حلم
دقّيت على كل الببان
ومشيت على كل الطرق
وكتبت فوق كل الورق ............حرفين
ورسمت على وش القمر ....نور الجبين
وبدرت أحلام السنين بإيديا في كل الغِيطان
وفردت إيدي وسط كل الناس ما ضمت غير إيديكي
بعد ما طال الغياب
هلّ السحاب يروي القلوب العطشانين
وبقيت انا وانتي هنا
وزرع الهنا طارح ف سكة خطونا
وف ليل لقانا وفرحنا
كل النجوم ترقص لنا
وكأننا وسط النجوم .......نجمين
عايشين على النور والدفا
أصل الشتا راح واختفى
وعاد الربيع ضم القلوب الفرحانين
بعد السنين السود
نعود بعد الغياب
يجمعنا من تاني السهر
ومشينا في سكة سفر
توصل لفوق سطح القمر
وطلعنا فوق سطح القمر
أصل القدر حارس لنا
وهناك بقينا لوحدنا
أنا وانتي والحلم اللي دوِّبنا على طول السنين........عايشين
بتمرجحيني وامرجحك وسط النسيم
ونهيم مع صوت ام كلثوم الشجي
وحكم على قلوبنا الهوا....
نعشق سوا....................وندوب
وندوب سوا ف الغنوة وتدوب القلوب
نزرع على سطح القمر بساتين غرام
ونعيش هناك نرويها من كاس الحنان
ينسى الزمان اتنين معرفوش ف الهوا لايمين
اتنين قلوبهم ف الغرام ......دايبين
وتضم إيدِك بالحنان إيدي
نخرج سوا نتمشى وسط جناين الأزهار
تتمايل الأزهار على خدك
والغيرة طبع ف كل مخلوق حي
لو قلت انا مليون قصيدة اوصف بهم حسنك
وشافوكي كل الناس
هيقولوا ما قال شي
لا لوم على الأزهار
لو يحسدوا خدك
يا زهرة الأزهار
عايش أنا محتار
والنار تقيد فيا
مش عارف اعمل إيه
رح اقيد صوابعي شموع
عهد ومافيهش رجوع
حسنك أعيش اراعيه
يا ضي ضي العين
عاشق أنا ومجنون
مجنون بسحر العين
دا ف العيون .. سحرين
مسحور انا بيهم
وماليش غنى عنهم
وباعيش أغنيهم
...
ومشينا وسط الزهر
إحنا نغني له
هوا يغني لنا
ليل علينا الليل
والليل ف جنتنا
ساحر ملهش مثيل
طلع القمر نور على جبينِك
ولقيت نجوم الليل مبدورة ف عيونك
وقعدنا نتونس ببعضينا
أنا وانت والأزهار والليل بيجمعنا
ضحك الزمان لينا وادى الحياة معنى
غمضت انا عنيا شفت القمر مخنوق
والزهر بات محروق
ووقعت انا من فووووق
.................وصحيت
وصحيت ...مشيت ...دقيت...............
ومديت ف الخَلا إيدي ...........بكيت
العزب فتحي