علميني ماحبكيش

علميني ماحبكيش
علِّميني ماحبكيش
علِّميني ازاي أعيش ...
من غير ماشوفِك
علِّمي طيفِك ...
يبطَّل يوم يزورني ف المنام
علِّمي كل الكلام ...
إنه مايجيبليش ف سيرتِك
علِّمي صورتك ...
متخطُرليش ف بال
علِّمي حتى الخيال ...
إنه مايسرحشِ فيكي
علِّمي ايديا تموِّت حلمها بلمسة إيديكي
علِّمي عنيكي متسكنش العيون
علمي الصوت الحنون ...
إنُّه يطْلَع م الودان
علِّمي حتى الزمان ...
إنه يرجع تاني بينا
قبل لحظة مالتقينا
قبل مادقت قلوبنا
قبل ما لمَعِت عنينا
*
علِّمي الأشجار متحضُنْش الطيور
علِّمي العصفور يبطل ... زقْزَقَه
علِّمي العشاق يعيشوا بدون أمل لحظة لُقَى
علِّمي الدنيا تبطل تبقى دنيا
علِّمي الثانية ف بعادك إنها متفوتش ........
............................... دهر
علِّمي الزهر ... انه مايجودش بعبير
علِّمي الطير ... لو يبطل يوم يطير
علِّمي القلب الأسير ...
إزاي يعيش من غير ... أمل
...............من غير ... أماني
علِّميني وقولي تاني
ازاي أعيش من غير .......... حياه
علميني ازاي أعيش من غير ماشوفك
علِّميني ازاي ........................ أموت
علِّميني ازاي ........................ أموت
علِّميني ازاي ........................ أموت

العزب فتحي