الديك واخد منى موقف !! :
عندى ديك حاططنى فى دماغه!! دائما يجر شكل معايا وينفشلى ريش صدره ورقبته وينط ناحيتى .. وآخر مرة من يومين هبش بطن رجلى وجرحنى ..بصراحة قلت فى نفسى انه محتاج وقفة لانه كده بيتمادى !! على فكرة انا معوده انى اكلمه وعلى صوتى عليه وانصحه يتلم بس برضه كان بيهجم .. النهارده بقى كنت رايح ناحية ترابيزة اجيب من عليها سكينة .. هو خبط فى رجلى بشدة وانا شخطت فيه فحاول ينط على .. شوطته برجلى .. رجع ينط تانى وشكله مخيف ..وتصاعد الموقف بينى وبينه وكان لازم احسمه !! فسحبت سدابة خشب من بتاع النحل .. رفيعة وخفيفة يعنى وضربته ضربة خفيفة على ظهره فرجع لورا وراح ناطط نطة شديدة ناحيتى وانا بدأت الوش بالعصاية -على فكرة انا بابتسم دلوقت لانى افتكرت الموقف -وفجأة سمعت صوت الضربة اللى اخدها ما اعرفش فين بقى .. يا على جمجمته يا على منقاره .. تراجع الى الخلف خطوة واحدة ووقف .. مذهول من اللى حصل !! هو مش انا !! وانا فجأة شعرت انى قسوت عليه فصعب على جدا ..جاءت بقية الفراخ فى اتجاه العشة الداخلية ووجدته يندس فى وسطها واختفواحوالى 5 دقايق ..انا قاعد بره افكر فيه !! وزعلان علشانه بجد !! الفراخ خرجت مرة تانية وهو مش معاهم !! تصدقوا حسيت انه اتقمص منى جدا وواخد على خاطره !! قلقت عليه فدخلت اشوفه .. تصوروا لقيته واقف فى ركن مظلم من العشة فى سكون تام !! قربت منه وانا باقول له حقك على ما تزعلش .. خلاص بقى يا جدع !! ما انت اللى دايما تهاجمنى .. انا بجد متضايق انى ضربتك .. انا آسف !! ياللا بقى خلاص !!وشاورت له بايدى .. والله العظيم بدأ يتحرك ويخرج من العشه وخرجت وراه ادلعه بصوتى وانا ماشى وراه وانا هاعيط بسبب الانكسار النفسى اللى اصبح فيه !! وكرامته اللى اتهانت .. راح وقف تحت قاعدة خلية نحل وهو عامل انه واخد موقف انعزالى منى .. باصص لى وساكت ولا بيكاكى ولا بينفش ريشه .. ربنا يستر عليه وما يعملش فى نفسه حاجة .. او يكون بيفكر فى الانتقام ...
اللى حصل ده خلانى اسأل نفسى سؤال : هو الديك ده لو اصابته حالة نفسية مرضية الواحد يروح بيه لمين ..؟؟ مفيش طبيب نفسى للدواجن !!