يقولك المخلوع كان ليه انجازات عديدة
سرقة ونهب وقتل ودى حاجت مش جديدة
موت ضماير ناس واللى مامتش بأه عالحديدة
قالك كفاية انه صاحب اول ضربة جويا
طب ما التانية يابن بلدى جت فيك وفيا
فوق بأه ياعم دة اضحك عليك وعليا
قتل قلوب الناس واخد منها الاحساس
النصاب هو اللى عاش والشريف ياعينى إنداس
وان جيت ياخويا تتكلم تلاقى عالباب الحراس
بأينا أخر أمة بعد ماكنا فى القمة
كنا طائة نور بأينا بؤرة الضلمة
معلش نستحمل بكرة تروح الغمة
فين خيرك يابلدى راح برة لمين
سيدنا يوسف كان عليكى امين
وجه المخلوع ضيعه بشلة الحرميين
غريبة الناس دى تقلب الحق باطل
مش واخدين بالهم ان نص الشعب عاطل
جهل وفقر وامراض ولأخر وقت بيماطل
مايقدر على القدرة الا رب العباد
اللى خلقه هيعزبه من كتر الفساد
ولسة مش راضى يسلم ومقضيها عناد
قال لعنان يللا هدو عليهم الميدان
خلوهم هما والارض واحد دول شعب جبان
مش عارف اننا اتحدنا مسلم و مسيحى واخوان
كلنا ايد واحدة الشعب كله والجيش كمان
لكل ظالم ومفترى نهاية والحق مسيره يبان
قول أسف ياريس زى مانت عايز لو قابل تتهان