علشان صحتك تهمني ......نصائح لنوم سريع وهادئ

2
1
عزيزي , عزيزتي .. عشان صحتك تهمني لازم تعرف إن النوم بشكل سليم , هو عامل مهم لتقوية جهاز المناعة , و الحفاظ على الجسم من أمراض كتير .. و عشان تنام كويس , حاقول لك على شوية نصايح , حيساعدوك على إنك تنام بسرعة و هدوء و اطمئنان إن شاء الله

أولا : حدد لنفسك توقيت ثابت للنوم (قدر الإمكان .. روتين يعنى) .. ده حيساعد جسمك على إنه يحس بالرغبة فى النوم فى نفس التوقيت كل يوم ..

ثانيا : اتنفس بشكل سليم .. يعنى لما تنام , حاول تسترخى تمااااااااااما , و تخلّى تنفسك بطىء و عميق .. و عشان تركّز مع تنفسك أكتر , حاول تقول - فى سرّك - مع كل شهيق : وااااحد .. و مع كل زفير : اتنيييين .. الشهيق اللى بعده : واااااااحد .. الزفير : اتنيييييين .. و خلّى بالك , عشان ما تفضحناش .. باقول "فى سررررررّك" .. و كل ده عشان نبعد تفكيرك عن أى مشاكل ممكن تسبب لك الأرق , و نخلّى تركيزك على نفس الحاجة اللى حتسبب لك استرخاء سريع , و هى التنفس العميق ..

ثالثا : حدد لنفسك مكان ثابت تنام فيه .. معروف إنه للنوم فقط تقريبا .. عشان تبرمج عقلك , على إنك لما تبقى متواجد فى المكان ده بس , تنام علطول ..

رابعا : ممكن تشرب مشروبات دافية , أو شاى أعشاب آمن .. ينسون .. حلبة .. كراوية .. كل الحاجات دى زى الفل , و آمنة نسبيا إن شاء الله .. و بتجيب نتيجة كويسة ..

خامسا : لو كل الحاجات اللى فاتت دى ما نفعتش , عاوزك تسمع الجلسة الاسترخائية دى ع الـ Youtube , أو تحمّلها و تسمعها على موبايلك كل ليلة .. و ابقى قابلنى لو فضلت صاحى إن شاء الله .. حتنام يعنى حتنام .. بس المهم تسمعها كل ليلة , .. قبل النوم .. و ما تنساش تدعى لى , و تدعى لصاحب الجلسة أ. شريف جمال ..

سادسا : لو كل اللى فات ده ما جابش نتيجة , فانت ممكن تحتاج علاج .. و فى الحالة دى , اسأل الصيدلى اللى بتثق فيه عن أفضل المنومات و أكثرها أمانا .. عشان مش أى حاجة منومة تنفع لك !! .. كل نوع من المنومات , لازم يكون مناسب لفئة معينة من الناس .. و الصيدلى الخبير , هو أفضل حد تستشيره بخصوص الكلام ده ..

 

إضافة منذ 7 عام
منقول
تعديل منذ 5 عام
safaa
50483

المصدر

د/ احمد فارس

التعليقات

لا يوجد
zedony.com - A mmonem.com production. Privacy Policy