ولادك المشتاقين
=======
يا مصر على فين الطريق ؟
ومعاكي هيكون الصديق ؟
واللا العدو ؟
واللا الكلاب السعْرانين؟
واللا اللي طامعين ف الدهب؟
واللا اللي ماسكين ف الإيدين
سكاكين تقطع عمرنا؟
واللا اللي جاي من غير سبب ؟
واللا اللي عايزينك تعيشي
بدون أذان
يملى الودان
ويصحي كل الغافلين؟
واللا اللي عايزين يهدموا
كل الكنايس
والمعابد والسنين؟
مين بس هيكون الرفيقْ
طول الطريقْ؟
عمَّال يشدك كل واحد ناحيتُهْ
عايز يمشِّيكي ف طريقُه وسكِّتُهْ
ولا حد سألك مرة إنتي تحبي مين
ولا حد فكر فيكي يا ست البنات
ولا حد ياخد عِبْرة مرة من اللي فات
رُدي عليهم قولي انتي تحبي مينْ
عايزة اليمينْ
واللا الشمالْ
واللا الطريق لساه قُصادك مش طريق
لساكي واقفة تفكري
طب فكري
بس انتي عارفة ان العيال
عايزين يعيشو ا قريبين من ربنا
من غير تشنج وشعارات
هتعيشي أُمَّة مؤمنة
مهما يكونوا الحاكمين
احنا اللي بنقول احنا إيه
ولا ييجي حد يهزنا
ويرسم لنا سكة ماهيش هتضمنا
وكأنه ميعرفش إننا
لازم نعيش مع بعضنا
*
يا مصر يا بلد الغلابة الطيبين
والنيل بيجري في عروق الناس
بيسقيهم حنين
واتنين حبايب وحدهم على مركبه
في النيل
يرموا ما بين شطه الهموم
ويوشوشوه أحلام
بطول الليل
وصيَّاد السمك فارِدْ شِباكه
والقلوع
يسرح يلملم غلته على ميته
الفدان
لابيشتكي ولا ينحني شراعه
طول عمره حاضن حبها جواه
وماجاش ف يوم باعه
ولا حد يعرف يشتريه
ولا يلتوي دراعه
إبنك أصيل يا مصرنا
وانتي ف حياته كل عنوان الحياه
ابنك أصيل واوعاكي انتي اللي تبيعيه
شايلك على طول الزمن جواه
إن قلتي آه بيقول آهين
ويبيع حياته عشان ميمسح دمعتك
يا فرحتك بولادك اللي علَّموا كل البشر
إزاي يكون نطق الحجر
وازاي يكون معنى الكلام
تعظيم سلام
لولادك انتي المشتاقين
علشان يقوموا يعلموا
تاني البشر
ويقوموا تاني ويرسموا ليكي الطريق
ويقوموا تاني ويرسموا ليكي الطريق
...................
العزب فتحي