كمان شوية تغريدات

ياللا يا زغبوبة افتحى الحوار فى اى نقطة

انا افتح الحوار في نقطة 9 لانها مهمة جدا جدا

المرشحين يتقاتلون ويصرفون الملايين وهم متاكدون من جمع اضعافها اذا فازوا

كل ما ركز في اي انتخابات سواء برلمانية او رئاسية كنت باستغرب علي حجم الدعاية الفلوس اللي بتصرف عليها حتي علي الرغم من ان الدولة وضعت حد اقصي للدعاية الانتخابية 10مليون زي ما حصل في انتخابات الرئاسة اللي فاتت بردو ما حدش التزم وبان اكنها هدايا من المؤييدين وكنت بقول ايه الهبل دا لو الفلوس دي اتصرفت في خدمات للمواطنين سواء خدمات صحية او غذائية او كسائية او تعليمية او مشروعات اسكانية كانت ممكن تفرق مع قطاع كبير من الناس وفعلا نقدر نقول ان الانتخابات لم ولن وتكون نزيهة وان اللي بيرشحوا نفسهم دائما بيكونوا ليهم اغراض شخصية اولا قبل مصلحة البلد وانا هاوضح نموذج بسيط يؤكد دا .

لما كانو عندنا في الشغل يعملوا انتخابات نقابية للعاملين بالهيئة كنت اجد كثير من الزملاء يتهافتوا عليها وعلي الرغم من ان مرتباتهم حكومية بسيطة الا انهم كانوا بيعملوا ورق دعاية وفلوس كتير بتتصرف علي هدايا عينية ومقابلات يومية مع العاملين وكنت باستغرب عماليين يعملوا برنامج انتخابيى وبيموتوا نفسهم عشان نختارهم ليه اصلا هو فيه حد بيحب الناس كدا ... مش معقول صح.

فقررت اني ادعبس ورا الموضوع واعرف ايه الاستماتة دي كلها في الترشيح ... فوجدت ان طبعا اللي بيكسب بيقعد في دورة نقابية مدتها 5 سنوات بياخد فيها ايه:
1- من حقة يومين اجازة في الاسبوع لمباشرة اعمال النقابة مأموريات هبل طبعا.
2- لا يخضع مرتبه للائحة الشرائح اللي بتنقص جدا من المرتب علي حسب هوا المديريين وبيأخد مرتبة حوافز ومكافأت كامل بدون ما ينقص مليم.
3- بيكون متحكم في ميزانية النقابة اللي مفروض انها بتتلم وبتتصرف علي العاملين في ايه ماعرفش غير في حالة الموت بيدوا فلوس للورثة.
4- طبعا مهما كان موظف صغير لكن بيكون علاقاتة كتير جدا بتصل الي مدير الهيئة والاستشاريين ومديريين العموم ورؤساء الادارات المركزية عشان لو حد عايز منهم مصلحة هو بيخلصها وبالتالي بيبقي فيه مجامالات وعلاقات بينهم.
5- اكيد فيه حاجات تانية كتير انا مش فاكرها ديلوقتي او معرفتهاش وقتها.

عرفتوا ليه المرشحين بيموتوا نفسهم اذا كان دا نموذج صغير في لجنة في جهة حكومية طيب لما يبقي الكيان دا دولة وبلد المرشحين يعملوا ايه ... دا مش معناه ان كل الناس اللي بتمسك مناصب بتكون نيتها وحشة او الاستفادة وخلاص في ناس بتكون بدايتها تخدم وتخلص في عملها ولكن علي رأي المثل المال السايب بيعلم السرقة ويا إما هيسرق يإما باقي المنحرفين هيلبسوه قضيه ويخرج منها بفضيحة يإما يلحق نفسة من بدري ويسبها بكرامته.

ومن هنا اقدر اقول انه مفيش فايدة الناس العاديين اللي عاييزين يعملوا حاجة ما ينفعش لازم هو اصلا يكون مستغني يعني عندو فلوس كتير وعندة نفوذ قوي وسلطة كبيرة من البداية مش حاجات ومكاسب لسة هيحققها من المركز اللي هيكسبه واوهم حاجة طبعا يكون علي خلق ودين واخلاص في النيه يمكن في الحالة دي يكون فيه امل .

بردو عشان اوضح مفهومي ... بمعني ادق المرشح لازم يكون شبعان قوي قوي يعني ويكون محترم يعني مش ماشي بمبدأ البحر يحب الزيادة عشان يكون مستغني وماحدش يقدر يشتريه ويكون تركيزة في العمل مش في انه يستغل الفترة بتاعتة في تجميع فلوس ومكاسب وبس ....مستحيل مش كدا انا بقول انه يمكن يكون فيه ناس كدا كتير بس مش مشهورة اعلاميا ومش عليها العين لانها مش بتسعي وراء الشهرة والسلطة لكن مش ممكن يكون امثال سيدنا عمر ابن الخطاب وعمر بن عبد العزيز والناس الصحابة والتابعين دول خلاص خلصوا من الوجود تماما.

من اللي شوفته في الجيش ممكن اتكلم على النقطه الاولى

*البداية تكون على مستوى الشعب والاحزاب بحملة لمدة سنة لمحو امية ملايين الناس الغلابة

الجيش دلوقتي بيعمل دورس للجنود الاميه (اللي جيشها 3 سنوات ) و طبعا بيكون فيه اقبال عشان يخلص الفتره بتاعته بسرعه ..... من الناحيه المدنيه فيه ناس بتحسبها و بتقول ان ايه فايده التعليم ما دام بشتغل ، خصوصا الناس الحرفيين ، عشان كده نسبه الاميه زايده شويه ، ممكن نحارب الاميه عن طريق التحفيز سواء ماديا او معنويا ، و هنلاقي فيه اقبال على التعليم

للبشمهندسة : عرفتى ليه باقول نائب الشعب يكون متطوع ؟
لشادى الجيش زمان كان فيه مدارس اسمها التحرير وكانت بتوصل لغاية الثانوية ..
ومحو الامية لازم يكون جبارى لمنع تكون المزيد من قطعان الخراف والمعيز ..
دا حنا فى مهزلة !!!

ايوه حكاية محو الامية الاجباري دي اساسي وعارف ايه كمان يكون فية غرامة كبيرة للي لم يدخل الامتحان او متهرب من التعليم واحنا هنا بس نسمع كلمة غرامة نترعب ونبقي زي الالف .... الالف مش كوز الذرة