النخبة المصرية
-------------
يا مصر حظِّك ف النُّخَبْ
نخَبوا عقول ناسِك
فارشين طريق الناس صَخَبْ
يحتار معاهم عقلنا
ويْكفّروا الناسك
ماسْكين سكاكين الكلام
بيقطََّعوا ف راسك
مبقيتش فاهم يا أميرة ...
هما عايزين إيه !!!
عايزينا نمشي للشمال
واللا اليمين
واللا محلك سرْ
بيني وبينِك يا بلد
وهقول كلام مش سرّ
عايزينا نمشي ف الطريق لكن
لخلفك دُرْ
نرجع لخيرِك يتنهب
واحنا ندوق المر
لو كانوا باعوا يابلد لساكي شارياهم !؟؟
بيعي اللي باعك يابلد
دوسي اللي يوم ........ داسك
الدنيا مش مستحملة
تِرضي اللي مش راضيين
دا كل حتة ف هِدْمِتِكْ
فيها واحد ماسك
بيشد فيكي ف ناحيته
بالدنيا أو بالدين
لمي هدومك يا أميرة عشان ماتتعريش
خلليكي ويّا الغلبانين
دُول هُمّا ريحِة زهرتِك
دُول مَيِّتِكْ ف النيل
من غيرها مايجريش
هما العيون السلسبيل
هما اللي شايلين الحمول
عنهم ماتستغنيش
حاولي ف مرة تسمعي
صوت اللي مابيشكيش
ولا صوته طاير ع الهوا
ولا يوم عرف له سبيل
لكنه شايلك ف الفؤاد
ويضحي حتى بالولاد
علشان ماتتهزيش
أصله ماهوش من نُخْبِتِكْ
يا نَكْبِتِك ... في نُخْبِتِكْ
مابتستحيش ...... من جَرح إحساسِك
يا مصر ما تزعليش
ياما عليكي مَر
واِقَفِي شوية وفكّري
الخطوة فين هاتمُر
سوّي غيطانك وازرعي
أمَلِك ف قلب الناس
وسيبي غاويين الكلام
دون اهتمام
واحْمِي اللي شال فاسك
أصل انتي حظك ف النُّخَبْ
نخَبوا عقول ناسك
ماسكين سكاكين الكلام
بيقطََّعوا ف راسك
................
العزب فتحي