لكل من يحب ان يبدأ في التجاره ومعندوووووش اي خبره

5
1
صباح الجمال والحب والتفائل والتقدم ..
لكل من يحب ان يبدأ في التجاره ومعندوووووش اي خبره .. ولكن لازم يكون بيحب التجاره طبعا .. تعالي معايا ....
من كام يوم كنت فالفجاله .. ولقيت هناك تجار جمله لبعض الخردوات اللي ممكن تتباع في المكتبات .. لقيت حاجات كتير من اكسسوار ولعب اطفال وخلافه كلها اسعارها بسيطه جدا .. ولقيت اللعبه دي .. هقول لكم بكام بعدين ..
فبقول لكل واحد عايز يشتغل انزل وانت مقرر تشتغل مش علشان تاخد فكره .. نظم نفسك جهز مكان ولو في بيتك .. اعمل خطه تسويق علي قدر معارفك واصحابك فالأول واي اماكن تانيه .. حدد رأسمالك اللي هتبدا بيه ويكون مش اكتر من 1000جنيه بل اقل .. علشان تدرب فيه .. وحدد خطه التسويق اي ازاي هتعمل خطه تسويق من خلال النت ومن خلال ارض الواقع ..
كل دا خد يوم اتنين .. تلاته .. عشره .. المهم بعد ما تخلص هتزل معاك 500جنيه وتاخد جوله في سوق
الجمله .. لقيت حاجه لقطه اشتري ملقتش يبقي تلف وتلف وتلف وتكتب اسماء المحلات اللي تعجبك وتاخد ارقامهم وتكتب عناوينهم .. ممكن من اول يوم ربنا يفتح عليك .. وممكن من تاني او تالت او رابع .. انما كل ماتلف كل ما هتتعلم وهتتنور ..
وكون متأكد انك طول ما بتسعي ربك مش هيكسفك وهيبسطك وهيفتح لك ابواب مكنتش علي بالك .. ربنا جميل اوي اوي .
اكتب كل النقط دي ..
حدد المكان اللي ممكن تبدأ منه .
اكتب خطه التوزيع.
حدد رأس المال اللي هتعتمده للتدريب .
اكتب خطه التسويق.
اقفل الفيس.
توكل علي الله ونيتك تكون خير وأنزل.
نرجع تاني لما كنت فالفجاله لقيت حاجات ومحتاجات وشفت اسعار بقيت عايز امسك عصايه وادخل الجروب واي واحد عمال يقول نفسي فمشروع .. عايز ازود دخلي .. ورايا التزامات ومش عارف اعمل ايه .. وبالعصايه وفين يوجعك
ليه بقي لاني لما شفت الاصناف والاسعار لقيت انك ممكن تعمل 500جنيه فاليوم وانت مستريح جدا .. مش مستريح يعني وانت قاعد .. لأ .. يعني من غير ما تلاقي تعب في البيع للأصناف لانها سعرها مناسب ومطلوبه .. ومن غير خساره بأذن الله ..
ازاي بقي اعمل 500 جنيه ياصديق؟
من ضمن ما شفته هناك ودا مثال لصنف مش اكتر .. لعبه البنات والولاد اللي بتتعمل اشكال وكانت منتشره اول الصيف بطريقه كبيره جدا ..
لقيت دسته 12 علبه كل علبه فيها الاساتك الخاصه بيها وفيها العده بتاعت الشغل من ابره بلاستك ولضامه .. وكيس اقفال بلاستك .. مرفق الصور ..
عارف ياصديق الدسته بكام ؟؟
ب12جنيه !!!!!!! يعني العلبه كامله ب1 .. يعني انت لو اشتريت 600 علبه ب600ج هيعملوا 50 دسته ونزلت وزعتهم علي المحلات ب18ج الدسته وكل محل اخد 5 دست هتوزعهم علي 10 محلات .. يبقي انت كده كسبت 300جنيه شيل منهم 100جنيه مصاريف يبقي صافي 200جنيه .. وحش ؟؟
العلبه دي بتتباع ب3.5ج فالمحلات قطاعي وفي محلات تانيه بتبعها ب5ج ..
العمليه دي علشان تعلمك التجاره وطول ما انت ماشي فالسوق هتلاقي رزق وهتلاقي بضاعه لقطه وكل ماتسعي ونيتك كويسه هتفتح معاك .. وكل التجار الكبار والمستوردين ابتدوا كده ..
لو ملكش خبره ومش معاك رأسمال ابدأ كده ..
لو ملكش خبره ومعاااك رأسمال وخايف يضيع فمشروع لانك معندكش خبره أبدأ كده .. وصنف والتاني والتالت .. وبعد كده لو معاك رأسمال او كونت رأسمال وفهمت اسرار الشغلانه من تجاره واستيراد .. افتح مكتب جمله او محل وابدأ وانت مطمن مش خايف لتخسر ..
البدايه سهله .. والله العظيم سهله .. وطول ما انت ناوي خير ابدأ .. وبالخطوات اللي قلت لك عليها .. وربنا هيكرمك وهتدعيلي بعد كام سنه لما تلاقي نفسك بقيت مليونير.

 

إضافة منذ 5 عام
reda okl
360
غير محدد

التعليقات

زغباوية منذ 5 عام
مقال حلوة اوى واللى عايز يشتغل بيشغل دماغه ويبحث كتير وربنا يفتحها عليه
safaa منذ 5 عام
بارك الله فيك
zedony.com - A mmonem.com production. Privacy Policy