خطوات ايجابية من اجل كل المصريين .... منظومة العيش وبطاقات التموين

4
0
الحمد لله اني مش من الناس المتسرعة اللي دايما بتاخذ بالظاهر وتبني افكار وهمية وتشحن في نفسها ضد الدولة وضد اي قرارات بتصدر ..... احنا في فترة لازم الواحد يتأني ويفكر قبل اي طكلمة ماتطلع منه.

ايه السبب بقي وراء هذا الكلام .... من حوالي شهرين تم تطبيق منظومة جديدة اسمها منظومة العيش في منطقة حلوان والناس قالت العيش بقي ثلاثة ارغفة بجنية وطبعا الناس في باقي المحافظات قعدت تتشحن تتشحن تتشحن لحد ماهتفرقع.

الموضوع بسيط ... باستخدام بطاقة التموين الذكية من حق كل مواطن في الاسرة خمسة ارغفة في اليوم وانا شايفة ان دا معدل معقول جدا واكتر كمان من المطلوب عند اسر كتير والرغيف لسة بشلنوالكلام دا في جميع الافران اللي حتي الافران السياحية بتاع العيش ابو نص وابو ربع يعني حاجة جميلة جدا والاحلي بقي ان في نهاية الشهر بيتم احتساب عدد الارغفة اللي استفادت بيها الاسرة ويتم خصمها من المستحق الشهري والمتبقي يتحول لفلوس تتضاف علي البطاقة وتاخد بيها منتجات وسلع تموينية .... يعني لو اسرة 4 افراد يبقي من حقها 20 رغيف في اليوم 30x يوم = 600 رغيف شهريا ولو فرضنا انك استهلكت مثلا 400 رغيف في الشهر يبقي متبقي 200 رغيف وتمن الرغيف هنا هيتحسب 35 قرش اللي هي تكلفة الرغيف الفعلية علي الدولة.
كدا يبقي معاك 200 رغيف متبقي 35x قرش = 7000 قرش = 70 جنية تتخزن علي بطاقتك وتشتري بيها سلع تموينية

اما بقي عن موضوع الثلاثة ارغفة بجنية دا اللي مش معاه بطاقة وغالبا دا مش موظف حكومي ولا فقير ومش محتاج الدعم ولا الرغيف ابو شلن يعني مفيش مشكلة ..... ماش والناس الغلابة اللي مش عندها بطاقة وعايزة عيش بشلن بتروح البوسطة تشتري استمارة ب 10 جنية وتكتب تعهد انها معندهاش بطاقة في حتة تانية وبيطلعلها بطاقة عيش مؤقتة انا شيفاها حاجة اخر عظمة ومفهاش ظلم والدعم بيصل لمستحقية فعلا.

طيب راحت الناس قامت وهاجت وماقعدتش لما عرفت ان زيت التموين بقي ب 7 جنية والسكر بقي ب 4.5 و ب 5 كمان ... وان الاسعار غليت قوي عن قبل كدا .

يا ناس شوية تركيز بقي دا انت كنت بتروح تاخد تموين ردئ جدا وبتدفع ما يقرب من 45 جنية ديلوقتي هو عمل التموين ببلاش خالص كل فرد في الاسرة له سلع تموينية بقيمة 22.5 مايدفعش ولا مليم غير 4 جنية مشال علي البطاقة الواحدة يعني لو اسرة مكونة من 4 أفراد ليها سلع تموينية بقيمة 22.5x 4 = 90 جنية خد اللي انت عايزة وحتي لو غالي بردو مش هتدفع غير لو انت بالغت في احتياجاتك ونزلك كمان 20 سلعة اضافية تختار براحتك وفيها لحوم زفراخ واسماك وما تنساش ان فيه رصيد فلوس متخزنك من العيش .....


حاجة اخر عظمة يعني..... بس ياريت الناس يبقي عندها ضمير ويتنفذ صح واقصد بالناس البائع والمستهلك

وماحدش يجيبلي سيرة ان الزيت بسبعة والسكر بخمسة اصلا اللي ماعندوش بطاقة تموينية بيشتري الزيت ب 13و14 جنية والسكر ب6و7 جنية يعني مش فارقة خالص.


وربنا يسدد خطى المسئولين ويوفقهم لما فيه صالح للبلاد والشعب

 

إضافة منذ 7 عام
الكاتب الأصلي
تعديل منذ 7 عام

التعليقات

Menem منذ 7 عام
الله على الفكر التقدى .. بارك الله فيك واكثر من امثالك ..وشوفى اللى بيشتكو من البنزين عيال 12 سنة بتلعب بالعربيات فى الشوارع..كل اللى بيسخن فى المواضيع دى هما الاخوان !!!
zedony.com - A mmonem.com production. Privacy Policy