تعرف ايه هي فوائد السفر السبع؟؟

7
0


دايما لما يكون حد مسافر عشان هيتغرب شويه عن اهله فناس تانية تصبره وتقوله للسفر سبع فوايد بس هي ايه السبع فوايد دي ؟ واصل الكلام دا ايه ؟ قررت ان ابحث عن الكلام دا.

خلاصة البحث
...اصل الكلام كان ان السفر خمـــس فوائد ودا راجع لكلام للامام الشافعي تحدث فيه عن السفر وقال:

تغرب عن الأوطان في طلب العلا وسافر ففي الأسفار خمس فوائد
تـفـرج هـم واكـتـسـاب مـعـيشـة
وعـلـــم وآداب وصــحـبـــة مـاجـــد
فإن قيلَ في الأسفار هَمٌّ وكربةٌ وتشتيتُ شملٍ وارتكابُ الشدائدِ
فموتُ الفتى خيرٌ له من حياته
بدارِ هَوانٍ بين واشٍ وحاسدِ

ولكن مع التطور بقيت سبعة واكيد ديلوقتي لو اترصت تبقي اكتر من سبعة لان في جديد كل يوم وحتي بقية القول بتوضح اد ايه ان السفر مهم وضروري

سافر تجد عوضا عمن تفارقه وانصب فان لذيذ العيش في النصب
اني رأيت وقوف الماء يفسده
ان سال طاب وان لم يجر لم يطب
والاسد لولا فراق الغاب ماافترست والسهم لولا فراق القوس لم يصب

وعشان كدا بالاستعانة ببعض الاراء والتوضيحات نلاقي ان السبع فوايد هي :

1– انفراج الهم والغم
2– اكتساب المعيشة
3– تحصيل العلم
4_تحصيل الآداب
5--صحبة الأمجاد
6– استجابة الدعوة
7– زيارة الأحباب من أقارب وأرحام وأصحاب

و عن النبي صلى الله عليه وسلم أنه قال: (ثلاث دعوات مستجابات لا شك فيهنَّ: دعوة المظلوم، ودعوة الوالد لولده، و
دعوة المسافر*) رواه الترمذي.


مش لازم السفر يكون عشان واحد هيتغرب ويشتغل ممكن يكون باحث عن العلم النافع وممكن يكون ذاهب للعبادة زي الحج والعمرة وممكن كمان يكون للترفيه مش مهم السبب ولكن المهم ان يكون الانسان نيته خير ويتقي الله في الغير وفي تصرفاته ويصون نفسه و شرفه ودينه.


و ربنا يرد كل غائب الي داره سالم غانم ان شاءالله

 

إضافة منذ 8 عام
غير محدد
تعديل منذ 19 يوم
safaa
50383

التعليقات

safaa منذ 8 عام
100-100 +1
Eng Ahmed منذ 8 عام
+1 انا واحد من الناس بحب السفر جدا وكان نفسى اعرف السبع فوايد 😞
kholio منذ 8 عام
جميل
أم يوسف منذ 8 عام
حلو الكلام
زغباوية منذ 8 عام
+1 كان نفسي اعرفهم فعلا
الباشمهندسة منذ 8 عام
علي فكرة المقال دا انا باهدي للد/الزغبي وان شاء الله يرجع بالسلامة من بلاد الفرنجة 😞
shady منذ 8 عام
لاء تمام كدة انا كمان مسافر بس استفدت اكتر من كدة مش اقل من 20 فائدة , يمكن علشان انا بقالى فترة مسافر 😞
الباشمهندسة منذ 8 عام
طيب هات ماعندك خلينا نستفيد ... وان شاء الله ترجع بالسلامة
shady منذ 8 عام
يعنى خبرة فى الشغل مثلا و سلوكيات جديدة عليك و الاعتماد على النفس بشكل كلى فى كل حاجة , كيفية مواجهة المشاكل وعدم الهروب منها لانك بتصبر اكتر مش زى مصر ممكن علشان مشكلة صغيرة مع اى موظف بتسيب الشغل , اعتمادك على نفسك بيخلى رؤيتك فى الحياة تتغير اصلا , كيفية الاستفادة من وقت سفرك ودة بيعلمك تستفاد من اى حاجة قدامك مهما كانت - بتحاول تستفاد منها على قد ما تقدر فى الصح طبعا , تعرف علوم جديدة وثقافات جديدة يعنى انا معايا فى الشغل اكتر من 8 جنسيات اخرى وكل جنسيية وليها طريقتها واللى يفرحها واللى يزعلها , تعرف قيمة اهلك ومقدار حبك ليهم بيزيد وهما كمان بيرتبطو بيك اكتر , تحس بقيمة بلدك لانك فى اى بلد اخرى اجنبى لان هنا مثلا فى شغل جامد جدا بس ممنوع للاجانب لكن فى مصر كل حاجة متاحة ليك , بتكون ملتزم اكتر هنا , دول اللى فى دماغى دلوقتى الصراحة بس هما اكيد اكتر من كدة وفى حاجات غايبة عن تفكيرى وحاجات مش عارف اعبر عنها
Noura منذ 8 عام
ايون انا كان نفسي اعرف ايه هما السبع فوايد دول اني سافرت كتير بس جوه مصر ومعرفتهومش 😞
زغباوية منذ 8 عام
شكرا ياباشمهندسة نيابة عن د/الزغبي
+1 ياشادي ربنا يرجعكوا كلكم بالسلامة
زغباوية منذ 18 يوم
واهم ميزة انك تعرف غلاوة وميزاتك وطنك مهما كانت عيوبه وميزات تانية كتير منها التعارف بين الشعوب وثقافاتهم المختلفة ودى في حد ذاتها بتدى الانسان خبرات كتيرة اوى
zedony.com - A mmonem.com production. Privacy Policy