احــــــــــــــــدث الطرق الحديثة في التربية (الورقة المضادة 2×1)

7
2


مقدمة بسيطة :
انا عاملة للولاد ورقة كاتبة فيها كل الواجبات اليومية المفروض يقوموا بيها وكمان الافعال اللى عايزاهم ينتظموا فيها وعايزة اعودهم عليها....الورقة دى على هيئة جدول اسبوعى مثال:

-غسل الوجهه
-الصلاة
-السرير
-سماع الكلام
-معاملة الاخوات
-التنظيف
-وهكذا

وبعلم على هذه الواجبات صح او غلط حسب الفعل وكل اسبوع فيه هدية لاكتر واحد عمل صح واقل واحد عنده غلط ولسة عاملين هدية يومية للى ماعندوش ولا غلطة في اليوم علشان احمسهم اكتر لعمل الصح

طبعا الولاد متغاظين جدا فقرروا انهم يعلموا عليا انا كمان ويعملوا ورقة ليا فيها كل اللى عايزينه مني مثال:

-الضرب
-الزعيق
-والاهم بقى دخول الموقع لو دخلت عليه هايعلموا غلط :)

وطبعا الفكرة عجبتنى جدا علشان اقلل صوتى العالى على طول والخناق معاهم طول النهار وكمان اقرب منهم اكتر

وقولت كمان اضيف كام حاجة كدا عايزة اعملها واستمر معاهم فيها زى اللعب معاهم - تعليمهم اى مهارة (رسم - ابتكارات ......)
وكمان باعلمهم الثقة بنفسهم وافرغ الكبت اللى عندهم منى وانهم يقدروا يعبروا عن رايهم
يعنى باختصار 2×1 علشان بكدا اقدر اعودهم على السلوكيات المظبوطة وفي نفس الوقت اعود نفسي على الهدوء وتقليل الحدة والانفعال الدائم

وكل يوم بالليل نشوف مين فينا عنده غلط اكتر بس لسة لغاية دلوقتى مش عارفة هايعقبوني او يكافئونى ازاى :(

عايزة أرائكم وافكاركم

 

إضافة منذ 13 عام
الكاتب الأصلي
تعديل منذ 6 عام

التعليقات

loleta1 منذ 13 عام
+1 تمام ولعلمك ده كلام علمى وسليم وبيطبق وبيظبط سلوك الكبار والصغار بس ليه غلط دخولك لزيدونى
زغباوية منذ 13 عام
علشان بسبهم ومش بلعب معاهم
أم العيال منذ 13 عام
عساسيل قوي العيال دي وبيفهمو
+1 ده للولاد
زغباوية منذ 13 عام
هاقوللهم
Albert منذ 13 عام
+1 دي فكره حلوه, وكنا بنعملها مع العيال وهما صغيرين شويه. الحاجة الى هاتلقيها صعبه (احنا فشلنا فيها) هي اذاي تجددي في اسلوب المكافءة؟ علشان بعد شويه هايبقى موضوع روتيني بالنسبه لهم, وهيفقدوا الحماس.
انا كمان عجبتني فكره الورقه المضاده...علشان دي هاتخلى عندهم ثقه في النفس, وكمان هاتعلمهم يعبروا عن رأيهم بطريقه متحضرة.
ربنا معاكي ... وياريت تعرفينا تطور الموضوع من وقت للتاني.
loleta1 منذ 13 عام
فعلا يا البرت بس مكن تكون مكافئات بسيطه وكل كلم مره تكون مكافئه كبيرة زى خروجه حلوة ومميزة متلا
زغباوية منذ 13 عام
الحمد لله لغاية دلوقتى بجدد ومفيش مشكلة في الموضوع ده واحدث ماتوصلت اليه ان اللى اليوم كله ماعندوش ولا غلطة بنديله نجمة ونعد النجوم اخر الاسبوع واكتر واحد ياخد مكافأة والمكافأت اللى بيحبوها كتير ومتنوعة
المشكلة بقى فى الورقة المضادة بيعلمولى غلط كتييييييير:-P
عبد المنعم منذ 13 عام
الاطفال فى العصر ده كلهم جيل كهرمغنطيسى .. احنا زمان كنا بنلعب كورة شراب حافيين فى الشوارع .. يعنى هيطلعوا عنيكم فى التربية بالاسلوب القديم ولازم تطوروا اساليبكم والا يضيعوا شوية العقل اللى فاضلين عندكم !!!
loleta1 منذ 13 عام
يبقى انتى اللى مجرمه وشقيه يازغباويه مش هما بقى هههههههههه
mora منذ 13 عام
+1
mora منذ 13 عام
هو المفروض اعمل +1 لكل حاجة تعجبنى عشان صاحبها او صحبتها تعرف
انا لسه عملة الحركة دى دلوقتى بس انا ضفت نقط كتير لناس عجبتنى مواضيعهم
زغباوية منذ 13 عام
عايزة تعلقي من باب التشجعيع ماشي مش عايزة براحتك او تقولي اللى نفسك فيه وبرضوا مش عايزة تقولى براحتك حتى كمان عايزة تزودى نقطك نكون ممنونين علشان بعد كدا الموضوع اللى نقطه بتزيد عن 6 بيدخل مسابقة احسن موضوع للشهر ولو مش عاجبك نقصي -1 براحتك *بس كدا كل ماتنقصي -1هاينقص مجموع نقطك نقطة علشان مانفتحهاش
mora منذ 13 عام
يا بنتى دا اخوكى بيقولى انى لم اقيم الموضوع كما ادعيت وانا والله لم اخذ بالى شكلى وحش قوى يا رونة
mora منذ 13 عام
طب لوليتا تقول عليا ايه
زغباوية منذ 13 عام
لا ماتقلقيش بتحصلنا كلنا ...الكلام يعجبنا ونخرج من غير مانزود
زغباوية منذ 13 عام
وماتقلقيش لوليتا بتعملها برضوا هههههههه
loleta1 منذ 13 عام
كلنا بنقع فى نفس الحفرة المهم مادام لفت أنتباهنا نعدل ونضيف النقطة
zedony.com - A mmonem.com production. Privacy Policy