عملت ايه النهاردة في المدرسة ؟!

4
1
عملت ايه النهاردة في المدرسة ؟!
طبعا دا السؤال التقليدي اللي ممكن أي ام تسأله لابنها او بنتها وبالذات اللي سنهم صغير وفي مراحل مثل رياض أطفال اولي تانية ابتدائي لما يرجعوا من المدرسة .... وطبعا الرد التقليدي الحمد لله ... كويس ... مش عارف.... وطبعا هي تتجنن وتشد في شعرها عشان هي مش عارفة تخليه يحكي ايه اللي حصل علي مدار اليوم.

عشان كدا فكر حد ماعرفوش في عمل لائحة من الاسئلة البسيطة اللي لما يجاوب عليها الطفل تقدر الام تعرف ايه الاحداث اللي حصلت وبطريقة سهلة مش سؤال ورد غطاه لا الطفل هيكي ويندمج في الحكاية .

والمقال دا باسم :



الترجمة ....
25 طريقة تعرف بيها من طفلك كيف كانت المدرسة اليوم بدون ان تساله كيف كانت المدرسة اليوم؟

1- إيه أحسن (أسوأ) حاجة حصلت لك النهارده ؟
2- إحكيلي علي حاجة ضحكتك النهارده
3- لو عندك الإختيار , مين أكتر حد تحب (ما تحبش) تقعد جنبه في الفصل ؟
4- إيه أكتر مكان بتحبه في المدرسة ؟
5- قولي أكتر كلمه غريبه سمعتها النهاردة
6- لو أنا كلمت المدرس / المدرسة بتاعتك النهارده و سألتهم عنك , تتوقع هيقولوا إيه ؟
7- هل ساعدت أي حد من أصدقائك النهارده ؟ إزاي ؟
8- هل أي حد ساعدك النهارده ؟ إزاي ؟
9- إحكيلي علي حاجة واحدة إتعلمتها النهارده
10 - إيه أكتر وقت كنت مبسوط و سعيد فيه النهارده و إنت في المدرسة ؟
11- إيه أكتر وقت حسيت فيه بالملل النهارده و إنت في المدرسة ؟
12- لو سفينه فضاء من كوكب تاني نزلت علي الفصل عندكم , تحب المخلوقات الفضائية دي تأخد مين من زملائك معاهم ؟
13- مين من أصدقائك اللي عمرك ما لعبت معاهم قبل كدة تحب تلعب معاه في الأجازة أو في أوقات الراحة ؟
14- إيه أكتر كلمه المدرس / المدرسة بتاع الفصل قالها (قالتها) النهاردة ؟
15- إيه أكتر (أقل) حاجة شايف إنك المفروض تتعلمها في المدرسة ؟
16- إيه أكتر مادة (أقل) مادة بتحبها من المواد اللي بتأخدها ؟
17- مين من زملائك في الفصل شايف إنك المفروض تعامله معامله أحسن ؟
18- إيه أكتر مكان في المدرسة بتحب تلعب فيه خلال أوقات الراحة ؟
19- مين أكتر ولد / بنت معاك في الفصل بتحس إنه لذيذ و دمه خفيف ؟ و ليه ؟
20- إيه أكتر حاجة بتحبها في الأكل اللي بتأكله في المدرسة ؟
21- إيه أكتر حاجة مش بتحبها في الأكل اللي بتأكله في المدرسة ؟
22- لو بقيت إنت مدرس الفصل بكرة , إيه اللي هتعمله في الفصل و مع الطلبة ؟
23- شايف حد من زملائك في الفصل يستحق العقاب ؟ و ليه ؟
24- لو تحب تبدل مكانك في الفصل مع حد تاني , تحب تبدل مع مين ؟
25- إيه أكتر نشاط غير دراسي (موسيقي , رسم , رياضة) بتحبه ؟

 

المصدر

http://www.huffingtonpost.com

التعليقات

زغباوية منذ 7 عام
موضوع مهم جداً لكل الامهاتوخصوصا اللى ولادهم كلامهم قليل
زغباوية منذ 7 عام
بس فيه عوامل مساعدة ممكن تخلي بيها طفلك يحكي للك لوحده زى مثلاً لو انتى خرجتي من غيره تيجي وتحكي له عملتى ايه او هو لما يرجع من المدرسة تحكي له عملتى ايه فى يومك
زغباوية منذ 7 عام
المهم الحـــــــــــــوار والتواصل المتبادل والمستمر
زغباوية منذ 7 عام
وحلو اوى مصدر الكلام حد ماعرفهوش 😃
zedony.com - A mmonem.com production. Privacy Policy