغل المحاور الثلاثة الاساسية الزباله والزبالين وتوعية البشر 😞
wael pauomi osman منذ 10 عام
تفتكر يا عبده المشكلة فى الناس اللى بترمى ولا فى الحكومة اللى مبتلمش ؟
انا عندى الاجابة بس احب اسمع اجابتك الاول
wael pauomi osman منذ 10 عام
حلو يا باشمهندسة
زغباوية منذ 10 عام
+1 موضوع فعلا فى وقته وانا مع المليونية....دا كدا بسرعة لغاية ماكتب راى
عبد المنعم منذ 10 عام
الحوار فى الموضوع ده ياوائل محتاج وقت اطول وانا حاليا الساعة 7صباحا وفصلت شحن .. نكمل بعدين ..
zedony.com - A mmonem.com production. Privacy Policy