عمل ميزانية اقتصادية

سؤال مهم فى وقت مهم ففعلا اليومين دول محتاجين للإقتصاد والتدبير وبلاش الإسراف
وهاحاول احط لك خطوط عريضة هاتجيبى ورقة وقلم وواحدة واحدة تحاولى تشوفى ايه اللى انتى بتستهلكيه فى اليوم و الأسبوع والشهر بمعنى انا بعمل مثلا 1/2 ك أرز فى اليوم طيب وبعمله حوالى كام مرة فى الأسبوع طيب والأيام التانية بناكل مكرونة ولا ايه طيب

ومثال تانى الخضار والفاكهة انتى بتنزلى كام مرة فى الاسبوع وبتشترى بكام وبيكفيكى لمدة كام يوم وده مثال

وقيسى على كدا كل حاجة انتى بتستهلكيها ادخلى مطبخك وشوفى كل الحاجات من زيت وسكر ولحوم وخضار اعملى لستة بكل حاجة بتستهلكيها فى المطبخ

وبعدين ادخلى على الحمام والمنظفات ومستحضرات التجميل وشوفى مثلا كيس المسحوق بيقعد معاكى حوالى اد ايه يعنى شهر ولا كام اسبوع ولا شهرين حسب استهلاكك

بعد كدا شوفى الحاجات المتفرقة مثل خروجة او فسحة بتصرفى فيها كام وكام مرة فى الشهر بتعمليها

وشوفى كمان لو تحبى تكونى دقيقة اللبس والأحذية بتجيبى بكام وكام مرة فى السنة بتعمليها

المفروض علشان الموضوع يكون دقيق تحطى الميزانية المبدئية دى تحت الإختبار حوالى 3 شهور هتلاقيكى بتزودى حاجات وتنقصى حاجات وممكن حاجات تستغنى عنها وهكذا

ارجو ان اكون افدتك
وبالتوفيق