قناع للبشرة الجافة: ملعقة كبيرة عسل نحل طبيعى ونص ملعقة دقيق قمح او ذرة ما تفرقش وملعقة زبادى متوسطة .. امزجيهم كويس وافردى على وشك بالراحة وبالدلك الخفيف وسيبيه اطول مدة ممكنة وبعدين اشطفى بماء فاتر .. الكمية دى ممكن تكفيكى ثلاث او اربع مرات وبعدها هتلاقى نتيجة حلوة ..
لو بشرتك جافة قوى ومحتاجة بروتين اكثر ممكن تضيفى الى القناع الاول صفار بيضة ... ايه رأيكم فى البساطة دى بقى ؟
نوع ثالث من الاقنعة: برضه ملعقة عسل نحل ونحط عليها ملعقة صغيرة من خبز النحل ( حبوب اللقاح التى يصنعها النحل داخل الخلية )وملعقة زبادى ... امزجى جيدا وعيشى حياتك مع اقوى انواع الكريمات المغذية والمعالجة والمرطبة وقولى كل اللى انتى عاوزاه فى الصنف ده..
نوع رابع : ممكن تستبدلو زيت اللوز المر بالعسل او تز ودوه عليه ..
نوع خامس: ده هيحتاج منكم شوية شغل.. هتضطرى تسيحى حتة شمع نحل طبيعى فى اربع امثال وزنها زيت لوز مر فى حمام مائى ... وممكن تستعمليه بعد مايبرد اما لوحده او ممكن تضيفيه الى اى نوع من الانواع المذكورة ..على فكرة زيت اللوز المر رائحته شديدة لكن مفعوله على البشرة عجيب .. اللى بشرتها بتتلسع منه ممكن تخف الكمية اللى هتضيفه ا الى اى نوع من الانواع اللى قلناها ..
على فكرة هناك عشرات المواد الممكن استخدامها سواء هى زيوت عطرية او عادية او بروتينات حيوانية او ثمار فاكهة او ثمار خضر
او منتجات نحلية او خمائر فلا يمكن لاى واحدة انها تلم كل حاجة لكن نشوف اللى فى ايدينا بسهولة ونستعمله وكلها بتؤدى الى نفس النتيجة ..