السمك الماكريل بطريقة مستحيل حد ميحبهاش

انا مش عارفة ايه هى بالظبط فوائد السمك الماكريل بس سمعت فى التليفزيون أنه له فوائد كتيرة جدا رغم انه سمك مجمد ومستورد

انا بقى باعمله بطريقة روعة

بعد طبعا ما يتنضف ويتغسل أقطع السمكاية بالعرض اربع أو خمس حلقات واعصر عليهم ليمون واسيبهم شوية

آجى فى طاسه جافة أحط معلقة كمون وزعتر وفلفل وكزبرة وقرفة وحبهان وكل التوابل اللى عندى تقريبا واحمص كل التوابل دى مع بعض شوية على النار

ولما تتحمص أحطهم مع بعض فى الكبة واضربهم مع بعض ضربتين كده علشان اخلط الروايح مع بعض

وبعدين احط خليط التوابل ده على السمك المتقطع حلقات واخلطهم كويس

احط معلقة زيت زيتون فى طاسة واحط عليها السمك أشوحه شويه وبعدين أهدى النار عليه

فى أقل من عشر دقايق هيكون استوى وطعمه روعة وممكن يتاكل بالعيش أو مع رز أبيض