قبل كدا بحثت في موضوع صلاة النساء للتراويح في الجامع في موضوع
هل يستحسن للنساء أداء صلاة التراويح في المنزل ام فى المسجد ؟ وانا شخصيا بفضل صلاة المرأة في بيتها لكن في سيدات عشان تتشجع وتواظب علي الصلاة وتبعد عن الشهوات اللي ممكن تكون في البيت من أكل وتليفيزيون وخلافة بتصلي التراويح في الجامع.
عشان كدا لقيت كام نصيحة لطيفة
-منقولة بتصرف- ياريت اللي هتنزل تصلي في الجامع تتبعها ......
بلاش علبة الكيك وصنية الكنافة وترمس الشاي مش ﻻزم تاكلوا بين الصلوات كلوا لما تروحوا.
(عارفين إنك شاطرة)
بنتك الصغيرة فرحانه بصوتها زي أصالة وماجدة الرومي وبتغني في المسجد وتنط على راس البنات وانت بتصلي .. و إبنك اللي بيسنن سخن و بيصرخ الظاهر سنانه بتاكله والناس مش بيسمعوا الإمام.
(اتفقي مع جارتك انت تصلي في المسجد يوم وهي يوم واقعدوا بالوﻻد وارحموهم)
مافيش حاجه إسمها محجوز ما تحطيش الشنطة جنبك وتبرقي للبنات وتقولي محجوز
وتستن جارتك على بال ما تخلص المواعين وتيجي
(المسجد مش أوتوبيس.)
بالنسبة للغلبانه اللي جنبك مش ﻻزم صباعك الصغير يلزق في صباعها لو بعيده وبطلي تزغزغيها.
(مش هاتستحملي وهاتقعي في الآخر)
ما تطلعيش تجري بعد الصلاة بالخمار علشان تلحقي المسلسل من أول المقدمة وتتفرجي على الاسفاف.
(فايدته إيه مرواح المسجد)
بلاش تلبسي العباية اللي بتلمع وتبرق بالترتر والخرز لأنها بتنور في الضلمة والناس بتتخض.
(ده مش فرح)
بلاش تنزلي تصلي بالإسدال بتاع البيت قماشه خفيف وبيبين الجسم ألبسي أحسن عباية عندك
(انت مش طالعة تنشري في البلكونة )
بطلي تبحلقي في البنات وتدوري لإبنك على عروسة وتنادي عليهم بصوت عالي.
(بصي من تحت ل تحت وأوصيك بالبنات الهادية اللي مش حاطين مكياج )
بلاش يا بنات الكعب العالي لأنه ملفت...وبيعمل حاجات وحشة.
(والإخوة واقفين حا يبصوا غصب عنهم ويتفرجوا)
روج وكحل وأحمر خدود وانت رايحه تصلي .. ليه !
(يا رب الإمام يخشع في الدعاء وتعيطي والكحل يسيح)
البارفان بلاش منه ... وعلى فكرة ما فيش واحد هايشمه يقوم يحبك فجأة
ويجري وراك وانت طالعة من المسجد علشان يخطبك من بابا
(اللي بييجي في الإعلانات كله كدب.)
آميييين .... الرجال اللي يعلوا صوتهم فيها انت صوتك حلو وناعم ومسمسم
وده مسجد وبلاش أوبرا عايدة
(قوليها بصوت واطي علشان ربنا يكرمك)
في السجود إدعي في سرك
بطلوا تتعاركوا على النور وشوية تطفوه علشان الخشوع وشوية تنوروه وتدوروا على العيال
وما تنسوش تنضفوا المسجد وبلاش ترموا مناديل ورق في الأرض علشان
(ده بيت ربنا.)
وربنا يبلغنا رمضان ويتقبل صالح اعمالنا