عشان صحتك تهمنى ------ أكتر من 10 نصايح لتجنب ادوار البرد و الإنفلوانزا

3
0
عشان صحتك تهمنى , حاقول لك دلوقتى , أكتر من 10 نصايح , تحطهم حلقة فى ودنك , لو عاوز "تنفد بجلدك" من شر أدوار البرد و الإنفلوانزا , السنة دى إن شاء الله ..

نبدأ بالكلام اللى كلنا عارفينه , و هو إنك تتجنب الخروج من جو دافى , أو قعدة فى التكييف , أو أوضة مقفولة لفترة طويلة , لجو ساقع مرة واحدة .. خدها بالتدريج .. يعنى قبل ما تخرج , اشرب شوية مية , أو افتح الشباك و اقف جنبه شوية .. !! ..

خلّى ملابسك (من اليومين دول) أتقل شوية , و مش عيب لما حد يشوفك "متقّل" فى الهدوم حبتين .. العيب لما ترقد فى السرير , بسبب إنك مش عاوز حد يتتريق عليك !! .. و المهم كمان , ما ترجعش "تخفف" فى الهدوم تانى لو الجو بقى لطيف شوية !! ..

ركّز فى أكلك ع الحاجات اللى ممكن تكون غنية بـ فيتامين سى , زى الليمون (اشربه طازة , أو اعصره ع السلاطة , لكن ع الشوربة أو الشاى , بيبقى زى قلته , عشان السخونة العالية بتقلل قيمته الغذائية) ! .. و الجوافة كمان مليانة فيتامين سى (بس للأسف , موسمها بيشطب) !! ..

لو أكلت معلقة عسل نحل الصبح ع الريق كده (أو حطها على كوباية مية و اشربها) , ده حيبقى مصدر طاقة محترم جدا , و حاجة حتزود مناعتك بإذن الله ..

لو حسيت بأى أعراض خاصة بالبرد أو الإنفلونزا , ما تحاولش تاخدها "على رجليك" .. أدوار البرد بتحتاج رااااااااحة , عشان الجسم يعرف يتغلب عليها كويس .. ما تعاندش دور البرد أو الإنفلونزا , عشان ما يطوّلش معاك ..

لازم تعرف إن "لفحة البرد" , بتبقى بسيطة , و كلها شوية احتقان فى الزور و رشح و ممكن صداع كمان و خلاص .. لكن أدوار الإنفلونزا , بتكون أشد و أقوى فى أعراضها , بجانب إن بيكون معاها ارتفاع فى درجة الحرارة , و كمان "تكسير فى المفاصل" , (زى ما المريض بيقول لنا بالظبط) .. و دى لازم نتعامل معاها صيدلانيا , باحترافية شوية .. فلازم تطلب التعامل الطبى لو حسيت بالأعراض دى ..

مش أى علاج من الصيدلية (مكتوب عليه إنه للبرد أو الصداع) , ينفع لك .. اسأل الصيدلى على أنسب اختيار لحالتك , عشان بعض الأدوية المشهورة , ما تنفعش مع مريض الضغط العالى مثلا (زى كونجستال أو فلورست) .. و بعضها ما ينفعش مع مرضى الكبد (زى فولتارين و كتافلام) .. و هكذا .. و اللى بينفع مع جارك أو صديقك , مش لازم يكون نافع ليك !! ..

أدوار البرد حاجة , و العدوى البكتيرية اللى بتحصل معاه أو بعده , حاجة تانية خالص .. , يعنى إوووووووووعى تطلب من الصيدلى مضاد حيوى (حتى لو حباية أو اتنين) عشان بيبقى ضررهم أكتر من نفعهم , إلا لو ظهر أعراض للعدوى البكتيرية , زى وجود بلغم أخضر مع الكحة مثلا , أو الإصابة بالتهاب فى اللوز , و يكون عليها صديد أبيض لو بصيت عليها فى المراية !! ..

يا ريت لو تقدر تحصل على المصل السنوى للوقاية من الإنفلوانزا , توصل لأقرب صيدلية , و تحصل عليه فى ساعتها .. و المفروض إنه ما يقعدش بره التلاجة كتير , يعنى يفضّل إنك تاخد الحقنة و انت واقف فى الصيدلية .. و ما تفتكرش إنك عشان أخدت المصل السنة اللى فاتت , يبقى ده وقاك من الدور السنة دى كمان .. لا .. الفيروس بيطوّر من نفسه كل سنة .. و عشان كده , حاول تاخد المصل برضه كل سنة ..

تجنب إنك تقرب من حد مصاب بالفيروس .. (تعرفه بإنه راقد فى السرير و الدور مبهدله) .. زوره فى بيته زى ما تحب (كعيادة مريض يعنى) , لكن تجنب إنك تاخده بالحضن مثلا , أو تبوسه من هنا و من هنا .. إنت كده حتبقى بتعدى نفسك بالفيروس و خلاص !! .. و إذا سلمت عليه باليد , يفضل إنك (بعد ما تنزل من عنده) , تغسل إيديك كويس بالمية و الصابون , و شوية "ديتول" إن أمكن ! ..

تجنب كمان إنك تتواجد فى الأماكن اللى فيها زحام , بالتحديد لو كان من المتوقع إن يكون فيها الفيروس منتشر شوية .. المستشفيات مثلا !! .. و تجنب إن حد يعطس قدامك أو فى المكان اللى انت قاعد فيه , من غير ما يغطّى وشه كويس ..

 

إضافة منذ 8 عام
safaa
50508
منقول
تعديل منذ 7 عام
safaa
50508

المصدر

د. أحمد فارس
د. أحمد الجويلى

التعليقات

لا يوجد
zedony.com - A mmonem.com production. Privacy Policy