بالمناسبة
آن آن آآآآآآآآآنن دي موسيقي تصويرة فيها عنصر تشويق
الحكاية دي حقيقية وحصلت معايا بالفعل بالامس
بالليل خالص بعد ماخلصت صلاة اتفجأت ان معنديش
عيش طيب اعمل ايه اتصرف ازاي الوقت اتأخر قوي وماعنديش جلاش ولا رقاق ولا اي حاجة ممكن تبقي بديل ...
بس الجيش قالك ايه .....
إتصرف قررت وفي لحظة تجلي اعمل عيش بيتي بس ماكنتش عايزة اشغل الفرن وكمان ماعنديش خميرة بيرة ولا حتي جافة ... بس الحمد لله عندي
دقيق المقادير : كوب دقيق
ملعقة كبيرة زبادي = نصف كوب جاهز تقريبا
ملعقتين زيت
ذرة ملح
ذرة سكر
ملعقة صغيرة بيكينج بودر
ملعقتين كبار دقيق ذرة لو متوفر عندك .... مش مشكلة دي اضافة وممكن لو كان عندي ردي كنت استخدمتها
لبن حسب الحاجة
الطريقة: اخلطي كل المواد الجافة مع بعض وبعدين الزبادي والزيت وشوية لبن لحد ماتحصلي علي قوام عجين متماسك ولا يلتصق بالايد او طبق العجين.
قسمي العجين الي قطع متساوية وكوريه .... وبعدين افرديه بالنشابة الي ارق طبقة ممكنة وبعدين في طاسة ساخنة جدا وعلي النار وممكن تدهينيها زيت بسيط جدا جدا
وهيطلعلك احلي عيش بيتي
وعلي فكرة لو مش مستعجلة علي التسوية ممكن تحطيه في الثلاجة لحين الحاجة ودا مش هيؤثر علي شئ لانه مافيش اساسا اي حاجة هتبوظ.
وهذة المقادير تكفي لعمل 6 ارغفة تقريبا متوسط الحجم.
ودي الصور.... معلش الكاميرا مش شديدة
وأخيرا ...
شوفتوا منفوخ ونافش ازاي 