كيفية التعامل مع الطفل الزنان (اللحوح)

1
0


يعنى ايه طفل زنان؟؟
يعنى طفل متعلمش الصبر وعدم القدرة على الاستحمال فبالتالى عند اعتقاد انه للما يبقى محتاج حاجة لازم تبقى امامه فورا .. ولو متوجدتش امامه فى نفس اللحظة بيستخدم اساليب كتيرة مثل:
- الصراخ والعياط المستمر
- احراجك بالطلب امام الاخرين
-الشكوى ومحاولة اخذ استدرار شفقة الناس
-الإرتماء فى الارض او ايذاء نفسه..

الحل؟؟
- التجاهل للصراخ والزن والتدرب على امتلاك الاعصاب .. ولازم تعرفى الطفل ان طول ما هو بيبكى او بيزن انتى مش هتستجيبى لاى طلبات له ..

- مثلا الطفل طلب منك فلوس يشترى حاجة .. بلاش فى وقتها تستجيبى عرفى الطفل انك هتخلصى اللى فى ايدك وهتخليه يشترى زى ما طلب .. بس بشرط يصبر لحد ما تخلصى شئ معين او حاجة معينة انتِ عايزة يصبر عليكى فيها .. وكل ما يزن بعد ما عرفتيه السبب تجاهلى زنه خالص.. ووقت ما يفقد الامل اشتريله اللى وعدتيه بى المهم انك تعرفيه انك فاكرة طلبه لكن مش هتنفذية فى نفس اللحظة ..

- وضع قواعد تشتمل حدود طلبات الطفل مثلا تحديد وقت للعب وعدد ساعات معينة وايام معينة للخروج على فكرة وضع القواعد دى بتزيد الطفل احساسه بالامان لكنه بيفضل يتحدى القواعد دى لحد ما يختبر ثباتك عليها وهل هتقدرى فعلا تنفذيها ولا لاء..

- اتفقى مع اللى حوليكى انهم يلتزموا بالقواعد دى .. يعنى ميجيش الاب يضيع تعبك كله بحجة انه مبيحبش يحرم طفله من حاجة لازم القواعد دى تبقى واضحة جدا ليكى ولكل من يتعامل مع الطفل ..

- كل اللى هيقدر يعمله هو الزن اكتر وكل اللى تقدرى عليه تكونى ثابته على مبدئك .. بعدها هتلقيه بقى بيفكر فى حيل تانية غير الزن يقنعك بيها لتنفيذ رغباته ..

- تجنبى تعنيف الطفل وضربة اثناء الزن لانه حتى لو سكت بسبب ضربك بس ده بيترك عواقب وخيمة فى شخصية طفلك .. ودايما اتعمدى بعد ما يخلص زن تفهميه ازاى يطلب المرة القادمة بشكل مهذب عما سبق..

- تعبيرات وجهك لازم تدل على الحزم والثبات .. بلاش التعبيرات اللى يفهم منها انك خلاص قربتى تزهقى فيفهم انه يزن اكتر عشان تزهقى بشكل اسرع فتنفذى اللى هو عايزه..

- اشكرى الطفل وقت ما يقلل من زنه او اى تغيير بسيط حصل فى موضوع الزن..

- بلاش اسلوب (هو كده) لازم تبررى لطفلك السبب وبعد ما تعرفيه السبب تتركيه يفعل ما يشاء لكن بعد ما تعرفيه سبب رفضك .. يعنى مثلا انت لسة واخد فلوس من شوية .. لاء عشان مش ده معاد اللعب بتاعك وهكذا ..

- ابعدى انك تضعى الناس فى حساباتك بمعنى انه لما يطلب حاجة قدام الناس تنفذيها عشان محدش يقول عليكى بخيلة مع ابنك انتِ مش محتاجة تبررى كرمك على اطفالك وتذكرى دائما انك بتزرعى قيم ومبادئك فى عقل طفلك فلا تبالى بكلام الناس ..

 

إضافة منذ 8 عام
غير محدد
تعديل منذ 6 عام

التعليقات

لا يوجد
zedony.com - A mmonem.com production. Privacy Policy