صحيت الصبح بدري، لقيت ساعتي مأخرة
فات تلاتين سنة وانا نايم ودماغي مشوشرة
في حاجات كتير عدت عليا وأنا فاكرها متقدرة
وبلاوي كتير حصلت وبتحصل وطلعت متدبرة
وحكومات تيجي وتروح وقرارت جابتنا ورا
وقمح ييجي غالي ومسوس وعيدانه منخورة
وقطاع عام يتباع وانا نايم وفلوسه فين يا ترى
وأراضي بتتنهب وتتباع بأسعار بصراحة مسخرة
ده غير شوية قروض في بنوك سويسرا متنطورة
وبوليس يقبض عليك من غير ذنب وعنده التهم متحضرة
ودعم خيالي بيسرسب مننا من غير أي شوشرة
وكل وزير يطلع ويقول دي موازنة متقاسة بالمسطرة
والأرباح كتير والخير كتير بس الناس دي مش مقدرة
ده شعب غير ناضج ولازم يتأدب على كل اللي جرا
واللي مش عاجبه يركب عبارة واحنا نموته موتة فشخرة
أو يهاجر ولما يغرق هنقول يا عيني لقد وراه الثرا
يا عيني عليكي يا بلد ويا عيني على كل اللي جرا
سامحيني كنت نايم وعارف وساكت على المسخرة
لكني خلاص صحيت وفوقت ولقيت حياتي متدمرة
وعرفت ان سكوتي كان من اسباب حالتك المتدهورة
ولازم أرفع راسي وأرفع صوتي وأرفع أيدي في المجالس الموقرة
وأقولهم أنا مصري ودي بلدي ومش هاسكت غير لما أشوفها مخضرة
منقول من مصراوى
( كلمات د. وائل على )