طريقة حفظ بعض الخضراوات في الديب فريزر

4
0

اولا الطماطم : أنا بجيب الطماطم مستوية وبعدين اضربها فى الخلاط واصفيها بصفايه .. وبعدين احط لكل كيلو طماطم تلات ملاعق سمن واسيبها لحد ماتنشف مايتها خالص وبعدين احطها فى اكياس وكل كيس على قد الاستهلاك

ثانياالثو: أنا بشترى الثوم فى شهر مايو لان سعره بيكون رخيص وكمان بيكون مش جديد فيبقى تقشيره صعب ولا قديم فيبقى فاضى ....بجيب الثوم واقشره واحطه فى الخلاط واحط معاه لكل كيلو ثوم اتنين ملعقة كبيرة زيت ونص ملعقة ملح... واضربهم لحد مايبقى ناعم... واحط معظم الكمية فى برطمان زجاجى (والزيت عشان لون الثوم مايتغيرش وكمان يحتفظ بالنكهة بتاعته.. اما الملح عشان مايجمدش فى الفريزر واعرف اخد منه بالمعلقة بطريقة سهلة).... اما باقى الكمية باحط معاهم فى الخلاط فلفل اخضر وكسبرة خضرة وكمون كتير وبضربهم مرة تانية لحد ما المكونات تنعم وبحطهم فى برطمان تانى عشان تتبيل السمك وطواجن الجمبرى والكاليمارى.. وتتبيلة البدنجان المخلل وحاجات كتير.......وبيقعد عندى من السنة للسنة اللى بعدها....

ثالثا البسلة: بجيب البسلة واخرج حبوب البسلة من قشرتها واحطها فى كيس مع جزر مقطع مكعبات صغيرة ...

رابعا الفاصوليا: بقطع طرفى الفاصوليا وبعدين اقطع الفاصوليا الى قطع متوسطة وبعدين اكون حاطة على النار حلة فيها ماء مغلى وملح واسقط الفاصوليا لمدة دقيقة بعد ما اشيل الحلة من على النار واصفيها فى مصفاة وبعد متتصفى خالص اكون مجهزة طبق فيه ماءوثلج كتير واحط المصفاه بالفاصوليا في الماء المثلج لمدة ثوانى حتى تحتفظ بلونها اخضر زاهى ..... واصفى الفاصوليا مرة اخرى واعبيها فى اكياس على حسب الأكلة..

خامسا الخضرة: بالنسبة للبقدونس والكسبرة والشبت بغسلهم كويس اوى وانقعهم بعد كده فى ماء مضاف ليه معلقة خل وبعدين افرمهم ناعم اوى بمخرطة الملوخية وواصفيهم لمدة ساعتين على قطعة قماش وبعدين احطهم فى كيس وكل ما احتاج شويه اخدهم من الكيس على طول..وباستخدمه لخلطة المحشى والممبار والفول بالتقلية وساعات لما بيكون عندى عزومة بافرشهم تحت الاكل فى الطبق وارشهم على الطبق ...

سادساالبطاطس المقلية: باقشر البطاطس واغسلها بعد ماأقشرها بس... وبعدين اأقطعا صوابع متوسطة وطويلة.. وانقعها فى ماء ساخن وملح وخل وملعقة سكر..(لكل كيلو بطاطس 1لتر ماء ساخن و3ملعقة ملح صغيرة وربع كوب خل وملعقة سكر) واتركها فى الماء منقوعة لحدمايبرد (مش اوى )يكون دافئ واحمرها فى زيت غزير وساخن جدا واقلبها باستمرار لكن بعد ما تاخد اللون الاصفر الفاتح.. واقلبها لحد لونها ما يبقى دهبى فاتح وأنشلها على ورق ماص للزيت واسيبها لحد ماتبرد وبعدين احطها فى علبة بلاستيك فى الفريزر... واخرجها فى اى وقت على الطاسة اللى فيها زيت ساخن جدا على طول من الفريزر(عشان درجة برودة البطاطس هتقلل درجة حرارة الزيت فلازم يكون الزيت سخن اوى اوى)

سابعا ورق العنب: باقوم برص ورق العنب واحدة عكس واحدة... يعنى امسك الورقة من العنقود واحطها فى اتجاه معين والورقة اللى بعدها اخلى العنقود فى الجهة الاخرى .......واشيلهم فى اكياس فى الفريزر ولما باطلع الكيس باسلق ورق العنب وهو متجمد..

ثامنا الباميه: باقمع البامية وأغليها لمدة تلات دقائق فى مية مغلية على النارواطلعها من المية المغلية على مياة فيها مثلجة(فيها تلج)واصفيها كويس من المية واشيلها فى اكياس ولما باستخدمها بحطها وهى متجمدة مش بسيبها تفك عشان لونها يبقى حلو مش غامق..

 

إضافة منذ 10 عام
غير محدد
تعديل منذ 8 عام
safaa
50508

التعليقات

الاستاذة منذ 10 عام
بص يا ريس انا جيت اعمل تعديل للموضوع علشان القراء الجدد يقروه
ام طلع لي بالشكل ده ليه ماعرفش
مع اني ماغيرتش اي حاجة فيه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
safaa منذ 10 عام
انا حاولت ارجعها زى ماكانت ...ولو فيها حاجة تانية ابقى عدليها براحتك يامرمر
الاستاذة منذ 10 عام
تسلميلي يا طنط
safaa منذ 10 عام
مرمر لو كنتى عاوزة تعملى تعديل فى المقالات القديمة ممكن تعملى قبل التعديل copy عليها وتنقليها على صفحة خاصة بك بعيد عن الموقع وبعد ما تعملى التعديل انقليها تانى هتكون سهلة جدا
safaa منذ 10 عام
+1 بس الصورة دى شكلها مغرى ...انا خايفة لحد يأخذها !! 😞
الاستاذة منذ 10 عام
نقدر نعمل منه طبق سلطة محترم
زغباوية منذ 10 عام
تسلم ايديكى +1
مها شاهين منذ 10 عام
معلومات قيمة فعلا +1
zedony.com - A mmonem.com production. Privacy Policy