خلوا بالكم اليومين دول جااااااامد لان للشحاتة والسرقة ايضاً تفانين واصول وكل فترة بجددوا فيها ويطوروا من اساليبهم علشان عنصر المفاجأة وبيخلوا الواحد مش مركز ومش عارف يتصرف صح
يعني من الأخر الشحاتة دى علم وفن وبيتم تطويرها باستمرار
اليكم القصة: امبارح كنا لسة واصلين البيت كلنا انا وزوجي والاولاد (التوقيت) الباب خبط وزوجي فتح للبنت اللى بتخبط وبتقوله انها تعرفني وتعرف اسم ابني واسماء كل سكان العمارة وابنائهم وان هما عارفينها وجاية من طرفهم وانى انا اللى قايلالها تيجي علشان عايزاها فى طلب فزوجى صدقها وافتكر انها من الناس اللى بتعامل معاهم وانى انها اللى قلتها تيجي وطلبت اننا نقعد لوحدنا علشان مكسوفة تتكلم امام زوجى فزوجى قلق وحس انى معرفهاش اصلا ففضل مراقبها وهى بتكلمني وهى حاسة بكدا(الحمد لله) المهم قعدت تكلمنى انها يتيمة وفرحها بكرة وانها من طرف جارتنا اللى تحتنا وهى عارفاها وعايزة اى حاجة تشترى بيها عباية علشان جوازها وان جارتنا ادتها وانى لازم اديها وما امشيهاش زعلانة علشان هى يتيمة .................
طبعا انا كنت مذهولة من الموقف ومش عارفة اتصرف ازاى بس الحمد لله ربنا الهمنى فقلتلها بيتك فين وانا اجيبلك اللى انتى عايزاه فلقيتها بتتهرب وانها من بعيد (وطبعا ماقالتش فين) فقلتلها هو مش جيراننا عارفينك هابعتلك الحاجة معاهم علشان انا مش عاملة حسابي دلوقتى وصممت على موقفى وانى مش معايا فلوس اصلاً وبعد الكلام بتاعها الكتير انى ماينفعش اسيبها تمشي من غير ما اديها حاجة قامت بالعافية وعايزة تطلع منى باى حاجة حتى لو كان لبس بتاع الولاد الصغير عليهم كان في شنطة حاطاها خلف باب شقتي فخدت بالها من الشنطة دى (يعني مركزة وبتبص فى كل مكان) فحاولت اخرجها من باب الشقة علشان اجيبلها اللبس لان المكان ضيق وومش عارفة اعدى منها فلازم هى تخرج الاول فخرجت باعجوبة وهى بتزق الباب وعايزة تفتحه على الاخر وانا واقفة ورا الباب بزق انا كمان وبجيبلها اللبس والحمد لله زوجى كان واقف علشان ماتقدرش تدخل تانى ....المهم طبعا اللبس مش هو ده اللى فى دماغها فقالت انه كبير والحمد لله نزلت
بعد كدا كلمت جيراني لاقيتهم مايعرفوهاش خالص وكل واحدة فينابتقولهم انها من طرف الجارة التانية علشان يطمنوا لها وخصوصا انها عارفانا واحد واحد وعارفة اسماء ابنائنا كلهم
وطبعا كلنا قلقانين ازاى عرفت كل ده عن العمارة كلها وربنا يسترها علينا وعلى ولادنا يارب
خلوا بالكم وماتفتحوش لأى حد وماتخلوش ولادكم يكلموا اى حد ولا يفتحوا الباب حتى وان كنتم معاهم