أرسينويثيريوم

3
0
طبعا الاكثرية اذا لم يكن الاغلبية مش عارف الاسم دا أرسينويثيريوم الحقيقة ولا انا كمان عشان كدا حبيت اني اشرككم معايا في المعرفة الجديدة دي .

انا بهتم جدا بصورة جوجل اللي بتتغير دوريا حسب الاحتفال بمناسبات او اشخاص والنهاردة احتفال بالذكري 215 علي ميلاد ماري آننج ودي طلعت انها عالمة حفريات بريطانية..... طبعا قريت ما كتب عنها في انها هي اللي اكتشفت حفريات من العصر الجوارسي -حاجة كدا من 20 30 مليون سنة- وانها من سن 12 سنة اكتشفت هيكل كامل لحيوان تيرصور طبعا عارفينه من فيلم جوارسك بارك .... المهم مش دا بيت القصيد.

انا طبعا اتعصبت جدا وخدني الحماس فقولت بدل ما أكتب عن ماري أننج اشوف حد مصري عالم حفريات ولكن المفاجأة .... اني لم اجد عالم حفريات مصري مشهور.

حزنت جدا انا فاكرة في ثانوي في مادة الاحياء كنا بندرس العصور التاريخية والوسطي والحديثة ودرسنا طبقات الارض والكائنات التاريخية ولكن من الواضح ان هذا الجانب من العلم غير مدعم في مصر بالصورة الكافية وبالتالي محدش عارف انوع العصور والصخور والحفريات مع ان مصر أرض خصبة لكثير من علماء الجيولوجيا الاجانب.

حتي لا أطيل عليكم ....

قلت طيب الناس هتعرف الحفريات من فين وتفهم يعني ايه مكتشفات من العصور ماقبل التاريخ ....المفاجأة اني بردو لم أجد في مصر غير مكان واحد هو المتحف الجيولوجي المصري علي كورنيش النيل ودي صورته من الخارج



شكلة كانه مركز شباب ريفي .... ما علينا المهم دخلت ابحث ورا المتحف دا وجدت ان عمره 120 سنة تقريبا في مصر من ايام الخديوي اسماعيل وطبعا اجانب هما اللي اشرفوا علي بناؤه وادارته حتي تولي حسن صادق واصبح اول امين للمتحف مصري الجنسية.

المفيد بقي ان المتحف أتخذ شعار ليه هو ......

أرسينويثيريوم وهو دا أسم المقال بتاعي

ومعلومة صغيرة كدا عنه ...هو جنس منقرض من أكلات الأعشاب و عاشت خلال أواخر عصر الإيوسين و عصر الأوليجوسين في وقت مبكر من شمال أفريقيا من 30 - 36 مليون سنة .... وسبب اختيارهم لهذا الاسم غالبا لانه يقال ان أرسينويثيريوم = حيوان الفيوم ... والله أعلم

دا شكل حفرية أرسينويثيريوم




يشبة وحيد القرن بس له قرنين ودي شكل تخيلي له




وطبعا لن أنسي ان اذكر ان المتحف الجيولوجي المصري فيه قطع حفريات لهذا المخلوق.

عظام متحجرة لحوض حيوان ارسينوثيريوم




انا بتمني ان في مصر يهتموا بهذا النوع من العلوم ويوسعوا نطاق الانفاق عليه فلا نفقد الأمل في أن يخرج من مصر عالم حفريات يقوم بانجاز يذكرة التاريخ دا غير انه موضع شيق جدا وفيه حاجات كتير بتدل علي عظمة الخالق فيما خلق.


 

إضافة منذ 7 عام
الكاتب الأصلي
تعديل منذ 7 عام

التعليقات

الباشمهندسة منذ 7 عام
وياريت نعمل زيارة للمتحف دا مش في مكان بعيد دا في زهراء المعادي في منطقة تسمي أثر النبي
safaa منذ 7 عام
اوعى تنسي تأخذينى معاكى
الباشمهندسة منذ 7 عام
ياريت والله ننظم رحلات لأماكن جميلة في مصر ونتعرف علي اشاء جديدة وننشر المعرفة بجد
safaa منذ 7 عام
باذن الله وصباح الفل
زغباوية منذ 7 عام
وانا معاكم......معلومات جديدة
محمد عبد المنعم منذ 7 عام
المتحف ده شفته كثير بس مدخلتوش ... على الكورنيش عدل قبل تقاطع الطريق الدائري
محمد عبد المنعم منذ 7 عام
نسيت أشكرك على المقال
زغباوية منذ 7 عام
وانا كمان شكراً جزيلاً على المعلومات الجديدة دى
zedony.com - A mmonem.com production. Privacy Policy