عندما تركب التاكسي الابيض ....خذ هذا بعين الاعتبار !

لان كثيرا منا يستخدم التاكسي الابيض كوسيلة مواصلات امنه و مريحة الا انه الكثير ايضا لا يعلم طرقة حساب العداد الخاص به والذي انتشر مؤخرا التلاعب فيه بطريقة غير ملحوظة للراكب واللي يعتمد علي انه عداد ديجيتال ويدفع زي ما العداد يقول دون اي وعي بطريـــقة الحســــاب لذلك قررت اني اكتب هذا المقـــال لنــشر .... ثقافة عداد التاكسي الابيض :D .

اولا بنديرة التاكسي 2.5 جنية شاملة كسر العداد 1.25 جنية + حساب الكيلو الاول 1.25 مقدما يعني بمجرد ركوب التاكسي والسير مسافة اقل من 1000 متر يكون الحساب خالص 2.5 جنية مع مراعاة ان كل دقيقة انتظار بقيمة 25 قرش يعني لو مشوار قصير والطريق زحام احسنلكوا تتمشوا علي الاقدام اوفر بكتير نجي بقي لو عدينا الكيلو الاول بتكون طريقة الحساب 25 قرش عن كل 200 متر وبردوا تسحب مقدما طيب ازاي تعرفوا الكلام دا كلوا لو بصيتوا في الصورة بالاسفل هي لنوعين من العدادت المستخدمة هنا في مصر الديجيتال الاحمر البسيط والثاني الازرق ابو حصان .

تعالوا نفهم العداد
هنال 3 ارقام علي شاشة العداد الاول الفلوس المطلوبة الثاني عدد دقائق الانتظار والتي تحسب في السرعات اقل من 5كم/ساعة والثالث المسافة المقطوعة بالمتر .

الخدعة فين ؟
بعض السواقين الغير شرفاء يتلاعبوا في العداد الخاص بالفلوس ولكن لكي تتأكد عليكوا انكوا تحسبوا حسبة صغيرة المسافة كام كيلوا (الكيلو مضروب في 1.25 جنية ) + (1.25 كسر العداد ) + (عدد الدقائق مضروب في 0.25 جنية) واذا كان الرقم هو هو او فارق ربع جنية فوق او تحت يبقي مفيش مشكلة ولو كان فيه فرق كبير يبقي ياما السواق دا حرامي يإما مـش دريـان انه عنده مشكـــلة في العـداد ومحتــاج يعايـــــره.... - إِنَّ بَعْضَ الظَّنِّ إِثْمٌ- وتبلغوه فورا.

والبعض الاخر بيشغل زر Night ودا موجود في العدادات الزرقاء ام حصان فقط وكان زمان اول مالتاكسي نزل الزرار دا فعال ولكن تم ايقافة حيث انه يستخدم في بعض الدول لطريقة الحساب مساءا تختلف عنها صباحا وفي حالة تشغيلة بيكون المؤشر علي كلمة Night وبيكون الحساب بالضعف بحيث كل 100 متر بربع جنية يعني الكيلو 2.5 جنية بدل 1.25 جنية ودا في نسبة بسيطة جدا من التاكسي ولكن من باب العلم بالشئ لان ولاد الحرام ماخلوش لولاد الحلال حاجة :D.

والبعض عندهم معايرة العداد غريبة جدا بتحسب الكيلو كله مقدم يعني تلاقيه بيزود 1.25 جنية مرة واحدة بدلا من ربع ربع ودا طبعا بردو غلط لانه ممكن تكسر الكيلو علي 100 ولا 200 متر ويكون الحساب فيه زيادة بدون حق ولكن السواق مش حرامي ولا حاجة .

واخيرا بقي الحكايه دي عن تجربه اكتر من مرة ماعرفش بيعملوا ايه في العداد بيكون سليم في الاول ولكن بمجرد مايكسر الـ 10 جنية تلاقيه بيزيد بطريقة عشوائية جدا .

ملحوظة
في بعض المشاوير الطويلة يجب ان تعلموا انه تتصاعد سعر الدقية الانتظار بعد الساعة الاولي من ربع جنية للدقيقة الي نصف جنية للدقيقة.

نصحتي ...
بمجرد ماتركبوا التاكسي تراقبوا العداد هل بيزود كل 200 متر ربع جنيه ولا ايه وعلي فكرة الـ 100 متر بتكتب بالعشري يعني 1.1 = كيلو و100 متر عشان تركزوا وتفضل تزيد 1.2 = كيلوا و200متر وعندها تلاقي العداد زاد ربع جنية وهكذاوايضا حتي لو اتطمنتوا للعداد بردو ترجعوا تعملوا ملاحظاتكوا لو المبلغ كسر العشرة جنية احتياطي بردو ...! ولازم نبقي عارفين المشوار بتاعنا تقريبا كام كيلوا او بيكلف في المتوسط دايما مبلغ اد ايه ونزيد عليه احتمالات زحام الطريق عشان نبقى عارفين تقريبا كدا هندفع كام.

اظن مفيش تفصيل اكتر من كدا ... ماحدش يشتكي بقي من التاكسي الابيض . {{uf:1992}}