الشخصية النرجسية

3
0
ايه ده ياعم ده انت بتحب نفسك أوى يا ساتر :)
وايه يعنى اما احب نفسى ده حاجة حلوة :D
لا يا عم حلوة ايه ده انت نرجسى صح ...
نرجسى ايه ده ؟!
أنا هقولك :
الشخص النرجسى ده بيتعامل كأنه أحسن من أى حد ،مستواه فى نظره دائما أحسن وأعلى ، وصعب عليه أوى إنه يتقبل فكرة إنه عنده مشكلة محتاجة لحل
وتلاقيه دايما يأخد امتيازات والحاجات الحلوة اللى فى الناس وينسبها ليه .
طب وايه المشكلة فى ده ؟
المشكلة إنه ممكن يكون مريض مش شخص عادى كدا
طيب وايه اللى ممكن يخليه مريض يعنى ايه الاسباب ؟
شوف يا سيدى الحوار ده بيظهر عند النساء أو الرجال تقريباً كده بيبدأ فى ال 20 او ال 30 وممكن كمان يظهر اثناء مرحلة البلوغ .
بالنسبة بقى للاسباب ..
التربية .. التربية .. التربية
الأب والأم بيكونوا سبب أساسى فى تكوين شخصية أولادهم يعنى الشخص النرجسى بيبقى عنده أب وأم بيقولوله احلم واحنا نحقق .
دائما طلباته مجابة ومفيش حاجة محروم منها.
أهله دائما حاطيين آمال وتوقعات كبيرة اوى عليه .
للأسف الجزء بتاع حب الأهل والاهتمام بيهم أو أى مشاعر مش موجودة عنده أو هو مش مهتم بيها أصلا .
من صغره كده مافيش حد بيعزز موقفه محدش بيقوله انت صح أو غلط .
يانهار ده الموضوع كبير طيب اعراضه ايه بقى الشخص المريض ده ؟
شوف الاعراض اللى هى التصرفات او الصفات بتاعته كاالاتى :
1\ دايما بيتكلم عن نفسه وصفاته وحسناته ونجاحه نفسه هى محور كلامه .
2\ شايف نفسه أحسن من أى حد هو الأنجح والأكثر موهبه وهو الأجمل دايما وعنده دايما روح التنافس مع الغير الهزيمة عنده مش مقبوله .
3\ دايما شايف انه يستحق المدح ومعندوش رحمة بمعنى انه ملوش فى جو الحنية والطبطبة .
4\ غيور مايحبش حد يبقى أعلى منه خالص .
5\ شخصية انتقادية مستفزة لازم ينتقد مينفعش يعدى حاجة من غير ما يعلق عليها .
6\جذب الانتباه ده هواية عنده .
اه يا نهار ياعم احنا موصلناش للدرجة ده انا نرجسى خفيف خفيف
بس تفتكر لو حد كده فعلاً نكتشف ازاى إنه مريض؟

بسيطة تحليل الشخصية
ايه ده يعنى مش تحليل دم أو أعصابه نشوفها أو اى حاجة من دول ؟
لا ياعم هو تحليل الشخصية هيبين كل حاجة ويقدر الدكتور يعرفه بسهوله ويعالجه:(
{{uf:2262}}

 

إضافة منذ 8 عام
منقول

المصدر


Grow up your mind / Medical

التعليقات

الباشمهندسة منذ 8 عام
فعلا اهم حاجة التربية
زغباوية منذ 8 عام
من غير دكتور ولا حاجة اكيد بيبان ...اساسا مين نرجسي هايرضى يروح للدكتور 😞
zedony.com - A mmonem.com production. Privacy Policy