مش عارف اقول آه ولا اقول ﻷ

4
0
فيه ناس كتير قوى رايحة تصوت وهى لم تقرأ مواد الدستور او انها لم تستمع وتشاهد عشرات الحوارات التليفزيونية عنه..

فيه مواد كتير شكلها حلو اول ما تقراها . زى ما تكون بتشترى خوخ او عنب من وش القفص . لكن من تحت شوية بتلاقى المفعص والرفيع واللى كله عيوب ..

فيه مواد كتير بدايتها جميلة لكن فى اخرها تلاقى جملة : حسب ما ينظمها القانون ... او : الا بقانون .. فييجى مجلس الشعب بعد كده يشرع القوانين اللى تنكد علينا كلنا ..

فى موضوع العلاج والتامين الصحى تلاقى جملة : لغير القادرين .. وده معناه ان الواحد علشان يتعالج لازم يثبت انه من غير القادرين . او يجرى بقى على حد يجيب له شهادة من الحرية والعدالة .. بالضبط زى الحزب الوطنى اللى كان بيتاجر بالقرارات العلاجية ..

لم يرد ذكر لحدود الدخل للموظفين العموميين او العمال فى القطاع العام ولا لاجر العامل الزراعى بل على العكس ربط الاجر بالانتاج وليس بمستوى الاسعار السائد ..

اول مرة فى دساتير مصرية يرد ذكر كلمة اليهود .. ودى لوحدها مصيبة .. فاكرين مولد ابو حصيرة اللى فى دمنهور ؟ هتلاقى اليهود ناطين فى كل حتة فى مصر . وبمناسبة اليهود فاكرين الاتفاق اللى عمله مرسى بين حماس واسرائيل ؟ نتيجته ان لاول مرة فى التاريخ اسرائيل هتركب اجهزة تجسس على الحدود بيننا وبينهم شغالين فيها حاليا بمعرفة متخصصين امريكان ..

كل مناصب الدولة تقريبا يتم التعيين فيها بمعرفة الرئيس سواء مناصب مدنية او عسكرية او رقابية او محاسبية او قضائية ..

طبعا مش فاكر غير كده دلوقت .. لكن من اللى تابعته فانا اقول ﻷ..

وعلى كل واحد او واحدة ما يسمعش كلام حد زيه ما يكونش قرأ او سمع . وعلى فكرة اى حد ممكن يقرا ويعجبه الكلام من اول وهلة لغاية ما يقابل حد فاهم فيغير رايه ..طب تصدقو ان فيه مواد بتقول ان النقابة او النقابات كلها او بعضها لا يمكن حلها الا بقضية .!!!

لو سمحتم مش عاوزين نعمل زى سلوك القطيع اللى ماشى ورا الراعى او الكلب او الخروف الكبير ولاغى دماغه ..


 

إضافة منذ 12 عام
Menem
5403
الكاتب الأصلي

المصدر

انا شخصيا

التعليقات

Menem منذ 12 عام
ما تآخذونيش فى الجملة الاخيرة .. لانى متغاظ جدا !!
زغباوية منذ 12 عام
كلام جميل جداً بس لاحظ ان احنا عمرنا مافكرنا بالسياسة ولا بالقانون كان مش عاجبنا الحال وساكتين فمحدش يلوم علينا علشان احنا مش فاهمين وللأسف الناس المفروض انهم يفهمونا لأ ليه عايزين يمشونا وراهم كالقطيع قولوا لأ علشان نعم مش هاتجيب الاستقرار طب ليه محدش بيقول او كلامهم غير مقنع طيب اتحاوروا مع الجمعية التى وضعت الدستور يقولوا لأ علشان هى بتكلمهم وبتطلب التحاورلا معهم بانهى صفة وهذا لاينفع ولايصح فى هذا الوقت اللى الشعب (وانا واحدة منه) عايز يفهم بجد يعني اقنعوني بمنطقية وليس ديكتاتورية مستبدة للمعارضة وكل اعلاناتهم تدل على ذلك تماما كما يفعل المؤيدون لنعم بيقولوا قولوا نعم علشان الاستقرار او علشان العجلة تدور

يعني من الاخر (وهذا بعد قراءتى للموقف وسماع جميع الاطراف) هى خناقة بين طرفين همهم الاول والاخير مصلحتهم الشخصية الشعب مالوش دعوة بيها ولا مصلحته تهم اى طرف من الطرفين ...اعتقد ان لو كل طرف من الاطراف التزم الصمت او مع توضيح للمواد التى لم تعجبهم وعملوا الحوار كان الشعب يقول كلمته بجد مش هانقول لأ عند فى اللى بيقولوا نعم ولا هانقول نعم علشان اللى بيقولوا لأ مش عجبنا
Menem منذ 12 عام
صباح الملووخية .. انت كده ما قريتيش اللى كتبته..
زغباوية منذ 12 عام
قريته وعندى تحفظات على كام مادة ومش فاهمة اصلا كام مادة تانيين بس باقي المواد عجباني انا بتكلم على الدستور شخصيا وليس من وراءه او محاربتهم علشانه بمعنى ان الدستور عجبني بنسبة 85 % ليه اقول لأ عليه الحل ان من لايعجبهم بعض المواد يحاربوا من اجل تعديلها في مجلس نواب مش اخوانييعني من الاخر ماننتخبش اى تيارت احزاب يسمون نفسهم اسلاميين ونحاول نختار صح من يمثلنا وياريت الاحزاب المعارضة وعلى راسهم جبهة الانقاذ يكون ده هدفها الفترة القادمة بتظبيط نفسها بعقل وحكمة ورؤية واضحة علشان تلم الشعب حولها وهذا ما فعله الاخوان فى انتخابات مجلش الشعب السابقة اغلب الناس وثقوا فيهم فاحنا لو لاقينا حد نثق فيه فعلا هاننتخبه وهذا ملخص لفكري... وشكراً
bigestman منذ 12 عام
هي البامية أحلي ولا الملوخية
zedony.com - A mmonem.com production. Privacy Policy