إنسان مع إنسان
==========
خايف تغيب الشمس
والصوت يصير بالهمس
وف بكرة أو ف الأمس
يبقى النهار والليل
مافيش فروق بينهم
ولا نلقى حتى سبيل
لشوية الأحلام
اللي احنا عايزينهم
ولا يبقى باب الأمل
مفتوح على بابنا
وهنبكي إيه العمل؟
ع العمر وشبابنا
وهتفضلي أمنا
مهما يسيل دمنا
على أرضك البستان
مسكين أنا وتعبان
وحكايتي كان ياما كان
طول عمري ممدودة
في سالف الأزمان
عاشق تراب أرضك
وبصون مَصون عَرضك
دي حقيقة موجوده
ولا بكْرَه الآخَر
ولا عنّه باتّاخِر
طول عمرنا إخوان
حالفين على ترابك
لنعيش سوا ف أمان
وتاريخنا يجمعنا
إنسان مع إنسان
أنا إبنك الغلبان
اللي الزمان طَحَنُه
والهم غرق مركِبُه
ولا أهله مرة علموه العوم
ولا يوم يبات ظالم
دايما يبات مظلوم
ولا يلتقي يوم الغطا
إلا بورق التوت .. والعمر لما يفوت
أو لو يجيلي الموت
انا مش هموت ندمان
ولا يوم هخاف بكره
…………………..
العزب فتحي