متحلمليش
وليا لسان وبتكلم
وممكن مني تتعلم
صحيح تعبان وبتألم
وطول العمر انا صابر
لكين ع الحلم انا قادر
.................... متحلمليش
كفاية سرقت أيامي
وحطيت أمسي قُدَّامي
وجاي تطلع ف أحلامي
سرقت الماضي والذكرى
وجاي تسرق طريق بُكْرة
....................... متسرقنيش
تجيلي ف توب ماهوش توبك
وتعمل إني محبوبك
كفاية ... عرفت ملعوبك
كفاية زن ف وداني
منيش هاسمع كلام تاني
..................... متخدعنيش
عاملي شيخ وتنصحني
وتاكل أكلي من صحني
ولو قاوحت .. تفضحني
تقول اني بقيت كافر
وتبعد عني ... تتاخر
..................... متنصحنيش
ومرة تجيلي علماني
وتسعى .. تهد وجداني
تقوللي الأصل إنساني
وتتكلم كلام موزون
عايزني ابعد عن المضمون
..................متقنعنيش
تقوللي ماما أمريكا
وحرية وشيكابيكا
وخمرة ومزة مزيكا
لانا كاري ف يوم كارك
ولا هامشي ف تيَّارك
................. متجْرفْنيش
أنا شعب الهرم والنيل
حِكَمْ موروثة جيل ورا جيل
حضارتي للحضارة دليل
أنا شمس العلوم للناس
أنا الطِّيبة أنا الإحساس
............... متجرحنيش
وياما طبول كتير دقت
لاخلّت شيء ولا بقت
ولو أرضي ف يوم نَطَقِت
تقول انا عندي مدفون مين
وانا الباقي سنين وسنين
.................. متهلكنيش
أنا ديني ف وجداني
لانا سلفي ولااخواني
ولا كافر وعلماني
ونبراسي نبينا الزين
وعنواني صحيح الدين
.............. متبعدنيش
متتكلمش بلساني
ومتلخبطش وجداني
وسيبني أبني من تاني
ومد إيديك وساعدني
على الإخلاص وعاهدني
...................ومتخونيش
ياريت نلحق طريق بكرة
نجيب فكرة على فكرة
نصير أعلام ومش نكِرَة
بإيد ف الإيد هنبنيها
سوا نحقق أمانيها
...................متخذلنيش
.................. متحلمليش
...................
العزب فتحي