يـــــاترى انت ميــــــــــــــــــــن فى دول؟

ربنا يديلك الصحة والعافية وطول العمر وبعدين انت لسة شباب ولا بتخزى العين

هو فى حد حيهرب من سنّه البركة فيكم ...

انا برضو مش عارفة اعمل اية ونفسي اعمل حاجة
انا من النوع التالت

طيب حلو جدا يابسمة امل لاقيت حد معايا يالا نحط افكارنا على افكار بعض وان شاء الله نعمل حاجة

Civilization begins with orders, grows with liberty, and dies with chaos -- Will Durant

ترجمة من فضلك

بس اللى بيحصل كل جمعة لو استمر فعلا بصورته الجميلة بالعكس ده هايخلى الامور تمشى بسرعة اكبر

النبي عربي يا اخ Monem صححهالي :
الحضارة تبدأ مع أوامر و تنمو مع الحرية و وتموت مع الفوضى -- حكمة ويل ديورانت

يقول ول ديورانت مؤلف موسوعة "قصة الحضارة" : إن الحضارة تبدأ بالأوامر وتنمو بالحرية وتموت بالفوضى

ماهو ويل ديورانت ده اللى ماكنتش عارفة اترجمه شكرا

وليام جيمس ديورانت هو كاتب امريكى ومؤرخ وفيلسوف ولد عام 1885 وتوفى عام 1981 من افضل مؤلفاته كتاب قصة الحضارة ، وهو مكون من 11 مجلدا مكتوب بالتعاون مع زوجته ارييل ديورانت ونشرت في الفترة بين 1935 و 1975.
حصل على جائزة بوليتزر في عام 1968 و ميدالية الحرية الرئاسية في 1977

مرسيى على المعلومه ياحماده

شكرا ياحمادة

طيب احنا ممكن نعمل حاجة حلوة اوى يوم الجمعة الجاية ننزل كلنا التحرير ونشوف الوضع بطريقة عملية ونحكم بطريقة ميدانية

شكرا اسحب فكرتى

حلو جدا الحل العملى ده وانا معاكى

انا معاكي يا loleta1 العمل في صمت اكثر حاجة بناءة اما في الهيصة كل المجهود بيضيع علي الفاضي

ايوة كدا الكلام الجميل بس انا برضو لو اتيحت ليا الفرصة هاحاول انزل اعتقد هاتفرق معايا اوى النزولة دى وتجربة محتاجاها جدا واجى احكيلكم

أصل زغباوية دي أختي وياما اتناقشت معاها ... أول مرة تتكلم في السياسة وبتتكلم باندفاع ملوش أي لزمة بوعي يقل عن 100% بشوية

الحمد لله مابيقلش كتير وبعدين اصلا مش لازم اتكل علشان اكون فاهمة او مش فاهمة بس ماكنتش بتكلم علشان اللى هاقوله مش هايعمل حاجة لكن دلوقتى خــــــــــــــلاص هاقول وهاقول وهاقول

وبعدين باندفاع جايز عشان الطاقة الكامنة من ايام ماكنتش بتكلم
وكمان فيه اهداف ماكانش الواحد بيقدر يعملها دلوقتى يقدر ان شاء الله والناس ماتقولش عليه مجنون زى تنظيف الشوارع مثلا

وكده احنا نقدر نديكي لقب موفدة الموقع من ميدان التحرير - الناشطة زغباوية

بما أنك أصبحتى موفدة موقع زيدونى لميدان التحرير أسمحيلى أتجرأوأزنقك وأسئلك ماذا أستفدت من وجودك فى موقع الحدث؟وماللذى غاب عن أعيينا ونقلته أليكى أرض الحدث؟وهل فكرتى فى تكرار التجربه أموجدتى أنا العمل من موقعك أثمر وأكثر فائده؟أفيدينى أفادك الله

اول حاجة ان شاء الله اروح كل مرة
ثاني حاجة لما بتروحى اولا بتفهمى حاجات مش فاهماها يعنى مثلا هما ليه مستمرين ومصرين على التظاهرات وهما ليه مصريين على الاشخاص الغير مرغوبين اكيد فيه لعب كتيير بيحصل او بيطولوا علشان يداروا على الأدلة التى تدينهم لانهم متشابكين ومتداخلين فى بعض وده ناس كتير مش فاهماه

ثانيا بتتشحنى وطنية عمرك فى حياتك ماهتشوفيها غير فى المواقف اللى زى دى

ثالثا صلاة الجمعة هناك حاجة تانية خالص بتهيألى عمرك ماهاتسرحى فيها ابدا لان الاحساس عالى جدا

رابعا بتشوفى اللى عمرك ماشوفتيه فى مصر من تنظيم الشباب لتفتيش الناس ومن احترام الجيش ليكى وهو بيفتشك ويشوف بطاقتك ومن ابتسام الناس كلها فى وشك ومن ادب الشباب معاكى حتى لو انتى غلطانة

خامسا لو معاكى ولادك ولو حتى ماخدتيهمش زيي هاتوريلهم الصور بتفهميهم وتوعيهم وتشيلى من جواهم الخوف وتحسيهم على الشجاعة وتحسسيهم انهم شاركو فى تظبيط البلد وده مطلوب طبعا فى الفترة الجاية لتربية ولادنا احنا مش بنأكلهم ونعلمهم وخلاص

سادسا شعور الانتماء والمشاركة فى حدث عظيم ممكن مايتكررش تانى فى حياتك وفى تخليص البلد من رموز الفساد فى حد ذاته بيبعث فيكى الايجابية والنشاط وان ليكى لازمة فى الحياة مش عايشيين وخلاص

سابعا لو ماشاركتيش لما تقابلى ربنا هاتقولى ايه ماشاركتيش ليه ماوقفتيش ضد الفساد ليه وعلشان ماندمش بعد كدا انى ماشاركتش ويبقى نستاهل كل اللى بيجرى فينا

كل ده طبعا بانب ان كل واحد يظبط فى مكانه
ارجو ان اكون اقنعتكم

ان شاء الله المرة الجاية اخد الولاد معايا

انه أأمن مكان فى مصر

على فكرة شوفت حاجة لفتت نظرى جدا السائحين فى كل مكان من ميدان التحرير ومش خايفين وتمشى يضحكوا فى وشك ولسان حالهم يقول اننا فخورون بكم وده ماكنتش بالاقيه احنا زمان لما كنا بنشوف سائح احنا اللى كنا بنبحلق فيه وهما كل واحد فى حاله ينظر امامه

مش قلتلك التجربه بتوضح برضه أن فى جوانب الواحد مش ملم بيها
يارب على طول مصر بخير وفكرة تربية الأولاد على الأنتماء فكرة ظريفه يمكن لأن بنتى صغنونه ماأنتبهتش للنقطه دى لكن الكبار لازم ننمى الحته دى فيهم
أما بالنسبه للأستمرار والضغط فأنا لسه عند العمل العملى أكتر من التظاهر لأن التظاهر ممكن يتم فى أى وقت أما التصرف العملى لازم يتم دلوقتى
أما موضوع شحن الوطنيه والأنتماء فيمكن انتى سعيده لأنك اول مرة بتشوفيه كواحده ست بينما أنا لأنى دخلت جيش قبل كده وعارفه معنى أنك تكونى مجنده منظمه وتشيلى سلاح وتتدربى عليه وشوفت مناورات وعروض عسكريه كتيير ودبابات وطائرات وغواصات كمان وعدت عليا حروب فى ليبيا وانا صغيرة ودرست حاجه أسمها الوعى السياسى فأنا مش جديد عليا مشاهدة الجيش وجو الأنتماء لكن انا سعيده بتغيير الفساد بس ياجماعه مصر وصلت من الفسادلحد كبير مايخلص مراجعته فيوم وليله عشان كده بطالب بأعطاء الفرصه لتطهير البلد وأسترجاع الحقوق بالتفصيل المريح .
أما السياح لازم يفرحوا بيكى لأنهم لأول مره يلاحظواأن أحنابنتصرف بمستوى الدول المتقدمه وبنعملثورة تنقل على الأقل أسلوب سلوكنا من دوله متخلفه ناميه[الى أسلوب حضارى فى التعامل مع بعضنا قبل السياح]

طيب الكل يروح ويحكم بنفسه يايكمل يا لا
وكويس انها بتتعمل يوم اجازة علشان برضو االحياة ماتقفش
وكمان علشان التظبيطات تتم أسرع

وبعدين المفروض تحكيلنا تجربتك فى ليبيا ولما تدخلتى الجيش ايه وكمان تقوليلنا رايك فى اللى بيحصل دلوقتى

ليبيا بلدى التانى بحبها كتيير قضيت فيها معظم عمرى حتى الثانويه العامه بلد جميل ونظيف وخصوصا البحر لأن الثانوى هناك عسكرى فكان الزى هولبس الجيش كامل وكنتى بتعملى تمام الصباح فى كتائب وسرايا زى الجيش وكنا بندخل ندرس من ضمن مواد الدراسه[عسكريه]بتدرسى فيها الأسلحه بمختلف أنواعها وتركيبها وتزييتها وأستخدامها.
كمان كنا بنتعلم المشى العسكرى وأستخدامها عملى مرتين فى الأسبوع فى معسكرات جيش وكنتى بتأخذى درجات على سرعة فكها وتركيبها وحسن أستخدامهاوبندخل دبابات وغواصات تدرسى تركيبهابيدرسلك مقدميين وعقداء جيش
وكنا فى أعياد الثورة بننزل العرض العسكرى ونعمل بانوراما بالأسلحه والدبابات بطلقات أمنه.
كنتى بتتعاملى كجندى وتتعاقبى كجندى[يعنىمره ترتيب الكتيبه مكانش مظبوط أتعاقبنا بالجلوس على الركب وأديكى وراء ظهرك على أسفلت المدرسه تحت عز المطر والتلج وده عشان أحنا بنات الأولاد بيحلقوا شعرهم وممكن يتحبسوا يوم كمان.

أما بالنسبه لوضعهم مستوى المعيشه عندهم ممتاز بس برضه رئيسهم خلع الملك ومسك هو وبلع خير البترول لأنها دوله منتجه للنفط زى الخليج والخير ده كان ممكن يخللى مستواهم المعيشى أفضل وكمان من وقت للتانى بيورطهم فى عمليه أرهابيه تفرض عليهم عقوبات وحصار جوى وده كان بيضايق الناس لأنهم أغلب شغلهم أسيراد وتصدير لأيطاليا ومالطا وفرنساوكمان بيعرقل حركة السفر الجوى فلازم تسافرى برى أو بحرى لأى دولهوبعدين منها تسافرى جوى واللذيذ أنه بيقول من زمان أنا العقيد معمر القذافى مش رئييس البلاد واللى يعترض يروح ولايتعرف له طريق جرة وكمان الناس أعترضتلأنهم حسوا أن الحكم هيورث لأبنه سيف فطاح وتجبر وماقدرش أقول أنه وقع لأن ليبيا هى طرابلس الى كنت عايشه فيها وكل مراكز القوة والنفوذ هناك لو تحررت تحررت ليبيا بس على حسب أتصالاتى بأصدقائ الناس مش قادرة تنزل للشوارع عشان المرتزقه بيقتلوهم وبالتالى هو قامع طرابلس بس لكل ظالم نهايه

ربنا يوفقهم ويحررهم وينصرهم ويحفظهم هما وسائر بلاد المسلمين
بس اكيد استفدتى وكانت تجربة حلوة

طبعا لأن البلد هناك ناس تانيه وجو تانى وأصحاب وثقافه وعادات مختلفه تماما فطبعا شكلت جزء كبير من هوية الواحد وشفت فيها حاجات غيرى ماشفهاش ولا جربها عشان كده برغم أنى مصريه بتضايق كتير لما بيقولوا عليها بلد متخلف ودول بتوع الناقه والجمل بالعكس دى بلد نضيف وفيها أثار فمصراته وصبراته تسحر من جمالها ولاشوفت بحر جنب الأثار ياخد العقل والعين زى هناك بس شوية أنفتاح وهى تتطور وتبقى أحلى

بإذن الله تكون احلى وبكدا نكون عايزين موضوع كامل عن ليبيا وكل اللى شوفتيه هناك

ربنا يعنكم.........

انا رحت وقلت نعم والحمدلله طلعت النتيجه نعم أهم حاجه أن صوت أى حد بقى مؤثر ومسموع
لمانصوت لشخص أو قرار وبالتالى لانقاطع الانتخابات بل نصوت للاصلح وللخير لبلدنا

ايه سبب التكرار ....هى Password ولا ايه الحكاية ؟

هي الفكرة ان الثورة خلصت فعلا ونتايجها تفوق الخيال بس الناس لازم تكون مصحصحة علشان اللى ماسكين البلد مايناموش ولا يتباطئوا

وهو الموضوع اصلا كان بايظ وان شاء الله يتعدل قريب

وكل الناس لازم تركز ويظبط كل واحد في مكانه ويساعد بأي حاجة يقدر عليها حتى لو نضف حول بيته ورمى الزبالة في مكانها بالظبط وعلم ولاده السلوكيات الصحيحة وياسلام بقى لو الكل يتطوع في اى عمل خيري يقدر عليه والمساعدات كتيرة يعني اللى عايز يساعد هايساعد
وربنا يسترها ويعينا